Haatuf News

London, June 29, 2006 (Haatuf) – Kooxda Mudaneyaasha Baarlamaanka Britain ee dhowaan isu magacaabay inay si mutadawacnimo ah u taageeri doonaan qaddiyadda Somaliland ayaa shalay fadhigoodii ugu horeeyay ku yeeshay Aqalka Baarlamaanka (House of Commons), waxaanay fadhigaas guddoomiye ugu doorteen Xildhibaan Allun Michael oo ah mudane laga soo doortay magaalada Cardiff ee gobolka Wales. Waxa kale oo Xoghaye loo doortay Xildhibaanada Kerry McCarthy oo ah Mudane laga soo doortay magaalada Bristol ee Waqooyiga London.

Cabdi-Kariin Aadan oo ka mida Jaaliyadda Somaliland ee Liverpool oo xalay Haatuf la xidhiidhay ayaa sheegay inay kulankaas isugu yimaadeen soddomeeyo Mudane oo ka tirsan Baarlamaanka Ingiriisku ah oo guddidan ka tirsan, kuwaas oo iskood isugu xilqaamay u ololaynta iyo meel-marinta Somaliland, siiba dhinacyada helidda kaalmada dhaqaale iyo soo-bandhigista qaddiyadda Ictiraafka.

Fadhigaas oo u dhacay si fiican waxa goob-joog ka ahaa wakiilka Somaliland ee UK, Cismaan Indhoole.

Top

Safiirka Britain Ee Addis Ababa Oo Ka Waramay
Taageerada Ay Dawladiisu Siinayso Somaliland

Hargeysa, June 29, 2006 (Haatuf) – Safiirka Dawlada UK u fadhiya Itoobiya Mr Bob Dewar oo shalay booqasho gaaban ku yimi Caasimada Somaliland ee Hargeysa ayaa sheegay in dawladiisu ay maal-gelin doonto Barnaamij lagu taakulaynayo Agalka Golaha Wakiilada ee Baarlamaanka Somaliland.

Sida uu safiirku Haatuf ugu waramay taakulaynta waxa ka mid ah taageero dhinaca tababarada ah oo la siin doono xubnaha iyo shaqaalaha Baarlamaanka iyo waliba dhinaca qalabka iyo adeegyo kala duwan oo Baarlamaanka u fududayn doona hawliisaha shaqo.
Mr. Bob Dewar waxa kale oo uu sheegay in ay masuuliyiinta Somaliland ka wada hadleen arrimo kale oo ay ka mid yihiin arrimaha Laanta Socdaalka (Immigration). Isaga oo arintaas ka hadlayana waxa uu yidhi “Waxa aanu isla soo qaadnay sidii aanu gacan u siin lahayn Laantiina Socdaalka, isla markaana aanu wax uga qaban lahayn baahiyahooda inaga oo iskaashanayna”.

Safiirku waxa uu intaasi ku daray in ay sii wadi doonaan kaalmada mashaariicda dhinaca Garsoorka, Bileyska iyo dib-u-jihaynta ee ay Somaliland u soo mariyaan hay’ada UNDP.
Mr. Bob Dewar iyo weftiga uu hogaaminayay oo ay ku jireen saraakiil ka tirsan Wasaarada Arrimaha Gudaha iyo Dibadaba, waxay shalay la kulmeen Madaxweynaha Somaliland Daahir Rayaale Kaahin oo xafiiskiisa ku qaabiley.

War-saxaafadeed uu kulankaasi ka soo saaray Afhayeenka Madaxtooyada Somaliland Cabdi Idiris Ducaale waxa lagu sheegay in danjiruhu madaxweynaha ka xog-wareystay aragtida Somaliland ee ku waajahan xaaladan cusub ee ku soo korodhay gobolka, gaar ahaan arrimaha Somaliya.

Kulankaa Danjiraha iyo Madaxweynaha ka hor, Mr. Dewar iyo weftigiisu waxay kulan ay gudoominayso Wasiirada arrimaha dibada Somaliland Edna Aadan Ismaaciil ku yeesheen xafiiskeeda, kaas oo ay ka soo qayb-galeen dhinaca Somaliland Wasiirada Qorsheynta Axmed X. Daahir, Dib-u-dejinta C/laahi Xuseen Iimaan, Arrimaha Gudaha Aadan Maxamed Mire, waxa lagaga wada hadlay arrimo ku saabsan sii xoojinta iskaashiga u dhexeeya Somaliland iyo UK.

Dhinaca kale, war-saxaafadeed uu Ambassador Bob Dewar ka soo saaray socdaalkiisan gaaban, waxa uu ku xusay ahmiyada ay dawladiisu siinayso xasiloonida ka jirta Somaliland in aanay hintaaqmin. Isaga oo arinta ka hadlayana waxa uu yidhi “Waxaan u malaynayaa in aad intiina badani maqasheen wareysigii wasiirka arrimaha Afrika Lord Triesman ee laga sii daayey BBC-da Jimcihii dhowaa, kaas oo uu Somaliland ku tilmaamay in ay tahay jasiirad nabdoon, iyada oo aanu u aragno xasiloonida iyo degananshiyaha Somaliland arin muhiim ah, isla markaana aanu Midowga Yurub iyo midowga Afrika kala shaqaynayno sidii gobolkan nabad loogu soo dabali lahaa, Somaliland-na waxaan ku bogaadinayaa in ay ku sii negaato waxyaabihii u qabsoomay ee lahaa dib-u-heshiisiin dimoqraadiyadeed oo nabad iyo horumar leh”.

Top

Koox Falal Argagixiso U Xidhnaa Oo Markii U
Horeysay Shalay La Horkeenay Maxkamadda

Waxa Ka Mid Ah Eedaysanayaasha Maqan
Xasan Daahir Aways Oo Ah Gudoomiyaha Majlisu
Shuuraha Maxkamadaha Xamar

Hargeysa, June 29, 2006 (Haatuf) – Maxkamadda Gobolka Hargeysa ayaa ku amartay Xeer Ilaalinta gobolka inay soo waafajiso Xeerka Ciqaabta ee ku haboon eedda ay ku soo oogtay 14 eedaysane oo loo haysto falal argagixiso oo ay doonayeen inay ka fuliyaan Somaliland bishii September, 2005.

Maxkamaddu waxay qaraarkan soo saartay ka dib markii maalintii shalay la horkeenay sideed ka mid ah eedaysanayaashaasi oo ilaa bishii September ee sannadkii tegay ku xidhnaa xabsiga dhexe ee Hargeysa.

Dhegeysiga dacwada eedaysanayaashan ayaa shalay abaaro 9:30 ka furantay hoolka garnaqa dacwadaha ee maxkamadda gobolka Hargeysa, iyada oo ay dhegeysiga dacwadan ka soo qayb galeen dad aad u farabadan oo ka mid ah ehelada eedaysanayaasha iyo dad kale oo farabadan.

Dacwadan waxa oogayey laba garyaqaan oo ka socda Xeer Ilaalinta Gobolka Hargeysa, halka ay eedaysanayaashana ka difaacayeen afar Qareen, iyada oo ay ka garnaqayeen Gudoomiyaha Maxkamadda Gobolka Hargeysa C/Raxmaan Jaamac Hayaan iyo laba garsoore oo ka socda dadweynaha.

Ugu horeyn markii uu Gudoomiyuhu furay dacwadaasi, waxa uu sheegay inay dhegeysiga dacwadan Maxkamadda Gobolka Hargeysa qaybteeda Tashiga oo uu Gudoominayo Gudoomiyaha Maxkamadda Gobolka iyo laba garsoore oo ka socda dadweynuhu ka garnaqi doonaan, iyada oo buu yidhi, sidaas loo yeelay inay dadweynuhu ogaadaan dambiyada noocan ah, maadaama uu kiiskani yahay mid xasaasi ah.

Ka dib, waxa uu Gudoomiyuhu u akhriyey xaashida eeda loo haysto sideed eedaysane oo maxaabiis ah, kuwaasi kala ahaa:
1. C/Raxmaan Cismaan Yuusuf
2. C/Raxmaan Maxamuud Jaamac Indhacade
3. Axmed Cali Xuseen
4. Maxamed Sh. Ismaaciil
5. Maxamed Ibraahim
6. C/laahi Axmed Maxamuud
7. Maxamed Maxamuud Nuur (Faruur)
8. Muuse Cali Yuusuf

Waxa kale oo ka mid ah eedaysanayaasha Maqane ee eedan ku jira Xasan Daahir Aways, Axmed Cabdi Godane, Ibraahim Jaamac, Aadan Xaashi Ayrow iyo nin kale oo magaciisa lagu soo gaabiyey Sahal.

Ka dibna waxa uu garsooruhu weydiiyey eedaysanayaasha inay qabaan eedaasi loo haysto ee qodobka 222 xeerka ciqaabta guud oo lala akhriyo 73-aad, iyada oo lagu eedaynayo inay ku hawlanaayeen hawlo lagu burburinayo, khalkhal gelinayo, laguna burburinayey doorashadii golaha Wakiilada Somaliland ee September 2005, iyaga oo shirar la xidhiidha sidii ay isugu duwi lahaayeen falalkaasi kor ku xusay ku yeeshay Magaalooyinka Burco, Ceerigaabo, Laas-caanood iyo Hargeysa ee Somaliland iyo weliba magaalada Muqdisho ee xarunta dalka Somalia ku yeeshay intii u dhaxaysay bishii April ilaa 22 September 2005, ka hor intii aan qaar ka mid ah lagu qaban guri ku yaala Xaafada Gacan Libaax ee magaalada Hargeysa iyaga oo hub ku urursanaya, isla markaana ay dhaawacyo soo gaadhsiiyeen qaar ka mid ah ciidanka bileyska Somaliland, iyada oo qaarkoodna lagu qabtay miinooyin, aaladaha qarxa, hub iyo rasaas, waxyaalahaasi oo ay doonayeen inay ku waxyeeleeyaan Somaliland. Hase yeeshee markii uu Gudoomiyuhu u akhriyey eedaysanayaasha Xaashidaasi eeda, ee uu weydiiyey inay qabaan dambigaasi iyo inkale waxay dhamaantood ku jawaabeen ma qabno.
Intaa ka dib, Maxamed Cali oo ka mid ah Qareenada difaacayey eedaysanayaasha ayaa bilaabay inuu naqdiyo xaashida eeda ee Xeer Ilaalintu soo gudbisay, isaga oo ku dooday in aanay sharci ahayn in qof laba jeer Maxkamadi ay dambi ku wada xukunto, iyada oo uu isla garsoorihii marka hore xukumay uu joogo, dambigii lagu xukumay marka hore iyo qodobkii Ciqaabta ahaa ee lagu soo eedeeyey uun haddana loo haysto.

