“Maxkamadaha Muqdisho Ha Ogaadeen Inaanu CulimoIyo
Shicibba Ka Midaysannahay Jiritaankayaga Somaliland”
Badhasaabka Togdheer – Shir-Jaraa’id
“Cidii Talada Dalka Hunguri Ka Hayo
Waa Inay Habka Axsaabta Siyaasiga Ah Ee Aynu Qaadanay Ku Soo Tartantaa”
Wasiirka Beeraha Oo Ka Hadlayay Munaasibad Lagu Xusayay Maalinta Cuntada
Aduunka Oo Hargeysa Lagu Qabtay
FARXADII GUUL-DARADA
Warbaahinta Somaliland Oo Gor-Gortan
Ka Gashay
Qorshe La Doonay Inay Gobol Ka Mid Ah Somalia Kaga Qayb-Galaan
Aqoon-Isweydaarsi Shalay Ka
Furmay Hargeysa
MA QALLOOCSHE
“Waxa Naga Go’an Inaanu Ka Qayb-Galno
Dedaalka Lagu Yareynayo Saboolnimada”
BAAQ – Ururada Dhallinyarada ee YMD iyo ORSOD
Wafdigii Somaliland Ee Socdaalka Ku
Joogay Addis Ababa Oo Kulamo Kala Duwan La Yeeshay Gudoomiyaha AU-da Iyo
Wasiirka Arrimaha Dibadda Itoobiya
Shaqaale Masaari Ah Oo Lagu Qaybtay
Markab Kalluumaysi Oo Xabsiga Boorama Loo Gudbiyay
ODHAAHDA AKHRISTAHA: “Waxaan Iska
Casiley
Shaqadii Aan Ka Hayey Shabakadda Somaliland.Org”
|
|
“Maxkamadaha Muqdisho Ha
Ogaadeen Inaanu Culimo
Iyo Shicibba Ka Midaysannahay Jiritaankayaga Somaliland”
Badhasaabka Togdheer – Shir-Jaraa’id |
Burco, October 17, 2006 (Haatuf) –
Gudoomiyaha gobolka Togdheer, Cabdi Xuseen Dheere ayaa shalay xafiiskiisa
shir-jaraa’id oo uu ku qabtay waxa uu kaga hadlay kormeero uu ku soo maray
degmooyinka gobolka Togdheer, kuwaas oo uu sheegay inay ahaayeen kuwo uu
ugu kuur-galayay xaaladda nabadgelyada guud iyo xaaladda nololeedba.
Sida uu ku soo waramay weriyaha Haatuf ee gobolka Togdheer, Axmed Aadan
Yuusuf, Badhasaabku wuxuu shirkiisaa jaraa’id ku sheegay inay roobabkii
gu’gu si wanaagsan uga da’een dhammaan degmooyinka gobolka, isla markaana
nabadgelyadu ay fiican tahay, wuxuuna intaa ku daray in sababta uu u
kormeeray degmooyinka gobolku uu ka kooban yahay ay ahayd si xog-ogaal uu
ugu noqdo xaaladahaas, isagoo sheegay inuu dadka degaamadaas kala hadllay
arrimo dhowr ah oo ay ugu horeyso buu yidhi: “cajalada been-abuurka ah ee
jidh-dilka la sheegay in lagu sameeyay ninka maxbuuska ah [Maxamed Sh.
Ismaaciil],” isagoo intaas ku daray Badhasaabku oo yidhi “Waxaan u sheegay
in wax allaala wax ka jiraa aanay jirin ee la doonayay uun in
qarannimadeena uun wax lagu yeelo.”
Badhasaabku isagoo ka hadlaya hadalada dhawaanahan ka soo yeedhaya kooxaha
Maxkamadaha Muqdisho, waxa uu sheegay inay yidhaahdaan had iyo goor cid
baa noo joogta gobolada Somaliland, “balse waxaan leeyahay ha ogaadeen in
iyagana cidi noogu dhex jirto, dadkayagana aanu annagu is ognahay culimo
iyo shicibba, aananu ka midaysannahay nabadgelyada iyo jiritaankayagaba,”
ayuu yidhi Cabdi Xuseen Dheere.
Waxa kale oo uu gudoomiyuhu dhaliilay hay’adaha miinooyinka ee ka shaqeeya
degaamada gobolka Togdheer, waxaanu sheegay in miinooyinku ay halis ku
hayaan dadka degaankaas oo aanay hay’aduhu sidii looga baahnaa wax uga
qaban, dadka degaanadaasina ay aad uga cowdeen dhibaatada ay miinadu ku
hayso.
Waxa kale oo uu Badhasaabku sheegay in dadkii dhammaan degaamadaas uu soo
maray ay u cadeeyeen inay heegan u yihiin qaranimada iyo jiritaanka dalka
Somaliland, cid kasta oo ku soo xad-gudubtana ay il gaar ah ku eegayaan.
Waxa kale oo uu gudoomiyuhu ka dayriyay xaaladda dadkii ay hore abaaruhu u
aafeeyeen, kuwaas oo uu sheegay inay magaalooyinka waaweyn ku soo
qulquleen cidina aanay waxba u qaban ee ay u baahan yihiin taakulo.
Gudoomiyaha gobolka Togdheer, Cabdi Xuseen Dheere wuxuu hadalkiisa ku soo
geba-gabeeyay in dadka ku dhaqan gobolka Togdheer ay dhammaantood
nabadgelyada iyo qaranimada Somaliland meel uga soo wada jeestaan. Top
“Cidii Talada
Dalka Hunguri Ka Hayo Waa Inay Habka
Axsaabta Siyaasiga Ah Ee Aynu Qaadanay Ku Soo Tartantaa”
Wasiirka Beeraha Oo Ka Hadlayay Munaasibad Lagu Xusayay Maalinta
Cuntada Aduunka Oo Hargeysa Lagu Qabtay |
Hargeysa, October 17, 2006 (Haatuf) – Sanad
Guurada 26-aad ee ka soo wareegtay maalinta Cuntada Aduunka oo u astaysan
16-ka October ayaa shalay lagu xusay xaflado lagu kala qabtay Tuulada
Abaarso iyo Hotel Italian Restaurant ee magaalada Hargeysa.
Wasiirka Beeraha Somaliland Aadan Axmed Dhooleyare iyo saraakiil ka kala
socotay hay’adaha FAO, WFP iyo Masuuliyiin ka tirsan wasaarada Beeraha
ayaa shalay subax booqasho ku tegay Beer Roobaad laga beeray Khudrad kala
nooc ah oo ku taala Tuulada Abaarso ee galbeedka Hargeysa, beertaas oo uu
iska leeyahay muwaadinka magaciisa la yidhaahdo Abiib Axmed Faarax, taas
oo ay aad ula yaabeen masuuliyiintii booqatay dedaalka dheeraadka ah ee uu
muwaadinkaasi ka sameeyey beertiisa, meeshas oo aan lahayn biyo joogto ah.
Goobtaas oo ay ku sugnaayeen beerlayda nawaaxigaasi wxa ugu horeyn halkaa
hadal ka jeediyey Abiib Axmed Faarax oo ahaa nin ka beerta leh, isaga oo
ka waramay sida uu ku bilaabay hawshan iyo sida aanu dawlad iyo hay’ad
midna aanu uga helin taageero iyo baahiyaha uu u baahan yahay ee ah sidii
uu biyo ugu heli lahaa, suntan cayayaanka lagula dagaalamo iyo qalab uu ku
shaqeeyo, isaga oo masuuliyiinta u sheegay inuu taageero u baahan yahay si
wax soo saarka ay ku yaalaan geedo muhiim ahi, sida saytuun, liin, iwm.
