|
|
Muuse Biixi Oo
Habac-Sanaan Ku Eedeeyey Hay’adaha Amniga Dalka, Luuqad Adagna Ku
Cambaareeyey Xadhigii Wasiir Ku Xigeenkii Hore Ee Amniga
Hargeysa,
June 2, 2014 (Haatuf) - Gudoomiyaha Xisbigul-xaakimka dalka ee KULMIYE
Mujaahid Muuse Biixi Cabdi ayaa jawaab kulul ka bixiyey eedo ay
xukuumadu u jeedisay hogaankooda oo ay lala xidhiidhiyey qaraxyadii
Shaanida ee Magaaladda Hargeysa ka dhacayey habeenadi u danbeeyey,
kuwaas oo uu dhinac iskaga leexiyey.
Muuse Biixi waxa uu wasiirka daakhiliga Mr Warancade ku tilmaamay nin
shaqadiisu dayacan tahay oo aan waxba ka ogayn dhacdooyinka amniga
khatarta ku ah ee dalka ka dhacay, kuwaas oo uu tusaale ugu soo qaatay
dadkii qaraxyada dhawaan ka fuliyey dalka Djibouti oo uu sheegay inay
dhawr iyo labaatan maalmood Somaliland joogeen, isla markaana aanay
hay’adaha amnigu ogayn.
Guddoomiyaha Xisbiga Muxafadka ah ee KULMIYE Muuuse Biixi Cabdi waxa uu
sidaasi ku sheegay shirjaraa’id oo uu maanta ku qabtay magaalada
Hargeysa, waxaana uu ugu horayn uu ka hadlay Kulamo ay isaga iyo
garabkiisa la yeesheen Guddida Golaha Guurtida Somaliland ee ku jirta
dhexdhexaadinta Khilaafka Xisbiga KULMIYE. Ugu horayna isaga oo
arrimahaasi ka hadlaya, waxa uu yidhi "Maanta waxaa noo yeedhay guurtida,
waxaa ay ahaayeen gudi aad u balaadhan oo aan isleeyahay Lix iyo Toban
ayey gaadhayeen, waxaa joogay shir gudoonkii oo isku dhan iyo odayaashii
waawaynaa ee Guurtida way noo goleeyeen nimankaasi waa ay na
dhagaysteen,waxaanu kala hadalnay wixii jiray,waxaanan ka xunahay oo
iyagana aanu u sheegnay,idinkana idiin sheegaynaa shacbigana u
sheegaynaa in nasiib darro ay tahay oo aanu aad uga xunahay in xisbiga
KULMIYE, in kulmiye oo is-haysta ay Guurti iyo shiciba ay u soo
gurmadaan tu aanu filaynay maaha, waa tu aanu ka xunahay waxaanaanu
jecelnahay in aanu hore u dhamayno waa qodob,Waa qodobka labaadee aniga
oo gudoomiye ah iyo raga iyo raga ila socdaaba waxaanu arintaa ka
taaganahay meel ah nabad galyo, wadahadal iyo is afgarad lagu dhameeyo,
ma sidno ficil tan ma sidno erayo dhiif leh,ma sidno waxaa haa la yeelay,
waxaanu sidnaa Xuluul sida wax loo helo wax walba dhinaca san ayaanu ka
eegnaa,Saaxiibadayada aanu wada shaqaynay ee aanu in badan soo wada
halgamaynay halgan halgan hore iyo mid danbaba ee Madaxweynaha Axmed
Siilaanyo ugu horeeyo aniga iima muuqato intii aanu iskhilaafnay iyo
intii aanu isnidhi xun anaga oo ah dadwada shaqeeya ah.waxaa noo muuqata
oo ka badan oo ah intaanu guul wada gaadhnay inta aanu is afgarad
gaadhnay ee aanu wax wada qabsanay horta anagu rayigaas ayaanu ka
duulaynaa,Guurtida waxaanu u sheegnay oo aanan imika halkan ka wada
akhriyi karayn sidii ay noogu muuqatay waxa dhibaatada keenay oo ay kow
ka tahay shirweynihii Xisbiga wixii uu go'aamo gaadhay oo aan lagu darin
go'aamo aan jirin dhibta koowaad halkaas ayaa ay ka kacday dhibtaa waxaa
ku xigay markii aan anigu idhi waxaan ahay murashax,dagaal cir iyo dhul
ah ayaa la qaaday oo uu madaxweynuhu qaaday iyana meesha may qabanayn
intaasi waxaa ku xigay dhibaatooyin ka dhashay oo dadbaa
laxidhay,dhiigbaa daatay khilaaf horla oo kii horaa ka yimi sadexdaa
qodab oo kaliya ayaanu ka hadalnay".
