Haatuf News

Waxay ahayd 02/01/2007, markii goor galab ah ay ciidanka bileyska oo hubaysani weerar ku soo qaadeen xarunta xafiisyada Haatuf Media Network ee magaalada Hargeysa.
Markiiba ciidankii waxay bilaabeen inay gudaha u soo galaan xafiisyadii qolalka wararka, halkaasi oo ay khasaare ugu geysteen qalab kala duwan, weriyayaalna garaaceen, halka ay Gudoomiyihii Haatuf Media Network Yuusuf Cabdi Gaboobe iyo Tifaftirihii Wargeyska Soomaaliga ah ee Haatuf-na Cali Cabdi Diini labadaba u kaxaysteen xaggaa iyo xarunta CID-da ee magaalada Hargeysa.

Labadii suxufi midkoodna lama soo celin, labadoodiiba waxa lagu xidhay qol yar oo dhinaca koonfureed u jeeda, isla markaana aan daaqado lahayn, albaab bir ah oo weyn leh, dhexdiisana aanay waxba oolin, albaabkaa loo jiiday, dadku waxay islahaayeen, caawa ayuun bay xidhnaanayaan, waana la iska soo daynayaa, balse taasi ma dhicin, waxaana ay qaadatay inay halkaasi ku jiraan ilaa 04/02/2007.

Muddadaasi bisha iyo labada maalmood ah waxay suxufiyiintani u dhaxeeyeen, maxkamadaha hoose ee magaalada Hargeysa, gebi ahaantoodba, waxaana lagu murmayey waa in xeerka saxaafadda Somaliland loo raaco dacwada loo haysto labada suxufi iyo waa in loo raaco xeerka Ciqaabta guud. Waxa intaasi dheerayd in ka badan 8 maalmood, labada suxufi wax eed ah looma haynin, waxaase marba maxkamadda laga soo qaadanayey wax loogu yeedhay “Xalaalayn”, oo macnaheedu yahay in ay la hayayaal ku noqdaan xarunta CID-da.

14/01/2007, waxa waqti ay saacadu ku dhawdahay 9:30 habeenimo gurigiisa loogu dhacay, lagana soo qabtay Weriye Maxamed Cumar Sheekh, oo isaguna Haatuf uga soo warami jiray gobolka Awdal, waxaana lagu xidhay saldhiga dhexe ee Boorame, halkaasi oo uu ku jiray muddo saddex maalmood ah oo aan loo ogolayn inay arkaan ehelada iyo asaxaabtiisa midkoodna.

Waxa xigtay 17/01/2007, ayaa waxa weriye Maxamed Cumar loo soo dhaadhiciyey dhinaca magaalada Hargeysa, waxaana lagu xidhay qol yar oo kaabado dhaadheer leh, isla markaana ay dhaxantu wehel la tahay oo ku yaala Saldhiga Degmada Ibraahim Koodbuur ee magaalada Hargeysa. Halkaasi oo uu ku xidhnaa ilaa 04/02/2007, maalintaasi oo inta gelinkii dambe laga soo saaray abaaro saddex galabnimo suxufiyiintii kale ee Gaboobe iyo Diini loogu keenay xarunta CID-da, maalintaasi oo loo balansanaa in maxkamadda gobolka Hargeysi dhegeysato dacwada loo haysto suxufiyiinta Haatuf, balse iyada oo aan waxba loo sheegin ayaa markeli ah gawaadhida soo fuula la yidhi.
“Kolayba xadhigayagu waa sharci darro, markaa tanina waa la mid uun” sidaa waxa tiraabay Weriye Maxamed Cumar oo weriye ka tirsan Haatuf kula kulmay xarunta CID-da daqiiqado ka hor intii aan galabtaasi loo caraabin jeelka weyn ee Mandheera.
Intii ay suxufiyiintani ku xidhnaayeen xarunta CID-da iyo Saldhiga Koodbuur, cambaarayn iyo baaqyo way hadh beeleen, balse dheg looma dhigin, waxaana marwalba la isku dayay in iyaga dambiilayaal laga dhigo, cidii dambiga lahaydna bilaa dambi.

Dabcan, waxa laga yaabaa in qof isweydiiyo, maxaa sidaa loo odhanayaa, laakiin dabcan waxa keli ah looga baahnaa maxkamadaha iyo cidda ay khusayso dacwadaniba, haddii ay daacad ka yihiin arrintan in iyaga oo suxufiyiintu debada iska jooga la yidhaahdo, eedaha musuq-maasuq ee aad ka qorteen qoyska madaxtooyada cadeeya, laakiin taasi lama doonayo sababta oo ah cid ayuu dambi ku cadaanayaa, markaa waa in la isticmaalo xeerka Ciqaabta ee laga dhaxlay maamulkii dhiigya cabkii Maxamed Siyaad Barre, si aanay u soo bandhigi fadeexada maamul iyo musuq-maasuq ee ay qoyska madaxtooyadu ku kaceen ee Wargeyska Haatuf iftiimiyey.

Isku soo duuboo, marka la qiimeeyo aragtiyihii laga bixiyey, arrintan xadhiga aan sharciga ahayn ee suxufiyiinta Haatuf waxa dadkii wax ka qoray ka mid ahaa weriye C/Risaaq Maxamed Dubad, waxaanu qoraal uu qoray oo lagu baahiyey Wargeyska Geeska Afrika uu ku sheegay in xadhiga suxufiyiinta Haatuf ku dhamaan doono sidii uu ku bilawday “waa sharci darro’e”.

Hase yeeshee, ilayn sharci darro maxkamad hoose ku kacday waa la saxaa, laakiin su’aasha isweydiinta mudani waxa weeye, Gudoonka Maxkamadda Sare ee dastuuriga ahayd ayaa mar keli ah, maalin taariikhi ah go’aan ku gaadhay in gebi ahaanba la laalo shuruucda xorriyadda saxaafadda iyo ra’yi dhiibashada mar keli ah.

Qaraarkan ayaa Gudoomiyaha Maxkamadda Sare 20/02/2007 soo saaray, maalintaas oo ku beegan 25 sannadood kadib markii ay ardayda dugsiyada magaalooyinka Hargeysa iyo Burco 20/2/1982 dhagax kala hortageen ciidamadii dawladda Siyaad Barre, taas oo ka dhalatay xukunkii xaq-darrada ahaa ee lagula kacay xubnihii UFO, garsoorana uu ka ahaa ninkii saddex xaraf yaqaanay ee Geelle.

Imika xaaladu way soo dhaaftay suxufiyiinta Haatuf ha loo raaco xeerka saxaafadda iyo dastuurka Somaliland, balse waxay sheekadu maraysaa xikmadii odhan jirtay “Faal wax kama taro jannadda nin ay faro ka yaaliin”, markaa xeer saxaafadeed iyo dastuur midkoodna waxba ka tari maayo nin ficilo uu yaqaanay gacmaha iyo afkuba u cun-cunayaan.

