SOMALILAND FORUM
www.somalilandforum.com
|
Haatuf cadadkii 41-aad
Haatuf, Feb.24, 2002, Cadadkii 41-aad,
Telephone 252-225-3783, 252-828-3783
E-mail: haatufnews@hotmail.com
C/Raxmaan Aw Cali: Ma jiro wax Qaban-qaabo dagaal ah oo ay ASAD iyo
SAHAN ku jiraan.
Boorame (Haatuf): Guddoomiye Xigeenka
urur-siyaasadeedka ASAD, C/Raxmaan Aw Cali Faarax oo
socdaal ku joogga magaalada Boorama, ayaa ujeeddada
Safarkiisa ku macneeyay in ay tahay mid uu dadka kaga
dhaadhicinayo in aanay ururada Mucaaridka ah ee ASAD
iyo SAHAN, wadin wax dhibaato bulshada ku ah,
nabadgelyadana wax u dhimaya.
Siduu noo soo gudbiyay Weriye Maxamed Cumar, Gudoomiye
Xigeenka ASAD, wuxuu sheegay inuu doonayo inuu dadka
reer Boorama ka saaro, Shakiga la geliyay ee ah ayuu
yidhi: ASAD iyo SAHAN baa wax wada.Wuxuu intaa ku
ladhay in aanay jirin wax dagaal ah oo dalka ka
dhacayaa, balse ay Xukuumaddu bulshada ku abuurayso
Wallaac iyo Shaki argagax gelin ah. Ma jiro wax
qaban-qaabo dagaal ah oo ay ASAD iyo SAHAN ku
tallo-jiraan, sidaa darteed way is-keeni doontaa cidii
iyadu wada qalalaase iyo xaalad-abuur, ayuu yidhi
C/Raxmaan Aw Cali. Wuxuu intaa ku daray in aanay dadku
u dheg taagin, wuxuu ugu yeedhay dacaayadaha raqiiska
ah ee Maamulku ka fidinayo, ayuu yidhi. Ujeeddadayada
oo ah in ay si nabad-gelyo ah xilka ku wareejiso.
Dhinaca kale, Suldaan Ibraahim Jaamac Samatar, ayaa
isna u sheegay Saxaafadda in ay haboon tahay
Xukuumaddu in ay joojiso ayuu yidhi; Dhoolla-tuska
Ciidan ee ay Jidadka ku gaynayso, Mucaaridkana ka
dayso masabidka. Suldaanku, wuxuu intaa raaciyay in
aanay jirin kooxo hubaysan oo dagaal-doon ahi, balse
wuxuu xusay in ay Xukuumaddu abuurayso tuhun, si ay u
meel-marsato ayuu yidhi; Wakhtiga dheeraadka ah ee ay
kordhisatay.
…………………………………………….
Dhismaha Urur Cusub oo lagaga Dhawaaqay Boorame
Boorama (Haatuf): Urur cusub oo ay ku bahoobeen
dhalinyaro dhigata Dugsiyadda Dhexe, Sare iyo
Jaamacadda Camuud, ayaa shalay lagaga dhawaaqay
dhismihiisa magaalada Boorama ee Gobolka Awdal.
Siduu noo soo tebiyay Weriyahayaga Gobolka Awdal,
Maxamed Cumar, Xafladii furitaanka ee lagaga dhawaaqay
dhismaha urur-bulsheedkan cusub oo lagu magacaabo
Al-AQSA oo ku yaalla magaalada Boorama, waxaa ka
qayb-galay Masuuliyiinta Maamulka Gobolka Awdal iyo
degmada Boorama, Gudoomiyaha Jaamacadda Camuud Prof.
Saleebaan Axmed Guuleed, Salaadiin, Xubno ka tirsan
Golaha Guurtida, Culimo, Ganacsato iyo xubno kale oo
bulshada ka tirsan. Gudoomiyaha Jaamacadda Camuud,
Prof. Saleebaan oo hadal furitaan ah xafladdaa ka
jeediyayna, wuxuu sharaxaad kaga bixiyay sidii lagu
hirgeliyay dhismaha ururkan oo la yidhaahdo; Ururka
Badbaadinta Dhalinyarada Somaliland (SAYS). Prof.