Waxaanu Qareenku intaasi raaciyey oo uu sheegay in aanay taasi waafaqsanayn shuruucda u taala wadanka iyo weliba xeerarka caalamiga ah, waxaanu yidhi. “Waxa la igu xukumay xabsi daa’im, iyada oo la adeegsaday isla qodobkan 222 ee Xeerka Ciqaabta, iyada oo qodobka 13-aad farqadiisa sadexaad ee xeerkaasi u dhigayo in aan qofna lagu soo eedayn karin isla dambi qudha, halka qodobka 14-aad farqadiisa 7-aad ee xeerka Caalamiga ee xuquuqda aadamuhuna uu sidaas oo kale dhigayo, haddaba waxa aan Maxkamadda u sheegayaa in aanu jirin xeer ogolaanaya arrintaasi, xataa ka Yuhuudana dhehoo, haddii ay Maxkamaddu ogolaato arrintaasina waxa ay u muuqanaysaa sidii xukunkii Marwaan Al-Barquuti maxkamada Yuhuudu ugu xukuntay Xabsi Daa’im, haddana shan sannadood oo dambe dib loogu xukumay”.

Waxaanu Qareen Maxamed Cali intaasi raaciyey in isla maanta lagala noqdo eedaynta maxaabiista uu u doodayo, C/Raxmaan Indhacade la sugo waxa ay ku xukunto Maxkamadda Sare oo uu hadda rafcaankiisii uu ka qaatay xukuno ay hore ugu rideen Maxkamadaha Gobolka iyo Rafcaanka Hargeysi hortaalo inuu calafkiisa ka qaato.

Waxa kale oo uu qareenkani ku dooday in eedaysanayaasha kale ee uu u doodayo eeda loo haystaa aanay waafaqsanayn sharciga, isla markaana haddii ay dambi tahay in laga qaybgalo Ijtimaac ama shirar ay maalin walba ka dhacaan magaalooyinka Somaliland, lagana wada qayb galo, sidaas darteed, waxa uu yidhi. “Waxa aan Maxkamadda u soo jeedinayaa inay Xeer Ilaalintu la noqoto eedeeda oo ay haddii ay jirto eed ay haysaa ay sharciga soo waafajiso”.

Garyaqaan Ibraahim oo isna ah Qareenka eedaysanayaasha 3-aad iyo 8-aad ayaa maxkamadda ka codsaday inay is-hortaagto xaashida eeda ee Xeer Ilaalintu Maxkamadda keentay, waxaanu ku sababeeyey in aanay xaashidaasi waafaqsanayn qodobka 71-aad ee xeerka habka ciqaabta, kaasi oo sheegaya haddii dambi dad loo wada haysto in mid walba dambigiisa loo sheego. Waxa kale oo uu Qareenkani ka hadlay ereyga Argagixiso oo uu sheegay in aan macnihiisa la garanaynin, isla markaana uu yahay erey ka soo yeedhay reer galbeedka, lana garanayn dambiga iyo yahay ciduu tilmaamayo, sharciga Qarankana meelna kaga oolin. Sidaas darteedna buu yidhi aanu dhibane ahaan sheegi karin qodob sheegaya falal argagixiso. waxaanu Qareenkan Maxkamadda ka codsaday in xafiiska Xeer Ilaalinta la amro inay sharciga waafajiso eedeeda, ka dibna la soo hordhigo garsugayaasha eed sharciga waafaqsan.

Sidoo kale Qareen Maxamed Siciid ayaa isna ku dooday inuu is-hortaagayo eeda ay Xeer Ilaalintu horkeentay Maxkamada oo uu sheegay inay tahay tii afraad ee ay Xeer Ilaalintu u soo gudbiso Maxkamadda, hase yeeshee iyada lafteedu aanay waafaqsanayn sharciga, una dheertahay iyada oo ay is khilaafsanyihiin eeda iyo qodobada loo adeegsanayaa, qodobada ay Xeer Ilaalintu u cuskatay eedana aanay hadda ahayn kuwo shaqeeya, balse uu tirtiray qodobka 130-aad ee Dastuurka Qaranka Somaliland, maadaama qodobkaasi ka horimanayo shareecada Islaamka iyo xuquuqda aas-aasiga ah ee eedaysanaha. Waxaanu Qareen Maxamed hadalkiisa ku soo khatimay in aanay eedani meelna kaga jirin 565 qodob oo uu sheegay inuu ka koobany yahay xeerka Ciqaabtu, waxaanu ku tilmaamay dacwadan mid aan sharci ahayn, balse ah mid siyaasadeed, sidaa darteedna waxa uu maxkamadda ka codsaday inay xidho.

Sidoo kale, Qareen Rooble Micheal oo ka mid ahaa qareenadii difaacayey eedaysanayaashan ayaa ku dooday in aanay eedani waafaqsanayn sharciga dalka, sidaas darteedna uu Maxkamadda u soo qoray waraaq uu kaga jawaabayo eedaasi, taasi oo uu ogeysiina ka siiyey Xeer Ilaalinta, isaga oo codsaday in eeda sharciga la soo waafajiyo, balse aanu taasi wax jawaab ah ka helin, sidaas darteedna uu Maxkamadda ka codsanayo in maadaama aanay eedan Xeer Ilaalintu waafaqsanayn xeerarka dalka u yaala inay joojiso oo ay xorriyadiisii u soo celiso eedaysanaha 7-aad ee uu Qareenka u yahay, mar haddii ay Xeer Ilaalintu keeni weyday buu yidhi eed sharciga waafaqsan.

Intaa ka dib, Garyaqaan Yuusuf C/laahi oo ka socday xeer Ilaalinta ayaa isna ku dacwiyey in is-hortaaga ay soo jeediyeen Qareenada eedaysanayaashu aanay waafaqsanayn qodobka 105 ee xeerka habka ciqaabta, maadaama buu yidhi eedaysanayaasha loo akhriyey eeda loo haysto dhamaantoodna ay ka jawaabeen oo ay yidhaahdeen ma qabno, sidaa darteed buu ku dooday ma banaana wax la yidhaahdo Is-hortaag, qodobka 114-na waxa uu farayaa Maxkamadda in lana weydiiyo cadayn, balse ma jiro is-hortaag.

Sidoo kale waxa uu Xeer Ilaaliyuhu ka codsaday Maxkamadda in dooda qareenka eedaysanaha labaad ku durayo kiiska loo haysto eedaysanaha 2-aad aanay sharcinimada inay Maxkamaddu ka qaado kiiska loo haysto, aanay kiiska lagu xukumay iyo kan loo haystaa ahayn qaar isku goob iyo goor ka dhacay meel isku mid ah, balse ay midaynayso dacwada labada eedood, qodobka Ciqaabta ah ee ah “Qofkasta oo isaga oo doonaya inuu waxyeeleeyo amaanka Qaranka ku kaca fal burburin, rigaaxid iyo dil gudaha dalka ah”. Kaasi oo uu Xeer Ilaaliyuhu sheegay in aanu dhamaystirmin, balse la damacsanaa, taas oo la mid noqonaysa iyada oo la fuliyey.

Intaa ka dib, Maxkamaddu waxay dib u gashay hoolka dambe ee tashiga, waxaanay soo saartay qaraar ay ku diidayso duris uu mid ka mid ah Qareenada eedaysanayaashu ku duray Garsoore ka tirsan saddexda garsoore ee ka garnaqayey dacwadan.

Waxa kale oo ay maxkamaddu Xeer Ilaalinta Amartay inay soo waafajiso Xeerka Ciqaabta ee ku haboon eedda ay ku soo oogtay eedaysanayaasha, hase yeeshee waxay maxkamadu sheegtay in iyada oo la cuskanayo xadiiskii Nebiga ee ahaa (SCW) “Dhibanaha cadayn baa looga baahan yahay, dhib geystaha dafirana waxa looga baahan yahay dhaar” waxa ay amartay in la dhegeysto Markhaatiyada Xeer Ilaalinta, hase yeeshee, markii loo yeedhay kii ugu horeeyey, iyada oo ay markaasi saacadu ahayd ku dhawaad 12:00-nadii ayaa la waayey, sidaas ayeyna Maxkamadii shalay ku xidhantay.

Top

La Taliyaha Madaxweynaha Ee Arrimaha Bulshada
Oo Qanciyey Dad Ka Cabanayey WFP

Hargeysa, June 29 2006 (Haatuf) – Boqolaal ka tirsan Ururada Bulshada ryidka ah ee ka dhisan gobolada dlaka ee mashaariicda ka qaadan jirey hay’ada WFP oo isu-soo-bax cabasho ah ku qabtay Wasaarada Qorsheynta Qaranka ayaa shalay waxa la kulmay oo khudbad u jeediyey La-taliyaha Madaxweynaha ee arrimaha bulshada Cali Maxamed Waran-cade oo ay maalintii doraad u gudbiyeen cabasho la xidhiidha hay’ada WFP oo ay sheegeen in ay u diiday mashaariic ay u soo gudbiyeen.

Dadka isu-soo-baxa cabashada ah muujinayay oo tiradoodu ahayd 300 oo qof oo ka kala socday NGO-yada wadaniga ah ee ka jira gobolada dalka, khudbada uu u jeediyey la-taliyuhu waxa uu ku yidhi “Sarkaalkan cusub ee WFP-da u fadhiya xafiiska Hargeysa waxa uu noo sheegay inuu xafiiska ugu yimid Faylal tiradoodu gaadhayso saddex boqol iyo dheeraad, waxaanu jeclaystay inuu arrintaa kala hadlo xafiiskooda Nairobi. Hase yeeshee waxaanu ku cadaadinay inuu Faylasha hada yaala uu u eego, kuwii shuruudaha buuxiyeyna uu u dhamaystiro,wixii shuruudaha buuxin-waayana ay dadka si cad ugu sheegaan. Dabadeedna waxa uu naga codsaday sarkaalka xafiiska WFP-du in wakhti la siiyo, waxaanu noo sheegay inuu todobaad kadib keeni doono faylashii mashaariicda mutaystay iyo kuwii shuruucda buuxin-waayey.

Waxaan markaa idinka codsanayaa in aad mudadaas ay ku keenayaan samirtaan, sidaasanu ku balanay oo uu naga balan-qaaday”.

Iyada oo dadkii cabashada muujinayayna ay si weyn ugu qanceen. Intaa kadib oo aanu wax ka weydiinay dadkii cabashada ka muujinayay WFP-da sida ay u arkaan khudbadaasi uu u jeediyey la-taliyuhu, ugu horeyn Khadar Maxamed Maxamuud oo ka mid ahaa ururadii bulshada ee cabashada isugu soo baxay, isaga oo dareenkiisa cabirayaa waxa uu yidhi “Waxaan halkan marka u horeysa hambalyo uga jeedinayaa khudbadii uu halkan nooga jeediyey la-taliyaha madaxweyne ee arrimaha bulshadu Cali Warancade oo aanu uga mahad-naqayno sida xilkasnimada ah ee uu uga hawl-galay cabashadaydii, wasiirada xukuumadana waxaan u soo jeedinaynaa inay xilkooda uga soo baxaan sida la-taliyuhu xilka gaarka uu isaga saaray wax-ka-qabashada arintayadan, hay’ada WFP-dana waxaanu u soo jeedinaynaa inay go’aanada ay la qaadatay la-taliyaha madaxweynaha ay si toos uga dhabayso, hadii ay balantaas ka soo bixi-weydana ay ka iman karaan dhibaatooyin badani, anaguse waanu ku qanacsannahay hadalka Waran-cade yidhi”.