Sidaasi darteed aan ku soo koobo, fariin muhiim ah oo odhanaysa “Meel walba la isla soo dhaaf, maxkamadihii hoose ee Xeerka Ciqaabta lagaga cabanayey dhaaftay, imika meeshu waa Mandheera, Garsooruhuna wuxuu xukunka ku qaadayaa xeerkii Ciqaabta ee galaaftay kumanaan qof oo aan waxba galabsan naftooda, kuwaasi oo ay saraakiishii ciidankii NSS-tu dambi ugu sameeyeen, ka dibna dhegta dhiiga loo daray”. Waxaase ugu cajiibsan maalinta suxufiyiinta Haatuf xabsiga loo taxaabay waxay ahayd 02/01/2007, oo ku beegnayd 02/01/1983-kii markii 40 Mujaahid oo uu hogaaminayo Alla ha u naxariistee Mujaahid Maxamed Xaashi Diiriye (Lixle) maxaabiis cabirka ra’yigooda loo xidhay kala baxeen xabsiga Mandheera oo ay hadda ku xidhan yihiin suxufiyiinta Haatuf.

Top

Dacwada Suxufiyiinta Haatuf Oo Maanta Lagu
Dhegaysanayo Xabsiga Mandheera

Hargeysa, March 1, 2007 (Haatuf) – Maxkamadda Gobolka Hargeysa ayaa maanta mar kale dhegaysan doonta dacwada Suxufiyiinta Haatuf ee muddada labada bilood ah lahayayaasha ku ah xabsiga weyn Mandheera, kadib markii ay qaraar ay soo saartay Maxkamadda Sare ee Somaliland shalay gebi ahaanba ku laashay ku-dhaqanka xeerka Saxaafadda ee dacwadaas, iyadoo dacwadaas Maxkamadda gobolka Hargeysa ku dhegaysan doonto xabsiga Mandheera ee ay suxufiyiintaasi ku xidhan yihiin.

Dacwaddan oo ay hore Maxkamadda Sare u hakisay dhegaysigeeda kadib markii ay qareenada difaacaya suxufiyiinta Haatuf racfaan uga qaateen Maxkamadda Sare qaraar ay Maxkamadaha gobolka iyo racfaanka Hargeysa ku laaleen in xeerka Saxaafadda lagu dhaqo dacwadaas, ayay Maxkamada sare maalintii shalay soo saartay go’aan ay ku ayidayso qaraaradaas ay Maxkamadaha hoose ku laaleen xeerka saxaafadda, waxaanay Maxkamadda Sare go’aankeedaas ku amartay inuu garsooraha dacwadaas gacanta ku hayaa si degdeg ah xukun uga soo saaro, waxaanu garsoore Faysal Ismaaciil isagoo amarkaas fulinaya maanta u muddeeyay in dhegaysiga dacwadaasi ka furmo xabsiga Mandheera, iyadoo la filayana inuu isla maanta si degdeg ah xukun uga gaadho.

Suxufiyiinta Haatuf oo kala ah Yuusuf Cabdi Gaboobe, Cali Cabdi iyo Maxamed Cumar Sheekh, ayaa xadhigoogu daba socdaa qoraalo taxane ahaa oo uu Wargeyska Haatuf ku soo bandhigay Musuqmaasuqyo ay galeen qoyska Madaxtooyadu, balse ciidanka bileyska ayaa bishii January 2, 2007 soo weeraray xarunta Wargeyska Haatuf, isla markaana si sharciga baalmarsan xabsiga ugu taxaabay gudoomaha Haatuf Media Network Yuusuf Cabdi Gaboobe iyo tifaftiraha Cali Cabdi Diini. Sidoo kale, isla bishii January 14, 2007 ayay xeer-ilaalinta gobolka Hargeysa oo ay weheliyaan ciidanka bileysku waxay magaalada Boorama ka soo qabteen weriyaha Haatuf ee gobolka Awdal, Maxamed Cumar Sh. Ibraahim.

Suxufiyiintan ayay Xeer-ilaalintu ku soo eedaysay inay aflagaado u geysteen Madaxweyne iyo qoyskiisa hase yeeshee suxufiyiintaas ayaa dacwadooda uu dhibanaha ka yahay Madaxweyne Rayaale waxa laga leexiyay gebi ahaanba in lagu dhaqo xeerkii saxaafadda Somaliland ee labada aqal ee baarlamaanku [wakiilada iyo guurtida] ansixiyeen, isla markaana uu Madaxweyen Rayaale saxeexay sannadkii 2004, kaas oo lagu bedelay in dacwadooda loo maro xeerkii ciqaabta guud ee dalkii Soomaaliya.

Dhammaan ururada xuquuqal-insaanka iyo kuwa saxaafadda ee gudaha dalka iyo kuwa caalamiga ah ayaa cambaareyn u soo jeediyay xadhigga suxufiyiintaas, isla markaana xukuumadda Somaliland ka dalbaday in si shuruud la’aan ah lagu sii daayo dacwadoodana loo raaco xeerka saxaafadda Somaliland leedahay, hase yeeshee Madaxweyne Rayaale iyo xukuumaddiisa ayaa gebi ahaan dhegaha ka furaystay dhawaaqyada iska soo daba-dhacaya ee gudaha iyo dibadda Somaliland, iyadoo dad badani u arkaa in tacadiga lagula kacay suxufiyiintaasi dhaawac weyn u geysatay sumcadii ay Somaliland ka kasbatay beesha caalamka.

Top

Mooshin Ku Saabsan Aqoonsiga Somaliland Oo Bishan
La Soo Hordhigayo Baarlamaanka Kenya

“Shantii Soomaaliyeed way kala tageene, maxaa Somaliland loo maagayaa”

Nairobi, March 1, 2007 (Haatuf) – Mudanayaal ka tirsan baarlamaanka dalka Kenya oo sannadkii hore booqasho ku yimid Somaliland ayaa sheegay inay mooshin la xidhiidha qaddiyada Aqoonsiga Somaliland soo hordhigi doonaan baarlamaankooda dalkooda 20-ka bisha March, 2007.

Sidaana waxa shaaca ka qaaday Mudane Bilow Keerow oo ah siyaasi miisaan culus ku leh siyaasadda dalka Kenya, lagana soo doorto gobolka Soomaalidu degto ee waqooyiga bari ee Kenya (NFD).

Mudanahani waxa uu sidaa ka sheegay xaflad weyn oo ay jaaliyadda Somaliland iyo mudanayaasha mooshinkan wadaa ku qabteen magaalada Nairobi ee dalka Kenya, taasi oo qayb ka ahayd ololaha la doonayo in baarlamaanka Kenya u codeeyo inay dawladda dalkaasi horseedo aqoonsi siyaasadeed oo ay Somaliland ka hesho beesha caalamka.
Mudane Keerow oo u waramayey Idaacadda Horn Afrik ee magaalada Muqdisho, isaga oo jooga xafladaasi waxa uu yidhi. “Dawladda Kenya waxaan raja weyn ka qabnaa inay aqoonsi buuxa siiso Jamhuuriyadda Somaliland, taas oo horseedaysa in Somaliland noqoto dal ka mid ah dalalka beesha caalamka”. Waxaanu Mudanuhu intaasi raaciyey, “Maadaama ay dawladda Kenya xilligan hayso gudoomiyenimada urur goboleedka IGAD waxay uga faa’iidaysan kartaa inay horseedo aqoonsiga Somaliland”.

