Haatuf News

Home | Contact Us | Links |  Archives

Muwaadinka Reer Somaliland Ee 18-Ka Dal Gaadhiga Ku Soo Maray Oo Xukuumadda Rayaale Ku Dhaliilay Qaabilaad La’aan Uu Kala Kulmay

“Kalluunka Waxa Birta Shabaga Loo Raaciyaa Hilib Si Loogu Soo Dabo, Markaa Aniga Shahaadadan Aad I Siinaysaan…. ” Mr Maqtal

Hargeysa June 29, 2009 (Haatuf) –Madaxweyne Ku Xigeenka Somaliland Axmed Yuusuf Yaasiin, ayaa shalay shahaado sharaf qaran gudoonsiiyay muwaadin Maxamed Muuse Yuusuf (Makhtal), oo 18 dal ku soo maray gaadhi, isla markaana wadamadaasi ka dalbanayay inay aqoonsadaan Madax-banaanida Somaliland. Muwaadinkaasi waxa uu shahaadada Madaxweyne Ku Xigeenka kaga guddoomay xarunta Guddida abaaraha Qaranka, oo ay shalay xafiiskooda ka soo saaray baaq qaylo dhaan abaareed ah.
Maxamed Muuse, wuxuu saluug ka muujiyey goobta shahaadadda lagu siiyay waxaanu sheegay in aanay xukuumadu siinin wixii uu ka filayay oo ahaa inay xaflad gaar ah oo weyn ku gudoonsiiyaan. Waxa isaga iyo Madaxweyne Ku Xigeenka halkaasi ku dhex maray hadalo duur xul ah oo ay isku weydaarsadeen goobta.
Waxa goobtii shahaadada muwaadinkaasi lagu gudoonsiiyay fadhiyay Wasiiradda Qorshaynta, Beeraha, Caafimaadka, Macdanta iyo Biyaha, Wasiirka Diinta iyo Aw-qaafta, Wasiirul dawlaha Wasaarada Arrimaha Gudaha, ku simaha Maayarka Caasimada ahna Maayar Ku xigeenka iyo masuuliyiin ka tirsan Hay’ada ka hortaga abaaraha iyo aafooyinka dabiiciga ah, kuwaasi oo qaarkood ay ka mid ahaayeen masuuliyiin uu muwaadinkani si gaar ah wax uga tirsanayay. Ku Xigeenka ka hor intii aanu shahaadada ka gudoomin wuxuu yidhi “Mar haddii Arrimahaygii lagu daray Aafada, Aniguna Aafada ayaan ka hadlayaa, waxa weeye Mudane Madaxweyne Ku Xigeen, halkan waxa fadhiya niman Wasiiro ah oo labaatan cisho ka hor ii balan qaaday inaan la kulmo Madaxweyne Ku Xigeenka iyo Madaxweynaha oo ay dhici weyday oo igaga baxay. Tv-ga Qaranka ee dawladu maamusho laba cajaladood oo ay iga duubeen illaa hadda may sii dayn”.

Mr. Maxamed Muuse Makhtal wuxuu tilmaamay in Huteelka Ambassador oo uu Maayarka caasimada Eng. Xuseen Maxamuud Jiciir, dejiyay loo haysto lacagtii, waxaanu yidhi Huteelka Ambassador oo uu Maayar Jiciir I dejiyayna waxa la iigu haystaa lacagtii, ” muwaadinkaasi oo Madaxweyne Ku xigeenka u duur xulayay wuxuu yidhi “Kalluunka waxa birta shabaga loo raaciyaa hilib si loogu soo dabo, markaa Aniga shahaadadan aad i siinaysaan waxay ka dhigan tahay inaad tustaan ummada inaad wixii aan doonayay aad ii qabateen. Imikana waxaan rabaa inaan TV-ga Qaranka muuqayga laga sii dayn. ”
“Madaxweye Ku Xigeen mid ogoow, 18 dal ayaan soo maray, lix bilood ayaanan carruurtaydii arag oo ka ugu yari yahay lix jir yahay, miyay iga mudan tahay Maryan Mursal oo Ingiriiska ka qaaday hal Hees, amar Madaxweyne ayaa lagu bixiyay soo dhawaynteeda oo Wasiiro ayaa qaabilay, ”ayuu yidhi Mr. Makhtal.

Madaxweyne Ku Xigeenka Md. Axmed Yuusuf Yaasiin ayaa jawaab ka bixiyay hadalka ka soo yeedhay Maxamed Muuse Yuusuf Makhtal, oo uu xukuumada kaga difaacayay hadaladii lagu dhaliilay, waxaanu yidhi “Ictiraaf doon maanta Arrimahaaga waa laga sii dayn doonaa TV-ga Qaranka, maanta haddii aan mar Anigu gacanta soo geliyay wixii kale ha inoo dambeeyaan inaga ayaa isku hadhi doona. Maxamed Muuse Yuusuf (Makhtal) oo ka soo gudbay wadamo badan soona kifaaxay tani waa shahaado sharaf aanu gudoon siin doono oo Madaxweynuhu uu soo gudbiyay, oo aanu ugu talo galnay si qof waliba qadiyada Somaliland sidiisa oo kale qaybtiisa ka qaato. ”
Madaxweyne Ku Xigeenku isagoo ka jawaabayay hadalkii Makhtal wuxuu yidhi, “Isagoo intaasi oo dhan u soo dagaalamayay qadiyada Somaliland, wixii uu tirsanayana waxa uu ka tirsanayaa wadankiisa. Midna ogow wadankan rag baa u soo dhintay, rag baa u naafoobay, kumanaan baa u qaxay iyo malaayiin qof oo lagu waayay haddii adiga shahaado laguu gartay waxa na sugaya kuwa dhulka hoostiisa ku jira iyo carruurihii ay dhaleen. Waxa laga yaabaa kii u soo halgamayay inaanu shaqo haynin laakiin waxa uu ku faraxsan yahay wadankiisa haddii uu qof khalad galo dadka oo dhammi may wada samayn. Qadiyadana ma aha mid yar, waa qadiyad 200 oo sanadood wixii soo jiray ay baaba’een. Adiguna haddii aad intaas soo samaysay intaas ku qanac. ”
“Maryan Mursal waa gabadh waxaanay isku xilqaantay sidii ay calanka Somaliland u meelo marin lahayd, waana qof wanaagsan oo Soomaaliyeed. markaas adigu ha is bar-bar dhigin waxaad tahay nin muwaadin ah. Waxaanad la mid tahay ragii madax-banaanida dalkan ciidda u hoos maray oo kale, ”ayuu yidhi Madaxweyne Ku xigeenku.
Dhinaca kale, Wasiiradii kulankaasi joogay ayaan midna ka hadal iyadoo ay goobta joogeen Wasiiro aan la magacaabin oo uu Maxamed Muuse Yuusuf Makhtal sheegay inay balamo kaga baxeen. Kuwaasi Matal iyo Madaxweyne ku Xigeenka isku dhegaysanayay.

Ugu dambayntii maayarka caasimada Jiciic ayaa sheegay inuu kharashka deynta ah ee mr Maqtal hudheelku ku leeyahay ee loo haysto bixinayo