Marwo Siraad Cabdi oo ka mid ahayd iyaduna ururada cabanayay ayaa tidhi “Anagu marka u horeysa waanu ku qanacsanahay sida xilkasnimada ah ee uu iskaga xil-saaray Waran-cade cabashadii aanu u gudbinay, balantii uu noo qaadayna wuu ka soo baxay. Hase yeeshee, waxaanu aad uga cabanaynaa Hay’ada WFP iyo wasaarada qorsheynta qaranka oo dhinacba noo jihayn weyday muddo saddex sannadood ah oo aanu ka sugaynay mashaariic noogu xaraysnayd”.

Top

Wasiirka Qorsheynta Qaranka Oo Hay’ada WFP Ku
Eedeeyey Inay Musuqmaasuqday Mashaariicda Ay Bixiso

Hargeysa, June 29, 2006 (Haatuf) – Wasiirka Qorsheynta Qaranka Axmed X. Daahir Cilmi ayaa sheegay in arinta cabashada ururada wadaniga ahi ay u soo jeediyeen hay’ada WFP ee ku saabsan mashaariicda ay ka qaadan jireen ay ka dhalatay musuqmasuq ka yimid qaabka mashaariicda hay’adu u bixiso oo uu sheegay in la musuqmaasuqo. Isaga oo intaa ku daray in laga musuqmaasuqo dadka u soo qorta mashaariicda, taasina ay ahayd arrimihii ay ku eryeen sarkaalkii hore ee hay’ada WFP-da u fadhiyey xafiiska Hargeysa.

Sidaana waxa uu ku sheegay shir-jaraa’id oo uu shalay ku qabtay xafiiskiisa oo uu kaga hadlay arrimaha cabashada ah ee loo jeediyey hay’ada WFP iyo wasaaradiisa, wasiirku isaga oo arintaa ka hadlaya waxa uu yidhi “Waxaan doonayaa in aan idin siiyo xog-waran kooban oo ku saabsan cabashada WFP, arintan WFP-na waa mid mushaakilkeedu taagan yahay, waxan la bixinayaana waa raashin, dadkeena Somaliland habka ay u qaataan mashaariicduna waa hab ay kaga been-sheegaan mashaariicda ay soo qortaan 80%, hadana maadaama dadkeenu shaqo la’yihiin waxaanu isku daynaa in lagu naas-nuujiyo, balse ay wax-qabtaan, mashaakilkan maanta taagani waa arrimihii aanu ku erinay sarkaalkii hore ee hay’adaasi. Waxa kale oo mashaakil weyni ka jiraa xafiiska hay’adaasi gudihiisa oo aanu doonayno in aanu nadiifino, arrimahaas oo muddo dheer ka soo dhex-jirey hay’adaasi, markii ay qaylo-dhaan badani ka timid hay’ada WFP ayaa waxaanu bilownay January 2005 oo ay dhacday faylal dadka laga qaaday 2003-dii oo kolba siday doonaan ka yeelayeen. Sidaas darteed 2005-tii ayaa waxay nagu soo wareejiyeen 330 fayl oo dalabyo ah, waxaananu ogaanay inay in gaar ahi ka faa’iidaysan jirtay mashaariicdaasi oo inta taagta darani ay ku xuquuq-waayi jirtay, codsiyadaa naloo soo gudbiyey waxaanu ka saxeexnay 90 fayl oo kaliya, inta kalena meel ay ka yimaadeen lama garanayo. Waxaana dhacday in Cover Letter-ka WFP-da la geeyo toban goor in wax lagu qaato, arrimahaana cabashooyin badani markii ay nooga yimaadeen, waxaanu ku erinay sarkaalkii hore ee hay’adaasi joogay, tan imika taaganina waxay ahayd oo ay noo sheegeen inay iyagu system-kaas ay wax-ka-bedelayaan oo ay tababaro siinayaan, sarkaalkan imika joogaa waxa uu yimid 5-tii April, waanu ka ogolaanay inay arrimahaasi wax ka qabtaan, halkan waxaanu ku haynaa qawaaniintii iyo shuruucdii u taalay WFP iyo qawaaniinteenii. Sidaas darteed, waa in aynu shuruucdaana fulinaa oo aan laga dhigin inagu hay’adaha inaynu u shaqayno, balse loo arko inay hay’aduhu ixtiraamaan shuruucdeena oo ay fuliyaan awaamiirteena, anigu horena waan u amray in dalabyadaa la bixiyo, maantana sarkaalka hay’adaasi waxaan ku idhi anaga xafiiska Nairobi nama xukumo ee waa in aad todobaad gudihii ku bixiso raashinka dalabyada ah ee aad hayso, sidaasi ayaanu ku kala tagnay”.

Mar la weydiiyey wasiirka qaabka loo bedelo faylasha ay u gudbiyaan hay’ada WFP, waxa uu sheegay in waraaqda ay ku dhejiyaan faylasha la soo eegay inta laga jaro faylal kale lagu dhejiyo, sidaana raashimada lagu qaato.

Mar la weydiiyey wasiirka qorsheynta waxa ka jira eedaha loogu jeedinayo inay cabashadan qayb ku leeyihiin wasaaradoodu, waxa uu sheegay in aanay arrimahaas waxba ka jirin,balse markasta kudedaalayaan sidii wax looga qaban lahaa.

Top

Sheekh Xasan Daahir Aweys Oo Maraykanka Ku
Eedeeyey Inaanu Doonayn Dawlad Somaliya Ka Dhalata

Qaramada Midoobey Oo Ku Taliyey In Xidhiidh Lala Sameeyo Maxkamadaha

Muqdisho June 29, 2006 (Haatuf) – Gudoomiyaha golaha shuurada maxaakimta Islaamiga Somalia Sheekh Xasan Daahir Aweys ayaa sheegay in dowladda Mareykanku aanay dooneyn nabad iyo dowlad ka Islaaxda Somalia mar uu wareysi dhinacyo badan taabanaya siiyay Shabakada warbaahinta Shabeelle.

Sida uu ku soo waramay weriyaha Haatuf ee Baydhabo G/doomiyaha golaha shuurada maxaakiimta islamiga ah ee Soomaaliyeed sheikh Xasan Daahir Aweys ayaa u gudbiyay madaxweynaha dalka Mareykanka George W.Bush dhanbaal qoraal ah uu ugu baaqayo in uu dib u eego waxa uu ku tilmaamay siyaasadda khaldan ee dowladda Mareykanku ay ku dhaqmeyso ee ku aadan dalka Somaliya.

Shiekh Xasan Daahir Aweys ayaa ku macneeyay siyaasadda khaldan ee dowladda Mareykanka ee ku aadan Somaliya in tahay taageero iyo maaliyad uu Mareykanku uu siiyo Qab-qablayaasha iyo horjoogayaasha Maleeshiyooyinka Soomaaliyeed.

Sheekh Xasan Daahir Aweys ayaa sheegay in Mareykanku uu u kaashado qab-qablayaasha dagaalka ololaha la la dagaalanka argagixisada ee Mareykanku uu ka wado geeska arrika iyo waliba baacsashada hadhaaga Al-Qacida ee gudaha Soomaaliya.

Sheekh Xasan Daahir Aweys ayaa intaa ku daray in uuna fileyn in madaxweynaha Mareykanku uu uga soo jawaabo qoraalkan, balse waxa u sheegay in uu doonayo in Mareykanku in uu dib u milicsado khataraha ka dhalan kara hadii ay sii socoto tallaabooyinka khaldan ee Mareykanku uu u qaadayo dhinaca Soomaliya iyo waliba geeska afrika.
Dhinaca kale, Sheikh Xasan Daahir Aweys oo telphonka ugu waramayay wargeyska Al sharqa Al Awsad ayaa sheegay in Mareykanku uu u gudbiyay laba qoraal oo mid ka mid ah si gaar ah uu ugu diray madaxweyne Bush halka kan kalana uu u diray kongareyska dalkaas.
Waxa qoraaladiisan uu ku xusan sheikh Aweys in uu jecelyahay in wadahadallo ay dhex maraan isaga iyo maamulka Mareykanka, balse waxa uu sheegay in taas macnaheedu uuna aheyn in uu ka tanaasulay go’aanadiisii ku aadanaa in uu ka dhiso dalka Somaliya dowlad islaami ah.

Dhinaca kale, Qaramada Midoobey ayaa guddi ay kal hore u saartey iney kala soo taliyaan sidii Midowga Maxkamadaha Muqdisho oo hadda la ballaadhiyey iyo Qaramada Midoobey wada hadal iyo iskaashi u dhexmari lahaa talo ka soo saarey maalinimadii shalay ahayd.
Guddigaas oo uu madax ka ahaa wasiirkii hore ee dalkaasi Germany Joshca Fisher waxa uu ku taliyey in Maxkamaduhu yihiin kuwa taageero buuxda ka heysta shacabka ku nool meelaha ay ka jiraan sidaa daraadeedna ay tahay khalad xaga bani`aadminimada ah haddii la dayaco dadkii kacay ee iska qaadey dulmigii hogaamiye kooxeedyadii aan ujeedada lahayn ee heystey.

Joshka Fisher wuxuu yidhi "Waa muhiim in shacabkii kacay lagu abaal mariyo howshii ay qabteen mana aha in la ciqaabo" isagoo farta ku fiiqay in hay`adaha Qaramada Midoobey ay hawlo iyo kaalmooyin kala duwannba ka qaban jireen meelaha hadda laga saarey hogaamiye kooxeedyadii hore".

Shalay ayey ahayd markii safiirka Qaramada Midoobey u fadhiya Soomaaliya ee fadhigiisu yahay Nairobi Francois Lonseney Fall uu xidhiidh xaga telefoonka ah la soo sameeyey guddoomiyaha Guddiga sare ee Fulinta ee Midowga Maxaakiimta Islaamiga isagoo u sheegey inaan Soomaalida la dayici doonin isla markaana ku adkeeyey in maxkamaduhu ay sii wadaan wada xaajoodka ay kula jiraan xukuumada Federaalka kumeel gaadhka ah ee Baydhaba uu fadhigeedu yahay.

Afhayeenka Qaramada Midoobey oo ka hadlayey xidhiidhka Fall iyo Shariif ee khadka Telefonka ayaa sheegey in Shariifku ka aqbalay dhamaan qodabadii uu soo jeediyey Fall isagoo welibana uga mahad celiyey talooyinkaasi wuxuuna Shariifku sheegey in dhamaan darafyada ay khuseyso arimaha nabad ku soo celinta Soomaliya ay kala tashanayaan, isagoo aqbalay inuu la kulmo wefdi Qaramada Midoobey ka socda oo dhowaan iman doona Soomaaliya.

