Haatuf News

Home | Contact Us | Links |  Archives

BADHEEDHAHA: Lugtii Jeeni Dhaaftaa Way Jabtaa

“Maxaa Sool Iyo Sanaag Bari Laga Sheegayaa Hargeysaa
Badh Maqan Yahaye”

Taliyaha CID-da Oo Amar Jeebkiisa Ah Ku Xidhay Nin Booqday Masuuliyiinta Haatuf Ee Halkaasi Ku Xidhan

Ururada Xuquuqda Aadamaha Oo Walaac Ka Muujiyay Markii Loo Diidday Dhegaysiga Dacwada Haatuf

Ururada Saxaafadda Somaliland Oo Walaac Ka Muujiyey Ku Dhaqanka Xeerka Ciqaabta Oo Loo Adeegsado
Warbaahinta Madaxa Banaan

Dareenada Mudanayaasha Wakiiladu Ka Bixiyeen
Xadhiga Masuuliyiinta Haatuf

Khasaaraha Weeraradii Maraykanku Ku Qaaday Somalia

Furaha Quluubta

ODHAAHDA AKHRISTAHA: Ka Quusta Somaliland Ama Xorriyada Hadalka U Halgama

Ina Sulub Ceebtii Maahee, Waa Caadadii
Muj. Xasan Aw Cali

- Garsooruhu wuxuu diidday codsigii Qareenada Haatuf in Dacwada loo maro xeerkii Saxaafadda ee Somaliland waxaanu ku adkeystay Xeerkii Ciqaabta ee Somalia

- Waxyaabaha Haatuf Lagu Eedaynayo Waxa ka mid ah Kartoon Rayaale ah oo sankiisa la dheeraysiiyay

Hargeysa, January 14, 2007 (Haatuf) – Garsooraha Maxkamadda Gobolka Hargeysa, Faysal Cabdillaahi, oo gacanta ku haya dacwada uu dhibanaha ka yahay Madaxweynaha Somaliland Daahir Rayaale Kaahin ee lagu soo oogay saddex ka mid ah hawl-wadeenada Wargeyska Haatuf, ayaa shalay daadefeeyay is-hortaag (objection) ay Qareenada Haatuf ku diiddanaayeen in dacwadaha ka dhanka ah Haatuf loo maro xeerkii ciqaabta (Penal code) ee Somalia maadaama uu dalka Somaliland leeyahay Xeer Saxaafadeed oo labada gole ee Baarlamaanku ansixiyeen, Madaxweynuhuna saxeexay.

Shalay oo uu qabsoomay fadhigii labaad ee dacwaddan, Garsoore Faysal Cabdillaahi wuxuu ku adkaystay in dacwadda loo maro xeerka ciqaabta ee Somalia, kaas oo ay Xeer-ilaalinta Somaliland u cuskatay in lagu dabbaqo eedaha loo soo jeediyay masuuliyiinta Wargeyska ee kala ah Gudoomiyaha Haatuf Yuusuf Cabdi Gaboobe, Tifaftiraha Haatuf Cali Cabdi Diini iyo Weriye Maxamed-rashiid Muxumed Faarax.

Xeer-ilaalintu waxay Cali Cabdi Diini iyo Maxamed-rashiid Muxumed Faarax ku soo eedaysay inay wada-jir u galeen dambiyada kala ah; waxyeelaynta sharafta Madaxweynaha Somaliland iyo ku dhiiri-gelinta ciidamada Somaliland inay sameeyaan amar-diido, eedaymahaas oo la xidhiidha maqaal taxane ahaa oo ku soo baxay Haatuf laga bilaabo 24/11/2006, kaas oo wargeysku ku soo bandhigayey dhaliilo iyo dhacdooyin musuq-maasuq ah oo uu ku lug leeyahay Madaxweyne Daahir Rayaale iyo qoyskiisu, halka gudoomiyaha Haatuf ee Yuusuf Cabdi Gaboobe lagu soo eedeeyay inuu is-hortaag shaqo ku sameeyay Bileyska markii ay ka hawl-galayeen xarunta Haatuf 2/1/2007.

Waxaanay Xeer-ilaalintu eedaymahaas u cuskatay qoddobada xeerka ciqaabta ee Somalia Lr. 220, 209, 264 iyo 321, taas oo qareenada Haatuf in ay ka soo horjeedo qodobka 32 ee distoorka Somaliland iyo qodobka 31 ee Xeerka Saxaafadda Somaliland, kaas oo laalaya gebi ahaanba in xeerka ciqaabta loo adeegsado saxaafadda isla markaana waxba kama jiraan ku sheegaya xeer kasta oo ka horimanaya Xeerka Saxaafadda.

Dhegaysigii shalay ee dacwadan Xeer-ilaalintu waxay Maxkamadda horkeentay Markhaatiga 1aad oo ka mid ah C.I.D-da, isla markaana ay xeer-ilaalintu u qabsatay inuu ka marag-furo eedaha loo soo jeediyay hawl-wadeenada Haatuf.

Markhaatiga 1aad wuxuu sheegay inuu ka mid ahaa guddi 6/1/2007 ay dawladdu u magacowday inay baadhitaan ku samayso kiiska loo soo jeedinayo eedaysanayaasha Haatuf, isla markaana wuxuu ka jawaabay su’aalo ay weydiiyeen Xeer-ilaaliyaha dawladda Siciid Fool-xun iyo Qareenada Haatuf difaacaya.

Markhaati 1aad wuxuu marag-furkiisii ku saabsanaa eedaha loo soo jeediyay hawl-wadeenada Haatuf u cuskaday arrimo siyaasadeed oo ay Haatuf kaga hadashay maqaalka kor ku xusan, arrimahaas oo ku saabsanaa dhulka Somaliland ee intii uu Daahir Rayaale xilka Madaxweyne-nimada qabtay ay la wareegtay Puntland iyo xidhiidho dhexmaray Somaliland iyo Faransiiska iyo Jarmalka, kuwaas oo uu yidhi waxa qoray Wargeyska Haatuf, iyada oo aanu caddeymo u haynin arrimahaas.

Mar ay Qareenada Haatuf weydiiyeen in markii ay baadhitaanka wadeen Madaxweynaha, Faransiiska iyo Jarmalka la xidhiidheen si ay wax uga weydiiyaan arrimahaasi iyo in kale. Markhaatigu wuxuu ku jawaabay inay ogaayeen in heshiisyadaasi aanay jirin sidaas darteedna aanay jirin sabab ay cid kale wax uga weydiiyaan. Hase yeeshee markii lagu celceliyay inuu haa ama maya kaga jawaabo su’aashaasi, wuxuuna yidhi “Maya”.
Waxyaabaha uu Markhaatiga 1aad ku tilmaamay in Madaxweynaha lagu ceebaynayo waxa ka mid ahaa sawir kartoon ah oo laga sameeyay Mr. Rayaale kaas oo lagu soo daabacay cadadkii Haatuf ee soo baxay 4/1/2007. Markii la weydiiyay ceebta ku jirta kartoonka, wuxuu ku jawaabay in sanka Madaxweynaha la dheeraysiiyay, taasna ay diintu ka soo horjeedo.

Markhaatiga 1aad waxa uu sheegay in Yuusuf Cabdi Gaboobe lagu eedaynayo inuu is-hortaagay ciidamada Bileyska ee hawl-galka ku tegay xarunta Haatuf, waxaanu markii la weydiiyay talaabada uu Yuusuf isku hortaagay yidhi: “Shaqaalaha Wargeyska wuxuu ku yidhi soo kaca oo kamarooyinkiina soo qaata oo sawira oo meydkoodu ha bato.” Markii la weydiiyay ma qoryaha soo qaata buu yidhi, mise kamaradaha, wuxuu Markhaatiga yidhi “Kamaradaha soo qaata buu yidhi, saxaafaddana waa hubkooda ugu dambeeya kamaraduhu.”

Garsoore Faysal Cabdillaahi waxa kale oo uu gaashaanka ku dhuftay codsigii Qareenada Haatuf in labada eedaysane ee Yuusuf Cabdi Gaboobe iyo Cali Cabdi oo waarran la’aan lagu soo xidhay 2/1/2007 la sii daayo.

Qareenadu markii ay la kaashadeen muwakiliintooda, waxay Maxkamadda ka hor sheegeen inay ambiil ka qaadanayaan qaraarka uu garsooruhu isku hortaagay soo jeedintoodii, isla markaana dacwadda la joojiyo, balse garsooraha wuxuu ku adkaystay inaanu joojin dacwada oo fadhiguna furan yahay.

Hase yeeshee markii uu Garsooruhu xidhay dhegaysiga dacwada kadib, eedaysanayaasha ayaa garyaqaanadooda u sheegay inaanay aqbali doonin in la baalmaro xeerka saxaafadda Somaliland oo dacwadan lagu dhaqo xeerkii Somalia, waxaanay eedaysanayaashu Madaxweyne Rayaale ku cambaareeyeen in aanu dan ka lahayn Somaliland balse uu u dabran yahay tiisa oo Somalilandnimadiisu tahay marka dantiisu ku jirto-na inuu isticmaalo, marka aanay dantiisu ku jirina uu iska indho-tiro, dantiisana ka raaco.
Yuusuf Cabdi Gaboobe oo aanu hoolka Maxkamadda gudihiisa ku waraysanay kadib markii uu dhegaysiga dacwadu dhamaaday, waxa uu yidhi: “Waa marka hore Madaxweyne Rayaale wuu is ceebeeyay, dalkiina sumcad xumo ayuu u soo jiiday, sharcigii iyo kala-dambayntiina wuu ku durduriyay, waxayna ila tahay cawaaqib-xumadeeda inuu si dhakhso ah u arki doono.”

