|
|
|
Xuseen Waji-xun, Cali Warancade Iyo Faysal
Dhaga-dhago Oo Diyaariyey Xukunkii Lagu Ridi Lahaa Masuuliyiinta Haatuf
Hargeysa, June 18, 2014 (Haatuf) - Dacwadii ay xukuumada
madaxweyne Siilaanyo ku soo oogtay gudoomiyaha Haatuf Yuusuf Cabdi
Gaboobe iyo Tifaftiraha wargeyska Axmed Cali Cige ayaa xukunkeedii
diyaar yahay taas oo ay kasoo wada shaqeeyeen gudoomiyaha maxkamada
Hargeysa Faysal Dhago-dhago, Xeer Ilaalinta Guud, Wasiirka Macdanta
Xuseen Waji-xun iyo Cali Warancade.
Dacwadan oo ay dhibaneyaal ka yihiin labada wasiir ee kor ku xusan iyo
wiilka uu madaxweyne Siilaanyo sodoga u yahay Baashe Cawil kuwaas oo
labada masuul ee Haatuf ku eedaynaya warar been abuur ah iyo meel ka
dhac ah oo ay ka qoreen ayaa la filayaa in dhagaysigeedii sadexaad uu
bari qabsoomo inkastoo qareenada Haatuf aanay ka soo xaadiri doonin
kadib markii uu gudoomiyaha maxkamada Hargeysa Faysal Dhaga-dhago ku
adkaystay inuu kiiska qaado garsoore Asad Nuur Cilmi oo ay
eedaysaneyaashu ku dureen dhagaysigii u horeeyey ee qabsoomay 10/5/2014
in aanu dhex ka ahayn dacwada ee uu u xaglinayo dhinaca dawlada.
Ugu yaraan laba garsoore oo todobaadkan gudihiisa lagu qoray kiiskan
ayaa ka cudur daartay inay qaadaan kadib markii uu gudoomiyaha maxkamada
Faysal Dhaga-dhago u dhiibay fayl dacwadeed oo xukunkiisu diyaarsan
yahay iyadoon la dhagaysanba dhinicii difaaca.
Dacwadan oo loo arko mid siyaasadeen (political trial) ayaa waxa
dhagaysigeedii u horeeyey ka soo qaybgalay labada wasiir ee
dhibaneyaasha ah oo saxaafadu soo sawirtay iyaga oo lacag ku dhex
qaybinaya kaamboolka maxkamadaha ee Hargeysa halka uu Baashe Cawil
maxkamada uu ka soo xaadiray dhagaysigii labaad oo dhacay 25/5/2014
isagoo wata ilaalo hubaysan iyo gaadhi madaxtooyadu leedahay oo kalidii
loo ogolaaday inuu gaydhka maxkamada dhex dhigtay.
Garsoore Dhaga-dhago ayaa maanta dacwadii dib ugu soo celiyey garsoore
Asad kadib markii ay u suurtoobi wayday inuu helo garsoore kale oo uu ku
dul maamuli karo kiiskan oo isla markaana ka ogolaada inuu ku dhawaaqo
xukunka uu Dhaga-dhago siidiyaariyey.
Labada eedaysane ayaa iyagu qaba in maxkamadani tahay mid qayrul sharci
ah maadaama ay baalmarsan tahay xeerkii saxaafada Somaliland oo lagu
qaadayo xeerka ciqaabta ee Somalia waxa kale oo ay aaminsan yihiin in
xukuumada madaxweyne Siilaanyo ay dacwadan soo maleegtay si ay uga aar
goosato kadib markii ay hore uga dhago adaygeen digniino uga yimid
dhinaca madaxtooyada in talaabo laga qaadi dooni hadii ay joojin waayaan
sheekooyinka ay soo daabacaan ee ku saabsan musuqmaasuqa shidaal
baadhista ama Baashe Cawil midkood toona.
Dacwadan ayaa waxay kashiftay xaalada garsoorka dalku marayo, musuqa iyo
maamul xumada madaxweyne Siilaanyo waxaana sumcad xumo weyn oo xaga
caalamka ah ay usoo jiiday dalka Somaliland. |