Shalay gelinkii hore ayey ahayd markii ambasadoor Fall uu Nairobi kula kulmey Ra`iisul Wasare Geedi iyo Guddoomiyaha Baarlamaanka isagoo ku adkeeyey weliba iney dhinacooda ilaaliyaan heshiiskii is afgaradka ahaa ee ka dhacay Khartuum isla markaana sii wadaan wada xaajoodkii ay ballan qaadeen, taas oo buu afhayeenku yidhi waa la isku afgarety.
Dhinaca kale, Isgoyska Bakaaraha ee magaalada Muqdisho oo ay hore u deganaayeen maleeshiyooyin taabacsanaan jiray hogaamiyihii la riday ee Max'ed Qanyare Afrax ayaa waxa gacan ku heyntiisa la wareegay ciidamo ka tirsan midowga maxkamadaha islaamiga Muqdisho.

Ciidamadan oo ay hor kaceysay maxkamada hirgelinta shareecada Dayniile ayaa la tilmaamay inay kula wareegeen qaab aan dhiig ku daadan, iyadoo wararkuna ay tilmaamayaan in maleeshiyooyinkii halkaasi jooji jiray ee gaadiidka ka qaadan jiray lacagahu ay xilligan ka maqnaayeen ayna ka war heyn, halka warar kalena ay tibaaxyaaan in maleeshiyada hore loogu war geliyay inay iskaga kacaan isgoyska Bakaaraha.
Si kastaba ha ahaatee maxkamadaha islaamiga ayaa weli sii wada sifeynta hadhaadiga isbaheysiga iyadoo habeen saddexaadkiina la wareegtay gacan ku heynta isgoys muhim ah oo ay fadhiyeen maleeshiyooyin taabacsan Col. Cabdi Xasan Cawaale Qeybdiid waxaana arrintan soo dhoweeyay dadweynaha gobolka Banaadir oo iyagu khaati ka taagnaa jidgooyooyinka lacagaha baada ah lagaga qaado ee gudaha magaalada inkastoo ay weli jiraan meelo ayna maxkamaduhu awood u laheyn inay sifeeyaan.

Dhinaca kale, Koofurta Muqdisho ayey ka taagan tahay Xiisad Colaadeed oo laga cabsi inay ka dhex qaraxdo laba beel.

Degaanadda KM4, KM5, buulo Xuubeey,Taleex ayaa laga qaxay kadib markii halkaas ay soo buux dhaafiyeen Maleeshiyadda Beesha Sacad oo qoryaha darandoorigga u dhaca qaarkood la fuulay dabaqyadda Jiidahaas.

Sida ay shegayaan warar ka naga soo gaadhaya Magaalada Gaarisa ee Gobolka waqooyi Bari Kenya Dad Somaali Ah oo isugu jira Dumar rag Dhalinyaro iyo Dad waa weyn Ayaa ku xidh xidhan Xabsiyada waaweyn ee magaalada Gaarisa dad kan Ayaa tiradooda saxdaa lahayn balse warar soo baxaya ayaa sheegaya in Dadkan Laxidh xidhay Ay tiradoodu qiyaas ahaan gaadhayso 149 qof oo Dhamaantood Ah Somaali qaxooti ku Ah.

Dadkan Laxidh xidhay Ayaa waxa ay qaarkood kayimaadeen Xeryaha qaxootiga ee Dhadhaab Xarardheer iyo Ifo dadkan Ayaa xeryahaas waxa Ay u doonteen warqado qaxootinimo oo ay u dirtay Hayada JVA- oo Ah Hayada dadka qaxootiga u qaada wadanka Maraykanka waxa kaloo jira dad kale oo iyaguna laxidh xidhay Kuwaas oo ka yimid wadanka Somaaliya Aana lahayn wax sharci Ah sidaasna Ay dawladu u xidhay.

Waxa jiray Warqado Muujinaya qaxootinimada kuwaas oo la siiyay dadka qaxootiga ah ee ku sugan wadanka Kenya balse warqadahaas Ayaan haatan shaqaynayn iyadoon dad ka mar kii lasiinayey loo sheegay in Ay yihiin Sharci ay kumari karaan dhamaan Gobolada wadanka Kenya balse warkaas dawlada Ayaa Noqday Mid runta Ka Dheer.

Dadka Somaalida ee Ku xidh xidhan Magaalada Gaarisa Ayaa eed Dusha uga tuuraya Dawlada Kenya iyagoo Ay dad ku Sheegeen In dawlada Kenya Ay dad ku usheegto in Sharcigan qaxootinmo Ay kumari karaan wadanka Kenya Balse markii Ay yimaadaan Magaalada gaarisa Laga jeex jeexo lana Weydiiyo lacag laaluusha oo aad Ufarabadan, dadka Somaalida ah ee Ku nool wadanka Kenya Ayaa dhibaatooyin aan la xisaabi karin kala kulma buundada Magaalada Gaarisa.

dhinaca kale, Col. Cabdi Xasan Cawaale Qeybdiid oo shalay kulan balaadhan la yeeshay beesha uu ka soo jeedo ee Sacad ayaa waxa uu si cad shaaca uga qaaday in Cisbitalka Banadir iyo nawaaxigiisa aaney ku sugneyn ciidamo isaga ka amar qaata, sida ay maalmahanba ay sheegayeen idaacadaha qaar ee gobolka Banadir.

Cabdi Qeybdiid oo ku sugnaa kulan ka dhacay Jaamacadii hore ee Kulyadii Siyaasadda ayaa sheegay in arinta lagu sheegay in ciidamo uu leeyahay ay ku sugan yihiin Cisbitalka Banadir lagu doonayo in lagu cambaareeyo isaga sidii Cisbitalkii Keysaney loogu cambaareeyay Maleeshiyaadka Muuse Suudi.

Waxa uuna ku tilmaamay arinkaasi mid aan sal iyo raad toona laheyn, waxaana uu sheegay in bililiqo xoogan ay ciidamadii Maxkmadaha islaamiga ka geysteen xaruntii uu ku lahaa Siinka dheer, taasoo ay kula kaceen dadkii rayidka ahaa, lana doonayo intaasi lagu marin habaabiyo arinta Cisbitalka oo la buun buuninayo.

Cabdi Xasan Cawaale Qeybdiid ayaa waxa uu sheegay in Cisbitalka Banadir uu yahay Cisbitalkii hooyada iyo dhalaanka, isla markaana aanu qeyb ka nahay amaankiisa, daryeelkiisa balse ma aha in ciidamo anagu aan leenahay ay gabaad ka dhigteen Cisbitalka gudihiisa iyo dibadiisa intaba.

Hadalka Cabdi Qeybdiid ayaa ku soo beegmay xilli shalay iyo maanta ay soo baxayeen warar sheegaya in ciidamadiisu ay gabaad ka dhigteen Cisbitalkii hore ee Banadir.
Dhinaca kale, Guddoomiyaha golaha fulinta ee maxkamadaha islaamiga Sheekh Shariif Sheekh Axmed ayaa kala hadlay nabad ku soo dabaalida dalka Soomaaliya wakiilka xoghayaha guud ee QM Francois Lonsény Fall.

Mr Fall oo khadka taleefanka ku la soo xidhiidhay Sheekh Shariif ayaa uga warbixiyay doorka QM ay ka ciyaareyso dar dar gelinta wada xaajoodka u dhaxeeya dawladda iyo maxkamadaha islaamiga.

Afhayeen u hadlay wakiilka xoghayaha guud ee QM ayaa sheegay in Sheekh Shariif uu u xaqiijiyay in uu diyaar u yahay sidii loo xoojin lahaa nabada Soomaaliya, waxuuna xusay in uu uga mahad celiyay QM doorkeeda, isaga oo muujiyay diyaar in uu yahay in uu kulan la yeesho wakiilka xoghayaha guud.

Xidhiidhkan dhex maray guddoomiyaha guddiga fulinta ee maxkamadaha islaamiga Sheekh Shariif Sheekh Axmed iyo wakiilka xoghayaha guud ee QM ayaa ku soo beegmay xilli uu wakiilka gaarka ah ee xoghayaha guud uu Nairobi kula yeeshay Mas'uuliyiinta Dowlada Federaalka ee Md.Cali Maxamed Geedi Raysalwasaaraha Soomaaliya iyo Md.Shariif Xassan Shiikh Aadan Guddoomiyaha Baarlamaanka Soomaaliya.

Top

Itoobiya Iyo Ereteriya Oo Isweydaarsaday Eedaymo
Ku Waajahan Somaliya

Addis Ababa/Asmara, June 29, 2006 (W.Wararka) – Ra'iisal wasaaraha dalka Ethiopia, Meles Zenawi ayaa ku eedeeyay dowladda Eritrea iyo Midowga Maxaakimta Islaamiga ah in ay xasilooni daro ka ridayaan gobolka Geeska Afrika, isla markaana wuxuu Ra'iisal Wasaraha Ethiopia ka digay in uu dalkiisu iska difaacayo khatar walba oo ka dhan ah.

Zenawi oo u waramayey wakaalada wararka ee Reuters ayaa sheegay in Maxkamadaha Islaamiga ee Muqdisho ay hogaanka u qabteen xubno u badan ururkii Al Itixaad Al Islaamiya.[...Ururka Al-Itixaad waa urur Argagaxiso oo caalamka laga yaqaan, horeyna weeraro uga fuliyey gudaha dalka Itoobiya...] ayuu yidhi Meles Zenawi oo sheegay in ay si gaar ah ulla socdaan dhaq dhaqaaqyada Maxkamadaha Islaamiga ee Muqdisho. Zenawi oo hadalkiisa sii wata ayaa yidhi [...Magacaabidii Xassan Daahir Aways ee Maxkamadaha ayaa muujineysa in ay yihiin urur ay hogaanka u hayaan dhaq dhaqaaqa Al Itixaad oo hore qaraxyo bambaano uga fuliyey magaalada Addis Ababa...].

Meles Zenawi ayaa beeniyey in ciidamada Itoobiya ay gudaha usoo galeen dalka Soomaaliya, isagoo markaasi sheegay in ciidamadooda ay ku jiraan heegan laguna xoojiyey xadka labada dal u dhaxeeya.

Meles Zenawi, wuxuu ka sheegay shir jaraa'id oo uu ku qabtay magaalada Addis Ababa in Itoobiya in ayna qabin cabsi degdeg ah oo dhinaca ammaanka ah oo kaga timaadda dalka Eritrea iyo maxaakimta Islaamiga ah ee Soomaaliya, hase yeeshee, ay xukuumadiisu diyaar u tahay in ay ka hortagto tallaabo kasta oo cadowtinimo ah oo ay ku dhaqaaqdo xukuumadda Asmara ama kooxaha xagjirka ee magaalada Muqdisho ku sugan.

"Waxaan xaq u leenahay in aanu iska difaacno isku day kasta ee xasilooni daro ku keeni kara ammaankeena iyo xasiloonideena" ayuu yidhi Meles Zenawi kadib markii saraakiisha Itoobiya ay sheegeen in ciidamada amnigu ay dileen 111 mucaaradka Itoobiya ah oo ka soo gudbay bishan."