Waxa isaguna halkaa ka hadlay wasiirka wasaarada beeraha Aadan Dhoolayare,
isaga oo halkaa ku guubaabiyey beeralayda sidii ay dedaal u muujin
lahaayeen iyo sidii ay ugu dayan lahaayeen Abiib Axmed Faarax oo tusaale u
ah beeralayda, una sheegay in wixii karankayo ah aanu wax idinkala qaban
doono. Waxa halkaa goob joog ka ahaa masuuliyiin ka kala socotay
hay’adahaasi oo halkaas ka dhegaysta cabashooyinkii ay halkaa ku soo
jeediyeen beeralaydu.
Sidoo kale, xaflad lagu xusayay 26 guurada ka soo wareegtay maalinta
cuntada aduunka ee 16 October ayaa xalay lagu qabtay Hotel Italian
Restourent ee magaalada Hargeysa, xafladan oo ay ka soo qayb-galeen
masuuliyiin ka tirsan golaha wasiirada, maamulka dawlada hoose ee
caasimada, mudanayaal ka tirsan golayaasha, saraakiil ka kala socotay
hay’adaha FAO, WFP, madaxdhaqmeedyo iyo marti sharaf kale, ayaa waxa ugu
halkaas khudbad ka soo jeediyey wasiirka wasaarada Beeraha Aadan Axmed
Dhooleyare, waxaanu ka waramay ahmiyada balaadhan ee ay leedahay xuska
munaasibada maalinta cuntada aduunka ee 16-ka October, isaga oo dhinaca
kalena khudbadiisa ku soo qaaday xaaladaha siyaasadeed ee ka soo kordhay
mandaqada, waxaana ka mid ahaa hadaladii wasiirka “Xafladan aynu ku
xusayno 26 guurada ka soo wareegtay maalinta cuntada aduunka ee 16-ka
October, 2006 waxa loogu magac daray maalgashiga beeruhu waa sugida amniga,
nolosheena, waxaa u saldhig ah cuntada la’aanteedna nololi ma suurtoobayso,
inagu waxaynu ku noolayn cuntadeena wadaniga ah, hadaynaan wax soo saarka
cuntada wadaniga ah kordhin dhibaato ayaa inagu imanaysa, sidaas darteed
waa inaynu wax soo saarka beeraha maalkeena iyo muruqeenaba u jihaynaa,
waxa kaloon ummadda u soo jeedinayaa inay ka digtoonaato dabinada cadawgu
u soo maleegayo iyo tabaha uu soo adeegsanayo cadawgaas oo aynu isku af
iyo diinba nahay waa in laga baraarugsanaadaa, dawladeenu maaha mid qori
caaradii ku qabsatay xukunka ee waa mid cod lagu doortay, sidaas darteedna
codkii lagu doortay mid la mid ah xukunka kaga tegi karta, cidii talada
dalka hunguri ka hayaa ama culimo ha noqdo ama mid kale, waa inay habka
axsaabta siyaasiga ah ee aynu qaadanay ku soo tartantaa, waxaana loo
baahan yahay inaynu qaranimadeena iyo madax banaanideena iyo
nabadgelyadeena ilaashano oo aynu meel uga soo wada jeedsano, shicib iyo
xukuumadba”.
Dhinaca kale, waxaa isaguna halkaas ka hadlay wasiirka horumarinta reer
miyiga Fu’aad Aadan Cade, waxaanu ka waramay ahmiyada balaadhan ee ay
noolaha cuntadu u leedahay, isaga oo dhinaca kalena halkaasi ka sheegay
xaalufka lagu hayo dhirta qoyan oo uu sheegay in si axmaqnimo ah loo
jarayo, waxaanu tilmaamay sida loogu baahan yahay in dhirta la kobciyo
isla markaana laga feejignaado wixii waxyeelo ku ah.
Gebogabadii xafladaa ayuu wasiirka beeruhu halkaasi ku gudoonsiiyey koob
iyo abaal marin laba kooxood oo ciyaar lagu xusayay munaasibadan iskaga
horyuimid garoonka kubada cagta ee Guryo-samo. Waxa kaloo halkaasi
maaweelo iyo majaajilo ku soo bandhigay kooxda fanaaniinta dareen oo ku
soo bandhigay rawaayad magaceeda la yidhaahdo Degaan.
Top
Waa buug cusub oo laga qorey kooxaha
Maxaakiimta Xamar, fursadaha iyo jaanisyadii ay ka faa’iidaysteen xilligii
ay koonfurta Somaliya qabsanayeen.
Waxa qaray buugga Sh. C/risaaq Yuusuf Aadan oo ah qoraa u dhashay Somaliya,
isla markaana warbaahin TV iyo Joornaal ah ku lahaan jirey Muqdisho.
Qaybtii 2-aad
· Fursada 1-aad (Magacii ay ku dagaalamayeen Labada Kooxood)…..
Sidaas awgeed, qof kasta oo laga maqlo magacan ah la dagaalanka
argagixisada waxa fudud in looga faa’iidaysto dad badanna la fahamsiiyo in
kuwan sheeganaya la dagaalanka argagixisada u adeegayaan gaalada. Wuxuuna
runtii noqday magacani mid ka mid ah ciladdihii guuldarada u keenay is-bahaysiga
laga itaalka roonaaday. Dhanka kale,
maxkamaduhu waxay ku dagaallamayeen magaca midowga maxaakiimta islaamiga
ah, waxay isticmaalayaan erayga jihaad, waxay sheeganayaan in dagaalku
yahay kacdoon dadweyne oo lagu difaacayo diinta, dadka iyo dalka.
Kacdoonkaas oo ay hoogaminayaan culumaa’udiinka Somaliyeed. Sheegashadan
caammada loo qurxiyey waxay ahayd mid xaqiiqada ka fog, hase yeeshee u
sahashay maxaakiimta inay dad badan ku soo jiitaan, kagana taageero bataan
isbahaysigii ay la dagaalamayeen. Waxa
xaqiiqa ah haddii lagala doodi lahaa sheegashadan inay la kulmi lahaayeen
guul darro deg-deg ah, waayo ciidankii dagaalamayey ma ahayn maxkamad iyo
kacdoon shacab toona, qabiiloyin ka mid ah qabiilooyinka Somalida ayaa
dagaalamayay, mana jirin wax culimo ah oo ku jirey dagaalka iska daa inay
hogaaminayaane, difaac diinna haba sheegin, bilcaksi wuxuu ahaa khatartii
ugu ba’nayd ee soo food saartay diinta islaamka iyo ehelkeedas, sida noogu
cadaan doonta qoraalka.
Waxay ahay din aanay sheegan magacyadaas xeelada ah ee ay la baxaan magaca
runta ah ee ay lahaayeen, magacaas oo ah midowga wahaabiyada, waxa xaqiiqa
ah in markaas aanay heleen shacab ku taageera dagaalka ay galeen, waxaana
hubaal ah in aanay haweesteen wax dagaal ah.
Sida la ogsoon yahay maxkamadaha lagu dagaal galay magacooda ma lahayn hub
iyo ciidan wax lagu qabsan karo, balse waxa dagaalka waday qabiilooyin la
dhagray, shirkadaha wahaabiyada, ganacsatada dagaalka, danley la siiyey
balanqaadyo kala duwan, calooshood u shaqaystayaal iyo ciidankii al-itixaad
wahaabiyada ee taagta darnaa. · Fursada 2-aad
(Ciidankii U Dagaalamayay Labada Kooxood):
Ciidanka isbahayigu waxya ku dagaalamayeen magaca la dagaalanka
argagixisada, annagoo soo xusnay guuldarada magacani huwan yahay, taa oo
macnaheedu yahay in aanay ku dagaalamayn hadaf diineed, siyaasadeed,
beeleed iyo mid la mid ah. Inta badan ciidankan wuxuu ahaa maleeshiyo
beeleedkii ciidanka u ahaa hogaamiyayaasha. Ciidankani xiisa badan uma
qabin inay u dagaalamaan hogaamiyayaasha, waayo muddo 15 sanno ah ayay ku
soo dhex jireen dagaaladan natiijo la’aanta ku dhamaaday, waliba magaca ay
ku dagaalamayeen waxay ka jeclaayeen inay ku dagaalamaan magaca qabiilka.
