|
|
Gudoomiyaha Iyo
Tifaftiraha Haatuf Oo Sheegay In Aanay Maxkamada
Hor-imanayn Barri Hadii Wax Laga Badali Waayo Habka Uu Garsoorku Uga
Garnaqayo Kiiskooda
Hargeysa, May 31,
2014 (Haatuf) - Gudoomiyaha iyo Tifaftiraha Haatuf, Yuusuf Cabdi Gaboobe
iyo Axmed Cali Cige ayaa sheegay in aanay maxkamada hor-imanayn bari
hadii wax laga badali waayo habka uu garsoorku uga garnaqayo kiiskooda,
Waxaanay soo jeediyeen in wax laga qabto duris ay ku sameeyeen
garsooraha iyo maxkamada qaadaysa dacwada masuuliyiinta Haatuf ay ku soo
oogeen xubno xukuumada ka tirsani.
Dacwadan oo uu qaadayo garsoore Asad Nuur Cilmi ayaa dhagaysigeedii u
horeeyey waxa uu ka bilaabmay 10-kii bishan maxkamada gobolka Hargeysa.
Hase yeeshee labada eedaysane ee Haatuf ayaa qareenadoodu waxay dhawr
jeer u gudbiyeen gudoomiyaha maxkamada gobolka Hargeysa Faysal
Dhaga-dhago codsiyo duris ah ay ku doonayeen in laga badalo garsooraha
dacwada ka garnaqaya oo ay ku tilmaameen in aanu dhexdhexaad ka ahayn
dacwadan balse uu u xaglinayo dhinaca masuuliyiinta xukuumada.
Waxa kale oo ay rafcaan ka qaateen maxkamada gobolka kadib markii ay
afar xukun oo hore ay ku riday wargeyska iyo masuuliyiintiisa kuwaas oo
kala ahaa xayiraadii lagu soo rogay xarunta wargeysyada Haatuf iyo
Somaliland Times iyo madbacadihii wax u daabici jiray 7/4/2014, iyo
xayiraadii labada website ee Somaliland times iyo Haatuf 16-kii April ee
sanadkan la xayiray iyo xayiraadii safarka dibada ee lagu soo rogay
gudoomiyaha Haatuf Yuusuf Cabdi Gaboobe iyo tifaftiraha Axmed Cali Cige.
Waxa kale oo ay eedaysaneyaashu hore u codsadeen iyagoo sii mariyey
qareenadooda in dacwada lagu dabaqo xeerka saxaafada Somaliland ee Xeer
Lr 27/2004, halka uu garsoorku ka adeegsanayo xukuumaduna kula ogoshahay
xeerka ciqaabta ee Somalia.
Labada eedaysane waxay sheegeen in garsooraha dacwada qaadayey iyo
gudoomiyaha maxkamada gobolka Hargeysa ay ku gacan saydheen dhamaan
codsiyadaa, sidaas darteedna ay qaadacayaan dhagaysiga dacwadan ilaa iyo
inta wax laga qabanayo cadaalad darada ay ka tirsanayaan hanaanka
garnaqista dacwadooda.
Ugu horayn gudoomiyaha Haatuf Yuusuf Cabdi Gaboobe oo shirkaasi jaraa’id
ee uu maanta ku qabtay Hargeyska kaga hadlaya arintaasi waxa uu yidhi
“Waxa ay maanta 31/5/2014 ku mudaysnayd dhagaysigii saddexaad ee dacwada
lanoo haysto, garsooruhu dibuu u dhigay oo bari ayuu ka dhigay
1/6/2014-ka, waxaanu ilaa hada ku dhagan yahay oo ay garyaqaanada Haatuf
kala hadleen duris, ilaa tiroba saddex jeer ayaanu durnay garsoorahan in
lanaga badalo, sababtoo ah hab cadaaladeed kuma qaadayo kiiska, Illaahay
iyo khalqigiisuba way arkayeen labadii dhagaysi siduu wax u waday ee
xukun qarqoosh-nimada ah, kolkaa anagu waxa aanu doonaynay in lanaga
badalo anaga oo codsiyadaa qornay dhawr jeer oo u gudbinay cida ay
khusayso ee garsoorka ah.
Waxa kale oo aanu hore u codsanay in aanu hore rafcaan ka qaadano
maxkamada gobolka oo uu gudoomiye ka yahay Faysal Dhago-dhago oo nagu
riday afar xukun oo aananu midna iska difaacin oo uu u horeeyey kii lagu
xayiray wargeysyada Haatuf Iyo Somaliland Times, kii lagu xayiray in aanay
Madbacaduhu waxba noo
daabicin, kii lagu xayiray website-yada Haatuf iyo Somaliland Times iyo
kii lagu xayiray in aanu safaro dibada ugu baxi karo aniga iyo
tifaftiraha.
Markay maxkamadu intaas oo xukuna gaadhay waxaanu codsanay in aanu ambiil
u qaadano maxkamada rafcaanka, iyadoo codsiyadaasi ay ugu
muhiimsanayn in xeerka saxaafada Somaliland lagu dabaqo dacwadayada
maadaama oo uu jiro xeer saxaafadeed oo Somaliland u degsan, wixii
doonaaba ha nagu dhacaane anagoo tirsanayna dulmi iyo tacadi badan oo
naga soo wajahay xagga Garsoorka, Bileyska iyo Xukuumada, waxaanu waxaas
oo dhan kaga soo kabsan kari lahayn xeerka saxaafada oo la dabaqo.
Xeer-ilaalintu markii maxkamada la joogay way ka hadleen waxaanay nagu
yidhaahdeen xeerkan yar ee aydun ina-Rayaale barigii ku khiyaamayseen
anagu diyaar uma nihin in aanu ku camal falno”.
Gabogabadii Yuusuf Cabdi Gaboobe waxa uu sheegay in dacwadooda loogu
wareejiyo garsoore cadaali ah, isla markaana lagu dabaqo kiiskooda
xeerka saxaafada Somaliland, lagana badalo maxkamada gobolka oo loogu
wareejiyo maxkamada Rafcaanka, waxaanu xusay in aanay ka qaybgali doonin
dhagaysiga dacwada bari hadii wax laga qaban waayo cabashadooda dhinaca
garsoorka. |