Meles Zenawi, wuxuu beeniyay in khatar wayn ay ka soo socoto mucaaradka, wuxuuse ku eedeeyeeyay Eritrea in ay ku howlan tahay sidii ay xasilooni daro uga abuuri lahayd Itoobiya, iyadoo taageeraysa mucaaradkeeda iyo kooxaha islaamiyiinta deriska ee ku sugan dalka Soomaaliya ee lagu eedaynayo ayuu yidhi in ay gabaad siiyaan argagixisada Al-Qaacidda.
"Eritrea, dadaalka ay damacsan tahay in ay xasilooni daro kaga abuurto gobolka, oo kaliya ma aha in ay shixnado hub gudbiso, balse waxay kaloo taageertaa falal kale" ayuu yidhi Meles, isagoo ka hadlayay eedo sheegayay in xukuumadda Asmara ee Eritrea ay ku xadgudubtay cunaqabataynta hubka ee saaran Soomaaliya, iyadoo hubaysan maleeshiyada Islaamiyiinta ah ee Soomaaliya.

Wuxuu weriyayaasha u sheegay in Maxaakimta Islaamku ay yihiin dad naf la caarid ah, oo koox rajo laawayaal ah, siyaasadda rajiimka Eritrea ayaa ku dhisan in ay ka faa'iidaystaan fursadahan oo kale si ay xasilooni darro gobolka uga dhaliyaan.

Koox khubaro ah oo ka socotay Qaramada Midoobay, ayaa bishii hore ku eedaysay Eritrea in ay hub siinayso kooxaha Islaamiyiinta Soomaaliya si meel ka dhacdyo dheeraad ah ay ugu gaysato Itoobiya, oo inta badan dadku ay aaminsan yihiin mad-hada Orthodox ee diinta masiixiga, taasoo walwal wayn ka qabta asalraacnimada Islaamka ee xuduudaheeda.
Eritrea way beenisay eedahay ay kooxdaasi Qaramada Midoobay ka socotay u soo jeediyeen.

Meles Zenawi, wuxuu sheegay in Itoobiya ay xoojisay ciidamadeeda military-ga ee jooga xadka dalka Soomaaliya, iyadoo horayna ula dagaalamay kooxo maleeshiyooyin Islaamiyiinta oo ku sugan dalka deriska ah ee Soomaaliya.

"waan xoojinaya difaaceena dhamaan xadka si aan uga hortagno halista ammaankeena ee laga yaabo in ay ka timaaddo dib u soo ifbixidda kooxaha Jihaad-ka ee Muqdisho, daqiiqad kastana ilaalo ayaan ka haynaa" ayuu yidhi Meles.

Kooxaha Islaamiyiinta ee haatan gacanta ku haya Muqdisho, ayaa ku eedeeyay Ethiopia in ay ciidamadeeda xadka ka soo gudbeen, balse Meles si joogto ah ayuu eedahaasi u beeniyay, balse wuxuu yidhi tallaabo noocaasi waa suurtagal hadii kooxaha Islaamiyiintu ay xadka ka soo tallaabaan oo halis na galiyaan.

"wakhtigan la joogo ma jirto khatar cad oo noo muuqata, wayse noqon karaan hadii ay xadka ka soo tallaabaan, way garanayaan xadkaasi, anaguna waan og nahay ilaa hadda ma soo tallaabin, marka looma baahna in aan hadda tallaabo qaadno." ayuu yidhi.
Meles, wuxuu intaasi ku daray in ay indhaha ku hayaan waxa ka socda Soomaaliya si foojigan, oo dulqaad leh, waxaan rajaynaynaa in ayna dhicin in loo baahdo in aan tallaabo qaadno.

Balse,Wasiirka Warfaafinta ee Eritrea, Ali Cabdu, ayaa beeniyay in dowladiisu ay taageerto mucaaradka Itoobiya.

Wuxuu yidhi, waxaanu ognahay in mucaaradka Itoobiya ay ku sugan yihiin gudaha Itoobiya, balse eedaynta Itoobiya ay tahay mid ay ku been abuurayso oo ay damacsan tahay in ay diirada kaga leexiso dhibka gudaha dalkeeda ka jira iyo galitaanka ay gashay dalka Soomaaliya.

Wuxuu intaasi ku daray in Eritrea mar walba cadaynayso siyaasadeeda dibedda in ay ku salaysan tahay xushmaynta deriska, iyo in ayna faragalin, isagoo beeninayay in mucaaradka Itoobiya laga soo taageero Eritrea oo ay ku sugan yihiin.

War qoraal ah oo la siiyay weriyayaasha, ayaa sarkaal sare oo ka tirsan wasaaradda arrimaha dibedda ee Eritrea, wuxuu sheegay in TPLF, oo jabhadda xoraynta dadka Tigray, oo ah xisbiga ugu awoodda badan isbahaysiga haya talada dalka Ethiopia, ay ciidamadoodu gudaha u galeen Soomaaliya.

Wuxuu sheegay in ayna waxba ka jirin beenaynta TPLF ay beeninayaan in ay galeen gudaha Soomaaliya, isla markaana awoodaha waawayn ee adduunku ay taageerayaan.
Sarkaalkan sare oo ka tirsan wasaarada arrimaha dibadda ee Eritrea ayaa tilmaamay in maamulka Mareykanku uu mar hore xeryo milatari ka sameystay dalka Jabuuti, iyo Galbeedka Ethiopia isagoo ku gabanaya qorshiisa la dagaalanka argagixisada iyo iskudaygiisa ah in uu xaqiiqsado in ay ciidamo u joogaan Gobolka Geeska Afrika ee aan argagixisada laheyn.

Sarkaalku waxa kale oo uu sheegay in uu Mareykanku isku dayayo in uu xaqiiqsado in ay milatarigiisa ku joogaan dalalka Sudan, Somalia iyo Eritrea magaca ah in ay xaqiijinayaan nabadda, isla markaana ay maareeyaan qaska.

Sarkaalku waxa uu intaa ku daray u jeedada uu Mareykanku ka leeyahay faragalintan milatari iyo in uu qorto calooshood u shaqeystayaal ayaa ah in uu abuuro gobolka geeska Afrika gobolo kala go'go'an oo ayna dowladi ka jirin, si loo meel mariyo xaalad gumumeysi cusub ah oo gobolka si buuxda loo hoosgeeyo.

Sarkaalku waxa uu sheegay marka laga gudbo in xukuumada TPLF ee xoogeeda siyaasadeed uu gabaabsiga yahay, in uu Mareykanku doorbiday in ay kala shaqeyso xukuumadaasi meelmarinta Qorshaheeda weyn ee gobolka Geeska Afrika.
Sarkaalkan sare ee wasaarada Arrimaha dibadda ee Eritrea waxa kale oo uu intaa raaciyay in dadaal guracan hadda la wado oo lagu abuurayo in la isku diro midowga maxaakiimta Islaamiga ah ee Soomaaliya, iyadoo la isku dayayo in la huriyo dagaal sokeeye oo lagu curyaaminayo ififaalaha hurumarka leh ee dib loogu yagleelayo dibudhisada Soomaaliya mideysan.

Sarkaalku waxa kale oo uu xusay in xukuumada TPLF oo uu ka wada jabhada Tigreega ee Ethiopia in ay ogolaasho ka heshay qorsheyaasha sare si ay door uga qaadato sidii u burburin laheyd fursada Soomaliya iyo iyadoo xukuumada TPLF ee Ethiopia la siinayo taageero siyaasadeed oo xoog leh iyo badhitaar dhaqaale.

Sarkaalku waxa uu intaasi kudaray in xataa wakhtiga la joogo ay ka soo baxayaan bayaano qeyrumas'uuliyadnimo ay ku jirto maamulka oo u muuqda in uu aaminsan yahay in uu ogyahay waxa Somaliya, halka dhab ahaantii ayna xataa waxba ka aqoon halka ay Somaliya ku taalo. Taasi waxay tilmaameysaa oo kaliya in qaabka ay dowladda Mareykanku ku socoto oo ay u la dhaqmeyso arrimaha Soomaaliya in ay xaaladda uun sii murgineyso oo ay sii xumeyneyso.

Sarkaalku waxa uu sheegay in marka ay arkeen Maraykanku xaqiiqada ah in qorshahoodu uuna u shaqeyneyn sida ay ku talo galeen oo ah in isku dayaan in ay ka kiciyaan xasiiloonidaro iyo qas dalka Soomaliya, ay hadda iskudayayaan qaab ay ku gabadaan oo ay u jeedooyinkooda ku gaadhaan oo ah, iyagoo iska dhigaya in ay ka shaqeynayaan wanaaga Soomaaliya.

Sarkaalkan Eritrea waxa uu hadalkiisa ku soo gabagabeeyay, in uu ugu baaqayo dowladaha kale duwan iyo ururada ka jira gobolka in ay ka foojinaadaan kana baaqsadaan in si ogaan la'aan ah ay qeyb uga noqdaan iskudayga Mareykanka ee wajiyada kala duwan leh ee dabinka loogu dhigo shacabka Soomaaliyeed, isla markaana loo curyaamiyo fursadaha ay leeyihiin.

Top

TOTAL Oo Dhuumihii Gudaha Haamaha Shidaalka
Berbera Ku Bedeshay Kuwo Duug Ah Oo Ruushku
Ka Saaray 36 Sannadood Ka Hor

Dhuumaha Duugga ah ee Haamaha Dhex Yaalay Oo Total Lacag Ku Sheegan Doonto Iyo Shuraakada ay Xukuumaddu Kula Tahay

Hargeysa, June 29, 2006 (Haatuf) – Shirkadda TOTAL ee gacanta ku haysa Haamaha Shidaalka Berbera, ayaa bishii March ee sannadkan 2006 bedeshay dhuumihii Haamaha Shidaalka dhexdooda oo qiyaastii 200 mitir ah, kuwaas oo ahaa dhuumihii shidaalka qaybinayay ee xarunta shidaalku ku soo dhaco ilaa Haamaha gudaha, iyo kuwii iskaga gudbi jiray haamaha dhexdooda, waxaanay shirkadda TOTAL sida la sheegay ku bedeshay kuwo duug ah oo Xarunta Keydka Haamaha shidaalka Berbera dhexdooda yaalay tan iyo waqtigii Ruushku dhisay Haamaha Berbera ee sannadkii 1970kii oo imika muddo 36 sannadood ah laga joogo.

Sida warar xog-ogaal ahi ay sheegeen dhuumahan duugga ah ee lagu bedelay kuwii hore ayaa la sheegay inay ahaayeen kuwo wasakh iyo daxal badani buuxiyeen, waxaana la sheegay in muddo laba bilood gaadhaysa sifayntooda ku qaadatay shaqaalihii ka shaqaynayay, iyadoo hawshaas ay fulinayeen 6 qof oo shaqaale ah oo ay shirkadda TOTAL ka keentay dalka Djibouti, kuwaas oo dalka yimi bishii December 2005 kana kooban hal injineer iyo shan farsamo-yaqaan, waxaanay ilaa hadda afar ka mid ahi ku sugan yihiin Xarunta TOTAL ee Berbera, halka laba ka mid ahi dib ugu laabteen Djibouti bishii hore ee May 2006 markii ay shaqadaas sifaynta iyo bedelaada dhuumahaas dhamaystireen. Wararku waxay intaas ku dareen in afarta hawl-wadeen ee Berbera ku sugani ay sugayaan hawlo kale oo aan ilaa hadda waxay tahay la ogeyn oo ay ka qabanayaan halkaas.