Saleebaan, wuxuu intaa ku daray in loo baahan yahay in
ururkani ka duwanaado, ururo dhalinyaro oo hore loo
sameeyay, kuwaas oo uu xusay in ay ka leexdeen
dariiqoodii, kadibna ay hadheeyeen; Qabyaalad,
Siyaasad iyo dhaqan-xumo. Gudoomiyaha Jaamacadda
Camuud, wuxuu kula dar-daarmay dhalinyarada ururkaas
in looga baahan yahay, adkaynta Midnimada Somaliland,
Nabad-gelyada iyo in ay ku dadaalaan waxbarashada.
Sidoo kale, waxaa iyana Xafladdaa ka hadlay
Masuuliyiin, Culimo, Ganacsato iyo Xubno Guurtida ka
tirsan, kuwaas oo dhammaantood-ba ku ballan qaaday in
ay ururka cusub ku taakulaynayaan, tallaabo kasta oo
waxtar u ah bulshada iyo dalkaba. Waxaanay
dhammaantoodba kula taliyeen dhalinta ururka in ay ka
fogaadaan, qof-nacayb, anshax-xumadda, qabyaaladda iyo
Siyaasadda.
…………………………………………
Ciidamada Goobahoodii halagu Celiyo, dadkana Bandooda
halaga qaado. War-saxaafadeed ururada Mucaaridka
Hargeysa (Haatuf): Shan urur-siyaasadeed oo ka mid ah
ururada Mucaaridka ah, ayaa ugu baaqay Xukuumadda in
Ciidanka Booliska loo daayo Sugidda ammaanka, laguna
celiyo Xeryahoodii Ciidamada kale ee Qaranka,
dadweynahana laga qaado waxay ugu yeedheen Bandooda
aan shrciyaysnayn. Sidaana, waxay shanta ururba ku
sheegeen, War-saxaafadeed wada-jir ah oo ay xalay
Fiidkii na soo gaadhsiiyeen.
War-saxaafadeedkaas oo ay saxeexeen ururada UCID,
SAHAN, HORMOOD, BIRSOL, UMAD iyo ILAYS, wuxuu u
dhignaa sidan:
Sida la wada-ogsoon yahay, dalka Somaliland wuxuu
marayaa marxalad adag, arrintaana waxa lagaga bixi
karaa iyadoo dadka reer Somaliland meel uga soo
wada-jeestaan hirgelinta Nabadda. Si taa loo helo,
ururada hoos ku xusan markay u caddaatay beryahan
dambe In dadweynaha uu galay SAS ah, in
xasilooni-darro ku soo fool leedahay, kaas oo ka
dhashay muddo-kordhinta aan ururada Siyaasaddu ka
midaysnayn, kaas oo ku ajburay ururadii kala aragtida
ahaa in ay ummadda wada-jir ugu ballan qaadaan in aan
wax dhaqdhaqaaqaa oo nabad-gelyada jirta dhaawici kara
aanay xagooda ka iman, cid kalena ka yeelayn meela uga
soo wada-jeestaan, waxayna isku raaceen qodobbada soo
socda:
v In dalka xasiloonidiisa iyo nabad-gelyadiisa la wada
dhawro, wixii dhaawacayana gees looga soo wada jeesto.
In Xukuumadda Somaliland ka waantowdo, baqa-gelinta
shicibka iyo xaalad-abuurka deg-degga ah ee ka muuqata
magaalooyinka. Sidaa darteed, waxaanu soo jeedinaynaa
in Ciidamada lagu celiyo goobihii ay deganaayeen,
dadkana Bandooda aan wax kelifaa jirin, cidina
sheegin, lana sharciyayn laga qaado, iyadoo Ciidanka
Booliska aanu filayno inuu qabsado shaqadii
Nabad-gelyada ay u xilsaaraayeen, Ciidanka Qarankuna
qabto shaqadii loo abuuray.
Ururadu, waxay soo dhawaynayaan cidii reer
Somaliland ah ee wanaag iyo isu soo dhawaanshaha
ummadda kala qayb-galaysa. Waxayna xoog saarayaan,
wada-jirka iyo wada-tashiga axsaabta Mucaaridka ah, si
ay uga hawl-galaan Nabadda iyo sidii loo gaadhi lahaa
Dimoqraadiyad aynu ku faani karo oo ku salaysan
Diinteena iyo Distoorka.