Fadhigii Maxkamadda ee khamiistii iyo kii shalayba waxa barxadda iyo agagaarka Maxkamadda Gobolka Hargeysa, la soo dhoobay ciidamo aad tiro badan oo bileys ah, kuwaas oo maalintii shalay gebi ahaanba xidhay wadooyinka taga Maxkamadda, waxaanay gaadiidka u diidayeen inay maraan wadooyinkaas, iyadoo dadka lagu amrayay inay gaadiidkooda dhigtaan una lugeeyaan Maxkamadda.

Waxa kale oo maalintii shalay Maxkamadda isugu yimi boqolaal dadweyne ah oo doonayay inay ka qayb-galaan dhegaysiga dacwada Masuuliyiinta Haatuf, waxaanay ciidanka bileysku iska hor-istaageen dadweynuhu inay galaan hoolka dacwadu ka socotay, balse dadweynaha Maxkamadda isugu oo aan u tiro badnaa dartood waxaa dhegaysiga dacwada tiro kooban, waxaanay dadka intii badnaa muddadii saddex saacadood ahayd ee dhegaysiga dacwadu socotay ay hor tubnaayeen dhismaha Maxkamadda Gobolka Hargeysa, iyadoo wejiyada dadka ay ka muuqatay walaaca ay ka qabaan cadaalad ay suxufiyiinta Haatuf ka heli karaan Maxkamadda ka gar-qaadaysa dacwadooda, waxaanay qaar ka mid ahi ku dhawaaqayeen hal-ku-dhegyo ay ka mid ahaayeen “Saxaafadda in la cabudhiyo, waa wixii laga soo dagaalamay…”

Top

Maalintii shalay waxa Maxkamadda Gobolka Hargeysa la horgeeyey gudoomiyaha Haatuf Media Network,Yusuf Cabdi Gaboobe iyo tifaftiraha Wargeyska Haatuf, Cali Cabdi Diini, kuwaas oo Xeer-ilaaliyuhu hor sidday dacwada eedooda loo soo cuskaday Xeerka Ciqaabta Guud, taas oo nuqulkeeda la baahiyey khamiistii 11.01.2007.

Markii Qareenada u doodayay bahda Haatuf ay arkeen xeerkan ciqaabta ee dacwada dabada loo saaray, waxay garsooraha u tilmaameen xeerka dacwadani sax ku tahay inuu yahay xeerka saxaafadda X.N.27.2004, kaas oo ah mid ay Golayaashuna ansixiyeen, madaxweynaha hadeer joogaana saxeexay.

Haddaba shalay oo ahayd maalinta go’aanka laga gaadhi lahaa xeerka dacwadu ku soconayso ee ay saxda ku tahay, waxaa nasiib darro ah in xaakimka gobolka ee dacwaddan daadihinayey, inuu iskaba dhaafo xeerkan saxaafadda u yaalay iyo dalabkii qareenadu u gudbiyeenba, isagoo garsooruhu sababayn waxa uu dacwadan ugu guda-gelayo xeerka ciqaabta ah ee ay xeer ilaaliyuhuba iska qoondaystay. Haddaba waxa su’aashu tahay, ma xeerka ayaan ahayn shuruucda dalka u taal mise maxaabiista ayaan suxufiyiin ahayn?

Dacwadana waxay cuntami kartaa marka xeerkeeda loo cuskado, haddiise dacwada uu xeerkeeda garsooruhu aanu waafajin, qaraarka uu ka gaadhaana wuxuun buu noqonayaa cadaalad-darro, xataa mid aan qodobada waafiqin taas oo maxbuuskana lagu qaado xukun aanu qabin, garsoorka dalkana jiidhis iyo jebinba ku ah. Xukuumadda Somaliland oo ah tan dacwadda dhibanaha ka ah isla markaana ah tan xeerka dalka midna dhaafaysa midna la dhuslaynaysa haddii aanay maxkamadu runta u sheegin yaa u dhex ah dadka sharciga hoos jooga, sida masuuliyiintan Haatuf ee dhawr iyo toban cisho cidlada ay xukuumaddu ku haysato ee ay sharci-darada u xalaalaysatay xadhigooda.

Ta kale xeerkan ciqaabta ah ee ay xukuumadu cuskatay garsooruhuna ka aqbalay wuxuu ahaa kii laga samaystay xeerkan saxaafadda ee imika layskaba dhaafay, iyadoo tan iyo wakhtigii la ansixiyeyba aanay xukuumaddu marnaba ku shaqaynin kolba hadii ay Maxkamaddiina ka toosin wayday waa lugtaa jeeniga dhaaftay inay jabtana u dhaw.

Top

“Maxaa loo sheegi waayey ragga 50-ka baloodh, daaraha dhaadheer iyo beeraha haysta”

“Maxaa Afarta Reer Nuur Iyo Labada Reer Caynaanshe Tilmaamay, Haatuf Iyo Ina Xaashi Waxa Ka Dhow Ina Buubaa”
Siciid Sulub, Wasiirka Hawlaha Guud

Haatuf, January 14, 2007 (Haatuf) – Wasiirka hawlaha guud ee dawladda Somaliland, Siciid Sulub Maxamed ayaa shalay si ba’an u weeraray Wargeyska Haatuf iyo sidoo kale shakhsiyaad siyaasiyiin ah, isagoo wasiirku sheekadiisa gaadhsiiyay beelo, isla markaana si weyn u difaacay Madaxweynaha iyo Marwadiisa.

Wasiirku wuxuu arrimahaa kaga hadlay shir jaraa’id oo uu shalay ku qabtay xafiiskiisa magaalada Hargeysa, isagoo ka hadlay arrimo badan oo uu marba dhinac u dhigay haddii ay tahay dhinac qabyaaladeed iyo hadday dhinac siyaasadeedba tahay, wuxuuna shirkiisa jaraa’id ka jeediyay hadal dheer oo uu sida uu doono u filiqtamay isla markaana waxa hadalka wasiirka ka muuqday dhiilo weyn isagoo xataa si rasmi ah shirkiisa jaraa’id uga dhawaaqay in dawladda Hargeysa badh laga haysto, wuxuun u muuqday nin aad u cadhaysan oo ay hadaladiisa ka dhadhamayso hanjabaad iyo cago-juglayn, oo mar af-dawladeed ku hadlaya, oo marna aad mooddo inuu a freer ku hadlayo.

Sidoo kale, wasiirka iyo weriyeyaashii shirka jaraa’id ka qayb-galay ayaa si weyn isula baaxaa-degay, kadib markii uu ku haftay su’aalo xad-dhaaf oo ay ku boobeen weriyeyaasu, isagoo tiroba laba jeer ka kacay su’aalihii ay weriyeyaashu weydiinayeen isagoo xamili waayay su’aalihii lagu liishaamayay.

Wasiirku wuxuu ku faanay inuu yahay wasiirkii ugu waxqabadka badnaa ee soo mara wasaaradda Hawlaha Guud muddadii 16-ka sannadood ahayd, isagoo arrintaas ka hadlayana waxa uu yidhi: “Inkastoo aanay dawladda dhaqan u ahayn inay saxaafadda daba-gasho waxa igu kelifaya waxa la yidhi dadka beenta isticmaala way ku celceliyaan marka dambe oo waxay yidhaahdaan run hala moodo marka dambe, markaa si aanay dadka xalaasha ah ee daacadda ah ee reer Somaliland, wixii dacaayad ah ama cay aan geedna loogu soo gabanayn ah ee cid sumcadeeda iyo magaceeda lagu wiiqayo, ayaa igu kelifaya inaan kaba daba tago jaraa’idka Haatuf.

Haddaba haddii aan ku bilaabo wasaaradda Hawlaha Guud, hawlo farabadan ay qaranka uga masuul tahay, hawlahaas waxa ka mid ah hawlaha guud, gaadiidka, wadooyinka.

Waxaan u malaynayaa cadceedda cidina sacabka ma saari karto, muddadii aan joogay waaaradda isbedel weyn baa ku yimid, taana qofkii caafimaadqaba ee Somalilander ahi wuu arki karayaa, waxaan aaminsannahay wixii kordhay 13-kii sannadood ee ka horeeyay saddexdii sannadood ee aan joogay, haddii laysu miisaamo waxa badan waxa u kordhay saddexdii sannadood ee aan joogay. Qofkii oggaa siday wasaaradu ahayd 2003 indhihiisa ayuu ku arki karaa waxa u kordhay wasaaradda, taas ma doonayo inaan aad ugu sii dheeraado oo ay faan u ekaato, laakiin marka aan ka tago ayay aad u muuqan doontaa.

Markii aan imid shaqada wasaaradda Hawlaha Guud waxay u ekeyd ama ay u badnayd gobol, ama gobol iyo badh, laakiin imika waxay gaadhsiisan tahay lixda gobol. Intii aan joogay waxa suurto-gashay in min Awdal ilaa Sool iyo Sanaag ay waxqabadka wadooyinku gaadhaan. Intii aan imid ka hor laba shirkadood oo qudha ayaa la shaqayn jiray wasaaradda Hawlaha Guud, waxa suurta-gashay inay la shaqeeyaan wasaaradda shirkado gobol walba leh, waxa qandaraasyadii wadooyinka wax ka qaatay reer Sool, reer Sanaag, reer Awdal baa ka qaatay oo cid waliba way ka qaadatay, taasi waxa laga yaabaa inaanay raaligelin cidii ay markii hore ku koobnayd, wasaaradduna waxqabadkeeda sannad walba iyadoo qoraala golaha wasiirada ayay u gudbisaa, waana la hayaa.

Midowga Yurub ayaa wasaaradda caawin jiray oo ka caawin jiray dhinaca wadooyinka iyo biriijyada, waxaan wasaaradda imid shaqadaas oo meel badhtan ah socota, nasiib-wanaag intii aan joogay waxa hirgalay 13 biriij iyo kaambado ah oo isugu jira qaar cusub oo la dhisay iyo qaar dumay oo dib loo dhisay oo ku fidsan ilaa Gorya-cawl ilaa Caynaba, waxayna wasaaraddu gaadhay intii aan joogay gobolada Sool, Sanaag iyo Togdheer oo aanay hore u gaadhi jirin. Waxa kale oo ay gaadhay Maydh iyo Tabca oo wax badan laga qabtay oo wadadii shanta saacadood lagu jiri jiray maanta laba saacadood iyo badh lagu jiro.