Lama garanayo sababta dhuumo duug ah oo hore looga bedelay Haamaha Keydka Shidaalka Berbera in dib loogu celiyo keentay, ilaa haddana tafsiir kamay bixin shirkadda TOTAL iyo Xukuumadda Somaliland toona, hase yeeshee Injineero aqoon u leh Haamaha Keydka Shidaalka ayaa Haatuf u sheegay inay arrintani tahay mid yaab ku noqotay dadka oo dhan, iyagoo sheegay inaanay jirin sabab macquul ka dhigi karta in dhuumo duug ah oo marka horeba farsamo ahaan looga bedelay in waqtigan oo muddo dheeri ka soo wareegtay lagu bedelo kuwii hadda ku jiray oo ahaa kuwo xaaladood 100% ka wanaagsan tahay, kana tayo fiican. Iyagoo dhinaca kalena walaac ka muujiyay tirada lacag maalingelin ah ee ay shirkadda TOTAL ku sheegan doonto hawshan.

Sida la ogsoon yahay sannadkii hore ayay sidan oo kale shirkadda TOTAL burburisay shantii dhuumood ee shidaalka lagaga soo nuugi jiray Markabka ku soo xidha dekedda Shidaalka Berbera, kuna bedeshay hal dhuun ah oo keliya, taas oo qaylo badan ka soo yeedhay bulshada Somaliland dhexdeeda, iyadoo waqtigaas ay soo baxeen warar sheegay in dhuumahaas oo aan waxba qabin ay shirkaddu burburisay iyadoon cidna kala tashan, isla markaana loo tuhmay in dhuumahaas qaybihii laga gooyay loo iib geeyay dibadda, gaar ahaan dalka aynu jaarka nahay ee Djibouti. Waxaanay hawshan cusub ee dhuumihii gudaha lagu bedelay, ay dadka qaar ku xidhiidhinayaan taas hore, iyagoo laga shaki qabo in halkii kuwii hore loo qaaday kuwana la geeyay, iyadoo ay arrintaas markhaati uga dhigayaan hawl-wadeena Djibouti laga keenay maadaama aan dalka gudihiisa laga waayin hawl-wadeeno aqoon u leh hawshan, balse ay arrintani tahay mid ujeedo ay ka leedahay shirkaddu ku fulinayso.

Sidoo kale shirkadda Total ayaa sheegtay inay lacag dhan $5,250,000 (shan milyan, laba boqol iyo konton kun oo dollar) ku samaysay dhuunta keliya ee ay ku bedeshay shantii dhuumood, taas oo ay shirkaddu fulisay iyadoo aanay xukuumadda Somaliland wax heshiis ah u saxeexin, haddii aanay bilahan u dambeeyay uga saxeexan xukuumadda [back date]. Sidoo kale lama ogga in dhuumahan dambe ee la bedelay inay ku jiraan lacagtaas hore ee dayactirka dhuunta hore lagu sheegay.

Dhinaca kale, warar xog-ogaal oo aanu ka helnay ilo ku dhow-dhow shirkadda TOTAL ayaa sheegay inay shirkaddu 2500 (laba kun iyo shan boqol) oo kaalmaha shidaalka lagu iibiyo ah ka dhisayso Somaliland, kuwaas oo la sheegay inay shirkaddu u dhiibi doonto dadka ay danaynayso ee ka faa’iidaysan karta, isla markaana ay shirkadu yeelan doonto kaalmahaa shidaalka lagu iibinayo iyo booyadaha shidaalka qaybinayaba. Waxa kale oo ay wararkaasi intaas ku dareen in qofka ku shaqaysanaya kaalmaha ay Total dhisayso laga doonayo damaanad (deposit) lacageed oo lagu sheegay $50,000 (konton kun oo dollar).

Hawlgalkan ayaa la sheegay inay shirkadda TOTAL bilaabi doonto dhowaan sida ku qoran foomamka ay shirkaddu samaysay ee maalgelinta cidii kaalmahooda danaynaysa. Arrintaas oo la sheegay inay shirkadda TOTAL uga dan leedahay inay meesha kaga saarto kaalmaha shicibku leeyahay ee shidaalka lagu tafaariiqeeyo, isla markaana ay qiimaha ay doonto shirkaddu ku tafaariiqayso oo ay ugaga iibiso bulshada reer Somaliland, si kooto (monopoly) ahna ugu qabsato jilmada iyo tafaariiqaynta shidaalka mustaqbalka dhow.

Top

Madaxweyne Rayaale Oo 48-ka Saacadood Ee Soo
Socda U Boqoolaya Dalka Gambia

Wasiiradda Maaliyadda iyo Warfaafinta oo ku sugan Gambia ayaa u gogol xaadhaya ka qaybgalka Somaliland ee shirka Madaxweyneyaasha Afrika

Hargeysa, June 29, 2006 (Haatuf) – Madaxweynaha Somaliland Daahir Rayaale Kaahin ayaa la filayaa inuu 48-ka saacadood ee soo socda u ambabaxo dalka Gambia, magaalada Banjul, halkaasi oo uu ka furmi doono shir madaxeedkii todobaad ee madaxweynayaasha Midawga Afrika 1-2July, 2006.

Shirweynahan waxa lagaga hadli doonaa arrimaha siyaasada iyo dhaqaalaha ee Qaaradda Afrika, iyada oo si gaar ahna loogu eegi doono urur goboleedyada dhaqaalaha ee Qaarada.
Madaxweyne Rayaale waxa la sheegay inay safarkiisan ku wehelin doonaan Wasiiradda Arrimaha Debada Edna Aadan Ismaaciil, iyo Wasiiradda Warfaafinta iyo Maaliyada, C/laahi Maxamed Ducaale iyo Xuseen Cali Ducaale (Cawil) oo hadda iyagu ku sugan magaalada Banjul ee xarunta dalka Gambia, halkaasi oo ay ugu sii gogol xaadhi doonaan sidii uu Madaxweynuhu uga qayb geli lahaa shir madaxeedka Midawga AFrika ee halkaasi ka dhacaya bisha July horaanteeda.

Waxa kale oo ay wararku sheegeen in safarka Madaxweynaha ee Gambia uu daba socdo, socdaalkii uu Madaxweynuhu bishan gudaheeda ku soo kala bixiyey wadamo ka mid Qaarada Afrika, kaasi oo uu taageero ugu raadinayey qadiyada Somaliland sidii loogu aqoonsan lahaa dal Madax banaan.

Shir Madaxeedka Madaxweynayaasha Midawga Afrika, waxa ka horeeyey oo shalay ka furmay magaalada Banjul ee xarunta dalka Gambia shirkii wasiiradda arrimaha Debada ee Midawga Afrika, kaasi oo ajandayaasha lagaga hadlayo uu meel sare kaga jiro amuurta Somalia iyo geedi socodka dimuqraadiyadda Somaliland.

Inkasta oo safarka Madaxweynaha aan qumaati loo shaacin, haddana waxa ilo ku dhaw dhaw Madaxtooyadu sheegeen inuu Rayaale uu xilli hore damacsanaa hindisahaasi ka qaybgalka shirka Gambia.

Top

Dildilaacii Ubaxa iyo Kacaankii Dhergiga

Qaybtii 2aad

Ganat: Dadkii aad aadka iskugu dhaweydeen cid kaga jirtay ama ka qayb qaadatay Afgambigaasi miyay jirtay?
Mengistu: Kuwo iyagu shaki uun lagu soo xidhxidhay oo lagu soo eedeyay in gacanta lagu soo dhigay iyagoo falka ku jiray oo waliba si cad markhaatigii loogu furay ama kuwii kale ee aan xabsiga gudihiisa ku soo booqday waxaan ahayn dadkii kale ee iyagana lagu eedeeyay in ay qayb ka qaateen Afgambigaasi wax caddaymo ah oo aanu ka helnay ma ay jirin.

Ganat: Waan gartay; balse haddii ay run tahay in aanad wax caddaymo ah u hayn; tusaale ahaan waxaan ku soo qaadanayaa, waxa lagu xantaa Jeneraal Tesfaaye Gebre kidaan inuu lug ku lahaa. Sidoo kale waxa warbaahinta caalamka laga sheegay in dhinaca waqooyigana in Jeneraal Gebremedhin Medhin iyo Kaasaaye Jamaada ay taageereen. Guud ahaan sideebaad u aragtaa adigu dadkii ka qayb qaatay ama lugta ku lahaa Afgambigaasi?
Mengistu: Jeneraalada oo dhammi kama ay wada qayb qaadan qorshihii afgambigaasi. Balse waxoogaa yar oo meelo aad u muhiim ah ku fadhiyay waa ay ka qayb qaateen. Qaban qaabiyihii Afgambigaasi waxa kow ka ahaa oo hormoodna u ahaa Jeneraal Mer’id Nigusee. Isaga qudhiisu waxa uu ahaa nin caan ah oo lagu yaqaano xumaanta iyo khiyaamada. Run ahaantii aad bay militarinimadiisu u fiicnayd. Isku soo ururinta iyo dhisidda ciidamada aad buu ugu xeel-dheera. Balse qof aad u shar badan ayuu ahaa. Waxa uu ka soo qallin-jabiyay kooraskii 3 aad ee ilaalada gaarka ah [Bodyguard]. Waxay naaneystiisu ahayd oo loo yiqiinay “Sun faafiye”. Isagaana ugu wacnaa waxaas oo dad ah in ay dambigaasi galaan siduu maalinba aayar aayar si kaftan ah kolba sidii uu ugu sheekeynaayay. Waxaanu markii ugu horeysay ka soo bilaabay Jeneral Abara Abebe.
Jeneraal Abera iyo Jeneraal Mer’id waxay soo ahaayeen niman in badan meel ka soo wada shaqayn jiray oo aad u saaxiibba, waxaanay wax ka soo wada dhigi jireen kuliyadii la odhan Jiray GANAT ee Militariga. Mar’id markaa aad buu u yaqaanay dabeecadaha iyo meelaha uu ka jilicsan yahay jeneraal Abera. Waxaa jirtay marar kala duduwan oo uu khaladaad yaryar sameeyay jeneraal Abera Abebe. Wuxuu calool xumo ka qaaday canaantii aan u soo jeedin jiray. Mar’idna waxa uu u badheedhay sidii uu uga faa’iidaysan lahaa cadhadaasi gashay. Balse sida laga waramayay waxa la ii sheegay intii hore Abera inuu dhag u dhigi waayay.
Labadooda Mar’id iyo Abera, aniga waxanu iskaga dhawayn Abera. Sarkaal aad u fiican ayuu ahaa oo geesiya oo aqoontiisu iyo khibradiisuba ay aad u fogtahay. Balse waxa kale oo uu lahaa Digtaaternimo. Hadalkana kama uu sugi jirin. Nidaamka iyo kala danbeynta ayaan xoojinayaa inta uu yidhaahdo ayaa buu ku leyn jiray askarta. Waxaanu go’aan kaligii ah ka gaadhi jiray arimo ka balaadhan oo ka awood weyn. Dhinaca dagaaladana haddii aynu ka eegno markii kaliya ee uu ka dagaalamay Misuwah waxaan ahayn marna kuma uu guleysan. Saraakishii jirtay ee kale in uu ka xilal yaraa uma qabo. Balse iyadoo taasi ay jirto haddana furimihii dagaalka ee uu isagu horkacaayay dhowr jeer oo isku xiga markii uu ku guuldareysatay mar iyo laba jeerba malaha inta aanu qoraal ku dhaleeceynay. Wixii intaasi ka dambaysay halkii ay ahayd inuu qaato khaladkiisa oo uu sixid sameeyo ayuu cuqdad ka qaaday. Saraakiil badan ayaa iiga soo warami jiray waxa uu odhan jiray “muddadi dheerayd ee aan dhulkii saxaraha ahaa joogay ee aan ku soo haglamaayay iyadoo aan maalin kaliya la iga mahad celin, haddana wixii khalad yar ee dhaca si xun la iigu dhaleeceeyaa”. Balse anigu uma aan qabin colaadu intaasi inta ay ka fido in ay xumaanta intaas le’eg dhalin karto.
La soco….