Mudane Keerow, waxa uu sheegay in marka ay mooshinka horgeeyaan golaha baarlamaanka Kenya ee uu ansixiyo inay dawladda Kenya fuliso go’aankooda, isla markaana aqoonsato Somaliland.

Hase yeeshee Mudanahan oo weriyihii Horn Afrik ee waraysanayey weydiiyey, sida ay macquul u tahay inuu hogaamiyo mooshin lagu kala goynayo midnimada Somalia waxa uu yidhi. “Shantii Soomaali weyn goor hore ayey kala tageen, anigu waxaan ahay Soomaali, Kenya waxa ku yaala gobol dhan oo Soomaaliyeed NFD, sidoo kale Itoobiya waxa ku yaala kililka shanaad ee Soomaalida, Djibouti waa Soomaali, waan dawlad la aqoonsan yahay, oo madax banaan, marka maxaa Somaliland keliya loo maagayaa, ma iyadaa ugu horeysay kala tagga shantii Soomaaliyeed, jawaabtu waa maya, anigu waxaan qabaa in Somaliland la aqoonsado, sababta oo ah markii horeba dal madax banaan ayey ahayd, iyadaa la midowday 60-kii Koonfurta Somalia, haddana isaga tagtay markii ay aragtay dhibaatada ka dilaacday koonfurta”.

Kooxdan mudanayaasha reer Kenya ee doonaya inay baarlamaanka Kenya 20-ka bishan March soo hordhigaan mooshinka aqoonsiga Somaliland, waxa ay tiradoodu gaadhaysaa 13 mudane, kuwaasi oo ay afar ka mid ahi hore u soo booqdeen Somaliland, isla markaana habeen hore xafladda ee lagu taageerayey qaddiyadda Somaliland kala qayb galay jaaliyadda Somaliland ee halkaasi ku dhaqan.

Mooshinkan oo ay hogaaminayaan ruug cadaayo xubno ka ah baarlamaanka dalka Kenya, waxa uu noqonayaa markii ugu horeysay ee ay baarlamaan Afrikaan ahi u ololeeyo qaddiyada Aqoonsiga Somaliland, iyada oo horena bishii ina dhaaftay wasiirka arrimaha debada ee Rwanda si rasmi ah u soo dhex dhigay shirweynihii madaxda Afriki ku yeelatay Addis Ababa qaddiyada Somaliland, waxa ay tan baarlamaanka Kenya-na ka dhigaysaa in waqtigan ay wadamo iyo shakhsiyaad caan ahi iskood ugu hawlan yihiin qaddiyada Aqoonsiga Somaliland.

Top

Ururka HAWO GROUP Oo Ololaha Wacyi-Gelinta HIV-AIDS
Ka Sameeyey Degaanada Galbeedka Hargeysa

Hargeysa, March 1, 2007 (Haatuf) – Ururka HAWO GROUP oo ka mid ah ururada wadaniga ah ee ka hawl-gala wacyi-gelinta cudurka dilaaga ah ee HIV-AIDS ayaa olole balaadhan oo wacyi-gelin ah maalintii shalay ku soo sameeyey degaano ka tirsan gobolka Hargeysa oo ay ka mid ahaayeen Gadh-yogol, Abaarso, Dhaboolaq, Cadaroosh iyo Caro-yaambo.

Masuuliyiinta ururka HAWO GROUP oo wata gaadiid ay ku rakiban yihiin codbaahiyayaal ayaa waxay degaanada ay soo mareen dhamaantood u qaybiyeen qoraalo muujinaya khatarta cudurkaasi, isla markaana u jeediyey bulshada degaanadaasi khudbado la xidhiidha wacyi-gelinta cudurkaas dilaaga ah, waxaanay ugu horeyn ololaha wacyi gelinta ah ka bilaabeen xubnaha ururkaasi boqolaal ka mid ah dadweynaha ku dhaqan degaanka Gadh-yogol oo isugu soo baxay barxad ku taala dugsiga hoose ee tuuladaasi, halkaas oo uu kala hadlay Eng. Cumar Cilmi oo ah sarkaalka mashaariicda iyo tababarada u qaabilsan ururka HAWO GROUP, waxaanu bulshada isugu soo baxday kulankaasi uga waramay khatarta iyo waxyeelada uu leeyahay cudurkani dilaaga ahi iyo sida ugu haboon ee layskaga ilaalin karo, kaas oo uu tilmaamay inuu galaagtay ummad badan oo caalamka ku dhaqan, isaga oo dhinaca kalena sheegay in cudurkani uu ka dhasho fusuqa iyo sinada xaaraanta ah, waxaanu Engineerku yidhi “Ujeedada socdaalkayaga iyo kulankan aanu idiin qabanay waxa uu la xidhiidhaa sidii wacyi gelin aanu idiinka siin lahayn khatarta cudurka dilaaga ah ee HIV-AIDS oo ah cudur aan ilaa hada dawadiisa la helin, loona baahan yahay in qof kastaa ka feejignaado waxyaalaha uu ka dasho ee ay ka midka yihiin galmada xaaraanta ah, taas oo marka dambe sababta inuu qofku u geeriyoodo. Anagoo adeegsanayna wacyi-gelintayada ku jihaysan cudurkaasi buugaagtan iyo qoraaladan xambaarsan khatarta uu leeyahay ee aan idiin qaybinay , waxaanu idinkula dardaarmaynaa inaydin feejignaan iyo baraarug u yeelataan aafada cudurkaasi, iskana wacyi-gelisaan gudihiina”.

Waxa kaloo iyaduna halkaasi ka hadashay Marwo Aamina Cige oo ah gudoomiyaha HAWO GROUP, waxaanay bulshada degaankaasi ku dhaqan u sheegtay inaanay wajigoodu isku cusbayn ururka iyo bulshada reer Gadh-yogol, balse ay si balaadhan iskugu xidhan yihiin ururkooda oo ay tilmaamtay inuu waxyaalo badan oo la xidhiidha adeegyada bulshada ay ka qabteen, isla markaana ay diyaar u yihiin in siminaaro la xidhiidha wacyi gelinta cudurkani ay dhowaan ka samayn doonaan tuuladan iyo degaanada ku dhow dhow, isla markaana Marwo Aamina maamulka, macalimiinta iyo ardayda dugsiga hoose dhexe wax ka barata dardaaran weyn ugu jeedisay inay si balaadhan uga faa’iidaystaan boqol buug oo la xidhiidha wacyi gelinta cudurkaasi oo uu ururkoodu ku gudoonsiiyey kulankaasi ay u qabteen.

Dhinaca kale, waxa isaguna halkaasi ka hadlay Cumar Sheekh oo ka mid ah odayaasha tuuladaasi, waxaanu halkaasi mahad naq balaadhan uga soo jeediyey masuuliyiinta ururka HAWO GROUP oo uu sheegay inay wax badan ka qabteen degaanada ku xeeran tuuladan.