In sida Xeerka Nidaamka Axsaabtu qorayo Qodobka
Lixaad, Faqrada A, loo sinaado adeegsiga
Warbaahinta. Waxay ururada ka codsanayaan Hayadaha
Warbaahinta in aanay buun-buunin, wixii
nabadgelyo-xumo abuuri kara.
……………………………………………..
Xukuumadda oo caddaysay Mowqifkeeda ku waajahan
Hindisaha Axmed Siilaanyo
Hargeysa (Haatuf): Xukuumadda Somaliland, ayaa shaaca
ka qaaday in aanay gelaynin Wada-hadal ku saabsan
Shir-beeleed iyo sannadkii loo kordhiyay Madaxweynaha
iyo Ku-xigeenkiisa, kuwaas oo ay sheegtay in ka
wada-hadalkoodu uu ka soo horjeedo dastuurka, Qaranka
iyo nabadgelyadana duminaya. Sidaana, waxay Xukuumaddu
ku caddaysay War-saxaafadeed ay soo saartay.
Xukuumaddu, waxay War-saxaafadeedka ku sheegtay in ay
diyaar u tahay wax alla wixii wada-hadal ah ee dan
guud la xidhiidha in ay la yeelato urur, koox iyo qof
kasta oo dastuurka aaminsan, isla markaana ay
caddaynayso diryaarna u tahay in khilaaf kasta oo
Siyaasi ah wada-hadal lagu dhameeyo. Waxase ka reeban
Xukuumadda, ayuu yidhi War-saxaafadeedku, In ay urur,
koox iyo qof la-gasho wada-hadal ku saabsan
Shir-beeleed dood la xidhiidha iyo sannadkii ay
guurtidu u kordhisay Madaxweynaha iyo
Madaxweyne-xigeenka.
Xukuumaddu, waxay intaa ku dartay oo ay War-saxaafadeedkaa
ku tidhi; Sababtoo ah ka wada-hadalka labadaa arin laga wada-hadlaa,
wuxuu ka soo horjeeddaa dastuurka, Qaranka iyo nabadda,
labadabana uu duminayo. Shir-beeleed-na, kol haddii
ururadii Siyaasiga ahi ay isdiiwaan geliyeen,
hawlahoodiina ay wataan, Shir-beeleed dambe oo
dhaqdhaqaaq Siyaasadeed lagu saleeyaa halkaasuu ku
hadhay. Muddada Guurtidu kordhisayna waa goaan
dastuuri ah oo waajib ah oo ay waajib ku tahay
Xukuumadda, Golayaasha Sharci-dejinta, ururada
Siyaasiga ah iyo Muwaadiniintu in ay ku dhaqmaan.
War-saxaafadeedkan Xukuumaddu wuxuu soo baxay, kadib
markii ay shalay wada-hadalo yeesheen Guddi Wasiiro ah
oo Xukuumadda ka tirsan iyo Siyaasiga Axmed Maxamed
Siilaanyo oo u ololaynayay, sidii wada-hadal loogu soo
dabaali lahaa xaaladda Siyaasadeed ee dalka ka taagan.
Axmed Siilaanyo, ka hor intii aanu la kulmin
Xukuumadda, wuxuu ku horeeyay Mucaaridka iyo
Salaadiintii hore u soo jeediyay qabashada Shir-weyne
Qaran, kuwaas oo aqbalay hindisihiisa. Kadib wuxuu u
gudbay dhinaca Xukuumadda, si uu jawaab ugaga helo
qorshaha uu badka soo dhigay ee wada-hadalka ah.
Hase yeeshee, mar aanu xalay Fiidkii la xidhiidhnay Axmed
Siilaanyo, wuu ka gaabsaday inuu wax faahfaahin ah ka
bixiyo, wixii uu kala kulmay dhinaca Maamulka, waxaanu
si kooban u yidhi; Arrintaa imika wax war ah kama
bixin karo, hase yeeshee Shir-jaraaid ayaan kaga
warami doonaa.
Dhinaca kale, iyadoo ay maalintii shalay soo
geba-gebaysay Muddadii 5 sanno ahayd ee Madaxweyne
Cigaal, hore loogu doortay inuu jagadaa hayo, ayaa
waxa habeenkii xalay lagu arkayay dariiqyada magaalada
Ciidamo dheeraad ah oo gaaf-wareegaya suuqyada.
……………………………………………..