Intaas waxa dheeraa ma jirin balanqaad loo sameeyey oo dhiiri-geliya, taas
waxaa uga sii darraa in badan oo ka mid ah malayshiyadan waxa sameeyey
dacaayadii wahaabiyada maxaakiimta, waxay dareensanaayeen inay la
dagaallamayaan diinta islaamka oo ay gaalnimo u dagaalamayaan. Ma jirin
ciidan kale oo u imanayay ama ay malaysanayeen. Intaas waxa dheeraa
maadaama ciidanka qab-qable kastaa yihiin hal jufa waxa dagaalka ku
dhimanayay ama ku dhaawacmayay wiilal aad isugu dhow xagga haybta, taas
awgeed waxa xanuunka geerida laga dareemayay hal qoys. Taas waxa ka sii
daraa waxya masleeshiyadu arkayeen isbahaysigooda oo aan isu soo gurmanayn
marka uu midkood dagaalku qabsado. Dhamaan arimahani waxay safka hore kaga
jireen raadka guul-daradii u soo hoyatay isbahaysigii la magac baxay la
dagaalanka argagixisada. Dhanka kale,
ciidanka midowgu waxay ku dagaalamayeen magaca farsamada badan ee midowga
maxaakiimta islaamiga ah. Ciidanka u dagaalamayay iyo hubkiisuba waxay
ahaayeen hubkii iyo mallayshiyadii beelaha, waxay la mid ahaayeen ciidanka
isbahaysiga ay la dagaalamayeen hadii laga reebo hub aan badnayn oo ay
lahaayeen wahaabiyada al-itixaadku.
La soco……… Top
Warbaahinta
Somaliland Oo Gor-Gortan Ka Gashay
Qorshe La Doonay Inay Gobol Ka Mid Ah Somalia
Kaga Qayb-Galaan Aqoon-Isweydaarsi Shalay Ka
Furmay Hargeysa |
Hargeysa, October 17, 2006 (Haatuf) –
Suxufiyiin ka tirsan Warbaahinta maxaliga ah ee Somaliland, ayaa maalintii
shalay gorgortan ka galay Aqoon-isweydaarsi ku saabsan doorka ay
warbaahintu ka qaadan karto cidhib-tirka cudurka Dabaysha oo ay hay’adaha
UNICEF iyo WHO shalay uga fureen hotelka Ambassador ee magaalada Hargeysa
in ka badan 40 suxufi oo ka socda warbaahinta Afka Soomaaliga ku hadasha
ee Geeska Afrika, waxaanay suxufiyiintaasi ka warheleen in Somaliland loo
qorsheeyay inay kaga qayb-qaataan gobolka ka mid ah Somalia, isla markaana
saamiga laga siiyay warbaahinta Somaliland inay uga qayb-galaan
aqoon-isweydaarsigan ka yar tahay saamiga laga siiyay qaybaha kale ee
Somalia.
Sida ku cad shaxda loogu qaybiyay saamiga suxufiyiinta ka qayb-gelaysan
aqoon-isweydaarsigan, waxay Somaliland u qoondeeyeen inay kaga qayb-gasho
gobol ka mid ah dalkii la isku odhan jiray Somalia [Waqooyi-galbeed], isla
markaana saamiga suxufiyiinta laga casuumay warbaahinta Somaliland uu
yahay 9 xubnood, halka saamiga Somalia-da kale la siiyay uu yahay 29
suxufi oo kala qaybsan; Waqooyi-bari [Puntland] 9 xubnood, Koonfur [Baydhabo
iyo Kismaayo] 6 xubnood iyo Gobolada Dhexe 14 xubnood.
Waxa kale, oo aqoon-isweydaarsigan lagu casuumay weriyeyaasha laanta
Af-soomaaliga ee BBC-da uga soo warama magaalooyinka Hargeysa, Garoowe,
Muqdisho, Baydhabo iyo Madaxa laantaas Yuusuf Garaad oo la-taliye ugu
magacaaban mashruuca ka qayb-qaadashada warbaahinta ee la-dagaalanka
cudurka dabaysha.
Hase yeeshee, qorshahaas waxa ka biyo-diiday, kuna gorgortamay
suxufiyiinta warbaahinta Somaliland ee lagu casuumay aqoon-isweydaarsigan,
kuwaas oo shuruud kaga dhigay in ay kaga qayb-galayaan keliya magaca
Somaliland oo aanay kaga qayb-gali doonin gobol ka mid ah Somalia [waqooyi-galbeed]
iyo inay helaan saami la mid ah ka ay heleen Somalia-da Koonfureed oo ah
29 xubnood, isla markaana lagu soo wada casuumo warbaahinta kale ee
Somaliland ee ka maqan.
Go’aankaas ay suxufiyiinta Somaliland gaadheen ayaa sababay in hay’adaha
soo qaban-qaabiyay aqoon-isweydaarsigan [UNICEF/WHO] ay wax ka bedelaan ku
talo-galkoodii, waxaanay ogolaadaan inay ka soo qayb-galaan qaybihii kale
ee warbaahinta ee aan markii lagu casuumin aqoon-isweydaarsigan.
Aqoon-isweydaarsigan shalay ka furmay magaalada Hargeysa bilowgii horeba
waxa ka dhashay ismaan-dhaaf, kadib markii sida la sheegay uu Wasiirka
Warfaafinta Somaliland, Axmed X. Daahir qoraal uu ku diidayo
aqoon-isweydaarsigan inay ka soo qayb-galaan suxufiyiinta Somalia u qoray
hay’adaha socdaalka Somaliland, taas oo keentay in suxufiyiintii ka timi
Somalia dib looga celiyo madaarka Hargeysa, iyadoo aanay sidan wax
ogolaansho dal-ku-gal ah, hase yeeshee mar kale ayaa dib loo soo celiyay,
taas oo lagu macneeyay in hay’adahaas iyo xukuumaddu isku af-garteen in
loo ogolaado inay dalka soo galaan kana qayb-qaataan aqoon-isweydaarsigan.
Furitaankii aqoon-isweydaarsigan shalay waxa ka qayb-galay wasiir
ku-xigeenka Caafimaadka Mahdi Cismaan Buuri, madaxda hay’adaha UNICEF iyo
WHO ee xafiisyadooda Hargeysa iyo saraakiil kale oo ka socday wasaaradda
Caafimaadka iyo labadaas hay’adood.
Wasiir ku xigeenka Caafimaadka oo munaasabadaas ka hadlay ayaa sheegay in
uu soo dhawaynayo ka qayb galayaasha hadday ka yimaadeen dalka Dibadiisa
iyo gudihiisaba, waxaanu ka waramay khatarta uu leeyahay cudurka dabayshu
iyo sida loogu baahan yahay in warbaahintu ay uga qaataan door waafi ah la
dagaalanka cudurkaas, iyaga oo dadka gaadhsiinaya halista uu u leeyahay,
isla markaana ku dhiiri geliyaan in ay waalidku ubadkooda ka tallaalaan
dabaysha oo ah mid aan dawo lahayn, balse laga hortagi karo.
Top
A. A. Garas
Halkani waa Maqalloocshe oo aydin ka dhegaysataan mawjadaha kaftan maalka
iyo ilaaq dhuubka, akhyaartayada indhaha buuranow ku soo dhawow warkii oo
kambadhuudha, waakan wariye Like Niyuus.