Sidoo kale, masuuliyiinta ururkani waxay ololahooda wacyi-gelinta cudurkani ku soo mareen degaanada Dhaboolaq, Cadaroosh, Caro-yaambo, Abaarso, kuwaas oo dhamaan dadweynaha ku dhaqan degaanadaasi ay u jeediyeen khudbado ku waajahn wacyi gelinta cudurkaasi dilaaga ah.

Top

Dawlada Hoose ee Boorama oo Bilawday Dhismaha Jid 10 Km ah
iyo Nadiifinta Magalaada

Boorama, March 1, 2007 – Dawladda hoose ee Boorama ayaa ka bilawday magaalada samaynta jid dhererkiisu gaadhayo 10 km, jidkaas ayaa ah mid wareeg ah oo isku xidhi doona xaafadaha magaalada Boorama.

Sida uu ku soo waramay Haashim Goth oo ka tirsan Shabakadda Awadalnews Duqa Magaalada Boorama Cabdi Shide Bile ayaa sheegay inay dawladda hoose bilawday banaynta jidadka iyo samayntooda kaas oo ay kharashka ku bixi doona ay bixinayso Dawladda hoose ee Boorama, “hawshana waxaan ugu talo galay in aan muddo dhawr bilood ah ku dhamaystiro, Jidadkani waa qaar ay dadku aad ugu baahi qabeen, waxayna u sahlaysaa isku socodka xaafadaha magaalada” ayuu yidhi Maayar Shide.

Banaynta jidadka ayaa dhanka kale waxay keentay khasaare taas oo ay cagafyadu waxyeeleeyaan qasabadaha biyaha ee magaaladu ka cabto, waxaana xaafadaha qaarkood ka go'ay biyaha, hawshaas oo ku noqotay shirkadda biyaha gacanta ku haysa ee SHABA mid culus oo ku keenta khasaare, lamana arag shaqaale ka socda SHABA oo tusaya Dawladda hoose meelaha qasabaduhu ku jiraan jidadka ee u baahan in ay iska ilaaliyaan.
Dhanka kalana waxay isla Dawladda hoose oo ay iskaashanayaan hay’adda Swiss-group bilaabeen olole dhinaca nadaafada ah, taas oo xaafadaha magaalada Boorama maalinba xaafad laga qaadayo khashinka, iyadoo maalmaha qaarna dadweynaha loo samaynayo wacyi-gelin dhanka nadaafadda ah, waxaana dadweynaha loo sheegayaa dhibaatada uu leeyahay khashinku iyo sida ay uga dhalan karaan cuduraddu. Waxa kale oo dadweynaha lagu boorinayaa in aanay caadaysan dugsashada xashiishka, iyadoo inta badana xanuunada ku dhaca carruurta iyo dadka waaweynba loo sababeeyaa in ay keenaan nadaafad xumada iyo xashiishka oo aan la iska fogayn.

Mashruucan nadaafada ee ay wada hirgalinayaan Dawladda hoose iyo Swissgroup ayaa socon doona mudo dhawr bilood ah, waxaana ka qayb qaadanaya D/hoose, Ururada wadaniga ah iyo warbaahinta, hawshuna waa mid tijaabo ah oo lagu eegayo in bal dadweynuhu fahmaan faa’iidada ay u leedahay.

Top

Ha Karaama Seegina

Gabay

Midhihii Axmed Cismaan

Kasma li’i calool loogu guray Raashin kala kaana
Kash taraaray dhuuniga kabiday Kurbadii shidaysay
Kadeed iyo adoon hawl u mudan tirada koorayda
Karuurkiisa geelaanad dhaqan waad ku kibirtaaye
Sidoon lawga kaaraha gubaa aanu karahaynin
Ha karaamo seegina habaar laygu kari waaye
Kumaa laga hayaa rag isyaqaan kuma kalaamaane
Kaskiisa hadal masuulkaa waxaan kaafiyeyn yidhiye
Hadaad kohato belo aan ku hayn waad la kulantaaye
Kelmadaa markii aad bulshada kor ugu qaadaysay
Kumaad darin kacaankii xaguu kaahinow maraye
Kurbadkiyo isma le sidaad shacbiga u kelifaysaane
Kudladii intaan cidi tarixinay ka kori wayday
Ee kaadir iyo guulwadihii lagu karbaashaayo
Sharaf inaad bulshada ka kasbataan kaafka kuma taale
Kuwii xaq u lahaayoo qunbaha wada kulaalaaya
Ummadii ku koolkoolisee kuugu riday foodka
Ee kaaga eexdee ku yidhi kaalay na hogaami
Malaa kooxdaa gabaaraydaad kaga kalsoonaatay
Mise faal ku haanaa ku yidhi awgayoow kalife
Kursigaa in lays daba galiyo kaashifaada lehe
Kartina ma lihid hadalxumana waad la kambadhuudhaaye
Kaban maysid caanaha haddii laysku soo kibo’e
Inbadan baanu kuu kaadinee kaarkan kugu oogan
Cid karaamo sugtaba dulqaad kaaba wuu hadhaye
Waxaad ka hesho haw dagan wanaag kugu filaan waaye.

Top

Ganacsatada Hillibleyaasha Hargeysa Oo Mar Ka
Dhawaajiyay Cabashadooda Korodhka Khidmadda Kawaanka Xoolaha

Hargeysa, March 1, 2007 (Haatuf) – Qaar ka mid ah ganacsatada Hilibka Hargeysa, ayaa mar kale soo bandhigay cabasho ay kaga soo horjeedaan lacag lagu kordhiyay adeega Kawaanka qalliin Xoolaha Hargeysa, oo ay maamusho shirkad madax-banaan oo lagu magacaabo Maandeeq, isla-markaana, waxay xukuumada ka dalbadeen gaar ahaan madaxweynaha iyo madaxweyne ku-xigeenka, inay arrintaa wax ka qabtaan.

Kontameeyo ka mid ah ganacsatada Hilibka oo ka kala hawl-gala suuqyo kala duwan oo magaalada Hargeysa ah, ayaa shir-jaraa’id oo ay shalay ku qabteen Hoteel Raasuun, ku soo bandhigay marxalado kala duwan oo ay soo martay cabashadoodu todobaadyadii ugu dambaysay, ka dib markii ay soo baxday qiimo-kordhinta adeegga Kawaanka Hargeysa.
“Intii aanu ku ganacsan jirnay kawaankii hore, ee aan loo rarin Kawaankan cusub ee Maandeeq maamusho waxa nalaga qaadi jiray 3000 neefka Geela ah, Lo’dana 2000, Adhigana 800. markii na loo raray Kawaanka cusub waxa laga dhigay Adhigii 3500, Geelii 7000, Lo’diina 4000. hase ahaatee, waxay tidhi shirkadda Maandeeq kordhiya lacagtii, oo waxa la yidhi 42,000 oo xataa qaadista bixiya, Adhigiina waxa la yidhi 6500, Lo’diina 22,000. taana waanu isku diidnay. Hase ahaatee, Maayarkii baa naga raacay shirkadii oo iyada laftigeedu shiciba sidayada oo kale.” Sidaa waxa yidhi, Iid Yuusuf Shookaan, oo ka mid ahaa xubnihii halkaa uga hadlay Hiliblaha, faahfaahinayayna bilowgii isqabsiga Hiliblaha iyo shirkadda Maandeeq, waxaanu intaa ku daray oo yidhi, “Waanu dacwad tagnay, ilaa madaxweyne ku-xigeenka ayaanu soconay, Badhsaabkana loo xil-saaray arrintayada inuu wax ka qabto, dhawaan baanu yidhi Guddi 15 xubnood ah iska soo saara, qoladii shirkadana ha loo yeedho, Saldhigga dhexe ee Bileyska dabaqa sare ayaana la yidhi kaalaya, waxaana halkaa noogu yimi Maayarkii oo na yidhi waa go’aan dawladeed ee lacagtii bixiya, adigu waxoogaa baanu wada-hadalay, waxaana nalagu dhex-dhexaadiyay in aanu saddex cisho bixino neefka Geel ah 15,000, neefka Lo’da ahna 10,000, neefka Adhiga ahna 6,500, Guddi baana loo saarayaa arrinka, kuwaas oo Wasiirka Arrimaha Guduhu ku jiro, oo arrinka dhamaysa, intaa ka dib baa Maayarka Caasimadu Radio Hargeysa ka sii daayay war uu ku sheegayo inaanu heshiinay, mana jiro heshiis dhacay.”