Dedaalka Siilaanyo iyo Dareenka Dadweynaha
Faallo: S.I.Guraase
"Haddii ay laba Maroodi islaayaan, waxaa ku dhex
burbura doogga, ayay tidhaahdaa maahmah Afrikaan ahi.
Sidaa darteed ayaan uga tanaasulay in aan loolan u
galo Madaxtinimada Somaliland, si aanay dhibaato ugu
keenin dadkayga, sidaa waxa yidhi Siyaasiga Caanka ah
ee reer Somaliland, Md. Cumar Carte Qaalib, mar uu u
warramay Telefishanka dalka Djibouti, sannadkii
1997-kii, kadib markii uu ka qaybgalay Shirweynihii
Hargeysa ay ku yeesheen Beelaha Somaliland.
Taasi waa xaqiiqo dhab ah, haddii uu adkaado loolanka
iyo u tartanka madaxtinimada dalku, iyada oo aan la
isu tanaasulayn.
Taasi waxay horseed u tahay dagaalo iyo burbur dalka
ku dhaca oo ay dhibaatada ugu weyni ka soo gaadho
dadweynaha iyo maatida aan waxba galabsan.
Marka aad eegto dalkeena Somaliland, waxa aynu kaga
duwanahay qaybaha kale ee dalkii la odhan jiray
Soomaaliya, waxay ahayd garashada ay garteen
Siyaasiyiintu dhibaatada ay leedahay tartan iyo
xafiiltan adag oo loo galo madaxtinimada, iyada oo
markasta looga hadhayey loona hanaynayay qofkii ku
guulaysta. Taas oo aan ahayn mid hadda bilaabantay ee
soo taxnayd tan iyo aasaaskii SNM, oo iyagu bilaabay
hannaanka isu tanaasulka doorashada iyo u hibaynta
ciddii ku guulaysata, taas oo keentay in ay
madaxtinimada SNM iska beddedlaan 7 Guddoomiye.
Hannaanka noocaas ahi, waxa uu u muuqday maalmihii
dhowaa, mid laga tallaabsanayo oo ay soo baxayeen
dhawaaqyo aan isu dabac lahayn oo ka soo yeedhayay
dhinaca Xukuumadda iyo Mucaaridkaba, kadib markii ay
soo dhawaatay gebo-gebada waqtiga Xukuumadda
Madaxweyne Cigaal, oo ku ekeyd shalay oo ay taariikhdu
ahayd 23-kii Feb, gaar ahaana intii uu soo baxay
goaanka ay Guurtidu muddada sanadka ah ugu kordhiyeen
Xukuumadda Madaxweyne Cigaal 12-kii bishii hore ee
January.
Muddadaana, waxay Mucaaridku ku adkaysanayeen in aanay
Xukuumaddu Sharci ahayn, wixii ka dambeeya Feberuary
23, Xukuumadduna intii hore waxay ku adkaysanaysay in
ay diyaar u tahay doorashooyin dalka ka dhaca.
Haddaba, goaanka ay Guurtidu gaadhay ee ay muddada
sannadka ah ugu kordhisay Xukuumadda, ayay dadka
qaarkii ku tilmaameen mid aan bislayn, si weyna aan
looga fiirsan, isaga oo u baahnaa wada-tashi
ballaadhan iyo in aad loo rog-rogo. Sidaa darteed ayay
ururada Mucaaridku, gaar ahaan ASAD iyo SAHAN ayay ka
timid cambaaraynta iyo mucaariddada ugu adagi, iyagoo
ku baaqay in ay dhisayaan Xukuumad cusub. Arrintani,
waxay dhalisay wer-wer weyn iyo walaac ku dhashay
dadweynaha oo isweydiinayey, sida uu xaalku noqon
doono.
Iyada oo uu xaalku halkaa marayo, ayuu soo baxay Warka
ku sahabsan dedaalka iyo dhex-dhexaadinta uu ku
dhaqaaqay Md. Axmed Maxamed Siilaanyo oo ka mid ah,
Siyaasiyiinta Somaliland ee aadka loo qaddariyo, taas
oo uu kaga dhawaaqay Shir-jaraaid oo uu gurigiisa ku
qabtay habeenimadii Khamiistii ina dhaaftay.
Warkani, waxa uu niyad-sami ku abuuray dadweynaha oo
ay intooda badani ku diirsadeen, iyaga oo uu arkayey
inuu buuxiyay kaalin banaanayd oo loo baahnaa cid lagu
wada kalsoonaan karo oo gasha.
