Haatuf News

Home | Contact Us | Links |  Archives

 ISSUE 2525

 “Haddii Aan Ahay Madanaha Ugu Da’da Weyn Wakiilada Inaan Damacsana In Aan Bedelo Shirgudoonka Hada Hadalku Ka Taagan Yahay, Arrintaa Wax Ka Jiraa Ma Jirto, Kumana Fikirin”

Md Dhaadheere
Hargeysa December 3, 2010 (Haatuf)-Xildhibaan Ibraahin Xuseen Dhaadheere oo ka mid ah Mudanayaasha golaha wakiilada Somaliland, ahna xildhibaanka ugu da’da weyn golahaasi ayaa sheegay inaanu ku talo jirin, islamarkaana hawlgal ugu jirin inuu kursiga shirgudoonka ku fadhiisan ee wakhtigan xaadirka ah buuqu ka taagan yahay ku kala qaybsan yihiin mudanayaashu in la bedelo hogaanka halka qaybina taageersan tahay shirgudoonka hada jira.
Mudane Ibraahin Dhaadheere, waxa uu sheegay in warar doraad soo baxay oo sheegaya inuu kaambayn ugu jiro sidii uu shirgudoonka kursiga ugu fadhiiisan lahaa, taasna ku tilmaamay inaanay waxba ka jirin, balse ay xaq tahay in shirgudoonka lala xisaabtami karo sida sharcigu dhigayo.
Waxa kale oo uu sheegay in Isagu uu taageersan yahay socdaalka dalalka Yurub qaar ka mid ah ugu maqan yihiin shirgudoonku yahay mid qadiyada Somaliland ayay kaga dhaadhicinayaan.
Xildhibaan Ibraahin Xuseen (Dhaadheere} waxa uu sidaas ku sheegay mar uu shalay nagu soo booqday xarunta wargeyska Haatuf oo kaga xogwaramay arrimo dhawra ayaa, ayaa sidoo kale waxa uu ka hadlay isbedelkii siyaasadeed ee dalka ka dhacay ee doorashadii Madaxweyne Siilaanyo ku soo baxay iyo doorkii weynaa ee ay ka qaateen Saxaafada madaxabaan sida Haatuf oo uu ku tilmaamay hormuud inay ka ahayd soo bandhigida khaladaadkii xukuumadii hore ee madaxweyne Rayaale, islamrkaana waxa uu xusay oo kale Culimaa’udiinka, Abwaanada Gaariye iyo Hadraawi iyo qaybaha bulshada oo uu sheegay inay suurto galiyeen isbedelkaasi.
Ugu horayn Xildhibaan dhaadheere isaga oo arrimahaasi ka hadlayaa waxa uu yidhi “Warar shalay (doraad) Haatuf ku soo baxay ayaan doonayaa siday ahaayeen inaan sheego, jariidada Haatufna way ku mahadsan tahay doorka weyn ee ay kaga jirto Saxaafada oo anaguna aanu ku ayidsanahay. Hadaba arrintaa shalay jariidada ku soo baxay ee ahayd haddii aan ahay xildhibaanka golaha Baarlamaanka ugu da’da weyn inaan damacsanaa inaan bedelo shirgudoonka maanta hadalku ka taagan yahay, arrintaa iyada ah wax alla wax ka jiraa ma jirto, ma odhan, la igama qaban kumana fikirin inaan u hawl galo ku fadhiisto kursiga shirgudoonka”
Xildhibaan Dhaadheere waxa uu sheegay in shirgudoonka lala xisaabtami karo sida sharcigu dhigayo, iyaguna diyaar u yihiin, waxanu yidhi “Inay xaq tahay in shirgudoonka lala xisaabtami karo siduu sharcigu dhigayo iyana inay diyaar u yihiin taas ayaan filayaa oon muranka taagnayn”
Isaga oo intaa ku daray, inuu isagu taageersan yahay shirgudoonka wakhtigan xaadirka ah hogaaminaya golahooda oo uu xusay in xukuumadan iyo goluhu si fiican u wada shaqaynayaan halka xukuumaddii Rayaale xidhiidh wada shaqayneed ka dhaxaynin, wax badana ku lumeen, waxanu yidhi “Maanta waxaan ayidsanahay shirgudoonka, marka ugu horaysa waxaan leeyahay golaha baarlamaanka iyo xukuumadda maanta taagan inay wada shaqayn wanaagsan leeyihiin, taana ay kaga duwan yihiin dawladii hore oo madaxweynihii hore aanu marnaba la shaqayn baarlamaanka wax badanina ay ku lumeen Ilaahay baa mahad leh maanta labadiiba way wada shaqaynayaan, waxaan doonayaa inaan sheego socdaalkan maanta shirgudoonku dibada ku marayo inuu wax badan dawladaha Yurub Switarland ay u dambaysay Jarmalka iyo Sweden intaaba inay si fiican uga dhaadhiciyeen qadiyada Somaliland waanay ku mahadsan yihiin”
Md Dhaadheere mar uu ka hadlayey isbedelkii siyaasadeed ee dalka ka dhacay iyo doorka ay ka qaateen dadweynuhu, saxaafada madaxbanaan, waxgaradka iyo Abwaana-ba, waxa uu yidhi “Isbedelka siyaasadeed ee ku yimi Somaliland ee doorashadii ka dhalatay dabadeed, taana waxa ku mahadsan dadweynaha, Saxaafada ayaa iyana ka dambaysay inay ka dhaadhiciyaan khaladaadkii jiray oo maanta saxmay, wargeyska Haatuf horseed bay ka ahayd u sheegida dadweynaha iyo soo bandhigida khaladaadkii dawladii hore ka jiray. waxa kale oo iyaguna ka qaybgalay isbedelkaasi inuu suuto galo Culimaa’udiinka, oo aan doonayaa inaan xuso sida Sheekh Aadan Siiro oo door weyn ka qaatay isbedelka maanta jooga, abwaanada waaweyn sida Gaariye iyo Hadraawi iyo ragii la midka ahaa ee wax badan ka hadlay’ Sidaas ayuu hadalkiisii ku soo gabogabeeyay Md Dhaadheere hadalkiisa.