Midowga Yurub (EU) caawimadii ay bixin jirtay waxay bilaabantay 2000 waxaanay ku ekeyd 2005-ta oo qorshe shan sannadood ah bay ahayd, markaa EU-du uma ay tegin inay wax saluugtay ee qorshihii baa ka dhamaaday, EU-du waxa ay qabataana ma aha sida hay’adaha kale ee seminaarada iyo ururada yaryar lagu maalgeliyo ee aan muuqan ee waxay qabatay waa si fiican u muuqan kara oo la taaban karo, waxaan isleeyahay waa dhaqaalaha keliya ee laynagu caawiyay ee siduu ahaa si toos ah u galay dalka, muddadii aan joogayna xidhiidh fiican baanu lahayn, waxaanan imid iyadoo uu saluug jiro, qorshaheeda caawimana waxay dib u bilaabaysaa 2008. Markaa hore EU-da 3,000,000 (saddex milyan oo Euro) ayay ku caawisay Somaliland, aniguse waxaan soo gaadhay 1.8 Milayn Euro, waxaanan ku dhisay wadooyinka iyo biriijyada, imikana marka la eego waraaqihii ay soo qoreen iyo waxyaabihii aanu ka dalbanay ee ay soo ogolaadeen, waxaanu rajaynaynaa in halkii ay markii hore ka ahayd 3 Milyan oo Euro ay imika noqoto $214,900,000 (Laba boqol iyo afar iyo toban milyan iyo sagaal boqol oo kun oo Doollar) dhokumentkii uu ku cadaana waa kan. Markaa ma aha in la yidhaahdo EU baa tagtay, laakiin xagal-daacintaa iyo dacaayaddaa waxa fidiyay dadka aan ka raalida ahayn inay Somaliland horumarto.

Waxa kale oo aan idiin sheegayaa wasaaradda Hawlaha Guud wadooyinka toos uma maamusho, waxa jirta hay’ad la yidhaahdo Somaliland Road Authority (SRA), guddi baa jira, guddidaas oo sideed xubnood ka kooban, afarna waa shicib afarna waa xukuumadda oo waa afar wasiir, mana jiro wasiir qandaraas bixiyaa, mana jiro dhaqan caynkaas ah oo ka suura-gala ummad dawlad sheeganaysa oo qof keligii wax iska maamusho, waxna iska iibsan karo, taasi waa magac-dil shakhsiyeed iyo magac-dil qaran,” ayuu wasiirku ku soo xidhay qaybtii hore ee hadalkiisa oo uu kaga waramayay waxqabadka wasaaradiisa, kadibna wuxuu u gudbay qaybtii labaad oo uu ahaa biyo-dhaca shirkiisa jaraa’id, wuxuuna yidhi: “Jariidada Haatuf waxa dhaqan u noqotay beryahan dambe anigu siiba waxaan hayaa qoraalo badan oo aniga igu waajahan oo ceebayn iyo meel ka dhac qaran ah ama magac-dil shakhsi (character assassination) oo ay ku sheegayaan waxyaalo la lunsaday, magac-dil marka la leeyahay waa dil uun, dilmadu haddii ay shalay ahayd dayday iyo xabad la isku dhufto, maanta waxay isu bedeshay cay iyo ceebayn lagu dilayo qofka qiimihiisa iyo qadarkiisa, qarannimaduna waxay ka kooban qofaf iyo madax, hadaan madaxda haybad loo yeelin oo sharaftaada la dhaawaco qaranimaduna way dhaawacan tahay, waxay Haatuf soo qortay sheeko ay ku ceebaynayso madaxweynaha iyo qoyskiisa oo ay ku sheegtay inay gaadhi MarkII ah lunsadeen, waa sheeko aad u rakhiis ah in Madaxweyne qaran isaga iyo gabadhiisii gaadhi MarkII lagu jiidjiido. Maalintay soo qoreen waxaan u yeedhay laba wiil oo qoraalka soo qoray Maxamed-rashiid iyo Cabdifataax, waxaaan tusay qoraalkii wax lagu xaraashayay iyo qaabkii wax loo iibiyay inuu ahaa mid saxa ah oo aan ahayn mid wax lagu dacaayadayn karo, waxa kale oo aan tusay labadii gaadhi oo kala ah gaadhigii anigu aan lahaa iyo gaadhigii dawladdu lahayd, dabadeedna anigoo diidaya ceebta iyo qarjajacda ayaan ku idhi idinku isa saxa.

Waxa jirtay inan (wiil) hore uga shaqayn jirey madaxtooyada, oo markuu shaqadiisa qabsan waayay la eryay, qaar wasaaraddayada ka tirsan oo loo yeedhyeedhaana way jiraan, inankaa TV-ga la soo fadhiisiyey wuxuuna ceebiyay qoyskaa xormada ku leh qaranka. Inankaasi waxa uu noo soo gudbiyey qoraal uu ku sheegayo in gaadhi MarkII ah loo xaraasho madaxtooyada, madaxweynaha iyo marwada toona ismaanu arag, inankaasi qoraalkiisa markii aan ka shakiyey ayaan wax ka weydiiyey wasiirka madaxtooyada, ka dibna waxa uu ii sheegay in qoraalkiisu rasmi (official) yahay, waxaanan u yeedhay agaasimaha guud, qaabkii sharciyeed ayaanu maray, gaadhigaasi aan kala wareegnay madatooyadu waxa uu soo galay madaxtooyada 1995-kii. Inankaa TV-ga la soo fadhiisiyay waxaanu ognahay inuu yahay abaabul la soo sameeyay oo rag waaweyni ka dambeeyo oo inanka lagu khasbo ama lagu laaluushay inuu waxan sameeyo. Imikana labadii gaadhi ee midna anigu aan iibsaday ee lahaa, midna ay wasaaradda Hawlaha Guud lahayd ee aanu Madaxtooyada ka iibsanay horteena ayay yaalaan oo waan idin tusaynaa. Markaa ay madaxtooyadu wareejinaysay anaguna gaadhi ayaanu u baahnayn, anagaana lacagtii u celinay oo ka iibsanay. Waxay yidhaahdeen miyaanu gaadhi dawladeed ahayn maxaa loo iibinayaa, anaguna miisaaniyad gaar ah ayaanu leenahay, wasaaradina wasaarad kale uma iibiso gaadhi. Waxa jariimada in gaadhiga caruurtaydu wadato qaranka loo tuso gaadhi qaran ama dawladeed.

Haddii cidi hanti qaran ku tagri falayso Haatuf bay ka bilaabmaysaa, guryaha iyo xafiisyada ay ku jiraana dawladaa leh, waxayna ka soo farcantay Sooyaal iyo hantidii ay hay’aduhu ku caawinayeen, maroodigu takarta ku taagan ma arkee, takarta ka kalena ku taagan buu arkaa, guryaha uu ku jiro gudoomiyaha Haatuf, kuwa hurdada u ah iyo kuwa xafiisyada u ahba waa hanti qaran, waxayna ka mid tahay hanti boobka qaran ee dalka ku fidday ee ninba intuu heli karayay xejistay, waxa la yidhi nin daar quraarad ah ku jiraa inuu nin daar dhagax ah ku jira tuurtuuro maaha, wixii ay iga qoreena waxaan ku talo jiraa inaanu Haatuf sifo sharciya ku wada xaalno, inamada la adeegsadayna intaa u dhaafi maayo, waxaanse doonayaa inaan u dhaafo ragga waaweyn ee ka dambeeya, raggaa qaarna waan magac-dhabayaa, qaarna dib baan u dhiganayaa, raggaas oo uu ka mid yahay Maxamed Xaashi Cilmi, waa ogeydeen oo markii Haatuf la xidhxidhay qaylo dheer buu ku dhuftay, waxa uu isku qaaday madaxweynaha iyo xaaskiisa, waxaanu ku sheegay Aar iyo Gool, Illaahay baan idinku dhaariyee in hablaha la caayo, waxaanu marwada ku tilmaamay gool, mar kase uu caayan yahay Madaxweynuhu iyo ee caayan tahay sodohda uu qabo ee Marwada koowaad, miyaanay Somaliland caynayn, marwada waxa uu ku tilmaamay waxshi ileyn libaaxu waa waxshiye, taasi waa dhaqan-xumo waana wax laga dhintaa.

Inamada yaryar ee wax qorayaana waa gardaro garab og, oo raggaa (Maxamed Xaashi) iyo rag kale oo waaweyn oo masuuliyiin ahaan jirey ayaa ka dambeeya, waxaana fiicnayd inaanay carruurta adeegsane ay banaanka u soo baxaan oo sidaa Maxamed Xaashi isu cadeeyaan.

Qof weyn oo masuul ah oo weliba doonaya inuu heer qaran madax ka noqdo, yaa u fasaxay inuu masuuliyiin kale caayo, miyey diintu u fasaxday cayda, uma ay fasaxin diintu, dhaqankeenii haboonaana umuu fasaxin, dawladnimada iyo madaxnimada ay sheeganaynaana ma ogola.

Maxamed wuxuu ka soo raamsanayaa halkii Ildab dheere iyo Xoore, dhaqankooduna sidan ma ahayn raggii u talin jiray ee odayaasha u ahaa Maxamed Xaashi, waxa uu adeegsanayaa inamada yaryar.

Waxa kaloo la yidhi wasiirka Hawlaha Guud iyo taliyaha CID-da ayaa isku qolo ah. Haatuf waxa kale oo ku qornayd afar nin oo reer Nuur ah oo la yidhi madaxtooyadaa laga shaqaaleeyey, goormaa qolooyin la noqday oo qaranimadii laga baxay, goormaa la xisaabiyay shaqaalaha dawladda oo qolo waliba inteedii la baxday, haddii xaafadayda laga helay aniga iyo ninka CID-da jooga, Maxamed Xaashi iyo xaafadooda inteebaa ka shaqaale ah, intee baase masuuliyiin ah, yaase cadaalad-darro wax ku haysta. Waxa jira 25,000 oo shaqaale ah marka ciidamada qaranka lagu daro, yaa wax inoo qaybiyay, yaa xisaabiyay, maxaa afarta reer Nuur iyo labada reer Caynaanshe tilmaamay.