Taasi, la-yaabis malaha marka loo eego Mud. Siilaanyo
oo ka mid ahaa gudoomiyayaashii SNM, ahaana
Gudoomiyihii ugu muddada dheeraa, iyada oo SNM, sida
aynu soo sheegnay ay caado u ahayd wada-tashi iyo
isu-tanaasul. Waxaanu markiiba sida muuqata, kalsooni
ka helay qaybaha is haya, gaar ahaana ururada
Mucaaridka ah oo soo dhaweeyey dedaalkiisa
dhex-dhexaadineed ee uu bilaabay. Inkasta oo ay weli
laalantahay, Natiijada dedaalkiisa dhex-dhexaadintu,
haddana waa mid sidiisa qiimo gaar ah u leh, una
baahan in gacan lagu siiyo Xukuumad iyo Mucaaridba.
Marka la eego dhinaca kale, waxaa in la qiimeeyo u
baahan, hadalkii uu maalintii Khamiistii ka jeediyay
Khayriyadda Xaaji Cabdi Waraabe, kaas oo uu ku
tilmaamay, sida loogu baahan yahay in ay Mucaaridku
midoobaan oo ay isku raacaan Musharax keliya oo la
tartama Madaxweyne Cigaal, si ay u muuqato cid isbedel
keeni karta laguna kalsoonaan karo, kaas oo ah xil
Mucaaridka saaran.
Geba-gebadiina, dedaalka dhex-dhexaadinta ee uu
bilaabay Mud. Siilaanyo, waa mid qaddarin leh, loona
baahan yahay inta laga midho dhallinayo,
Siyaasiyiintana waa inuu tusaale u noqdaa hadalka aynu
ka soo xiganay Cumar Carta Qaalib ee ah; Haddii ay
laba Maroodi is-laayaan, waxaa ku dhex burbura
doogga.
……………………………………………
ODHAAHDA AKHRISTAHA
Madaxweyne ninka kuugu godobooba marka aad is
qabataan, si xun hawtuurin
Geela ayaa loogu heesaa, Ninba tacabkii Toggaay ka
maal, taas oo macnaheedu yahay nin waliba inta uu
geeliisa dhaqdo ayuu ka faaiidaa. Sidoo kale Beertu
marka hore waa dhib badan tahay, markay midhaheedu
bislaadaana way macaantay. Beer la beerana waxa ugu
qaalisan beerta xoriyadda, waayo waxay ku baxdaa
xinjiro dhiig ah. Qof kasta oo reer Somaliland ah,
marka uu xusuusto dadkii kaga dhintay halgankii iyo
hantidii uu ku waayay halgankii lagu keenay
madaxbannaanida iyo dawladnimada Somaliland, wayna
damqadaan. Waxayse ku ilaawaan calanka tawxiidku u
xardhan yahay iyo dawladnimada.
Marka dib loo eego taariikhdii halganka, marka hore ma
jirto cid gooni u sheegan karta libtii halganka,
waxaanse la dafiri karin doorkii lama ilaawaanka ahaa
ee SNM ku lahayd taariikhdii halganka, taas oo ay
shacbigu u hayaan mudnaan iyo ixtiraam. Mana mudna in
madaxdii SNM abaal looga dhigo xaqiraad iyo taariikh
liidata, sida ay dadka qaarkood ku hadaaqaan. Hase
yeeshee, waxa iyana xusid mudan dhaliilihii
siyaasadeed ee ay kasbadeen madaxdii SNM markii loo
dhiibay talada dalka, taas oo la odhan karo mar iyo
lababa inay taloxumaysteen, talo-xumadoodana waxa
umadda ka soo gaadhay dhibaato badan iyo dib-u-dhac.
Sidaa darteed, maantana raga mucaaradka ah oo ay ku
badan yihiin siyaasiyiin SNM ahi, waxaan kula talin
lahaa ama uga digayaa inaanay markale ku dhicin
talo-xumo, iyaga iyo umaddaba adhax-jab ku noqota.
Inkasta oo ay ummaddu dooratay, calafna meesha ku
jiray, haddana markii ina-Cigaal Boorama lagu soo
doortay raggii ugu badnaa ee codsaday waxay ahaayeen
niman SNM ah.
