|
|
Faadumo Siciid Oo Eedo Hor-Leh U
Jeedisay Wasiirka Waxbarashadda, Kana Hadashay Dhaqamada Argagaxa Leh Ee
Ciidamada RRU-Da Iyo SPU-Da
“Hablahan
Maanta La Silcinayo Miyaanay Kuwaaga Oo Kale Ahayn Jidh Yar Oo Ku
Damqanaya Miyaanu Kugu Oolin, Falkaa Xun Ee Maanta Dhacay Ee Aad Waliba
Leedahay Iyagaa Mutaystay Oo Jeelka Ay Ku Jirayaan Waxaasi Wax Lagu
Dhaqmo Maaha”Marwo Faadumo Siciid
Hargeysa, April 14, 2014 (Haatuf) – Xoghayaha maaliyadda ee
xisbiga mucaaradka ah ee UCID Marwo Faadumo Siciid ayaa fashilaad ku
eedaysay wasiirka wasaaradda Waxbarashada Samsam Cabdi Aadan, taas oo ay
ku canaanatay inaanay ka run sheegin balan-qaadadeedii wakhtigii ay
mucaaridka Kulmiye ka tirsanayd.
Faadumo Siciid waxay dhacdadii shalay ee mudaharaadadii ardayda
Jaamacadda Hargeysa ku sifaysay inaanay istaahilin sida ay xukuumadu ula
dhaqantay, taas oo ku dooday in wasiirka waxbarashada marwo Samsam inay
wakhtiyadii hore ka shaqayn jirtay ilaalinta xuquuqal iinsaanka iyo
sidii wax loola qaban lahaa dhalinyarada dalka, waxaanay xustay Faadumo
Siciid inay taas badelkeeda ka shaqayso wasiirka waxbarashada Somaliland
Marwo Samsam Cabdi Aadan.
Xoghayaha maaliyadda UCID Faadumo waxay sidaasi ku sheegtay mar ay
maanta warbaahinta kula hadlaysay xafiiskeeda magaaladda Hargeysa. Ugu
horayna iyada oo arrimahaasi ka hadlaysa, waxa ay hadalkeeda ku bilawday
“Falkii foosha xumaa ee shalay dhacay ee dhalinyarada Somaliland ee
muwaadiniinta sida xun loo galay ee jidh dilka aadka u foosha xun lagu
sameeyey xabsiyadana lagu guray ee ciidanka RRU-da iyo SPU-da loo
dalbaday, waa mid ay aad uga xumaadeen mujtamaca Somaliland dibad iyo
gudaba, dhalinyaradu wax way diidi karaan, mudaharaadna way samayn
karaan , waayo waa xaq uu qofku leeyahay inuu sameeyo marka uu wax ka
dhiidhiyayo, boodhadhkoodii-bay siteen, waanu la yaabanahay sababta
ciidanka SPU-da ah loogu daray”.
Marwo Faadumo Siciid, iyada oo hadalkeeda sii wadata, isla markaana
farriin u diraysa Wasiirka Waxbarashada Samsam Cabdi Aadan, waxay tidhi
““Wasiirka waxbarashada waxaan u dirayaa fariin, wakhtigii aad
mucaaridka ahayd waxaad ka shaqayn jirtay xuquuqal iinsaanka waxaanad u
doodi jirtay dhalinyarada, haweenkana waad u doodi jirtay, markii aad
kursiga ku fadhiisatay ayaad ilawday wixii aad u doodi jirtay oo aad
xaga danbe ka xoortay, caruurtan yar yare ee aad sidan ku samaynaysaan
maaha caruur cidla laga soo helay ama dukaan laga soo iibsaday hooyo
ayaa u dhibaatooday, shalayna waxaanu xasuusay dhalinyaradii Ufo, Ufo-na
waxay ahayd dhalinyaro dugsiyadii ka soo rawaxay oo mudaharaaday ayaa
beerka xabad lagala dhacay taasna waad na xasuusiseen, jidhkii ayaa
diiday inaanu dhagaysano oo aanu maqalno caruurta masaakiinta ah
qayladooda, hablihii sida asluubta leh loo saari lahaa baabuurka oo si
arxan daro ah loola dhaqmayo, caruurteenu may mutaysan falalka noocaas
ah, waxaanan ku leeyahay wasiir Sam Sam ilaahay ayaa maanta wasiir kaa
dhigay laakiin sharaftii,xurmadii,ixtiraamkii iyo raxmadii hooyanimo
xagee ayey kaa tagtay, hablahan maanta la silcinayo miyaanay kuwaaga oo
kale ahayn jidh yar oo ku damqanaya miyaanu kugu oolin, waxaanan
leeyahay falkaa xun ee maanta dhacay ee aad waliba leedahay iyagaa
mutaystay oo jeelka ay ku jirayaan waxaasi wax lagu dhaqmo maaha”.
Ugu danbayn marwo Faadumo Siciid waxay sheegtay in shacabka Somaliland
ay khaatiyaan ka taagan yihiin ciidanka ay xukuumadda Siilaanyo u
adeegsato mudaharaadada Salmiga ah, waxaanay tidhi “Anagu khaatiyaan
ayaanu taaganahay mana ogolin in caruurtayada maalin kasta maydkooda ama
dhaawacooda meel laga qaado, falkii shalay ee Berbera ayeynu ogayn,
falkii caruurtii Xaqsoor meel walba lagu balan baliyey ayeynu ogayn,
waxaynu arkay tii cusbitaalka dabadiisa ka dhacday, ma waxaynu ku
jiraynaa shantaas sanadood ee uu Kulmiye dalka Haysto inaynu geeri uun u
taagnaano,ma tacsi ayeynu u taagnaan, caruurtana ma xabad uun baa laga
ilaalin, waxaan leeyahay xukuumada waxan dib ha looga noqdo,
dadweynahana waxaan leeyahay askarta haw cadhoonina waayo amar ayey
qabaan, askariguna danbi ma laha danbigana waxa iska leh cidii amarka
soo siisay oo ah madaxweynaha, wasiirada iyo inta la hal maala”. |