Haddiise ay Haatuf noqotay fawaaxish ama cayda ay qaabiso oo ay dadka burush xaarleh marmarinayso, maxay u wada sheegi wayday yaa hantidii qaranka haysta, yaa daaro dhaadheer ka dhistay, yaa beerihii haysta, yaa guryihiin dawladda haysta, waxaynu leenahay oo aynu ka hadalnaa Sool iyo Sanaag bari ayaa la haystaa, Hargeysa ayaa badh maqan tahay, wixii aynu qaran iyo dawlad ku noqon lahayn dad baa haysta oo dawladda xafiisyadii iyo guryihii baa laga haystaa oo dhulkiibaa la haystaa.

Anigoo wax badan og, anigoo ay aniga iyo dad ila mid ahiba wax badan dhoob-dhoobayeen, ma doonayo inaan ka nixiyo dadka reer Somaliland ee wanaaga iyo horumarka Soamliland jecel, waxaanse leeyahay haddii aan la xishoon oo tixgelin la samayn, oo dhaqankeenii suubanaa iyo diinta loo noqon oo aan la odhan hebelow ka daa, waxa muuqan doona wax badan oo aanu daaha saaraynay.

Waar marka madaxweynaha la caayo ee marwadiisa la caayo ee wasiirada la caayo xikmadda ka dambaysaa maxay tahay, xikmadda ka dambaysaa waxay tahay shalayna kuwo (Madaxweyne) ayaa la caayayey, maantana kuwo (Madaxweyne) ayaa la caayayaa, waxa la doonayaa inaynaan waxba noqon.

Madaxweynaha marka la leeyahay waa tuug, waa musuqmaasuq taas macnaheedu waxa weeye caalamkow hana aaminina, Somaliland wax maaha, oo mar haddii ka noo madaxweynaha ahi sidaa yahay, oo marwadiisii sidaa tahay, ee wasiiradiisu tuug yihiin, waxba ma nihin, dhaqanka meesha laga rabaa waa kaa.

Rag Somaliland u dhashay baa reer Somaliland ka hor yimid ama ka soo horjeeda imika, raggaa sida Ina Buubaa oo koonfur u shaqo tegay waxa ka khatarsan ninka gudaha jooga ee doonaya inuu gudaha ka dumiyo, ee doonaya inaan laba isu iman, oo aanay dadku u midoobin cadowgooda oo uu tafaraaruq ku rido. Haatuf iyo Maxamed Xaashi waxa ka dhow Ina Buubaa.

Runtii waan ka xumahay maan jeclayn meelaha qaar inaan gaadho, wayse socon doontaa haddii la wado waxaanan jeclahay inay noqoto riwaayad laga ilaaliyo carruurta iyo dumarka uurka leh oo ragga waaweyni isu soo baxaan.”

Su’aalihii halkaa lagu weydiiyey waxay u dhaceen sidan:
S: Weerarkan aad ku qaaday Wargeyska Haatuf iyo sidan aad u hadashay ee ilaa xad aad beelo gaadhay, miyaan la odhan karin adigaaba xaaladii taagnayd ka sii daray?
J: Anigu Shirkan jaraa’id ugumaan talo gelin inaan cidi waxaanay ahayn ku sheego, dadkana qof baan ka magac dhabay, waxaad ogtihiin baanan ku magac dhabay.

S: Maxaad ku cadaynaysaa in Maxamed Xaashi Haatuf ka dambeeyo?
J: Soo kii lahaa maxaa Haatuf loo taabtay ee loola hadlayaa ee madaxweynuhu ku cambaaraynayey ee caayay Madaxweynaha iyo Marwadiisa.

S: Dad badan ayaa ka hadlay xadhigga masuuliyiinta Haatuf xadhiga Haatuf ee maxaad Maxamed Xaashi gaar ugu soo soocday miyaan arrintaadu noqonayn eedayn qabiil?
J: Maxaa Yuusuf Cabdi Gaboobe, Cabdifataax, Maxamed Rashiid iyo Ina Xaashi is-daba dhigay, maxayse u sheegayaan inaanu isku qolo nahay taliyaha CID-da. Oo laga yaabo inuu yahay ka keliya ee xaafadayada yahay.

S: Marka laga hadlayo arrimaha musuqmaasuqa, qoysaska maamulka madaxtooyada caalamka haya waa lagu eedeeyaa arrimo musuq maasuq oo ay galeen, markaa adigu ma waxaad u haysataa haddii musuqmaasuq la sheego in madaxtooyada la ceebeeyey oo lagu gefay?
J: Maya, anigu sidaa uma jeedo laakiin, waxaan kuu sheegayaa in waxan lagu eedaynayo madaxtooyada ay been tahay, laakiin qofka bini’aadamka ah khalad wuu ka dhici karaa, madaxweynaha ha noqdo, marwadiisa ha noqdo, aniga ha noqdo, bini’aadamku waa khaldaamiin, laakiin wixii been abuur ah ee magac-dil ah ee aan kaaga metelo qorigii shalay shaaraca lala joogay in maanta lagu dilayo dadka, afku waxa uu la xoog yahay magliga xawda kaa jaro’e, afka hadii la doonayo la isku dilo maanta oo la joojin-waayo, cayda, fawaaxishka iyo nijaasta la wado ee la doonayo in lagu baabi’iyo Somaliland taa waa laga hadlayaa.

S: Waxaad sheegtay inaad tahay masuulkii ugu wax qabadka badnaa ee soo maray wasaaradda hawlaha Guud, haddana waxaa la ogyahay in biriishkii magaaladu wali dunsan yahay, waa maxay markaas waxa aad ku faanaysaa?
J: horta biriishka waxa inaga heshay aafo qaran, qarankoo dhamina wuu u gurmaday. Jiitankuna waxa uu ka dhashay tamarteena, nin khabiir ku ah dhismaha biriishyada ayaanu sugaynay, ninkaasina dhawaan ayuu yimid, qandaraaskii tartankana shalay ayaa la bilaabay, horaanta February-na waxaa la filayaa inuu kombaniga ku guulaystaa uu shaqada dhismaha bilaabo.

S: Maadaama baabuurta dawladda loo iibinayo iyo kuwa la xaraashayaba ay u qaabilsan tahay Guddida Qandaraasyadu miyaanay gaadhigan madaxtooyada aad kala wareegteen sharci darro miyaanay noqonayn, habkii laydiinku soo wareejiyey?
J: Wasaaradda Hawlaha Guud Gaadiidka ay wadataa waxay u badan yihiin baabuurtii hawlgabka ah. Haday iskaraab tahay iyo haday gaadiid daalay oo la xaraashayo tahayba, waxa u xilsaaran qaranka Wasaaradda Hawlaha Guud, waxaana la xaraasha xubin wasaaradda maaliyadda ka socota iyo xubin hanti dhawrka Qaranka ka socota.
Mida kale, Qarankani ma qaran ay saxaafaddu hanti dhawr u tahay baa, haddiise wax la lunsado miyaan hay’ado daba-gala oo qaranka u qaabilsani jirin, haddaad soo ogaato wax la lunsaday dee u tag xisaabiyaha guud. Dalkani cagaha iskuma taagin waxna muu noqon in loo tudho buu u baahan yahay. Madaxweynuhu markuu dibadaha tegayay ee aad lahaydeen intaas milyan buu qaatay oo aynaan haysanba, miyaanay ahayn dadkii loo baryo tegay inaan ku lidihiin waar waa tuuge waxba hanooga dhiibin, iyadoo aan ogahay in markii masaariiftii ka go’day Yurub in nin reer Somalilander ahi masaariiftii ka bixiyay afartaa cisho ee dambe, iyadoo aan ogahay in markii uu safarka ku marayay Afrika in nin Somalilander ah oo idinla mid ah laakiin aan damiirkiinoo kale lahayn inuu muxawil ku qaaday oo ilaa imika lacagtii badh leeyahay.

S: Dacwadan Haatuf ku socota, ma ka noqon doontaa marag muujinaha Maxkamadda horyimaada?
J: Anigu waxaan marag ka noqonayaa dacwad ii gaarka ah ee aan xeer ilaalinta guud iyo Maxkamadda u gudbin doono ayaan marag iyo muduci ka ahay, cidii madaxweynaha caydaana waa cid Somaliland cayday.

S: Ma noo sheegi kartaa cida daaraha dhaadheer hantida Qaranka ka dhisatay ee aad ku eedeysay Haatufna?
J: Ma doonayo inaan ragga sii sheego, balse way soo bixi, cidda 50-ka baloodh haysata ee daaraha dhaadheer iyo beeraha haysataa, adiguba waad garanaysaa waxaanan la yaabanahay waxa raggaas loo sheegi waayey.
Miyaydaan su’aalaha joojinaynba miyeynu wadi uun haddii aydaan is qabanayn maxaa yeelaa. [kadibna wasiiru wuu kacay iyadoo su’aalihii la weydiinayo]

Top

Hargeysa, January 14, 2007 (Haatuf) - Taliyaha Qaybta Dambi Baadhista Bileyska ee CID-da Saleebaan Muuse Xasan ayaa doraad abaaro 1:00 duhurnimo amar ku bixiyey in la xidho Mr. Kayse Axmed Cismaan oo raashin u siday Gudoomiyaha Haatuf Media Network Yuusuf Cabdi Gaboobe iyo Tifaftiraha Haatuf Cali Cabdi Diini oo muddo 14-maalmood ah ku xidhnaa qol ku yaala xarunta CID-da ee magaalada Hargeysa.