Top

Khilaaf Weyn Oo Soo Dhexgalay Xamid Karsay
Iyo Maraykanka

Kabul, June 29, 2006 (W.Wararka) – Wasiirka Arrimaha Dibada ee Maraykanka Mrs.Condaleezza Rice ayaa safar deg deg ah ku tagtay Afghaanistaan iyadoo ay jirto xiisad soo dhexgashay Dowlada Karasay iyo Maraykanka.

Condaleezza Rice ayaa lagu wadaa in ay Madaxweynaha Afghaanistaan Xamid Karasaay ay kala hadasho khilaaf soo dhexgalay Dowlada Afghanistan iyo Maraykanka oo salka ku haya dagaalada ka socda Koonfurta dalkaasi.

Xamid Karasaay Madaxweynaha Afghaanistaan ayaa si weyn ugu dhaleeceeyey dowlada iyo ciidamada Maraykanka dhimashada iyo khasaaraha ka dhashay dagaalada ka socda Koonfurta Afghaanistaan.

Xamid Karasaay oo isagu asal ahaan kasoo jeeda Koonfurta Afghaanistaan iyo beesha Bashtuunka ayaa dhaleeceyntan soo saaray kadib markii ay dowlada Maraykanka ku gacan seeydhay qorshe uu watay Mr.Karasaay.

Qorshaha Xamid Karasaay ayaa ahaa in la hubeeyo dadka shacabka ah ee ku dhaqan koonfurta Afghaanistaan si ay markaasi isaga dhiciyaan maleeshiyooyinka Dalibaanka.
Dowlada Maraykanka ayaa qorshahan ku tilmaamtay mid aan suurta gal ahayn isla markaana ay ka muuqato in Madaxweynaha Afghaanistaan uu si gaar ah ugu xaglinayo hubeynta beesha uu kasoo jeedo.

Maraykanka ayaa qorshaha Hamid Karsaay ku tilmaamay mid ayna ka muuqan xilkasnimo Madaxweyne.

Arrintan ayuu si weyn uga cadhooday Madaxweynaha Afghaanistaan oo markii ugu horeysay si kulul u dhaleeceeyey qaabka ay ciidamada Maraykanka uga dagaalamayaan koonfurta Afghaanistaan.

Koonfurta Afghaanistaan ayaa waxaa bilihii lasoo dhaafay kasoo cusboonaaday dagaalo horleh oo dhexmaray Maleeshiyooyinka Dalibanka iyo kuwa Maraykanka uu hogaamiyo.
In ka badan 50 askarta Maraykanka iyo kuwa kale ee Shisheeye ayaa lagu dilay dagaalada sanadkan ka socda koonfurta Afghaanistaan.

Madaxweyne Hamid Karsaay ayaa war uu shalay soo saaray ku sheegay in aan loo dul qaadan doonin khasaaraha ay ciidamada Maraykanka u geysanayaan dadka shacabka ah, wuxuuna dhaliilay qaabka ay hawlgaladooda u wadaan.

Mrs. Condaleezza Rice ayaa isku dayi doonta inta ay safarka ku joogto magaalada Kabul in ay dowlada Hamid Karsaay ka dhaadhiciso in dib loo hagaajiyo xidhiidhka labada dhinac.

Warsaxaafadeed ay shalay soo saartay Condaleezza Rice ayaa lagula taliyey Dowlada Pakistaan in ay kala shaqeyso Afghaanistaan dhinaca la dagaalanka waxa loogu yeedhay Argagaxisada (Dalibanka).

Top

Ciidamada Israa’iil Oo Burburiyey Warshadii
Korontada Ee GAZA

Gaza, June 29, 2006 (W.Wararka) – Ciidamada Yuhuuda ayaa bilaabay in ay gudaha usoo galaan Marinka Gaza iyagoo markaasi burbur xoogleh u geystay xarumaha Korontada iyo Buundooyinka.

Taangiyada Ciidamada Yuhuuda ayaa la arkayey iyagoo gudaha usoo galaya Marinka Gaza oo ay hore Yuhuuda uga baxday sanadkii hore.

Ciidamada Yuhuuda ayaa dib ugu soo noqday Marinka Gaza, iyagoo baadi goob ugu jira mid kamid ah Askartooda oo ay habeen hore afduubeen maleeshiyooyinka Reer Falastiin.
Ciidamada Yuhuuda ayaa hore u sheegay in hadii aan lasoo deyn Askariga la qafaashay in ay xoog kusoo geli doonaan Marinka Gaza.

Diyaaradaha dagaalka ee Ciidamada Yuhuuda ayaa duqeeyey xalay Warshadii kaliya ee Korontada dhalin jirtay ee ku taalay Marinka Gaza, taasi oo keentay in korontadii la waayo.
Diyaaradaha dagaalka ayaa sidoo kale burburiyey dhowr Buundo oo ku yaal Marinka Gaza.
Ciidamada Yuhuuda ayaa hada fadhiisin ka dhigtay Airporka Caalamiga ah ee Marinka Gaza oo aan isagu ka fogeyn Xuduuda Marinka Gaza iyo dhulka Yuhuudu heysato.

Maamulka Yuhuuda ayaa sheegay in ay ciidamadooda ku amreen in ay gudaha u galaan Marinka Gaza kadib markii uu maamulka Falastiin ku guuldareystay inuu soo daayo askariga ay afduubeen dagaalyahanada u dhashay reer falastiin.

Burburka ay u geysteen ciidamada Yuhuuda xarumaha korontada iyo Buundooyinka ayaa si weyn loo dhaleeceeyey iyadoo ay dowlado ay ku jirto Maraykanka kula taliyeen Yuhuuda in ay xakameeyaan ficilada noocaan ah.

Ciidamada Yuhuuda ayaa sheegay in maleeshiyooyinka Reer Falastiin ay qorsheenayaan in askariga la afduubay ay si qarsoodi ah uga saaraan Marinka Gaza, isla markaana arrintaasi ay ka hortagayaan.

Maleeshiyooyinka reer Falastiin ayaa habeen hore ku guuleystay in ay afduubaan mid kamid ah Askarta Yuhuuda, isla markaana ay dilaan 3 kamid ah ciidamada Yuhuuda.

Dagaalyahanada reer Falastiin ee Marinka Gaza ayaa la sheegay in ay kusoo dhuunteen godad dhulka hoostiisa laga qoday kadibna si kadis ah weerar ugu qaaday goobo isbaadho ama kontarool u taalay ciidamada Yuhuuda.

Maleeshiyooyinka ayaa codsaday in lasoo daayo dhamaan Haweenka iyo Caruurta da'adooda ka yartahay 18 sano jir ee ku xidhan xabsiyada Yuhuuda, codsigaasi oo uu diiday maamulka Yuhuudu.

Top

ODHAAHDA AKHRISTAHA: Hambalyadda Xorriyadda
Jamhuuriyadda Djibouti Ee 27 June

Waxan hambalyo iyo bogaadin u dirayaa ummadda reer Djibouti, munaasabadda maalinta xorriyadda ay qaateen ee 27June awgeed. Waxan u rajeynayaa reer Djibouti in bash-bash iyo barwaaqo ku waaraan.

Kolka hore waa Eebbe mahadii kolka xigana waxa amaan mudan aabayaashii reer Djibouti ee gartay, ee ka digtoonaaday in ay hoddo beentii Somaliweyn, ee lagu khiyaameeyey walaalahood Somaliland. Hassan Gueled Aptidon iyo raggii kale ee la shaqeeyey waxay ku guuleysteen in ay ku fara adeygaan xorriyaddaa qaaliga ku joogta reer Djibouti oo aanay ku dhicin tii ku dhacday walaalahooda Somaliland 26 June 1960.

Shacabka Somaliland iyo ka Djibouti waa laba shacab oo walaalo ah oo sina loo kala qoqobi karrin, sidaa awgeed wanaaga ama dhibaatada la soo darista midkood toos ayey ka kale u saameyneysaa. Shacabka Somaliland waxa lawada ogsoonyahay qeybtii ay ka soo qaateen gobonimo u dirirkii Jamhuuriyadda Djibouti, waana mid waajib ku aheyd, waayo dheeftii xoriyadaas waxa la ogyahay in aanay ka qaddin. Waa isla doonasho Ilaah, xataa isku dhowaanshaha labada maalmood ee xorriyadda Somaliland (26 June) iyo ta Djibouti (27 June), waxa ay ka marrag kaceysaa sida labada shacab aan loo kala dhex gali karrin. Waxa kale oo cadeyneysa isku xidhnaashaha labada shacab, abwaankii weynaa, Alla ha u naxariistee, Timacadde ee habeenkii calan saarka Hargeysa ka curiyey tixda caanka ah ee "Kaana siib kanna saar", wuxu halganka gobonimo u dirirka ka bilaabay magaalada Djibouti. Waxana hubaal ah haddii uu nolol ku soo gaadho 27 June 1977 in uu tix kale oo taariikhda gasha u tirrin lahaa calanka wadankiisa labaad ee Djibouti.

Inkasta oo ay jireen khilaafaad soo kala dhexgalay labada ummadood ee Djibouti iyo Somaliland, haddana abaal weyn ayey Somaliland u hayaan reer Djibouti waxterkii ay u fidiyeen waqtiyadii kala duwanaa ee dhibaatada, gardarrada iyo gumaadka kaga imanayey talisyadii dulmiga badnaa ee koonfurta Somalia. Waa run, in dad badan oo reer Somaliland ahi ay saluugsan yihiin waxtarkii reer Djibouti ee waqtiyadaasi oo ay ka filayeen in uu intaa ka bato. Laakiin diinteena xaniifka ah ayaa ina fareysa in ay koleyba wacan tahay in loo mahad celiyo cidii wax ku tarta intay doonto waxtarkaasi ha leekaadee.

