|
Wefti Ka Socda Ingiriiska Oo La Filayo
Inay Xabsiga Ku Booqdaan C/laahi Abokor
Si Ay Uga Waraystaan
Dhaqdhaqaaqyada Xagjirka Iyo Xubnaha
Xukuumada Ku Jira Ee Uu Tilmaamay
Nairobi, June 21, 2014 (Haatuf) – Wefti ka socda dalka Ingiriiska ayaa
la filayaa in maalmaha soo socda ay xabsiga Mandheera ku booqdaan wasiir
ku xigeenkii hore ee amniga Somaliland Cabdilaahi Abokor oo xukuumadu
jeelka u taxaabay markii uu daboolka ka qaaday arimo ku saabsan
dhaqdhaqaaqyo xagjirnimo oo uu sheegay inay ka jiraan Somaliland.
Weftigan Ingiriiska ah ayaa la tilmaamay inay ku jiraan xubno ka mid ah
sirdoonka dalkaasi iyo diblomaasiyiin kale oo si weyn u danaynaya xogo
dheeraad ah oo ay ka helaan arimaha uu Mr Abokor ka dhawaajiyey ee ku
saabsan dhaqdhaqaaqyadaasi xagjirka ah iyo xubno uu tilmaamay inay
xukuumada Siilaanyo ka mid yihiin.
Xadhiga wasiir ku xigeenkii hore ee amniga Cabdilaahi Abokor ayaa yimid
xili uu wasiir ku xigeenku shir jaraa’id oo uu Hargeysa ku qabtay ka hor
intii aan la xidhin uu ku iftiimiyey xubno golaha xukuumada Siilaanyo ka
tirsani inay ka mid yihiin ururada xagjirka ah taas oo shaki badan ku
abuurtay dalalka reer galbeedka iyo kuwa jaarka ah ee daneeya
xasiloonida Somaliland iyo ta mandaqadaba.
Hadalkaasi ka soo yeedhay Cabdilaahi Abokor ayaa keenay in xukuumadu
habeen saq-dhexe ah ciidamada RRU-da u dirto guriga wasiir ku xigeenkii
hore ee amnigu ka dagan yahay Hargeysa isla markaana ku qaaday weerar
argagax galiyey shacabka Somaliland, naxdin iyo anfariirna ku abuuray
qoyska wasiir ku xigeenka amniga iyo dadkii jiiraanka la ahaaba.
Sidoo kale waxa iyaduna fashilaad ku noqotay Somaliland inay ogaan
waayaan hawlgalkii is-qarxinta ee ka dhacay dalka Djibouti ee
diyaargarawgiisu mudada dheer ka socday Somaliland gudaheeda. |