Kayse markii uu soo galay xarunta CID-da waxa lagu wargeliyey in aan loo geli karin labada suxufi ee halkaasi ku xidhan, isla markaana aan loo ogolayn inay cidiba aragto.
Ka dibna Taliyaha CID-da Saleebaan Muuse Xasan ayaa amray in xafiiskiisa loogu keeno, waxaanu u sheegay inuu xidhan yahay, iyada oo Kayse lagu amray inuu kabaha iyo suunka bixiyo, waxaana lagu xidhay qol ku yaala xarunta CID-da oo uu weli ku jiro.

Hase yeeshee, sida ay Kayse Axmed Cismaan ka soo weriyeen dad eheladiisa ah oo shalay ku booqday xarunta CID-da waxa uu u sheegay in shalay subaxdii loogu yeedhay xafiiska Taliyaha CID-da Saleebaan Muuse Xasan, kaasi oo weydiiyey su’aalahan soo socda.

Taliye Saleebaan: Ma istaaqaanaan qoladan Haatuf?
Kayse: Haa waanu is-naqaanaa oo asaxaab ayaanu nahay.

Taliye Saleebaan: Miyaad ka shaqaysaa Haatuf?
Kayse: Maya.

Taliye Saleebaan: Goormaad is-barateen?
Kayse: Muddo dheer ayaanu is-naqaanay, saaxiibo isku dheerna waanu nahay.

Taliye Saleebaan: Ma adaa siiyey macluumaadka ay ka qoreen madaxtooyada?
Kayse: Maya, anigu weriye ma ihi, kamana shaqeeyo Haatuf.

Taliye Saleebaan: Ma is-taqaanaan Maxamed Cumar (Weriyaha Haatuf ee Awdal) iyo C/Qani Askar [suxufi madax banaan oo dhawaan Haatuf ku qoray maqaal la xidhiidha mawaadiicda loo haysto] midna?
Kayse: Waanu is-naqaanaa oo niman tol ah ayaanu nahay.

Taliye Saleebaan : Ma laga yaabaa inay iyagu xogta Haatuf madaxtooyada ka qoreen ay labadaasi nin bixiyeen?
Kayse: Anigu ma ogi, ee iyagaad weydiin.

Inkasta oo uu amarka xadhiga Kayse bixiyey, taliyaha CID-da Saleebaan Muuse Xasan, haddana wuxuu taliyuhu Kayse u sheegay in markii horeba la raadinayey, oo lagu xidhiidhinayo arrinta loo haysto Gudoomiyaha Haatuf Media Network Yuusuf Cabdi Gaboobe iyo tifaftiraha Haatuf Cali Cabdi Diini oo ku saabsan eedo musuq-maasuq iyo ku takri fal awoodeed oo ay madaxweyne Rayaale iyo qoyskiisu ku kaceen.

Hase yeeshee, Kayse Axmed Cismaan mar uu taliyaha weydiiyey cida ku amartay inay raadiyaan isaga (Kayse) waa uu ka war-wareegay inuu u sheego.

Kayse Axmed Cismaan oo uu adeer u yahay Madaxweyne ku xigeenkii hore ee Somaliland C/Raxmaan Aw Cali Faarax, waxa uu hore uga mid ahaa koox Mujaahidiin ah oo ay xukuumadda madaxweyne Rayaale 2003 hore ugu eedaysay inay wadeen falal nabadgelyo darro ah, isla markaana in ka badan lix bilood si sharci darro ah ugu xidhnaa xabsiga dhexe ee Hargeysa, balse la sii daayey markii ay maxkamadu ku weyday waxyaabihii ay xukuumaddu ku soo eedaysay.

Top

Hargeysa, January 14, 2007 (Haatuf) – Ururada bulshada rayidka ah ee ka shaqeeya horumarinta iyo ilaalinta xuquuqda aadamiga Somaliland oo ay kulmiso dalada heer Qaran ee Isku-xidhka ururada xuquuqda aadamiga Somaliland oo magaceeda loo gaabiyo SHURO-Network, ayaa walaac weyn ka muujiyay sida sharci-darrada ah ee Bileyska Somaliland ugu diiday in ay ka qayb-galaan dhegaysiga dacwad lid ku ah qaar ka mid ah masuuliyinta iyo suxufiyinta Shabakadda wararka Haatuf ee madaxa banaan, dacwadaasi oo ka socotay hoolka Maxkamadda Gobolka Hargeysa shalay.

Gudoomiyaha SHURO-Network, Marwo Samsam Cabdi Aadan oo ka mid ahayd Saraakiisha xuquuqda aadamiga ee shalay laga horjoogsaday dhegaysiga dacwada masuuliyiinta Haatuf ee ka socotay hoolka Maxkamadda gobolka, ayaa waxay tidhi: “Haddii aanu nahay ururada xuquuqda aadamiga Somaliland, waxaanu aad iyo aad uga walaacsannahay sidii foosha xumayd ee ay ciidanka Bileyska ah iyo madaxdoodii ee shalay laga hawl-geliyay Maxkamadda Gobolka Hargeysa ay noogu diideen annaga oo ah wakiiladii iyo madaxdii ururada xuquuqda aadamiga dalka in aanu ka qayb-galo dhegaysiga dacwada lidka ku ah suxufiyiinta Haatuf oo shalay ka socotay hoolka Maxkamadda Gobolka Hargeysa.”

Marwo Samsam oo faahfaahinaysa ujeedada ay uga qayb-galeen ama u xiisanayaan ka qayb-galka dacwadaasi ayaa tidhi: “Annagu maadaama aanu nahay ururadii wadaniga ahaa ee isku xilsaaray ilaalinta xuquuqda aadamiga, waxaanu rabnay bal in aanu hubsano inay cadaalad iyo garsoor dhex ah helayaan suxufiyiinta Haatuf ee dacwada lidka ku ahi ka socotay hoolka Maxkamadda shalay.”

Geba-gebadii waxay Marwo Samsam Cabdi Aadan wasaaradda Arrimaha Gudaha JSL iyo guud ahaan hay’adaha sharci-fulinta Somaliland ka codsatay in ay ixtiraamaan difaacayaasha xuquuqda aadamiga iyo xuquuqda hawl-wadeenada saxaafadda madaxa banaan ee war helida, isla markaana aanay Bileysku is-hortaag ku samaynin kormeerayaasha xuquuqda aadamiga ee u dhabo gelaya in eedaysanayaashu garsoor dhex ah ka helayaan cadaaladda Somaliland. “Haddiise sidii shalay annaga nagu dhacday oo kale naloo diido xataa ka qayb-galkii dhegaysiga Maxkamadda, taasi waxay shaki weyn gelinaysaa dhexnimada garsoorka Somaliland, iyadoo muujinaysa in eedaysanayaashu aanay helayn garsoor xaq ah oo cadaalad ku dhisan.”

Top

Hargeysa, January 14, 2007 (Haatuf) – Ururada saxaafada Somaliland ee SSJW iyo SOLJA ayaa ka digay in eeddaha saxaafada loo qabsado ka gar-naqidooda loo raaco xeerka ciqaabta Guud, waxaanay ururadu sheegeen in aanay aqbali doonin eed kasta oo ku salaysan xeerkaasi oo loo adeegsado dacwad ay cidi ku soo oogtay warbaahinta madaxa banaan ee Somaliland.

Guddoomiyaha ururka saxaafada ee SOLJA, Mustafe Cabdi Ciise (Shiine) ayaa isaga oo ka hadlaya arrintaasi waxa uu yidhi “Ma aqbali doono eed kasta oo lagu soo ooggo saxaafada madaxa banaan leh oo aan waafaqsanayn xeerka saxaafada Somaliland ee golayaasha sharci-dejintu ansixiyeen, madaxweynuhuna saxeexay, sidaas darteed hadii garsoore ka mid ah maxkamadaha hoose uu iska yidhaahdo waan laalay xeerka saxaafada, waxaanu ka furan doonaa dacwad ka dhan ah”.

Gudoomiyaha Solja waxa uu intaas raaciyey inay kiis dacwadeed ka furan doonaan hadii maxkamada gobolka Hargeysa u raacdo ka garsoorida eedaha loo haysto gudoomiyaha HMN Yuusuf Cabdi Gaboobe iyo Tifaftiraha Wargeyska Haatuf Cali Cabdi Diini xeerka ciqaabta Guud ee 1962-kii dawladii hore Somalia samaysay, isla markaana cid kasta oo saxaafada u adeegsata xeerkaasi ay sharci la tiigsan doonaan.

Dhinaca kale, C/raxmaan Axmed Shunuuf oo u hadlay ururka suxufiyiinta iyo qorayaasha madaxa banaan ee Somaliland (SSJW) ayaa sheegay inuu hadda soo baxday walaacii ay ka qabeen in gudoomiyaha Haatuf Yuusuf Cabdi Gaboobe iyo tifaftiraha wargeyska Haatuf Cali Cabdi Diini ay heli karaan garsoor dhex ah oo cadaalad ah, ka dib markii maxkamada gobolka Hargeysa ay sheegtay inay eeddda loo haysto labadaas suxufi ay kaga garsoori doonto xeerka ciqaabta ee dawladihii hore Somalia ku dhaqmi jireen, iyada oo dhinac iska dhigtay xeerka saxaafada qaranka Somaliland, taasi oo ka soo horjeeda qodobka 32 ee Dastuurka Qaranka Somaliland iyo Xeerka saxaafadaba.

Waxaanu C/raxmaan sheegay in aanu ururka SSJW marna aqbali doonin xukun kasta oo ku salaysan xeerka ciqaabta, oo ay Maxkamadda Gobolka Hargeysa ku xukunto Masuuliyiinta Haatuf.