Isaga oo fadhiya:
Shirgudoonka Golihii la odhan jirey Mudane dalmooge ayaa soo dhoweeyey
kaarkadii madaxyuubka ee uu ku baaqayay in laysugu yimaado talo-qaran oo
gole xin ka saarid ah. sida wararku sheegayaan shirgudoomiyahan oo ah kii
ugu dambeeyey saddexdii maqaaxidda lagu soo rakibay, wuxuu guddi gole u
naqeeyey koox uu madax u yahay mudanihii xaashi ee miisaaniyadii muruqu ku
galay guddida kale ka qabtay, iyadoo baaqan iyo ogolaanshihiisuba ahaa wax
loo baahnaa si loo bogsiiyo mshaqadii iyo shilkii gole gole ku dhufadka
ahaa. Waxaase aan la hubin inay ku qanci doonaan labadii shirgudoon ee
kale, kuwaas oo la sheegayo in hawlo gacan maris ka mid yahay ay dalka
dibadiisa ugu maqan yihiin, hadiise kii joogayba go’aamiyey haba iska
maqnaadeen hadii waxay keenaanba baaqan madaxyuubku uu dhowaan soo saaray
waxaa ku ladhnaa mid kale oo uu xisbiyada mucaaradka ah ka baryay inay
talo qaran isugu yimaadaan xaalad awgeed, baaqaas kale laftiisa ayaa la
soo sheegay in reer UCID ay ogolaadeen, laakiin kuwii Kulmiye la odhan
jirey ay diidnay iyo yeelnay midna odhan kari waayeen. Markaan isu geeyey
soo dhoweynta UCID iyo ogolaanshahan shirgudoonkan oo ahaa nin reer UCID
ahaa waxaaban is-idhi malaha la kala reeb labadii isla waashay.
Hadaan maleeyo waxyaalahan guddidani bogsiin doonto waxaa ka mid ah finkii
ka dhex baxay golaha wakiilada iyo guurtida iyo xeerarkii isku shiidka
galay, iyada oo laga yaabo in alleba garansiiyo maahmaahdii ahayd ‘Tagto
looma arimiyee, timaadaa loo arimiyaa’.
Hadaan ka garnaqo qodobada ay labada gole isla seegan yihiin waxaa ugu
waaweyn laba amuurood:
1. Muddo kordhinta guurtida
2. Xeerka doorashada golaha guurtida.
Ta hore hadaynu ka garnaqno heshiis marka la doonayo muddo kordhinta
guurtidu waa saddex nabar midkood:
· In wakhtiga la kordhinayo la yareeyo oo afar wax ka yar laga dhigo
· In waxba kama jiraan laga soo qaado wakhtigii ay guurtidu kordhisay
· Iyo in sideeda loo daayo.
Ta hore wakhti yar in la kordhiyo waxa qadhaadheeyey qodob dastuuriya oo
sheegaya in guurtida iyo wakiiladu sanad kale dambeynayaan hadiiba laba
sanno la kordhiyo, waxay ku dhacaysaa meel dhexe, golaha xiligaas la
doortaana markuu shan sano noqdo wuxu dhaafayaa doorashada wakiilada,
markaa waxa la kala dooranayaa in afarteedaa lagu daayo iyo in laba diidoo
oo imikaba laga tashado.
Hadaynu labadaas sii kala qaadno oo aynu soo qaadano in imikaba la kala
diro, waxa diidaysa laba arrimood. Waa ta hore ee dastuurku wuxu sheegayaa
inta gole cusub laga soo dooranayo waxa xilka sii h aynaya kaa hore.
Ta kale ee inoo qadhaadhaynaysaana waxa weeye ma jirto xeer laysla gartay
oo lagu soo dooranayo golaha guurtida. Ta ay isugu shubanaysaa waxay
noqonaysaa in la yidhaa afartaasna sidaas ku qaata, wax kalena ha sugina.
Amuurta labaad ee qilaafku ka imanayaa waxay ahayd xeerbaaskii doorashada
guurtida, taa lafteeda haday miyir-qab kaga talinayno, xeer in la helo waa
laysla ogolyahay, laakiin waxa laysla seegan yahay oo aan dadkuba isku
raacsanayn guurtiyey horta xageebaad ka imanaysaa, ma xisbiyadaa, ma
beelahaa, mise gobolada. Ta hore ee ah inay xisbiyada ka timaado oo ah
siday golaha wakiiladu qabaan, anaa diiday, waayo hadii la rabo laba gole
oo xisbiyo ka imanaya lanana dooranayo maxaaba inna arbushey ee laba
goleba looga baahan yahay, mid kaliyaba maa laga dhigo, gole kaliyana dal
baa diiday oo dalalkii kale ee aan guurtida lahayni cago kuma taagna.
Jabuuti baa ugu yar oo waxaan maqlay inay gole guurti samaynayso, markaa
guurtida xisbiyo ka imanaysa, ninak xeerku qoray iyo ka ansixiyeyba talo
dambe ha ka sugin. Gobol ha ka timaado hadaad odhan lahayd, gobol iyo
degmo iyo xisbiba wakiiladda ayaa ka soo baxaya, anigu waxaan ku talin
lahaa guurtidu inay beelaha ka timaado, waayo beelaha ayaa ah waxaynu u
qaybsanno, haddii aynaan ka soo xulin siyaalaha dadkeenu u qaybsano,
waxaynu saxeexnay sidaynaan wax u wada qabsan karin ama burbur dhow, waayo
xisbiyada cadawgaaga ayaaba iibsan kara, laakiin beesha maya, waliba aan
tilmaam sida loo soo xulayo.
Marka ay xilliga ay dooran yihiin u hadhsan tahay lixdan cisho waa in
madaxweynuhu diyaariyo sagaal xubnood oo ka soo kala jeeda sagaalka
dhigood ee aynu u qoryanno. Waa inuu u gudbiyo fadhi wada-jir ah oo labada
aqal ku ansixinayaan sagaalkaa xubnood oo noqon doona kuwa kala noqonaya
golaha dambe ee guurtida noqon doona, sagaalkaas xubnood waxay dhexdooda
ka dooran doonaan shirgudoomiyo, sodon cisho markay ka hadhayna
sagaalkoodu waxay u kala bixi beelahoodii oo mid waliba wuxuu soo dhamayn
liiska beeshooda ka gelaysa guurtida, maalinta ugu dambeysa waxaa ku
dhowaaqi doona, gudoomiyaha guddida komishanka isaga oo la tashaday
sagaalkii qof ee diyaar-garawga oon iyagu liiska lagu dhawaaqayo ku jirin.
Xubinta guurtida ee geeriyoota ama tagta, laguma bedelan karo dhaxal qoys,
laakiin waxaa lagu bedelan karaa dhaxal qabiil ama hayb dhexal, shuruudaha
qofka guurti noqonayaa waa siduu ahaan jirey, waxaan ku dari lahaa in
shirgudoonku noqon nin dibada ka yimi ama degayba, waxa kaloo aan raacin
lahaa, shirgudoonka wakiillada in uu noqdo qof golihii hore ku jirey ama
sharciyaqaan ka soo shaqeeyey hay’adaha garsoorka, dalkana labadii sanno
ee ugu dambeeyey aan ka bixin.
Koox joornaal la callow damacsanayd ayaa xaashiyo dab xuluuliyey, waxaanay
xaashiyahaas ku samaysay ee karsadeen derbi ku yaal magaalada Burco.
Kooxdan oo la weydiiyey waxay xaashida u shidayaan ayaa waxay sheegeen in
warqadani warbeen ah Burco iyo maxaakiimta muslinka ka sheegtay. Kooxdan
oo culimo yar-yar la baxday ayaa waxay reer Burco isaga dhigayeen niman
Burco been ka gubaya, balse waxay reer Burco sheegeen inay yihiin kurey
lagu shubay Kaadhkii Wallaweynta iyo Kacdoonkii.