Haddaba waqtigan xaadirka ah Somaliland waxay ka rajeynayaan walaalahooda reer Djibouti waxtarkii laba walaalo ahi ay isku lahaayeen. Waxanu ka dooneynaa reer Djibouti caawimo siyaasadeed, tu dhaqaale, tu dib udhiska wadanka ah. Wadankaa oo aanay ciddi uga warameyn sida loo curyaamiyey ee dabadeedna diyaaradihii cashuurtii ay bixinayeen lagu soo iibsaday loo adeegsaday in ay burburiyaan. Mida kale reer Jabuutow kolka aad wax tareysaan Somaliland waa wax aad tartay dadkaagii, sidoo kale Somaliland haddii ay wax tartay reer Djibouti waa wax ay istareen. Sababtoo ah labadan shacab oo ay adagtahay sida loo kala soocaa. Waxa labada shacab ka dhaxeeya aftirsiimo iyo jaarnimo. Waxa ka dhexeeya xidhiidh dhaqaale iyo mid baayacmushtari oo soo jreen ah.

Sidaa awgeed waxa ay reer Somaliland filayeen in Djibouti noqoto ta iyadu walaalahooda ku dhiiri galisa qadiyadooda, ee isgarab taagta, ee yur ka odhan laheyd habar dugaaga. Waayo walaalnimada ka sokow, waxa u dheer iyagoo xog-ogaal u ah in israacii 1960 kii aanu sharci aheyn, sidaa daraadeed la soo noqoshada xorriyadda Somaliland aanay wax xeer ah oo ay jabineysaa aanay jirrin.

Tiiyoo ay ceynkaas arrimuhu yihiin, waxa dad badani la yaaban yahay waxa xukuumadda Djibouti ku kalifay in ay u ololeyso in Somaliland ku noqoto godkii madoobaa ee ay dirqiga uga soo baxday. Waxanu isweydiinaa waa maxay maslaxadda ugu jirta xukuumadda Djibouti in Somaliland ku biirto fawdada iyo qaska ka taagan Koonfurtii Somalia? Haddii ay magaalada Lowyacado ee xuduudka Djibouti iyo Somaliland ku taalaa ay soo gaadho sharci la`aanta iyo jahawareerka ka taagan koonfur Somalia miyaanay taasi wax u dhimi karrin nabadda iyo deganaanshaha Djibouti? Bal u fiirsada mashaqada loo taag waayey, ee hadh iyo habeen ka taagan goballada Kenya ee ay deriska yihiin Somalia. Dhibaatadaa Kenya haysata waxa Djibouti ka baajiyey in ay ka dhacdo Jamhuuriyadda Somaliland. Kolkaa halkii aad Somaliland uga mahad cellin laheydeen ee aad taageeri laheydeen maaha in aad si kale ka yeeshaan. Djibouti waxa danteedu ku jirtaa wanaagaa, deganaanshaha iyo nabadgalyada Somaliland in ay gargaarto. Djibouti waxa haboon inay ka garaabto oo ay gacan ka geysato dimoqraadiyadda iyo waxa ay Somaliland hirgalisay ee ay caalamkii ka foggaa qireen. Waxa kale oo aan kula talinayaa xukuumadda mudane Ismaaciil Cumar Geelle in uu saddex arrimood midkood yeelo marka ay la soo gudboonaato in uu ka taliyo arrimaha wadankii Somalia la isku odhan jirey:

1. Xaq-soor wanaagsan noqo oo dhinacna ha u eexan ee cid walba xaqooda sii. Somaliland duulaan kuma aha xaq cid kale, keedana kama ogola in cid kale hungureyso.

2. Haddii ay kula noqoto in aad cid garabka saarto, kii Somaliland gargaara noqo. Sababtoo ah shacabka reer Djibouti ee aad madaxweynaha u tahay iyo ka Somaliland way iska xigeen dadka intiisa kale. Kolkaa haddii aad gargaarto Somaliland waxaad si dadban ugu gargaartay ummadii adiga ku igmatay oo waa waajib ku saaran.

3. Labadaa qodob ee horeba haddii ay kugu adkaadaan in aad yeesho, gebi ahaan arrin Somaliyeedba iskaga gaabso oo waxad tidhaahdaa aniga "habartii la iguma haleeyo". Mudane kol walba ha kaa reebanaato Somaliland inaad cadowgooda u soo raacdo.
Gunaanadkii hadalkeyga, waxan mar labaad walaalaheyga reer Djibouti ugu hambalyeynayaa maalinta qiimaha leh ee xorriydda 27 June. Waxan ka rajeynayaa iyaguna in aanay walaalahooda Somaliland kala bakheyllin hambalyeynta maalmahooda mudan ee 18 May iyo 26 June. Illaahay ha ina garansiiyo in inagu cid walba iskaga xaq leenahay, oo in aynu isu baarikno oo aynu istixgalinaa ay waajib inagu tahay.

Eebbow labada shacab ee Jamhuuryadda Djibouti iyo Jamhuuriyadda Somaliland is afgarad wanaagsan ka dhex abuur.

Eebbow labadii shacab ee kheyr iyo wanaag ku bahooba naga yeel.
AAMIIN!!AAMIIN!!AAMIIN!!!
Waxa qorey: Cali Aw Xuseen

Top

Talo Soo Jeedin Ku Socota Madaxweyne
Daahir Rayaale Kaahin

Marka hore waxaan hambalyo gaara u dirayaa madaxweynaheena DAAHIR RAYAALE KAAHIN, anigoo ku hambalyeynaya dadaalka uu hadh iyo habeenba ugu jiro shicibkiisan itaalka daran, siiba waxaan aad iyo aad ugu sii hambalyeynayaa socdaalkiisii ugu dambeeyey ee uu ugu baxay dalal ka tirsan qaaradan AFRIKA, madaxweynaha oo socdaalkan si maskax iyo siyaasad qoto dheeriba ku dhisantahay ugu beegay wakhtigani uu isbedelka wayni dhacay. Waxaana la odhan karaa socdaalkan iyo dadaalkan uu madaxweynuhu libin laabay wakhtigan waxay dhalin kartaa waxaynu muddada badan raadinaynay ee ahaa ictiraaf caalamiya oo aynu ka helno dunida, taasina waxa kuu caddaynaysa rajada dhaw iyo yididiilada uu madaxweynuhu sida sarbeebta ah ugu sheegay shicibkiisa. waxaanan ilaahay ka baryayaa inuu innoo rumeeyo yididiilada iyo saxansaxadan ictiraafkee inna haysa. Aamiiiiiiiiiiiiiiiiin Aamiiiiiiiiiiiiiiiiiiiiiiiiiiiin Aamiiiiiiiiiiiiiiiiiiiiiiiiiiiiiiiin.

Marka xigta waxaan doonayaa inaan madaxweynaha si toos ah ugu gudbiyo farriin talo soo jeedin ah, farriintaas oo aan filayo inay gaadhi doonto INSHA ALLAH. anigoo farriintan ku soo koobaya dhawr qodob:

1. Maadaama ay maanta xaaladdii GEESKA AFRIKA is bedeshay, iskuna bedeshay xaalad la odhan karo reer Somaliland waxay u noqon kartaa fursad dahabi ah oo loo baahanyahay in sida ugu dhakhsaha badan uga faa'iidaysanno, innagoo ka eegayna dhan walba waxa habboon inaynu kaga bilowno dalkan aynu jaarka nahay (anigoo ka hadlaya daba joogana war maanta BBCda ka baxay oo ku saabsanaa war saxaafadeed uu MALAZANAWI uu qabtay), waayo dalka ETHIOPIA marnaba ma ogola mana ogolaanayso dawlad awood leh oo waliba wadaado ah oo ka dhalata dalkii laysku odhan jiray JAMHUURIYADDII SOMALIYA, waayo waxay ogtahay haddii SOMALIYADII hore oo kale ay soo noqoto in ayna jirayn, waxayna maanta warwar wayn ka qabtaa wadaadadaa qabsaday koonfurta Somalia siiba halbawlihii oo ah caasimaddii Muqdisho. Sidoo kale dalal badan oo ka tirsan AFRIKA, YURUB iyo MARAYKAN-kuba ma ogola mana doonayaan inay arkaan dalkii Somalia laysku odhan jiray oo dib u soo rogaal celiyey oo waliba wadaado ama qaar ku dhawdhawi ka taliyaan. Haddaba haddii ay sidaa tahay maxaa innala habboon innaga, illayn waatan oo gaaladii JAMHUURIYADDII SOMALIA oo dal kaliyaata ah madoonayaan oo warwar ayey ka qabaane. Waxaan odhan karaa inay innala habboontahay inaynu afka gacanta galino oo caalamka baaq u dirno oo aynu nidhaahno sida ugu dhakhsaha badan hanaloo soo gaadho haddii kale wadaada ayaa nala kacaya. ee halla ogaado. Waxaana baaqan aynu ku koobaynaa uun sidan ama si kasii habboonba:

- Ugu horreyn Ethiopia waxaynu ka codsanaynaa inay dedaalka ay innagula jirto sii libin laabto illayn iyada lafteedu danteeday wadataaye oo ay siyaasaddeedan ku aadan Somalida shaaca ka qaado, toosna innoo aqoonsato, illayn Erateriyaba waxay si cad u taageertay maxaakimta Muqdishee, haddii kalena ay Ethiopia ogaato inay ERATARIYA iyo WADAADADAA Muqdisho qabsaday ay u hirgali doonaan ujeedooyinkooda ku qotoma in Somalia mid ku soo noqoto dabadeedna Itoobiya weerar lagu qaado.

- In madaxweynuhu uu caalamka baaq kulul oo cadho iyo cambaaraynba ku jirto u diro, issagoo ku cambaaraynaya iska indho tirka ay muddada badan wadeen, ugu dambayntana uu madaxweynuhu kaga codsado caalamka in sida ugu degdega badan u soo gaadhaan una ictiraafaan jamhuuriyadda Somaliland, issagoo u sheegaya caalamka in ay wadaadadii durtaba doonayaan in ay dhaqdhaqaaqyo la mida kuwa ay ka sameeyeen koonfurta ay ka bilaabaan Somaliland, iyagoo doonaya inay Somalia oo sal-ballaadhan oo qabsata GEESKA AFRIKA gacanta ku dhigaan, taasina ay aad iyo aad ugu rajo waynyihiin inay u suuroobayso haddii ay Somaliland sii ahaato sida ay maanta tahay oo aan la aqoonsan.

- In madaxweynuhu uu aad ugu adkeeyo caalamka una sheego in haddii aan Somaliland lala soo gaadhin ictiraaf degdegga, in ay sugaan uun dawlad salballaadha oo Somaliland cagta marisa qabsatana ETHIOPIA, KENYA iyo dalal badan oo ka tirsan Bariga Afrika dabadeetana isku ballaadhisa iskuna xidha illaa iyo dawladaha carabta.

Waxaan madaxweynaha leeyahay, madaxweyne waa talo aan is idhi malaha haddii laysla meel dhigo oo laysla yara gorfeeyo, wax waa laga qaadan karaa. Haddaba madaxweyne dedaal kuuma dhinnee waxaan kaa codsanayaa uun haddii ay taladani suuro gal tahay in aad caalamka sida ugu dhakhsaha badan ugu gudbisid farriintan.
Qore: C/salaam Cismaan Cuma r(jeex), Hargeysa, Somaliland.

Top