“Ururka Suxufiyiinta iyo Qorayaasha Madaxa Banaan ee SSJW waxa uu hore u sheegay inuu ka walaacsan yahay sida ay labadan suxufi u heli karaan garsoor cadaalad ah, imikana waxa soo baxaya wixii aanu hore uga digaynay, sababta oo ah, Garsooraha hadda ka garnaqaya kiiska eeda loo haysto Gudoomiyaha Haatuf Media Network Yuusuf Cabdi Gaboobe iyo tifaftiraha Wargeyska Haatuf Cali Cabdi Diini, wuu ka baaqsaday inuu qaraar ka soo saaro xeerka saxaafadda Somaliland iyo xeerka Ciqaabta Guud, midka uu kaga garsoorayo dacwadooda.

Sidaa darteed marka la eego hab-dhaca dacwada iyo garsoorkeeda, waxa uu ururka Suxufiyiinta iyo Qorayaasha Madaxa Banaan ee Somaliland aaminsan yahay in aan dacwad la qaadi karin, iyada oo aan loo marin qawaaniinta sharciga ah ee dalka u taala, sidaasi darteed ururka Suxufiyiinta Qorayaasha Madaxa Banaani waxa uu halkan ka cadaynayaa in aanu marna ogolaan doonin in dacwada eeda Suxufiyiinta Haatuf loo haysto lagu qaado xeerka Ciqaabta ee Somalia.

Ururka suxufiyiinta iyo Qorayaasha Madaxa Banaan ee Somaliland waxa uu ka digayaa haddii aanay maxkamadda gobolka Hargeysi go’aan cad ka soo saarin in dacwada suxufiyiinta lagu qaadayo xeerka Saxaafadda Somaliland, in uu gebi ahaanba qaadici doono in suxufiyiintu hortagaan Maxkamadda, sababta oo ah garsooruhu wuxuu diiday inuu qaraar ku soo saaro xeerka uu u raacayo dacwadan labada suxufi, wuxuuna diiday inuu ogolaado damaanad ay labada suxufi iyaga oo debada jooga iskaga difaacaan eedaha loo soo jeediyey”.

Afhayeenka Ururka SSJW waxa uu intaasi raaciyey oo uu yidhi, “Waxa aanu golayaasha sharci dejinta ugu baaqaynaa inay xeerkan saxaafadda Somaliland ee ay saxaafadu dedaafaysay wax ka yidhaahdaan, si loo ilaaliyo shuruucda dalka u taala”.

Top

Hargeysa, January 14, 2007 (Haatuf) – Golaha Wakiilada oo ku guda jira kalfadhi aan caadi ahayn ayaa fadhigoodii shalay oo albaabadu u xidhnaayeen waxay mudanayaashu warbixin ka dhegaysteen guddidii turxaan-bixinta khilaafaadka golayaasha qaranka ka metelaysay golahooda.

Fadhigan oo albaabadu u xidhnaayeen, isla markaana saxaafadu ay dibada ka joogtay oo uu goduuminayay guddoomiyaha golaha wakiilada Md. C/raxmaan Maxamed C/laahi (Cirro) ayaa la sheegay in goluhu warbixin kaga dhegaystay guddoomiyaha ergadii turxaan-saarka uga qayb-gashay wakiilada Md. Maxamed X. Maxamuud Cumar Xaashi oo sida la sheegay golaha uga xog-waramay hawshoodii turxaan-bixintu inay meel fiican u marayso, isla markaana aanay jirin wada xaajood burburey, isaga oo intaa ku daray in muddo afar maalmood ka dibna ay wada jir u soo saari doonaan qodobada ay heshiiska kaga gaadheen wada xaajoodkoodii u socday guddigooda saddexda gole qaran.

Kulankaa ka dib, ayaanu wax ka weydiinay saddex mudane oo ka soo kala jeeda mudanayaasha saddexda xisbi qaran (UCID, Kulmiye & UDUB) ka kala tirsan, kuwaas oo aanu wax ka weydiinay waxyaalaha ay kulankooda kaga wada hadlayeen iyo sida ay u arkeen xadhiga masuuliyiinta Haatuf Guddoomiyaha Yuusuf Cabdi Gaboobe iyo Tifaftiraha Cali Cabdi Diini oo muddo 14 maalmood ah ku xidhan CID-da.

Ugu horeyn, Md. Bashiir Sh. Xuseen Tukaale oo ka hadlaya kulankooda iyo xadhiga masuuliyiinta Haatuf ayaa yidhi “Fadhigayagan albaabadu u xidhnaayeen waxa uu ku saabsanaa warbixin ay gudidii turxaan-bixinta nooga qayb-gashay ayna siinayeen, waxaanay noo sheegeen inay hawshoodu meel fiican u marayso, afar maalmood ka dibna ay si wada jira u soo bandhigi doonaan qodobadii ay heshiiska ku soo gaadheen guddiyadii kala sida xeer hoosaadka goluhu dhigayana fadhiyo furan iyo fadhiyo gaaraba way ku xusan tahay. Arrinta xadhiga msuuliyiinta Haatufna waxa imika gacanta ku haysa maxkamada gobolka, waxaanuse u soo jeedinaynaana in kiiskaasi ay maxkamadu si cadaalada uga garsoorto oo ay ka ilaaliyaan laaxinka, sidaas darteed waxaanu ka war-sugi doonaa sida qaraarka maxkamadu noqdo”.

Md. Axmed Maxamed Diiriye (Nacnac) oo isagu ka mid ah mudanayaasha xisbiga Kulmiye ayaa yidhi “Arrinta xadhiga masuuliyiinta Haatuf waxaan u arkaa arin sharciyada dastuurka qaranka ka baxsanayd, habkii loo qabtay xadhigooduna waa mid cadaalad darro ah oo ka soo horjeeda shuruucda saxaafada, waananu cambaaraynaynaa”.

Md. C/kariin Aw Cali Shabeel oo isaguna ka tirsan mudanayaasha UDUB ee golaha wakiilada ayaa isaguna yidhi “Arintaa xadhiga Masuuliyiinta Haatuf hore ayaan uga hadlay, waxaanan anigu qabaa in xadhigooda shuruucda saxaafada iyo dastuurka qaranka lagu dabaqo, isla markaana si cadaalada dooda ay maxkamadu u eegto”.

Gebagabadii fadhiga waxa mudanayaasha loogu qaybiyey qorshe hawleedka kalfadhiga aan caadiga ahayn iyo qodobada ajandahooda ay kaga doodi doonaan.

Top

Muqdisho, January 14, 2007 (Haatuf) – Tan iyo intii Maraykanku weerarada Cirka ah ku qaadeen Raaskambooni iyo deegaamada ku wareegsan ee Somalia todobaadkii ina dhaafay, waxa laga soo weriyey in dad badan oo rayid ahi ku dhinteen halkaasi, balse dawladda Washington marna kamay waramin sababta ka dambaysa weeraradaasi.
Warsaxaafadeed ay soo saartay Safaaradda Maraykanka ee Nairobi, ayaa ka soo xigatay afhayeenka wasaaradda Difaaca dalkaasi Sean McCormack inuu yidhi waxa uu bartilmaameedkayagu ahaa xubin sare oo ka tirsan Al-Qaacida oo hawlo Somalia ka waday.

Sidoo kale, ma jirto daadefayn iyo qirasho toona oo ay Maraykanku ka bixiyeen weerarka cirka ee Maraykanka oo loo qaatay inay tahay mid ay ka dalbatay Itoobiya oo ciidamadeedu difaac adag kala kulmeen maleeshiyooyinka maxkamadaha ee agagaarka Raaskambooni.

Hase yeeshee, inta la ogyahay ugu yaraan 30 qof ayaa ku dhintay weeraradan, qaar kale oo badan oo ay ka mid yihiin dad xoolo dhaqato masaakiin ahina dhaawacyo ayaa ka soo gaadhay. Weeraradani keliya kuma koobnayn Raaskambooni, balse waxa kale oo la weeraray Hayo, Gareer, Jankajirow, Afmadaw iyo meelo kale.

Waxa keliya ee la ogyahay dadka la sheegay inay Al-Qaacida Xidhiidh la leeyihiin ee gudaha Somalia ama ka baxsani waxay ay yihiin Abu Dalxa Al-Sudani (reer Sudan), Saalax Ali Saalax Nabhan (Kenyan), Fazul Abdulle Mohamed (Kenyan/Commorian), kaasi oo laga shakisan yahay in lagu dilay weeraradan iyo Fahid Maxamed Cali Msalam (Kenyan).

Sidoo kale waxa ka mid ah Sheekh Maxamed Saalim Swedan, oo weli ku jira dadka ay FBI-du aadka u raadinay, oo isna ka mid ahaa shakhsiyaadka la beegsanayey.
Waxa ay wararku sheegeen in kooxahan argagixisada loo haystaa ay ku sugan yihiin Raaskambooni, halkaasi oo ay la joogaan Maxkamadihii awooda laga qaaday, kuwaasi oo ka talin jiray Muqdisho iyo meelo kale oo Somalia ah intii u dhaxaysay June 2006 ilaa December 2006.

Hase yeeshee, ilaa hadda dawladda Maraykanku ma ay cadayn in dadka ay FBI-du raadinaysay lagu dilay weeraradaasi iyo inkale.

Top

Siiradii Rasuulka (SCW)

Waa buug dhawaan soo bixi doona oo magaciisa la yidhaahdo “Furaha Quluubta”, waxaana qoray Qoraaga reer Somaliland ee Maxamed Xaashi Cismaan. Buuggan waxa uu ka hadlayaa Siiradii Rasuulka {SCW), islaamka ka hor iyo jasiirada Carabta. Haddaba waxaad kala socon doontaan Qaybihiisa Wargeyska Haatuf, haddii Eebe Idmo oo uu si xidhiidh ah ugu bixi doono.