Waxa uu tilmaamay, in kulankaa ay goob-joog ka ahaayeen masuuliyiinta Bileyska oo uu ku jiro Jananku (Maxamed Saqadhi Dubad).

Sidoo kale, waxa ay sheegeen in saddexdii maalmood ee heshiiska lagu ahaa inay lacagtaas sii bixiyaan inta guddidu arrinka meel ku hubsanayso, ay maanta ku egtahay. Isla-markaana, aan ilaa hadda jirin wax heshiis ah oo arrintaa laga gaadhay.

“Gaadhigan Lambarka Dawladu ku qoran yahay, dhinacna shirkadda Maandeeq kaga taalo iyo Maayarkan marna shirkadii ah, marna Maayarkii magaalada ah, garanmayno’e, waxaanu u sheegaynaa madaxweynaha iyo madaxweyne ku-xigeenka inay arrinkan guddi u saaraan oo wax laga qabto, Saddexdii cisho ee naloo qabtayna maantay (Shalay) ku egtahay, berina waanu bixinaynaa,” ayuu yidhi Iid Yuusuf Shookaan.

Kooxdan Hiliblayaasha ah oo Afartaneeyo ka mid ahi Haween ahaayeen, waxay ka cawdeen culays ay sheegeen in lagu saarayo bixinta lacagta lagu kordhiyay adeega Kawaanka Qalliinka Hilibka, “Dawladayada waxaanu u sheegaynaa, in aanaan qaadi karin cidhiidhi, markaanu neefka iibsanayno ciidan baa na ilaaliya, waana kuwii loo sameeyay inay ilaaliyaan ammaanka shicibka.” Sidaana waxa tidhi Luul Faarax Xuseen.

Xaliimo Cabdi Aw-xuseen oo iyaduna ka mid ahayd dumarkii halkaa ka hadlay, ayaa sheegtay inuu jiro Adhi Dawladda Hoose uga xanibtay laba todobaad ka hor cabashadan la xidhiidha qiimo kordhinta Kawaanka, Adhigaas oo ay sheegtay inay gaadhayaan Labaataneeyo, waxay tilmaamtay in lagu xidhay ganaax ka badan qiimahoodii neef kasta.

Sidoo kale, waxa halkaa ka hadlay oo kale Xubno ay ka mid ahaayeen, Aadan Muuse Kabadhe, Cabdi Maxamuud Warsame (Foostari), iyo Sahra Muuse Jaamac. kuwaasoo dhamaantoodba iska daba-maray inay si aada u diidan yihiin qiimo-kordhinta Kawaanka Qalliinka, isla-markaana, codsaday in la soo dhex-galo iyaga iyo Maandeeq, waxna laga qabto arrinta, maadaama ay weli sidii u cakiran tahay.

Top

Nin Ay Walaalo Ahaayeen Xasan Dahir Aweys Iyo
Mid Kale Oo Seediyo Ahaayeen Ra’iisal-Wasaare Geedi
Oo Lagu Khaarajiyay Muqdisho

Muqdisho, March 1, 2007 (W. Wararka) – Nin magaciisa la yidhaahdo Asad Yaasiin Sheekh Muxumed oo ay ilma adeer ahaayeen Sheekh Xasan Dahir Aweys Gudoomiyihii golaha Shuuradda Maxkamadihii burburay ayaa shalay lagu toogtay agagaarka xaafadda Cali Kamiin ee magaalada Muqdisho, kadib markii kooxo hubaysan ay rasaas huwiyeen iyagoo gaadhigii ay wateen ku hor gudbay gaadhigii uu watay ninka la dilay.

Goobjoogayaal ku sugnaa agagaarka Furayaasha Cali Kamiin ayaa sheegay in kooxdaas Asad Yaasiin dishay ay wateen laba gaadhi oo nooca loo yaqaan Mark2 ah iyo gaadhi kale oo ah bas oo ah nooca loo yaqaan Caasiga, kuwaas oo si arxan daro rasaasta ula raac-raacay.

Asad Yaasiin wuxuu ka mid ahaa dhalinyaradda Xaafadda Laba dhagax ee magaalada Muqdisho, isagoo ka mid noqday 8 Nin oo maalintii shalay siyaabo kala duwan loogu kala dilay degaanadda Suuqa Xoolaha, Yaaqshiid, Xamar weyne, Cali Kamiin iyo Buulo Xuubeey oo dhammaantood ka tirsan magaalada Muqdisho.

Lama ogga sababaha loo dilay Marxuum Asad Yaasiin Sheekh Muxumed laakiin xilligii Maxkamaduhu ay ku sugnaayeen Muqdisho ayaa la sheegay inuu mar ka badbaaday mishin la doonayay in lagu dilo kadib markii nin ku hubaysan bastoolad uu ugu galay goob Internet Coffee ah kadibna ay ka katibtay bastooladii uu sitay taas oo sababtay in ASAD bastoolad uu isagu sitay la soo baxo oo uu dhaawaco ninkii doonayay inuu khaarajiyo.
Dhinaca maalintii dorraad ayaa nin magaciisa la yidhaahdo Yuusuf Maxamed Maxamud oo ka mid ahaa Ganacsatadda Muqdisho ay kooxo dabley ahi ku dileen wadada labaad ee Suuqa Bakaaraha Muqdisho xilli uu ka sii baxaayay degaankaas.

Marxuumka la dilay oo caan ku ahaa Yuusuf Darbuuxshe ayaa la sheegay in kooxaha dilay ay muddo daba taagnaayeen iyagoo u aaneynayay inuu ka tirsanaa ganacsatadda la siyaasadda ah Ra’isul-wasaarre Geeddi.