Raga mucaaridka ahi waxay had iyo goor
Cigaal ku dhaliilaan inaanu waxba qaban, laakiin anigu
taa ma qabo, waayo Soomaalidu waxay tidhaahdaa gaal
dil, gartiisana sii.
Sidaa awgeed, waa in la qiro wixii uu qabtay, maxaa
yeelay maalintii Boorama lagu doortay wuxuu la
wareegay dal aan wax dawlad ahi ka jirin. Maantase
waxaa marag ma doon ah inuu dhisay haykal dawladeed oo
dhaxalgal ah, nidaam siyaasi ah iyo nabadgelyo taam
ah, taasina waxay u baahan tahay in la ilaashado,
halkaana laga sii wado.
Hase yeeshee, laba arrimood oo I xaganaya ayaan
doonayaa inaan madaxweyne talo kaa siiyo. Waxaanay
kala yihiin:
· Madaxweyne ha noqon nin dhogorta Weylaha leh.
Haddii aan taa yara macneeyo, beribaa waxa jirey nin
caaqil ah oo la odhan jiray Xasan Sheekh, wuxuuna ahaa
nin dulqaad badan, aadna u hoggaamin fiicnaa oo qaali
ah, hase yeeshee maalin maalmaha ka mid ah ayuu Xasan
Sheekh aad u cadhooday oo dagaal xun ku qaaday nin ka
mid ah raggii uu xukumi jiray.
Cadhadaasi waxay ahayd mid aan looga baran Xasan
Sheekh, waxaana lagu yidhi Xaaji waa sidee? Wuxuuna
ku jawaabay, Adeer mar-mar ayaan dhogarta weylaha
yeeshaa.
Ninkii yaqaanba waa yaqaanee, haraga ama dhogarta
weylaha hadba doc buu cararaa. Sidaa awgeed qofka
fuulaa si deg-dega ayuu uga dhacaa, kadibna dingaraaro
uu la dawakho ayuu la kulmaa.
Dadka intaad marka hore xanbaarto oo cirka geyso,
ayaad marka dambena bahal dingaraaro ah dhulka ku
tuurtaa, waxaanad isu raacisaa eris iyo hadal adag,
taasina waxay keentaa colaad badan. Markaa waxaan
kugula talin lahaa inaad waxa tegay tegye wixii dambe
ka qabato.
· Madaxweyne ninka adiga dalkaba abaal u gala ama u
godobooba, marka aad is qabataan si xun ha u tuurine
waa inaad mar walba u tixgelisaa wixii uu qabtay iyo
wixii wanaag uu adiga kuu galay, adigoo ku dayanaya
xadiiskii Rasuulka, oo niman Asxaabtiisa ahaa oo qalad
sameeyay ku yidhi; Iska daaya dagaalkii Bedar ayay
xaadireene.
Waxa jirta madaxweyne sheeko xariir, taas oo ah;
maalin maalmaha ka mid ah ayaa nin Faras fuushani ku
soo baxay nin liita oo naftu hayso, oo dhulka jiifa,
kadibna wuxuu siiyay caano iyo biyo. Ninkii naftu
haysay markii uu noolaaday, ayaa wuxuu ugu abaal guday
inuu ninkii faraska ka tuuro, isagii ayaana kaxaystay
faraskii. Ninkii faraska lahaa oo dhulka jooga ayaa
ninkii faraska ka dhacay ku yidhi, Ilaah baan kugu
dhaariyee kelmad iga maqal.Inta ninkii meel fog isa
soo taagay ayuu yidhi; Ii sheeg waxa aad sheegayso.
Wuxuuna yidhi, Ilaah baan kugu dhaariyaye sidaad
faraska iiga qaaday cidna hawsheegin, kadibna ninkii
faraska dhacay ayaa yidhi, maxaad uga jeedaa?
wuxuuna ugu jawaabay, nin dambe oo cidla jiifa ayaan
cidina qaadi doonin.
Haddaba madaxweyne aniga oo aan marna ku sifaynayn
sheeko xariirtan, haddana waxaan kugu odhan lahaa;
ninka faraska xaggiisa hore lagaaga dejiyo, cidla ha
kaga dhaqaaqine waa inaad fanaysaa oo aad faraska
xagiisa dambe u ogolaataa.
Cismaan Aw Maxamed (Buur-madow).