Qaybihii - 19aad

CUTUBKA LABAAD

TAFIIRTII NEBI ISMAACIIL CS
Nebi Ismaaciil Bin Ibraahim, wuxuu dhalay laba iyo toban wiil oo ah: Naabit, Qaydar, Adbal, Maysha, Masmac, Maashi, Dama, Adar, Daym, Yadwar, Nabash iyo Qaydum.Naabit Bin Ismaaciil wuxuu dhalay Yashjub, oo sii dhalay Yacrab, oo isna sii dhalay Tayrax,oo sii dhalay Naaxuur, oo sii dhalay Maqawim, oo sii dhalay Add, oo sii dhalay Cadnaan. Haddaba marka Cadnaan la soo gaadho ayey u qaybsameen qabaa’il ilmo Nebi Ismaaciil. Cadnaan wuxuu dhalay laba wiil: Macad Bin Cadnaan, iyo Cak Bin Cadnaan. Waana labada ay ka tafiirmeen qabaa’ilka Carabtu.

Cak Bin Cadnaan wuxuu degay guriga Yaman, halkaas oo uu ka guursaday Ashcariyiinta, markaasu dhex degay oo deegaankii iyo luqadiiba noqotay mid keliya. Ashcariyiintuna waa ilma Ashcar Bin Nabat Bin Adad Bin Hamaysac Bin Camar Bin Cariib Bin Yashjub Bin Zeyd Bin Kahlaan Bin Yashjub Bin Yacrab Ibnu Qaxdaan.

Macad Bin Cadnaana wuxuu dhalay afar wiil: Najaar, Qudaaca, Qanas,iyo Iyaad. Qudaaca waxay u guurtay xagga Ximayr Bin Saba, Qanas Bin Macad se way madheen intii ka hadhay sida uu leeyahay Nusaab Bin Macad. Waxaana ka mid ahaa Al Nucmaan Bin Al Mundir boqorkii Xiira.

ABTIRSIINTII RASUULKA SCW
Waa Muxammed Bin Cabdillaahi, Bin Cabdi Mudalib (Sheybah), Bin Haashim (Camar), Bin Cabdi Manaaf (Almuqiira), Bin Qusay ( Zeyd), Bin Kilaab, Bin Murra, Bin Kacab, Bin Lu’ay, Bin Qaalib, Bin Fihir, (oo la odhan jiray Quraysh) Bin Maalik, Bin Nadar, Bin Kinaana, Bin Khuzayma, Bin Mudrika ( Caamir), Bin Ilyaas, Bin Mudar, Bin Nizaar, Bin Macad, Bin Cadnaan, Bin Ad, Bin Maqawim, Bin Naaxuur, Bin Tayrax, Bin Yacrub, Bin Yashjub, Bin Naabit, Bin Nebi Ismaaciil, ( Bin Ibraahim, Bin Taarix (Aazar), Bin Naaxuur, Bin Sawruq, Bin Raacaw, Bin Faalikh, Bin Caybar Ibnu Shaalikh, Bin Arfakhashad,Bin Saam,Bin Nebi Nuux,Bin Lamak, Bin Mutawshalakh,Bin Akhnuukh ( waa Idriis sida la yidhi ) Bin Yard, Bin Mahlayl, Bin Qaynan, Bin Yaanish, Bin Shays, Ibnu Nebi Aadam. Waxaana la isku raacsan yahay siduu Nebigu SCW sheegay abtirsiinta,oo la hubaa uun ilaa Cadnaan.

QOYSKII RASUULKA SCW
Raaska Nebiga SCW waxa loo yaqaan qoyskii Bani Haashim, kaasoo ah magaca awoowgiisii labaad ee Haashim Bin Cabdi Manaaf. Markaasi bal aynu wax yar ka sheegno xaalkii Haashim iyo kuwii ka dambeeyeyba. Waxaynu hore u soo sheegnay inuu Haashim ahaa kii isagu u qabtay xilkii waraabinta iyo sooridda xujaajta ilma Cabdi Manaaf, markii ay ku heshiiyeen ilma Cabdi Manaaf iyo ilma Cabdi Daar inay qaybsadaan xilkii dhexdooda. Haashimna wuxuu ahaa nin ladan oo sharaf weyn leh, waxaanu ahaa kii u horreeyey ee xujaajta Maka ku siiya Sariidka ( oo ah hilib iyo kimis). Magaciisuna wuxuu ahaa Camar, Haashimna looguma bixin waxaan ahayn kimistii uu u burburin jiray xujaajta. Waxaanu ahaa kii u horreeyey ee Quraysh u jideeyey labada safar ee jiilaalka iyo xaggaaga.

Warkiisana waxa ka mid ah inuu ganacsi ugu baxay xagga Shaam, oo markuu Madiina gaadhay uu ku guursaday Salma Bintu Camar oo ah reer Bani Cadi Bin Najaar, lana degay. Dabadeedna wuxuu u kacay xagga Shaam, iyana wuxuu kaga sii tegay reerkoodii tiiyoo uur qaaday Cabdi Mudalib. Wuxuuna Haashim ku dhintay Qaza oo dhulka Falastiin ah, haweenaydiisii Salmina waxay dhashay Cabdi Mudalib sannadkii 497 ee miilaadiga. Waxayna u bixisay Shayba (ciro) ciro ku tiil madaxiisa darteed, waxayna ku korisay gurigii aabbaheed ee Madiina, mana ogayn qof ka mid ah qoyskiisii Maka deggenaa. Haashimna wuxuu dhalay afar wiil oo kala ahaa: Asad, Abuu Sayfi, Nadla iyo Cabdi Mudalib, iyo shan hablood oo ahaa: Alshifaa, Khaalida, Daciifa, Ruqiya iyo Janah.

Waxaynu hore u soo ogaanay in xilkii waraabinta iyo sooridda xujaajta uu qabtay Haashim dabadii walaalkii Mudalib Bin Cabdi Manaaf. Waxaanu ahaa nin haybad iyo sharaf leh oo la addeeco, qiimo weyna ku leh qoladiisa. Qurayshina waxay u bixisay dhergiye deeqsinimadiisa darteed. Markii Shayba waa Cabdi Mudalibe uu kuray noqday ama ka sii weynba ayuu Mudalib maqlay warkiisa, waanu soo doonay. Markii uu arkayna ilmaa ka soo booday indhihiisii waanu isku duubay, waxaanu damcay inuu ku soo qaado rakuubkii uu watay. Markaasu Shayba ka diiday inuu raaco jeeroo ay hooyadii u ogolaato, markaasu Mudalib weydiistay hooyadii inay wiilka raaciso, wayna ka diiday. Wuxuuna yidhi: Wuxuu u socdaa inuu qabto xukunkii aabbihii, iyo Xaramka Alle. Markaasay u ogolaatay, Makana wuxuu keenay isagoo la fuushan awrkiisii, dadkiina waxay yidhaahdeen: Kani waa addoonkii Cabdi Mudalib, oo waxay u qaateen addoon uu soo iibsaday. Markaasu yidhi: Waa hoogteen e waa wiilkii walaalkay Haashim (waana taasi sababtii Shayba loogu bixiyey Cabdi Mudalib oo ah addoonkii Mudalib). Adeerkii Mudalib ayaanu Maka la joogay ilaa uu weynaaday, dabadeedna Mudalib wuxuu ku dhintay Bardmaan oo dhulka Yaman ah, dabadiina waxa xilkii qabtay Cabdi Mudalib. Markaasu ku dhaqay qoladiisii wixii ay aabayaashii ku dhiqi jireen, waxaanu ku dhex yeeshay qoladiisii sharaf aanu midna gaadhin aabayaashii, waanay jeclaadeen oo taladiisiina saamayn weyn bay ku yeelatay dhexdoodii.

Haddaba markii uu Mudalib dhintay waxa Cabdi Mudalib xilkii ka boobay Noofal oo qasab kaga qaaday, markaasu arrinkii u soo bandhigay rag Quraysh ah inay uga hiiliyaan adeerkii Noofal. Waxayna ku yidhaahdeen: Idin kala dhexgeli mayno adiga iyo adeerkaa. Markaasu abtiyaashii reer Bani Najaar u diray tixo tirtirsi ah, waxaana u soo gurmaday abtigii Sacad Bin Cadi oo wata sideetan rakuub fuushan, ilaa uu degay banaankii dooxa Maka. Markaasu Cabdi Mudalib la kulmay, oo uu yidhi: Abti ina keen aan guriga idin dejiyo e, markaasu yidhi: Maya, Ilaahay baan ku dhaartee ilaa aan Noofal helayo. Dabadeedna wuxuu u yimid Noofal isagoo la fadhiya Kacbada odayaal Quraysh ah, markaasu Abuu Sacad seeftii galka ka saaray, oo uu yidhi: Rabbiga Kacbadan leh baan ku dhaartee haddii aanad ku celin wiilka walaashay xilkiisii in aan seeftan kaala daali. Markaasu yidhi: Waan ku celiyey, waxaanu markhaati uga dhigay odayaal Quraysh ah. Markaasu ku degay gurigii Cabdi Mudalib, oo uu saddex cisho la deggenaa, dabadeedna inta uu cimraystay ayuu Madiina ku noqday. Markii ay taasi dhacday ayuu Noofal xulufo la noqday ilma Cabdi Shamis Bin Cabdi Manaaf, ooy iska bahaysteen ilma Haashim Bin Cabdi Manaaf. Markii ay reer Khuzaaci aragtay Bani Najaar oo abtinimo ugu hiilisay Cabdi Mudalib, ayey yidhaahdeen: Anaguba waxaanu u dhalay sida aad u dhasheen, anagaana u mudan hiilkiisa, taasoo ay Haashim hooyadii ahayd Khuzaaca. Markaasay galeen Daaral Nadwa, waxayna xulufo la noqdeen ilma Haashim oo ay isaga bahaysanayaan ilma Cabdi Shamis iyo Noofal. Isbahaysigaasina waa kii sababta u noqday furiddii Maka, sida aynu ku mari doono meeshiisa deriska furitaanka Maka. Cabdi Mudalibna waxa u muhiimsan arrimihii ku soo maray Xaramka laba arrimood oo kala ah: Qodistii ceelka Zamzamka iyo dhacdadii Maroodiga ee uu Abraha ku soo duullay Kacbada, si uu u dumiyo.