Marxuum Yuusuf Darbuuxshe ayaa la sheegay inay xaaskiisa ahayd gabadh la dhalatay Ra'isulwasaarre Cali Maxamed Geeddi oo la yidhaahdo Ayaan Maxamed Geeddi.
Yuusuf Dar buuxshe ayaa la sheegay inuu kaalin weyn ku lahaa dhinaca Waxbarashadda Magaaladda Muqdisho, isagoo ahaa Mulkiilaha Dugsiyada Jaabi binu Xayaan, Maka Al Mukarama iyo dugsiga weyn ee Macalim Jaamac.

Lama garanayo kooxaha ninkan dilay hase yeeshee waxay warar hoose u badan yihiin dhinaca Muqaawimadda ka soo horjeedda dawladda Cabdillaahi Yuusuf walow ila xog ogaalina ay sheegayaan inuu ahaa ganacsadihii qandaraaska ku qaatay dayactirka xarunta Madaxtooyadda.

Magaalada Muqdisho ayaa iyana maalintii Salaasadii dorraad lagu dilay 11 qof, dilalkaas oo la aaminsan yahay inay ahaayeen kuwo inta badan siyaasi ah oo lagaga soo horjeedo dawladda Cabdillaahi Yuusuf iyo ciidamada Itoobiyaanka ah.

Top

Itoobiya Oo La Wareegtay Dhexdhexaadinta Labada Beelood
Ee Dirirtu Ku Dhexmartay Degaanka Daroor

Hargeysa, March 1, 2007 (Haatuf) - Ergooyinka reer Somaliland ee waayadan nabadeynta iyo dhexdhexaadinta ka dhex-waday labada beelood ee walaalaha ah ee dirirtu ku dhexmartay degaanka Daroor oo ka tirsan Kililka 5-aad ee Soomaalida Itoobiya ayaa shalay dalka dib ugu soo laabtay kadib markii ay hawshii dhexdhexaadinta khilaafaadka ee u dhaxeeyey labada beelood ku wareejiyeen dawladda Itoobiya ee ay degaanka ahaan dhulka dirirku ku dhexmartay ka tirsan yihiin.

Ugu yaraan 50 xubnood oo isugu jira labada beelood ee walaalaha ah ee colaadu ku dhexmartay degaanka Daroor ayaa loo saaray sidii heshiisyo iyo go’aamo wax ku ool ah uga gaadhi lahaayeen colaadii dhexmartay, taas oo ay dawladda Itoobiyana qayb ka qaadanayso.

Munaasabad ay ujeedadeedu ahayd sidii nabad waarta looga dhaqan gelin lahaa labada beelood ee walaalaha ah ayaa shalay lagu qabtay Madasha wada-hadalka ee Daroor, halkaas oo ay khudbado dardaaran iyo waano ah ka jeediyeen masuuliyiinta iyo wax-garadka ergada halkaas u tegay.

Muftiga Reer Somaliland Sheekh Maxamed Cumar Dirir oo munaasabadaa ka jeediyey hadal isugu jira duco iyo waano ayaa sheegay inaanay colaadu ahayn wax fiican waxaanu yidhi: “Waxaan idiin sheegayaa inaanay colaadu fiicnayn, isla markaana ay diinteena islaamku diidan tahay in la daadiyo dhiigga qof muslim ah.”

Gudoomiyaha Golaha Guurtida Somaliland Md, Saleebaan Maxamuud Aadan oo isna halkaas hadal dheer ka jeediyey ayaa hadalkiisa waxa ka mid ahaa oo uu yidhi: “Mar haddii ay dawladda Itoobiya qaadatay masuuliyada xilkaasi balaadhan ee nabadeynta ee labada beelood ee walaala ah ee ay shaqaqadu ka dhexdhacday waa inay si cadaaladda ugu xaqsoortaa.”

Wasiirka Duulista Hawada Somaliland Cali Maxamed Warancadde oo isna halkaas ka hadlay ayaa sheegay inay labada beelood ee walaalaha ah heshiisiintooda ay dawladda Somaliland dedaal ka gashay iyadoo Dawladaha Somaliland iyo Itoobiyana ay yihiin laba dal oo xidhiidh qoto dheeri ka soo dhexeeyey. “Dawladda Itoobiyana waxa looga baahan yahay inay arrintaasi dedaal dheeraada ka gasho si aanay dib ugu soo noqon dhibaatooyinkii halkaasi ka dhacay” ayuu yidhi Warran-cadde.

Gudoomiye ku-xigeenka labaad ee Maamulka Kililka 5aad ee Soomaalida Itoobiya Cabdi Maxamed oo isna halkaasi ka hadlay ayaa sheegay in dadka ay xurguftu dhexmartay ay yihiin dadkoodii sidaas darteedna inaanay damiirkiisa siinayn khilaafka ka dhacay Daroor inay xalin-kari waayaan “Dadka ay xurgufrtu dhexmartay waa dadkeenii, Damiirkayaguna na siin maayo inaynu wax ka qaban kari wayno khilaafka ka dhacay degaanka Daroor, waxaanu balanqaadaynaa sidii aanu xal balaadhan oo waara uga gaadhi lahayn walaaleynta labadaasi beelood” ayuu yidhi.

Top

Warbaahinta Ingiriiska Oo Dhacdadii 11 September
Ku Xidhiidhisay Madaxweyne Bush

Qaybtii 5-aad

Wargeyska Daily Mail oo ka mid ah Wargeysyada ugu caansan dalka Boqortooyadda Ingiriiska ka soo baxa ayaa bishan February 10-keedii daabacay maqaal la yidhaahdo “An Explosion of disbelief – fresh doubts over 9/11” oo la macno ah “Sawaxanka u qaadan waaga ah ee ka dhashay shaki cusub oo ku saabsan dhacdadii 9/11”, kaasi oo uu wax kaga iftiiminayo shaki ka yimid cida loo aanaynayo burburkii 11-kii September 2001 oo marka la soo gaabiyo loo yaqaano 9/11.

Wargeyska Daily Mail, qaybtiisii shanaadna waxa uu Wargeysku u qoray sidan:-
Buugga Professor Griffin iyo Filimka loogu magac daray “Loose Change” [ee aynu qaybihii hore ku soo qaadanay], filimkaas oo magaciisa loo turjumi karo “Qadaadiic ayaa la iskugu keen dhuftay” waxay labaduba calaamatu su’aal saarayaan sidii uu madaxweyne Bush u dhaqmay labadii jeer ee la war-geliyey markii ay diyaaradihii kala dambeeyey duqeeyeen “Twin Towers”.

Dadka qaba in dhacdadan 9/11 inay ahayd shirqool (conspiracy lobby) xukuumadda Bush ka dambaysay, waxyaabaha ay cuskadaan doodooda kama maqna shucuurta madaxweyne Bush laga arkay TV-yada, daqiiqadihii ugu horeeyey ee loo sheegay weeraradii “Twin Towers-ka” lagu qaaday, iyada oo uu waqtigaasi madaxweyne Bush joogay gobolka Florida oo boqolaal mayl u jirta xaruntii dalkiisa ee Washington, isaga oo markaa arday dugsi hoose ah booqasho kula jooga, una akhriyaya buug sheeko carruureed ah, waqtigaasi oo ahaa ilbidhiqsiyadii ay dhacayeen weeraradii ugu xumaa ee casrigan aynu joogno.