Xaashiyahan ay shidayeen oo ahaa kuwo ay soo saartay wargeyska Haatuf in
waraaqda ay qornaayeen warar sir ah oo ka sheekaynaya hunguriga ay
wallaweyntu Shankaroonta ku doonayso iyo daldaloolada ay ka Fagan
lahaayeen, meelahaas oo ay ka mid ahayd in dad reer Shankaroon ah Shan-shan
lagu shubto si ay burburkooda ugu jihaadaan. Kooxdan oo kurey gadhle u
badnayd waxa loo malaynayaa inay bayrka lahaayeen barnaamij iyaga u gaar
ahaa, kaas oo joornaalku kaga joogsaday, inkasta oo aan iyaga wax war ah
lagu dhufanin. Waxa laga yaabaa inay u damqadeen kuwa lala dhacayo
wadaadada wallaweyn ee doonaya inay Shankaroonta xaaraan ku legdadaan.
Si kasta ha ahaatee dabkaas oon wax aan warar ahayni ku dhiman waxaa ka
mid ahaa akhbaarta ay ololiyeen shirqoollada maxaakiimta Muqdisho
Somaliland ka fulinayaan iyo diinta islaamka ah oo Ramadaanta dadka sooman
loogu talo-galay, wallow wararkaas Burco ka dheregsan tahay hadana kooxdu
waxay jeclayd in aan asnaabta ay caabudayaan laga caayin maxaakiimta oo
reer Hargeysa u yaqaanaan qolyahan dooxa ku kariya xaaraanta. Bahda Haatuf
oo arintaa ka hadashay ayaa yidhi nin waxaanu ahayn ummadda u sheeganayaa
isu-naallee dad reer Burco ahina waxay yidhaahdeen shiid waanu u aanownaa,
laakiin waraaqo gubis uma aanowno. Dad kale ayaa iyaguna arinta ku
tilmaamay inay tallaabadani ka mid tahay sadex iyo tobankii qodob ee
Maxaakiimtu ku xakamaynaysay warbaahinta, kuwaas oo idaacadna lagu
qabsaday joornaalana lagu gubayo. Waxaase la yaab cusub ah culimo ciyaalo
suuqeynaysa iyo xaashi la gubo dad janno ku doonaya, iyadas oo cadaan loo
ogaaday afkaarta maxaakiimta Muqdisho inay ka mid tahay Xamarna nabad ka
dhiga Hargeysa iyo Burcana colaad ka rida oo nabadda ka qaata ayaan waxaan
xusuustay Abwaan Hadraawi iyo Maansadii goljano baydkeedii ahaa;
Wax la yidhi guyaal hore
Bahal geed is-marisaa
Maqlay gobol Islaamoo
Wadaad gaasa baxay raba
Gadh intuu samaystuu
Kutub garabka soo sudhay
Soo gaadhyey beeshii
Hadba dadabta loo goo
Hadba goolal loo loog
Badhi iyo leg loo gee
Gallad loogu roonaa
Hoosna gaadhku kala socoy
Gahan gaha abaaraha
Sida weerka guuree
Hadba reer ku soo gaas
Hadba galab carraabaha
Masallaha gabboodkiyo
Hoos galbeedka soo dhigey
Gelin qudha maqnaan waa
Guryihii ku fara badey
Galgal iyo xasarad keen
Gacan dhaafna lagu arag
Gungunuuska beenta ah
Ku galgaley Quraankii
Guudaankii dhayi waa
Goosan lumay bariin waa
Lagu barey gaddiisiyo
Inaan Geeddi Baabow
Naf gunaanadkeediyo
Garashada ku dheerayn
Misna gogosha loo badi
Isna laba gar-daaqii
Hadba taako sii gudub
Ganacsiga ku sii durug
Guul-darraa ka salaglee
Galab buu ka kacay meel
Gegi laysu soo baxay
Dadkii joogey goobtaas
Kadin geela weydii
Warka Geedi Baabbow
Gujo iyo faq hoosiyo
Isha laysku gaadhsii
Waa dad soo gubtoo jabay
Dhegahay gufaysteen
Sii garooc hankiisii
Gu'rin qaalinuu yidhi
Yaa godkiisa hoosiyo
Geysanaaya aakhiro?
Shirkii ruux garaaboo
Gacan taaga laga waa
Iyadana ka sii gudub
Kuye gacallayaalow
Boqol shilin ha lay guro
Goroddaa la wada lulay
Ku go' baana lagu yidhi.
Gonduhuu u sii degey
Kuye geed is-mariskii
Gini lagaca yaa hura?
Laga gaabsey hadalkii
Wuxuu yidhi galkiisiyo
Yaa kitaabka naga gada?
Gaw baa lawada yidhi
Go’a boodhka laga tumey
La bannee gawaankii
Dadku galab carraabaha
Badhba gees u siigee
Raabe raabe loo guran
Golihii ku noqoy keli
Goobtaas la kala dhimey
Isna Geeddi Baallow
Galalkiyo khamiiskiyo
Garan gari kitaabkii
Ged kaluu u diga rogey
Miciyii gahaydhiyo
Daba goojinaysiyo
Gawsihii u sheellaa
Gibishii u duubnayd
Gashey saamihiisii
Gaaleemadii tuur
Gafi waa runtiisii
Dadku gacan macaannaa
Gobsanaa furfuranaa
Gacaltooyo badanaa
Gaarriyow shabeelkaas
Gabbal iyo galaal iyo
Maxaa gaasho loo qalay
Maxaa goobo loo shiray
Maxaa guulo loo qoray
Taariikhda guunka ah
Maxaa baalal loo gubey
Immisaa garaaddiyo
Billad gaara lagu tolay
Immisaa g'sharafliyo
Shaal guduudan lagu xidhay Top
“Waxa Naga
Go’an Inaanu Ka Qayb-Galno Dedaalka
Lagu Yareynayo Saboolnimada”
BAAQ – Ururada Dhallinyarada ee YMD iyo ORSOD |
Bilanahan ugu danbeeyey oo dhan waxaa ka
socday aduunweynaha ololayaal loogu talo galay in dalalka deeqaha bixiyaa
ay oofiyaan balamadii ay u qaadeen dalalka soo koraaya ee ahaa Higsiyada
Horumarinta ee Kun Sanakda (Millennium Development Goals). Hadaba, waxaa
shalay lagu qabtay magaalada Hargeysa istaag qayb ka ah olalayaashan
dhanka ka ah la dagaalanka saboolnimada (Stand Up Against Poverty).
Istaagaas waxa uu ka dhacay xarunta Xafiiska Ururka Dhalinyarada ee ORSOD,
waxaana soo wada qaban qaabiyey Ururada ORSOD iyo YMD, waxaana ka qayb
galay istaagaa dhalinyaro wiilal iyo hablaba isugu jira oo tiradoodu
dhanmeyd 25.
Istaagaa kadib iyo xidhashada duubka cad (the white band) waxay
dhalinyaradu soo saareen baqqan hoos ku xusan:-
- Haddaanu nahay Dhalinyarrada reer Somaliland waxaa naga go’an in aanu ka
qayb qaadano isku-dayada iyo dedaalada loogu jiro sidii loo yareyn lahaa
Saboolnimadda.
- Waxaanu Xasuusinaynaa Shacbi-weynaha reer Somaliland in ay kala qayb
galaan Shucuubta kale ee Dunnida hirgalinta Hiigsiyadda Horumarita ee Kun
Sannadka ama (Millennium Development Goals).