WARKII ASXAABUL “FIIL” MAROODIGA
Xabashida ayaa qabsatay Yaman oo xukumaysay sannado halkaas, dabadeed waxa taladii isku qabsaday Aryaad iyo Abraha, Xabashidiina way kala raacday. Markay iska horyimaadeen labadoodii ciidan oo la isku dhowyahay ayuu Abraha cid u diray Aryaad, in ay labadoodu isu soo baxaan oo ka la dilo ciidankiisu ku biiro ka kale. Aryaadna wuu ka yeelay markaasu Abraha u soo baxay, waxaanu ahaa nin gaaban oo buuran, oo Kiristaan ah. Aryaadna wuu usoo baxay, waxaanu ahaa nin qurux badan oo dheer, gacantana ku haysta waran. Abraha wuxuu iska dambaysiiyey wiil la odhan jiray Catwada si uu u ilaaliyo dhabarkiisa, Aryaad ayaa ku sii daayey warankiisii oo ku dhuftay Abraha, isaga oo la doonaya badhtamaha madaxa, wuxuu se kaga dhacay dhinac jeexayna sanka iyo il iyo debnaha. Catwada ayaa Aryaad waran kaga soo rideeyey Abraha xaggiisa dambe oo dilay. Ciidankii Aryaadna wuxuu ku biiray kii Abraha, kuna urureen Xabashidii Yaman joogtay.
Dabadeed Abraha wuxuu ka dhisay Sanca kaniisad uu u bixiyay Alquleys, oo u doonayey in uu u soo wareejiyo xajka Carabta. Wuxuu dhisay kaniisad aan lagu arag iyadoo kale xilligeedii dhulkaba wax la mid ah. Markaasu warqad u qoray Boqorkii Najaashi ee Xabashida, uu leeyahay: Boqoryahow anigu waxaan kuu dhisay kaniisad aan weli loo dhisin iyada oo kale boqor kaa horreeyey, mana nasanayo ilaa aan u soo wareejiyo iyada xajka Carabta! Markii ay ka war heleen Carabtu warqadii Abraha u diray Najaashi ayaa waxa cadhooday nin ka mid ah Alnasaah, markaasu intuu baxay u tegay kaniisadii Alquleys oo uu dhexdeedii xaar la fadhiistay, dabadeedna ku toosay reerkoodii. Markaasaa Abraha tii loo sheegay, wuxuuna yidhi: Yaa sameeyay tan? Waxa lagu yidhi: Waxa sameeyay nin Carabta ka mid ah oo reer Maka ah, oo uu ku yaal aqalka ay Carabtu u soo xajaan. Markuu maqlay hadalkaagii inaad u soo wareejinayso xajkii Carabta ayuu ka cadhooday kuna xaaray dhexdeedii, waayo uma qalanto taasi!

Abraha ayaa ka cadhooday tii, waxaanu ku dhaartay waa in aan gaadho gurigaa (Kacbada) oo aan dumiyo. Dabadeedna wuxuu faray Xabashidii inay is diyaariso ooy xidhxidhato, markaasuu hor kacay ciidankii isagoo maroodi wata. Carabtiina way magashay taasi waanay baqdeen, waxaanay ula muuqatay in jihaadkiisu xaq ku yahay markay maqleen inuu doonayo duminta Kacbada guriga Ilaahay ee xurmaysan. Dabadeed waxa u soo baxay nin ka mid ah ashraafta Yaman iyo boqoradooda oo la yidhaah, Du nafar. Markaasu u yeedhay qoladiisii iyo kuwii ka yeelay Carabtii kale la dagaalanka Abraha iyo ku jihaadka guriga Ilaahay ee xurmaysan, ee u la doonayo duminta iyo kharaabinta. Kuwii u jawaabay Du nafar ayaa horjoogsaday Abraha oo la diriray, Markaasu Abraha jabiyay Du nafar iyo ciidankiisii, loona soo qabtay oo loogu keenay maxbuus ahaan. Abrahana wuxuu u socday hortiisii isagoo u socdo wuxuu u soo baxay, ilaa markuu marayo dhulkii Khascam uu ku horjoogsaday Nufayl Bin Xubiib oo wata labada qabiil Sharaan iyo Naahas, iyo wixi ka raacay qabaa’ilkii Carabta. Wuu la diriray markaasu Abraha jabiyey, Nufaylna loogu soo qabtay maxbuus ahaan. Masuu dilin Abraha ee wuxuu u kaxaystay dal yaqaan ahaan, markuu marayo Daa’if ayuu u soo baxay Mascuud Bin Muctib oo ku jira rag ka mid ah reer Saqiif. Waxayna ku yidhaahdeen: Boqoryohow, waxaanu nahay addoomahaagii, ku maqlaya oo ku addeecaya, agtayadana khilaaf kuuma yaal, ma ahana kaa aad doonaysaa gurigayaga (waxay u jeedeen Laata} ee waxaad doonaysaa guriga Maka ku yaal, ee waxaanu ku raacinaynaa cid ku tusta. Dabadeedna wuu iska dhaafay. Waxay raaciyeen Abaa Riqaal si uu u tuso jidka Maka loo maro, Abraha ayaa baxay oo uu la socdo Abaa Riqaal ilaa uu ku degay Almaqmas oo maka u dhow. Markii uu dejiyey ayuu ku dhintay Abaa Riqaal halkii (Carabtuna qabrigiisa way tuurtuuraan).

Top

Xadhiga iyo dacwada lagu oogayo Gudoomiyaha, Yusuf Cabdi Gaboobe iyo Tafatiraha Haatuf Diini waxa ay tusaale uu tahay indhihiina oo shan ah in la laalay qodobkii u dabeeyey ee aad halaaga iyo dhibka iyo qaxa u soo marten. Waxa manta fal aan lala gabaneyn oo xishood laheyn loola badheedey in lagu yidaahdo waa xadhig hadii aad tidaahdo “MADAXWEYNE DAAHIR RAYAALE KAAHIN AYAA CIIDANKA KA SOO RAREY LAASCANOOD OO KEENEY CAYNABA TAAS OO KA DHIGTEY IN XADKU CAYNABA YAHAY”. Waxa la ina aqbalsiinaya in aynaan ka hadlin musmaasuuqa iyo xatooyayada lagu wadoo hantida qaranka. Waxaad mooda inaga oo arkeyna in dalku dhaxal wareegayo oo uu lumey waxaan dhammaan uu soo halganey.

Waxa inagu filan sida loo mareeynayo cabudhiinta ummada ee dhammaan saxaafada intii kale aad moodo in ay bustaha hoosta ka gashey. Jamhuuriya, Ogaal iyo dhamaan saxaafada waa qoolantahiin.

Awooda aynu haysano ee lagu diriri kara waa shacabka oo gadood ku soo baxa.
Waxaan soo jeedinaya in la abaabulo in banaabax lagu cabiro ku xadgudubka xuquuqda muwaadinka, Hadii kale aan quusano.

Waxaa aad iga fajicsay sida aan loola gaban in la ina cabudhiyo oo aynu hibad noqono. Waxa la ilaawey in hore waxii aanu heysaney oo dhan uu burburiney xorriyada.
Waxaan rabaa in aan aarko wargeyska ku dhaca leh ee soo daabaca maqaalkan aan gadoodno abaabulaya. Wargeyska oo qudha kuma deynaayo ee hubaal waan abaabulaya ku dirirka xaqa.

GUUL IYO GOBONIMO.
Rashiid Hassan Ali.

Top

Dhidar hadal ka dhacay waa halkuu dhaayaha u laalaadiyaa, dhunkana moogow wuu garanayaa dheef u intuu u nacaye, dhugo oo aduunyada waxaad dhigatee kuu yaala.

Waxaa maansadan i-soo xasuusisay hadalada curfiga iyo yaqyaqsiga ah ee ka soo yeedhay wasiirka hawlaha guud Siciid Sulub Maxamed oo shir-jaraa’id oo uu ku qabtay xafiiskiisa si aqoondarro ah ugu aflagaadeeyey beel ka tirsan beelaha Hargeysa iyo wargeyska Haatuf, waxaanse leeyahay ninka hadlaya miyaanu ahayn ninka dhacdadii 2-dii February 2005-tii ka masuulka ahaa, taas oo ahayd labadii marxuum ee ciidanka bileysku tacshiirada rasaasta ah ku rideen, iyaga oo marayay agagaarka wasaarada hawlaha guud, ka dibna halkaas ku geeriyooday, waxaan odhan lahaa isma oge agoon iyo aabaheed ninkii dilay, balse la yaab malaha hadalada ka soo yeedhay ina sulub, ceebtiina maahee waa caadadii oo hore ayuu dambi uga galay beesha uu aflagadeynayo maanta.

Hase yeeshee dembiga hore maaha kuwo lagu qarin karo erayo raqiis ah oo afkaaga ka soo yeedha, waxaanse odhan lahaa Ina sulub ceebtii maahee waa caadadii, maxaa yeelay wax aflagaadop iyo musuqmaasuq ka culus ayuu ka galay ummadda, wakhti munaasibana waa lagala xisaabtami, goobteed iyo goorteed, waxaanan odhan lahaa arimaha aad wadaa ka weyn wax caqligaaga ka soo baxay, adigiyo rag aad ka midatahayna ummaddu wy idinla socotaa, waana munaafaqad aad cid gaar ah ku meelayseen hadalada wiswiska ah ee kaa soo yeedhay, waxaan kuu soo jeedin lahaa inaad cuqdad nafsi ga iyo naxliga uurkaaga buuxiyey aanad ummadda qaadsiin, balse aad isku daweyso xoolaha qaranka ee aad sida xaaraanta ah ugu bahalowdayna ka waantow oo ubadkaaga u danee, si aanay cuqubo iyo dhaxal xun ugu iman, waa hadaad caqligaaga ka shaqaysiinayso, waxaanan kuu arkaa in xilka aanad u qalmin ee laguugula soo khaldamay.

Waxaan ku soo gebagabaynayaa waxa looga sii daray markii ninka maqasha dayacay geela loo diray.

Top