Madaxweyne Bush waxoogay dareen ah ayuun buu muujiyey, markii la taliyihiisu ku wargeliyey in mid ka mid ah dhismayaashii Twin Towers-ka la duqeeyey, markaasuu weliba maamulihii dugsiga uu joogay ku yidhi, “diyaarad rakaab ah ayaa ku dhacday dhismihii ganacsiga adduunka, laakiin siday doontaba ha ahaatee, waynu iska sii wadaynaynaa akhriskeena” (“but we’re going ahead with the reading thing anyway”). Miyaanay ahayn “war la qabaa xiiso ma leh” ayey ku sheegaan dadka qaba in weeraradani ahaayeen qaar ay xukuumadda Bush lug ku lahayd, taasi oo ay ula jeedaan Madaxweyne Bush isaga oo ah Taliyaha Guud ee Ciidamada dalka Maraykanka ayuu haddana iska sii watay buuggii uu kooxda yar yar ee ardayda ah u akhriyay’e, isaga oo markaa og dhiilada dhacday.

Daqiiqado yar dabadeed, waxa markale akhriskii ka soo dhex-galay la taliyihiisii, kaas oo dhegta u saaray in dhismihii labaad ee Twin Towers-kana ay diyaarad kale duqaysay ama ku dhacday, hase yeeshee, muuqaalka sawirada laga qaaday madaxweyne Bush daqiiqadahaasi wax dareen naxdineed ah muu muujin, lagamana dareemayn wax amakaag ah oo wejigiisa ka muuqda.

Madaxweyne Bush daqiiqadahaa way u cadayd in duulaan weyn oo argagixiso lala beegsanayey dal uu madaxweyne u yahay, balse aanu wax caynkaasi u weyn ka soo qaadin. Laakiin saddex maalmood ka dib isaga oo caasimadiisii jooga, kiiba muu ahayn. Sababta oo ah, shirkii jaraa’id ee ugu horeeyey ee uu kaga hadlo dhacdada 9/11 dareenkiisa iyo hadalkiisuba qaar dhiilo leh bay ahaayeen, wuxuuna si dhiiranaan iyo kalsooni leh ugu eedeeyey dhacdadii 9/11 inuu Usaama Binu Laaden iyo ururkiisa Al-Qaacida ka dambeeyeen.

Weedhaha hadalka uu shirkiisa jaraa’id u adeegsaday oo ay dib u soo xigteen buugga Professor Grifin iyo Filimka Loose Change-ba waxa ka mid ahaa “Masuuliyada taariikhiga ah ee arrintan nagaga aadani way cadahay, waxaanay jawaabteedu noqonaysaa weerarada lanagu soo qaaday inaanu dhudhubo leexsan iyo laba dhagax dhexdood iyo xataa dilba ugu badheedhno sidii aanu uga takhalusi lahayn dunuubtan kawnka taal”.

Isku soo duuboo, arrintan ayey dad badani u macnaysteen in aanu madaxweyne Bush ixtiraami doonin wax sharci ah, haba yaraatee, isla markaana uu qaadi doono talaab kasta oo uu u arko inay dani ugu jirto, xataa haddiiba oo ay diidayaan shuruucda, qawaaniinta iyo heshiisyada caalamka u yaalaa. Taasi oo ay dadka arrimahan ka faaloodaa rumaysan yihiin inuu madaxweyne Bush kaga dhabeeyey, iyada oo wadada loo mari doono dagaalka loogu magac daray “la dagaalanka argagixisada” lagu dejiyey.

Maqaalkii Wargeyska Daily Mail ee aanu idiin soo bandhignay, halkaasi ayuu ku dhamaaday, balse waxa aanu maalmaha soo socda idiin soo baahin doonaa, cida ay dhacdadan 9/11 warbaahinta Maraykankuna ku xidhiidhisay.

Top

Nin reer Pakistan Ah Oo $165 Khamaar Lagaga Helay
U Bixiyay Gabadh Uu Dhalay

Karachi, March 1, 2007 (W. Wararka) – Bileyska dalka Pakistan ayaa baadi-goobaya 10 nin oo ka mid yihiin madax-dhaqameedyo, kuwaas oo gabadh reer Pakistaan ah cadaadis ku saaray inay gabadh yar oo 17 jir ah ku bixiso khamaar 16 sannadood ka hor lagaga helay aabaheed.

Kiiskan ayaa muujinaya meel ka-dhacyada loo geysto xuquuqda dumarka ee dalka Pakistan.

Haweenaydan oo magaceeda la yidhaahdo Nuuraan Cumraani ayaa ku dacwiyaysay in iyadoo bixisay deyntii ninkeedii hore khamaarka lagaga helay oo dhammayd $165, haddana lagu handaday in la waxyeelayn doono haddii ay bixin waydo gabadheeda oo la yidhaahdo Rashiida, gabadhaas yar oo 17 jir ah ayaa loo doonayaa inuu guursado wiil uu dhalay Lal Hayder, oo ah ninkii khamaarka turubka kaga guulaystay gabadha yar aabaheed, waxaana sidaas saxaafadda Isniintii ugu sheegtay magaalada Hyderabad Nuuraan Cumraani.

Waxa kale oo ay sheegtay Nuuraan in ninkeedu ahaa khamaarle, kaas oo deynta khamaarkan laga helay markii ay inantiisa Rashiida hal sanno jirtay, waxaanu ugu balan-qaaday inuu Rashiida u bixin doono khamaarkaa deynta ah marka ay weynaato.
Koral Shaah, oo ah sarkaal ka tirsan bileyska Hyderabad ayaa sheegay in labada qoysba ka soo jeedaan qabiilada Cumraani oo ka mid ah beel-weynta reer Pakistan ee la yidhaahdo Baluchistan. Ninkaas bileyska ahi waxa uu sheegay in koox odayaal ah oo qabiilkaas ka socdaa ay yimaadeen bishii January magaalada Hyderabad si ay u baadhaan arrintaas, waxaanay xukumeen iyagoo u adeegsanaya caado qabiileed, in gabadha yar loo guuriyo wiilka 23 jirka ah ee uu dhalay Haidar oo magaciisa la yidhaahdo Cabdil-qani.

Bileysku waxa kale oo ay sheegeen inay doonayaa inay qabtaan Haider iyo wiilka uu dhalay iyo weliba sideedda madax-dhaqameed, iyadoo dhinaca kalena ay saraakiisha bileysku Salaasadii dorraad sheegeen in hooyada iyo gabadheeda ay bileysku ilaalinayaan.

Top

Maraykanka, Iran Iyo Syria Oo Ka Qayb-Gelaya Shir
Lagaga Arrinsanayo Xaaladda Ciraaq

Baqdaad, March 1, 2007 (W. Wararka) – Shir madaxeed ku saabsan xaaladda dalka Ciraaq ayaa lagu wadaa inuu ka dhaco gudaha waddankaas, kaas oo ay ka qayb gelayaan dalalka saameynta ku leh waddankaas ee ay ka mid yihiin Maraykanka, Iran iyo Syria.
Aqalka Cad ee Maraykanka ayaa laga xaqiijiyey in Maraykanka ay wakiillo u diri doonaan kulankaas, waxana xukuumadda Washington ay marar badan ku eedaysay waddamada Iran iyo Syria in ay batrool ku shubayaan xaaladda ammaanka ee dalkaas iyaga oo taageeraya kooxaha kacdoonka ka wada gudaha dalkaas.

