|
|
Xildhibaanada Kulmiye Oo Shir Uga Socdo
Guriga Madaxweyne Ku Xigeenka Iyo
Xukuumada Oo Abaabulaysa Sidii Xilka Loo
Qaadi Lahaa Guddoomiyaha Baarlamaanka
Hargeysa, October 23, 2014 (Haatuf) - Xildhibaanada xisbiga
Kulmiye ayaa caawa shir uga furmay guriga Madaxweyne ku xigeenka
Somaliland Cabdiraxmaan Saylici, kaas oo la sheegay in xukuumada
Madaxweyne Siilaanyo ku doonayso sidii maalinta sabtida xilka
looga qaadi lahaa gudoomiyaha Golaha Wakiilada Cabdiraxmaan Ciro.
Shirkan ayaa wararka laga helayo ay sheegayaan inay ka soo
qaybgaleen ku dhawaad 40 xildhibaan oo ay ka mid yihiin labada
Gudoomiye ku xigeen ee Baashe Maxamed Faarax iyo Cali Yuusuf,
kuwaas oo xukuumadu ay kala hadlayso sidii maalinta sabtida ah
xildhibaanada la iskugu yeedhi lahaa kalfadhi aan caadi ahayn si
xilka looga qaado Cabdiraxmaan Ciro.
Ilo wareedo ka ag-dhaw guriga Madaxweyne ku xigeenka ayaa
Hilaacmedia u sheegay in caawa dhaqdhaqaaq xoogan laga dareemayo
guriga, isla markaana baabuurta xildhibaanadu ay buux dhaafiyeen
barxada hore ee gurigaasi.
Shirkan caawa madaxweyne ku xigeenku gurigiisa ugu qabano
xildhibaanada Kulmiye iyo kuwa taabacsan xukuumada ayaa waxa uu
ku soo beegmayaa hanjabaado iyo goodin maanta dhex martay
xildhibaanada golahaasi ee kala taageersan Xukuumada iyo
Gudoomiyaha Baarlamaanka, kuwaas oo iskugu hanjabay in hadii
Gudoomiye Ciro xilka laga qaado ay iyaguna golaha soo dhigi
doonaan maamuus ka xayuubin ay ku sameeyaan Madaxweyne Siilaanyo.
Si kastaba ha ahaatee golaha wakiilada ayaa ku jira fasax, isla
markaana gudoomiyaha Xisbiga Wadani ahna gudoomiyaha golaha
Wakiilada ayaa hada ku sugan magaalada Nairobi, waxaana la
saadaalinayaa in gudoomiye Saacadaha safarkiisa soo gaabin doono,
maadaama oo uu jiro shirqool ka dhan ah oo xukuumada Madaxweyne
Siilaanyo ku doonayso inay xilka kaga qaado. |