- Waxaanu ka codsanaynaa Madaxda Somaliland, Hay’adaha Qaramada Middoobey
iyo Kuwa Dawligga ahba inay fuliyaan balan-qaadka Hiigsiyada Horumarinta
ee Kun Sannadka ama (Millennium Development Goals).
Ugu dambeyn waxaa Dhamaan inagu waajiba in aynu u hawl galno dar-dar
galinta dedaalada looga gol leeyahay in faqriga wax lagaga qabto si looga
baxo tabaaladda, silica iyo saxariirka haysta dadyow fara badan oo
faqriggu saameeyey.
Top
Wafdigii
Somaliland Ee Socdaalka Ku Joogay Addis Ababa
Oo Kulamo Kala Duwan La Yeeshay Gudoomiyaha AU-da Iyo
Wasiirka Arrimaha Dibadda Itoobiya |
Addis Ababa, October 17, 2006 (Haatuf) –
Weftigii uu hogaaminayay Wasiirka Arrimaha Dibadda Somaliland Cabdillaahi
Maxamed Ducaale oo socdaal hawleed ku jooga magaalo-madaxda Itoobiya ee
Addis Ababa, ayaa maalintii shalay kulamo kala duwan la yeeshay
Gudoomiyaha Ururka Midowga Afrika Prof. Alpha Oumar Konare iyo Wasiirka
Arrimaha Dibadda dalka Itoobiya Mr. Seyoum Mesfin, waxaanay weftigu
masuuliyiinta ay la kulmeen kala hadleen xaaladda Somaliland, iyo guud
ahaan xaaladda nabadgelyada gobolka Geeska Afrika.
Sida lagu sheegay war-saxaafadeed uu soo saaray Wasiir ku-xigeenka
Warfaafinta Somaliland, Cali Cilmi Geelle oo ka mid ah weftiga, waxay
weftiga Somaliland u gudbiyeen Prof. Alpho Konare dhambaal ay uga sideen
Madaxweynaha Somaliland Daahir Rayaale Kaahin, isla markaana waxay weftiga
Somaliland ka codsadeen gudoomiyaha Midowga Afrika in Somaliland gacan
laga siiyo sidii ay ictiraaf buuxa oo degdeg ah u heli lahayd,
dhaqaalaheedana loo kobcin lahaa, isla markaana gacan looga siin lahaa
sidii ay Somaliland mucaawimo toos ah uga heli lahayd beesha Caalamka.
War-saxaaafadeedka wasiir ku-xigeenka Warfaafintu ka soo saaray caasimadda
Itoobiya, waxa uu qornaa isagoo dhammaystiran sidan:
“Weftigii uu hogaaminayey Wasiirka Wasaaradda Arrimaha Debedda, Mudane,
Cabdillaahi Maxamed Ducaale ayaa kula kulmay maanta Xarunta AU-da ee
Magaalada Addis Ababa Guddoomiyaha Midawga Africa Prof. Alpha Oumar Konare.
Kullaankaasi Wasiirka iyo weftigiisu la yeesheen Guddoomiyaha Ururka
Africa (AU) ugu horeynba waxay halkaa ugu gudbiyeen dhambaal ay uga sideen
Walaalkii Madaxweynaha Jamhuuriyadda Somaliland, Mudane Daahir Rayaale
Kaahin, kadib waxay Weftigu uga xog warameen xaaladda guud ee Gobolka,
gaar ahaan Somaliland dhinacyada Siyaasadda, Horumarka, Dhaqaalaha iyo
Nabadgelyada iyada oo si mug lehna Wasiirka iyo Weftgiiisu uga warameen
heerka dhismaha Dimuqraadiyadeed ee Somaliland.
Waxa labada dhinac si weyn isula qaadaa dhigeen xaaladaha Guud ee Gobolka
Geeska Africa, khaasatan ta Nabadgelyada, iyadoo wakhtigan xaadirka ah ay
ka aloosan tahay Xaalad Cusub oo baaxaa degaysa, oo saameyn wayn ku yeelan
karta, Somaliland iyo Nabadgelyada Guud ee Gobolka. Waxa weftiga
Somaliland ka codsadeen Guddoomiyaha Ururka Midawga Africa in gacan laga
siiyo Somaliland sidii ictiraaf buuxa oo deg deg ah ay u heli lahayd,
dhaqaalaheeda loo kobcin lahaa, gacanna looga siin lahaa mucaawino toos ah
sidii Somaliland ay uga heli lahayd beesha Caalamka.
Dood dheer iyo fallanqeyn ay ka muuqatay dareen is faham kadib, waxa uu
ballan qaaday guddoomiyuhu in uu gaadhsiin doono Beesha Caalamka codsiyada
Somaliland, Guddoomiyuhu wuxuu caddeeyay inuu arrintaa ictiraaf raadinta
wax ka qaban doono, Somaliland-na ay mutaystay isaguna uu ka hawli gali
doono geedi socodkeeda.
Guddoomiyaha AU-da waxa shirka ku weheliyey,
ku Xigeenkiisa Mr. Partick Mazamhaka iyo Guddoomiyaha Peace and Security
Council-ka iyo saraakiil kale,
Waxa isla maanta weftigii uu hogaaminayey Wasiirka Wasaaradda Arrimaha
Debeddu ee JSL, Mudane, Cabdillaahi Maxamed Ducaale la kulmeen Wasiirka
Wasaaradda Arrimaha Debeda ee Ethiopia, Mudane, Seyoum Mesfin iyo Wasiiru
Dawlaha Arrimaha Debedda Ato, Tekeda Alemu iyo masuuliyiin kale oo ka
tirsan Arrimaha Debeda, halkaasi oo labada dhinac si weyn isaga waraysteen
xaaladda ay ku sugan yihiin labada dal, iyo xaaladda guud ee Gobolka guud
ahaan, iyadoo si gaar ah looga wada hadlay xidhiidhka labada dal sii
xoojintiisa, dhinacyada amniga dhaqaalaha, ganacsiga iyo arrimo badan oo
khuseeya labada Dal,
Waxa la isla qaatay sii adkeynta Nabadgelyada Somaliland iyo joogteynta
xasiloonida Gobolka Guud ahaan. Kullankaasi wuxuu ku dhammaaday is afgarad
Isla shalay waxa booqasho sharaf ku soo booqday Wasiirka iyo Weftigiisa,
Amb. Franklin Esibilia oo ah Safiirka Dalka Kenya u fadhiya Addis Ababa,
Kenya oo hadda ah Shir-guddoonka Guddoomiya Ururka Goboleedka IGAD.”
Shaqaale
Masaari Ah Oo Lagu Qaybtay Markab
Kalluumaysi Oo Xabsiga Boorama Loo Gudbiyay |
“Waxa jira shirkado warqado foorjari ah
ku kalluumaysta, shirkadda HOT FISHING-na waxa maamula dad aan u dhalan
Somaliland” Sarkaal ka tirsan Almis Fishing
Boorama, October 17, 2006 (Haatuf) – Hawlgal ciidanka amniga, kuwa qaranka
iyo kuwa ilaalada xeebaha Galbeedka Somaliland labadii maalmood ee u
dambaysayba ka wadeen xeebta galbeedka, ayaa lagu soo qabtay ugu yaraan
hal markab oo la sheegay inuu ka mid yahay kuwa sida xun badda u xaalufiya
iyo shaqaalihiisii, kuwaas oo haatan ku xidhan xabsiga dhexe ee Boorama.
Sida uu ku soo waramayo weriyaha Haatuf ee gobolka Awdal, Maxamed Cumar,
warkan oo Haatuf ka heshay maamulka dawladda ee gobolka iyo ciidanka
amniga ayaa lagu sheegay in markabkan oo laga leeyahay dalka Masar, laga
soo qabtay biyaha xeebta degmada Saylac kaddib markii looga shakiyey
qaabka markabkaasi iyo kuwa kaleba ku soo galeen biyaha degaanka xeebta
Galbeed ugana kalluumaystaan.