Xoghayaha arrimaha dibadda ee Maraykanka, Condoleezza Rice ayaa sheegtay in shirkani uu hagaajinayo xidhiidhka waddamadaas isla markaasna gacan ka geysan karo xasiloonida dalka Ciraaq.

Sidoo kale, wasiirka arrimaha dibadda ee dalka Ciraaq ayaa sheegay in uu doonayo in laga midoobo xaaladda waddanka Ciraaq taasina ay tahay ta keliya ee nabad lagaga dhalin karo waddanka Ciraaq.

Top

Madaxweyne Ku-Xigeenka Maraykanka Oo Ka
Badbaaday Weerar Bambaano Oo Lala Beegsaday

Kabul, March 1, 2007 (W. Wararka) – Madaxweyne Ku-xigeenka Maraykanka Dick Cheney ayaa Salaasadii dorraad ka badbaaday weerar lagu qaaday xili uu safar ku marayey dalka Afghanistan.

Dick Cheney ayaa shalay ku sugnaa Xarunta Ciidamada Maraykanka ee Bagram halkaas oo lagu soo qaaday weerar bambaano oo ay ku dhinteen 20 qof.

Dick Cheney oo safar kedis ah ku tagay dalka Afghanistan ayaa habeenkaas seexday Xerada weyn ee Bagram oo 60km u jirta magaalada Kabul ee xarunta Afghanistan, waxaana subaxnimaddii doraad xilli uu quraacanayay Dick Cheney ayaa weerarkaas bambaano lagu soo qaaday xeradaas, iyadoo weerarkaas loo adeegsaday gaadhi.
Qaraxan ayaa ka dhacay albaabka laga galo Xerada Bagram halkaasi oo ay ku dhinteen 3 ka mid ah Ciidamada ISAF ee NATO iyo labaataneeyo kale oo u badan dadka reer Afghanistan oo xeradaasi u soo shaqo tagay.

Saacad iyo badh kadib weerarkaas ayuu halkaas ka baxay Madaxweyne ku-xigeenka Maraykanka oo kulan uu la yeeshay Madaxweyne Hamid Karsaay kadib ka ambabaxay dalka Afghanistan.

Sannadkii la soo dhaafay ee 2006 ayey dalka afghanistan ku dhinteen 4000 oo ruux, iyadoo weerarada ay soo qaadayaan kooxdii Daalibaan ay sii xoogsanayaan, iyadoo ay Ururka Daalibaan sheegteen inay ka danbeeyeen weerarkan lagu qaaday xerada Bagram ee xilligaas ku sugnaa Dick Cheney.

Top

Baaqa Nabadaynta Colaadda Darroor:

JAALIYADDA REER SOMALILAND EE CARRIGA INGRIISKA (Great Britain).

Annaga oo ku hadlayna magaca Jaaliyadda Reer Somaliland ee ku dhaqan Carriga Ingriiska, annaka oo aad uga murugaysan colaadda ka soo laba kaclaysay ee ka aloosan deegaanka Darroor, ee uu dhiigga sokeeye ee faraha badani beryahanba ku daadanayey; waxaannu si Islaamnimada, walaalnimada iyo waddaninimada inaga dhaxaysa waafaqsan ugu soo jeedinaynaa inay labada dhinac ee is-hayaa ugu horrayn si degdeg ah, oo bilaa shuruud ah xabbadda u joojiyaan, geedka nabaddana la soo wada fadhiisto!
Waxaanu codsanaynaa in ciidammada hubaysan la kala kexeeyo oo ergooyinka nabadaynta ee walaalnimada idiinku soo gurmaday la aqbalo oo xeerbeegtida loo daayo inay ka gungaadho xallinta mushkiladda.

Waxaannu idin xasuusinaynaa in Diinteenna suubban ee Islaamku ay xaaraantinimaynayso in dhiigga Muslimka lagu daadiyo xaqdarro; oo dagaallada noocan ah kooda ku dhinta iyo kooda cid ku dilaaba ay Naarta ku hoyanayaan; sida laga weriyey Nebi Maxamed, nabadgelyo iyo naxariisi korkiisa ha ahaato e.

Marka natiijada dagaalkan ee aakhiro taa tahay, waxaynu ognahay in ta ifka ee dagaal sokeeyena jab iyo halaag uun laga dhaxlo.Dagaal wiilbaa ku dhinta ama ku naafooba ee wiil kuma dhasho!

Sidaa darteed cidda keliya ee ka faai’idaysanaysaa waa Ibliis oo colaad guun ah u haya Adamahaba, iyo cadowgeenna guud oo ah cadowga Somaliland.

Waxaannu Dawladda S/Land ka codsanaynaa inay waajibkeeda degdeg uga gudato colaaddan sokeeye oo ay iyadoo la kaashanaysa Dawladda Ethiopia ay nabadda gacan bir ah ku qabato; ergooyinka nabadayntana ay u fududayso taakulaynta iyo arrimahooda xeerbeegtinimo.Dawladda waxa waajibaadkeeda ka mid ah muquuninta cid kasta oo u muuqata gardiid ama fidmawale iyo hubinta fulinta go’aamada kasoo baxa heshiisyada kama dambaysta ah ee la wada saxeexo.

Ugu dambayn Jaaliyadda Reer Somaliland ee UK , waxa ay u ololaynaysaa inay suurtageliso sidii loogu diri lahaa odayaal iyo waxgarad degdeg ugu gurmada hawlaha nabadaynta ee jiidaha colaaddu ka oogantahay; annagoo soo jeedinayna in daminta colaaddan aan loo kala hadhin, oo yar iyo wayn,gude iyo dibadba loo qalabqaato.
Wa Billaahi Tawfiiq.

Xubnaha baaqan saxeexay :
1.Ismail Omer Aden ( Boss)
2.Suleiman Cumar Ku-Joog
3.Abdalla Alifdoon
4.Abdiqani Osman Sabban
5.Mohamed Abdillahi Absiiye
6.Mohamed Kahin Ahmed
7.Aqli Nur Galaid
8.Abdi Hussein Abdillahi(Hadka)
9.ALI Omer Doob-Ilkoole
10.Farah Hassan Jagac
11.Jama Abokor Mohamed
12.Osman Farah (Ciiro)
13.Osman Abokor Mohamed
14.Suleiman Nugal
15.Yusuf Ismail Hassan
16.Mohamed Yuusuf Liiban
17.Suleiman Dirir Abdi
18.Abdulhamid Ali Muse
19.Ahmed Muse Gedi(Sanjab)
20.Ismail Shombe
21.Hussein Alifdoon
22.Mohamed Yonis Awale
23.Mohamoud Hassan Good
24.Ahmed Yousuf
25.Said Jama (Ilka Wayne)
26.Mohamoud Abdi Duale
27.Ahmed Hassan Abdi(Arwo)
28.Jama Haibe

Top