Mujaahid Muuse Biiixi Cabdi ayaa isaga oo hadalkiisa sii wata waxaa uu
ka hadlay Xadhiga Wasiir ku xigeenkii hore ee Amniga Cabdilaahi
Abokor,waxaana uu tilmaamay in qaabkii loo xidhay wasiiirkaasi ay ahayd
mid khalad ah isaga oo sida oo kalena carabka ku dhuftay in ay ahayd
xadhig siyaasi ah kaasi oo aan colaad mooyee laga helin wanaag, waxaana
uu ugu baaqay xukuumada in si dagdag ah loo sii daayo masuulkaasi, isaga
oo arrimahaasi ka hadlaya, waxa uu yidhi "Ta 1-aad dadka dhibaatada loo
gaystay ee la xidhxidhay waxaanu leenahay waa khalad waana in gafkaa la
saxaa oo dadka xuquuqdoodii loo soo celiyaa tusaala ahaan sidiisaba
xadhiga siyaasiga ahee Wasiir ku xigeenkii hore ee Amniga Somaliland
Cabdilaahi Abokor, la xidhay waa xadhig siyaasi ah, waxaanan ognahay
xadhiga siyaasiga ahi Colaad iyo nac mooyee wanaag ma keeno waxaanu
leenahay waa khalad ee hala ga noqdo waxaa iyana dhibaato labaad ah
habkii loo qabtay ee gurigiisa loo galay qof walba oo daawaday dhaawaca
naxdin iyo fool xumaba waa ay ugu filan tahay Somaliland, cidii
talaabadaa qaadana waa ay u badheedhay waayo waa la qaban karaayey oo si
nabad galyo aha ayaa loo qaban karaayey,waxaan maqlaayey gurigiisa ayaa
hub lagu qabtay Guri waliba hub ayaa yaala,waxaan leeyahay halkaasi waa
arin godob wayn dhali karta oo halkaa taala, waxaa la xidhay dad
taageerayaal xisbiga ah oo loo xidhay sawirka gudoomiyaha ayey siteen”.
Mujaahid Muuse Biixi Cabdi mar uu ka hadlayey sawiro lagu xidhxidhay
qaar ka mid ah taageerayaasha, waxa uu yidhi "Xukuumadda waxaanu
waydiinaynaa Madaxweynaha markuu danbi noqday sawirkaygu kaaguna uu
noqday Xalaal, waxaanu ka diidanahay oo nalagu eedeeyey in wasiirka
daakhiliga Somaliland waxa wax qarxinaaya rag madaxnimo doonaya waan ka
xumahay in madaxweynaha afkiisa ay ka soo baxdo,warancade isaga la yaabi
maayo intan danbe ee uu isagu wasiirka noqday hadaladan deel qaafka ahi
waa isaga caadi maalmahan danbe".
“Wuxuu yidhi (Waran Cade) isaga oo Space Channel-ka la hadlaaya anigu
waxaan ahaa oo uu ku faanay ragii toogtay markuu Siilaanyo mucaaridka
ahaa hadana uu iga maarmi waayey oo wasiir ayuu iga dhigtay. Tana ku
darso ragbaa madaxtinimo Shaani ku doonaya”
Gabo-gabadii Guddoomiyaha Xisbiga Kulmiye Muuse Biixi Cabdi ayaa
dhaliilo u soo jeediyey wasiirka arrimaha gudaha ee Somaliland, isagoo
sheegay in ragii dalka Djibouti qaraxyada ka fuliyey Hargeysa joogeen
mudo bil ku dhaw, waxaanu yidhi “Waxaan waydiinayaa wasaaraddaha amniga
oo uu kow ka yahay wasiirka daakhiligu ragii Jabuuti qarxiyey waxaa la
sheegay inay dhawr iyo labaatan cisho Hargeysa joogeen, dhaawac iyo ceeb
ka wayn oo Somaliland dul saarani ma jirto”. |