Laba ka amid ah shaqaalaha markabkaas, haatanna ku xidhan xabsiga dhexe ee
Boorama ayaa la sheegeyaa in la horkeeni doono sharciga si loogu qaado
dembiga loo haysto oo ah kalluumaysi sharci-darro ah.
Dhinaca kale shirkadda Almis Fishing ee iyadu muddaba ka kalluumaysta
xeebaha Galbeedka Somaliland ayaa isla xalay war ka soo saartay waxa ka
jira hadalhaynta warbaahinta madaxa-bannaan ee Somaliland ee dhinaca
kalluumaysiga xeebaha Galbeed.
Sarkaal sare oo ka tirsan shirkadda Almis, magaciisana la yidhaahdo Cabdi
Maxamuud Muuse (CABDI QURAAB) ayaa waraysi uu siiyey wargeyska Haatuf ku
sheegay in dad aan u dhalan dalka Somaliland maraakiibtooda kalluumaysi
soo geliyaan biyaha Somaliland iyagoo isticmaalaya warqado foorjari ah,
waxaanu Cabdi Quraab hadalkiisii ku bilaabay: “Waxaan aad uga xunnahay,
haddii aanu nahay shirkadda Almis Fishing, hadalhaynta beryahan dambe
saxaafaddu hadalhayso kalluumaysiga xeebaha Galbeedk a Somaliland, iyadoo
wararkaasi marmarka qaarkood aad mooddo in lagu xumaynayo ama lagu magac
dilayo hoggaanka sare ee Somaliland gaar ahaanna madaxweynaha iyo
shirkadaha kalluumaysiga dalka ee aanu ka midka nahay. Sideedaba
wasaaradda Kalluumaysigu rukhsad ayey bixisaa,wayna u kala xadaysaa
shirkadaha kalluumaysiga si looga ilaaliyo xaalufinta kalluunka. Dhinaca
kale waxa dhacda in shirkaduhu ku xadgudbaan aagagga loo kala
calaamadeeyey iyagoo xadgudubkaasina u adeegsanaya warqado foorjari ah,
waxaanan eedda saareynaa shirkadda la yidhaahdo HOT FISHING oo dhawr jeer
ku xadgudubtay biyaha xeebaha galbeedka, dhawr jeer oo horena loo ganaaxay
oo loo ciqaabay xadgudubkeedaasi, iyadoo ay u dambaysay tan imika lagu soo
qabqabtay shaqaalaheeda,mana fiicna in cid ka tirsan madaxda qaranka lagu
eedeeyo xadgudubkaasi, waana daciifnimo in waxyaalahaas oo kale oo aan la
ogeyn xogtooda cidi rumaysato. Ugu dambayntiina arrinta haatan socotana
waxaan aaminsannahay inay ku lug leeyihiin dad aan u dhalan Somaliland oo
reer Puntland ah, gaar ahaanna nin lagu magacaabo Faysal oo reer
Gaalkacayo ah, sidaa darteedna maamulka gobolka Awdal iyo ciidamada
ilaalada xeebaha iyo kuwa amniga guduhuba ka qaadeen tallaabadii ku
habboonayd.”
Haddaba hadalkan ka soo yeedhay Cabdi Quraab oo ka tirsan shirkadda Almis
ayaa waxa uu muujinayaa in Maamulka Puntland aanu marnaba ka hadhin
gardarada uu ku hayo dalka Somaliland xagga badda iyo Berrigaba. Sida
wararka la xidhiidha masaarida ku xidhan xabsiga Boorama sheegayaan, waxa
jirta in shakhsiyaadka reer Puntland ee ku lugta leh markabkan
kalluumaysiga, hore loogu qabtay xeebta Berbera balse la sii daayey, ay
xidhiidha la yeesheen nin Reer Boorama ah oo madaxtooyada ka ag dhawdhaw,
kaas oo nimanka Shirkaddan Hot Fishing u sheegay inaanay xeebaha
Somaliland ka jirin ilaalo adag sidaa darteedna ay meel kasta ka
kalluumaysan karaan, iyagoo adeegsanaya warqado foorjari ah oo hore loogu
siiyey dhul ka baxsan xeebaha Lughaya iyo Saylac, balse aanay waxba ka
ogeyn madaxweynaha iyo wasaaradda kalluumaysigu, kuwaas oo horeba
maraakiibta shirkaddan amar ugu siiyey in dalka laga saaro gebi ahaanba.
Shirkaddan Almis oo iyadu muddo ka badan saddex sannadood ka
kalluumaysnaysay degaanka Saylac – Lughaya, ayaa dhawr jeer ku celcelisay
kana cabatay shirkado kale oo si sharci-darro ah uga kalluumaysta
degaankaas, sidaa darteedna aanay xeebahaasi qaadi karin maraakiib laga
soo wareejiyo xeebaha bariga Somaliland iyo Puntland maadaama iyagu
bixiyaan cashuur ka mid ah dakhliga dalka kuna dhaqmaan sharciga
kalluumaysiga dalka u yaalla.
Ugu dambayntiina dhaqdhaqaaqa ciidamada kala duwan ku gaalaa bixiyeen
Biyaha xeebaha galbeeka Somaliland, ayaa waxay digniin u noqonaysaa
doonyaha cadowga Somaliland ku soo daldalayo xeebaha dalka iyagoo u
adeegsanaya shakhsiyaad reer Somaliland ah oo aan dan ka lahayn
mustaqbalka khayraadka baddaha Somaliland.
Tan iyo markii shalay shaqaalaha Masaarida ah loo soo gudbiyey xabsiga
Boorama ayaa dhinaca kale waxa socda gurmad xoog leh oo ka imanaya dhinaca
Hargeysa, kuwaas oo la tuhunsan yahay in ujeedadoodu tahay sii deynta
raggaasi horeba si dhib yar uga baxay xabsiga Berbera.
Top
ODHAAHDA
AKHRISTAHA: “Waxaan Iska Casiley
Shaqadii Aan Ka Hayey Shabakadda Somaliland.Org” |
Mahad oo dhami waxay u sugnaatay Ilaahay
subaxanahu watacalaye, Naxariis iyo nabadgelyo Korkiisa ha ahaato
Nebigeena Suuban Maxamed (C.S.W).
Waxaan Muddo hal sanno iyo dheeraad ku beegaan aan hawl ka hayey
shabakadda Somaliland.Org hawshaasi oo ahayd soo gelinta wararka ,
tafatirka faalooyinka iyo wararka, tafatirka war saxafadeedyada ka soo
baxa Xukuumadda, Xisbiyada iyo Hay’adaha Maxaliga iyo kuwa caalamiga ah.
Muddadii aan hawshaasi ka hayey shabakadda Somaliland.Org waxaan kor usoo
qaaday sumcadii shabakadda oo kastabtay akhristayaal aad u tiro badan
iyadoo wararka aan soo geliyo badanka aan usoo tabin jiray si deg deg ah
isla markaana ku dhisan daraasad iyo taxadar weyn.
Waxaan shabakadda Somaliland.Org ku xidhay dhammaanba wakaaladaha Wararka
iyo weliba ilaha wararka iyo faalooyinka ee ka soo baxa Xukuumadda,
Xisbiyada iyo weliba qaybaha bulshada Somaliland, waxaan xoogga saaray
inaan isku qabto hawsha gelinta wararka, iyo odorosidda wararka iyo
faalooyinka, Shabakadda Somaliland.Org waxaan runtii u huray wakhti, juhdi
iyo maskax farabadan oo aan uga mahad celinaayo dhammaanba shacabkii reer
Somaliland ee qurba jooga u badna ee sida joogtada ah ula socday hawlahii
aan shabakadda ka hayey, aniga oo markasta maanka ku hayey baahida dhinaca
wararka ee qurba jooga reer Somaliland ay qabaan.
Iyadoo mudadii sannadka iyo dheeraadka ahayd ee aan shabakadda hawlaheeda
hayey ay soo booqdeen ugu yaraan 1 Malyuun iyo badh qof oo ahaa
somalilanderskii u heelana helista xogaha iyo wararka dalkooda hooyo,
taasi oo ka dhigaysa shabakadda ugu booqashada badan (Somaliland largest
traffic website), aniga oo aan runtii ku faanayn waxay ii tahay sharaf
weyn in qurba joog badan ay si hufan ula socon jireen wararka iyo
faalooyinka aan shabakadda soo gelin jiray.
Waa Maxay Haddaba Sababta Aan Isku Casilay
Nin Daawe La Leeyahay
Danbi Uu Badh Leeyahay
Isagay U Darantoo
Daaranta Miridhka leh
Inuu daaro ma ogola
Labadii todobaad ee ugu danbeeyey waxaa ashkhaasta shabakadaasi
mulkiyadeeda lihi ay bilaabeen in wararkii aan sida tooska ah uso
gelinaayey ay ka saareen sabab la’aan, waxaa keliya ee ay u adeegsanayaan
saaristaasina ay noqotay iyagoo ka eegaayey tiirar qabyaaladeed oo ay
adeegsadeen iyo difaaca qaranimada Somaliland oo ah muqadas oo aanu isku
feker ka noqon waynay tusaale ahaan:
Todobaadkii ugu danbeeyey waxay ka saareen shabakadda Somaliland.Org
Wararkani oo aan soo tabiyey
- Nuqulo Ka Mid Ah Wargeyska Haatuf Oo Lagu Gubay Magaalada Burco (
Warkani oo lagu daabacay dhammaanba wargeysyada iyo saxaafadda internetka
lagana baahiyey idaacadaha dunida sida laanta afka soomaaliga ee B.B.C-da,
Radio Hargeysa Labada Telefishan ee Madaxa Bannaan iyo Telefishanka
Qarranka)
- Gabadh Reer Hargeysa Ah Oo Maxkamad Ku Taalla Magaalada Boosaaso Ay Shan
sannadood oo Xadhig Aargudasha Ah ku xukuntay (Warkani oo laga soo xigtay
oo lagu daabacay shabakadaha internetka somaliland oo dhan isla markaana
lagu daabacay dhammaanba wergeysyada madaxa bannaan ee Weraysi Aan ka
qaaday
- Wareysi aan ka soo qaaday Dr. Axmed Xuseen Ciise, Xoghayaha arrimaha
dibadda Ee Xisbiga Kulmiye oo horana looga saaray qoraal abaal gud ah oo
loo aqoonsaday Axmed Xuseen Ciise shakhsiyadda Sannadka isla markiibana
wakhtigaa ay ka saareen.
Markii aan weydiiyey sababta ay uga saareen warka nuqulada Wergeyska
Haatuf ee Lagu Gubay Burco Warkaasi waxay iigu soo jawaabeen Qoraalkani oo
ay email ahaan iigu soo direen waana kani qoraalkaasi ay iigu soo
jawaabeen oo dhamaystirani:
“Warka noocaas ahi wuxuu dhaawac wayn u gaysan kartaa Somaliland iyada oo
cadowguna ka dhigan karo gabbood wararka noocaas ah haddii ay
Somaliland.Org soo qorto.
Gubitaanka jariidadda Haatuf macnaheedu ma aha waxa la gubay calankii
Somaliland. Waa khalad in laysla meel dhigo Haatuf iyo Somaliland.
Haatufna waa jariidad madax bannaan oo afkaarteeda iyo fikirkeedana ay soo
qoreen bani aadam inala mid ahi mana aha in la yidhaahdo "jariidadii
Haatuf baa la gubay" waxay ka dhigan tahay kitaab quraan ah baa la gubay .
Ma aha been ee waa wax jira in Haatuf marar horeba soo qortay warar
xaqiiqada ka fog oo aan ku koobnayn Burco ama gobolka Togdheer ee ka
hadlayay meelo kale oo Somaliland gudaheeda ahba. Sidoodabana wararka aynu
inagu iska qorno gudaheenu waxay keeni karaan muran iyo jahwareer iyo
ficiltan waxana fiican in wararka mujtamaca Somaliland laga qorayo in
layska hubsado. Jariidadda wararkeediiba waxay ka dhamaan waayeen Togdheer
waxa jooga waddaado gacansaar la leh kooxaha Muqdisho iyaga oo indhaha ka
qarsatay xaqaa'iqa dhabta ah ee jira sida caddaalad darada iyo
maamulxumada ka jirta guud ahaan dalka gaar ahaana gobolada bari, waana
hubaal iyada oo dadweynaha gobolada bari horeba uga cadhaysnaayeen duruufo
badan oo aanay dawladdu waxba ka qaban oo caddaalad, garsoor iyo maamul
xumo isugu jira haddana haddii ay arkaan waxa qudha ee Burco laga qorayaa
inay tahay warar negative ah sida wadaadadan la sheegay loona dhigo in
Burco ay joogaan maxaakiimta Musqdisho, way dhacayaan mudaharaadyo gadood
ahi oo dadku ku diidan yihiin in magacooda lagu dilo.
Haatuf waa inaanay burcana aanay markasta u gaar yeelin dhibaato kasta
waayo wararkeeda burco ay ka qortaa salka kuma hayaan xaqiiqada jirta isla
markaana waxaa ka muuqata caadifadda adigaba kaa muuqata imika. Dadkuna
dhinacooda waxay xaq u leeyihiin inay afkaartooda ku cabiraan bannaanbax
salmi ah oo aan cidna lagu waxyeelayn laakiin aan lagu tilmaamin xag jir
iyo kuwo ka soo horjeeda Qaranimada Somaliland.
Aniga oo reer Burco ahi (Habarjeclo) miyaanan ku odhan karin ma waxaad
doonaysaa inaan adiga oo reer Hargeysa ah (Sacad Muuse) u daba fadhiisto
wax kasta oo aan samaynayo si aanan uga cadhaysiinin!!!. “””
Warqaddani oo uu soo qoray isla markaana uu ku saxeexanyahay Mid ka mid ah
Mulkiilayaasha shabakadda ahna Dhisaha (Webmaster) shabakadda oo la
yidhaahdo Abdiraxiim (Xaajiga) isla markaana ay la wadaagaan labada
mulkiile ee kale oo la kala yidhaahdo Baashe Cumar iyo Daahir Cabdi Jaamac.
Aniga Oo Ammaan, ixtiraam, iyo wanaag badan u haya dhammaanba qurbe joogii
reer Somaliland ee shabakadaasi Somaliland.Org wararkayga kala socday.
Waxaan go’aan ku gaadhay inaan iska casilo hawshii aan shabakadaasi ka
hayey maadama mulkiilayaasha shabakadaasi hawsha ay doonayaan tahay
Hammigooda qabiileed fullinteeda oo aanan weligay hiyiga ku qaban.
Waxaan akhristayaashii iyo Somalilanderskii wararkayga iyo faalooyinkayga
xiisaha u hayey aan ugu ballan qaadaya inaanan sidaasi kaga tagin ee aan
weli u heelanahay hawshii aan u hayey, waxaana inoo ballan ah difaaca
qaranimada dalkeena hooyo ee Somaliland, Somaliland-na qabiil maahe waa
Qarran.
Somaliland Guul iyo Gobonimo
MOHAMED ABDI HASSAN (DIRIDHABA)
Hargeisa, Somaliland Top
|