Haatuf News

Home | Contact Us | Links |  Archives

Sidee Looga Dabaal-degay Munaasabadda 18-ka May Gobolada Iyo Degmooyinka Dalka?

Hoggaamiyeyaasha Ururka QARAN Oo Jaaliyadda Somaliland Ee Cardiff Kala Qayb-Galay Xuska 18-Ka May

Prof. Ismaaciil Muumin Iyo Masuuliyiinta Kulmiye Oo Ka Hadlay Sidii Loogu Diiday Inay Ka Hadlaan Munaasibadda 18-ka May Ee Boorama Lagu Qabtay 

Deeq Isugu Jirtay Gaadiid Iyo Qalab Oo Ay Bisha Cas Ee Imaaraadku Bixisay Oo Lagu Wareejiyey Madaxtooyada

Gaadiidka Dadweynaha Hargeysa Oo Xalay Loo Diiday Inay Maraan Madaxtooyadda Horteeda Cabsi Darteed

Ciidamo Ka Socda Qaramada Midoobay Oo Dhowaan La Filayo In La Geeyo Somalia  

Faysal Cali Waraabe Fursadaha Uu Helo Ma Ka Faa’iidaysan Doonaa?

"Waxan Leeyahay Markuu Mandate-kiisu Dhammaado 15-ka May, Madaxweynuhu Waa Gudoomiye" Faysal Cali Waraabe

“Xukuumad Ahaan Iyo Xisbiyada Qaranka Waxaanu rajaynaynaa balan dambe oo noo qabsoomaysa inaanu wanaag ku dhamaysano wixii noo dhiman” Rayaale

“Runta in laga warwareego maaha ee dimuqraadiyadeena waxa ku yimi hantaaqooyin waaweyn, balse ma yeeli doono …” Axmed Siillaanyo

Hargeysa/Burco/Boorama, May 19, 2008 (Haatuf) – Xafladdo kala duwan ayaa shalay si weyn loogaga kala xusay munaasibadda sannad-guurada 17aad ee dib-ula-soo-noqoshadii madax banaanida Somaliland oo ku beegnayd maalintii shalay ee 18-ka May, magaalooyinka Hargeysa, Burco iyo Boorama, kuwaas oo ay kumanaan ka mid ah dadweynaha ku dhaqan magaalooyinkaas ay isugu soo baxeen fagaarayaasha Xoriyadda loogu dabaaldego, iyadoo ay dadweynahaas kala qayb-galeen xuska dabaaldega 18 May saddexda hoggaamiye ee saddexda xisbi qaran ee UDUB, KULMIYE iyo UCID.

Munaasibaddan ayaa sannadkan ku soo beegan xili uu dalka ka jiro khilaaf siyaasadeed oo cakiran oo ka dhashay kadib markii ay dhammaatay muddadii shanta sannadood ahayd ee xilka loo doortay Xukuumadda uu Madaxweynaha ka yahay Daahir Riyaale Kaahin, taas oo ay muddada xilku kaga ekayd 15-kii May ee bishan, iyadoo ay golaha Guurtidu go’aan ay soo saareen 10-kii April ku sheegeen inay muddo sannad ah u kordhiyeen Xukuumadda Riyaale, hase yeeshee xisbiyada mucaaridku ay si adag geeska ugu dhufteen kuna dhawaaqeen inaanay Madaxweyne u aqoonsan doonin Daahir Riyaale wixii ka dambeeya 15-kii May. Inkastoo maalin ka hor wakhtigii kama dambaysta ahaa ee Xukuumadda Riyaale ay wada-hadalo isugu yimaadeen madaxda saddexda xisbi, haddana ilaa hadda ma jiro heshiis la isku af-gartay marka laga reebo in wada-hadal lagu dhameeyo khilaafaadka jira.

Gudoomiyaha xisbiga Mucaaridka ee KULMIYE, Axmed Siilaanyo ayaa isagu munaasibaddan kala qayb-galay dadweynaha magaalada Burco, Sidoo kale gudoomiyaha xisbiga kale ee mucaaridka ah ee UCID, Faysal Cali Waraabe ayaa isna dabaal-dega munaasibadda kala qayb-galay dadweynaha magaalada Boorama, halka uu Madaxweyne Riyaale isagu kala qayb-galay dabaaldega munaasibadda dadweynaha Reer Hargeysa.

Hargeysa
Madaxweyne Riyaale oo muddadii xilka loo doortay dhammaatay 15-kii May, ayaa munaasibad loogu dabaal-degayay 18-ka May waxa uu fagaaraha Beerta Xoriyadda ee Hargeysa kagala qayb-galay kumanaan dadweynaha reer Hargeysa ah, kuwaas oo subaxdii horeba ku soo jarmaaday fagaaraha beerta Xoriyadda, halkaas oo uu Daahir Riyaale ka jeediyay khudbad kooban oo uu kaga hadlay dhawr arrimood oo ay ka mid yihiin ciidamo nabad ilaalineed oo ay Qaramada Midoobay keenayso Somalia, wada-hadalada u socda Xukuumadda iyo mucaaridka, sicir-bararka iyo raashinka qaaliyoobay, balanqaad la xidhiidha ceel biyood oo uu sheegay in laga qodi doono koonfurta magaalada Hargeysa iyo dardaaran uu u jeediyay dadweynuhu inay nabadgelyada ilaaliyaan.

Ammaanka beerta Xoriyadda ee Hargeysa, ayaa shalay si weyn loo adkeeyay iyadoo wadooyinka soo gala Beerta Xoriyadda aad ku arkaysay ciidamo farabadan iyo gawaadhida tiknikada, waxaanad dareemaysay in jawiga xuska maalintani uu aad uga duwanaa kuwii ka horeeyay, iyadoo ay dadka ka qayb-galayna ka yaraayeen kuwii munaasibadihii hore, waxaanay dadka intooda badani ku soo jireen jidka markii uu Daahir Riyaale uu si degdeg ah khudbad dhawr daqiiqadood qaadatay ugu saydhiyay kadibna uu isa soo rogay, taasina waxay keentay in dad badani ku soo lu’go’aan ka qayb-galka xuska.

Madaxweyne Riyaale khudbadiisa waxa uu ugu horeyn ku yidhi: “Maanta waa maalin weyn, oo waxaynu u dabaaldegaynaa oo aynu xusaynaa sannad-guuraddii 17-aad ee aynu la soo noqonay gooni-isu-taageena, waana maalin taariikhi ah oo taariikh weyn u leh ummadda Somaliland meel kasta oo ay joogaanba, waxaanan aaminsanahay ninkii 1991-kii dhashay inuu qaan-gaadhay.”

Riyaale waxa uu sheegay, in xuskani kaga duwan yahay xusaskii hore ee 18-ka May, in dalka oo dhan shalay laga wada xusay. “Maanta waxa ay kaga duwan tahay sannaddihii hore ee aynu xusi jiray, dhamaan Somaliland Goboladeeda oo dhan ayaa laga xusayaa munaasibadan, guulaha ay ciidamadu gaadheen ee suuragaliyay inaynu xuduudaheenii iyo Goboladii inaga maqnaa ayaa ah ta keentay in meelo aan laga xusi jirin xuskan maanta laga xuso,” ayuu yidhi Daahir Riyaale, isagoo munaasibaddaas awgeed hambalyo u diray guud ahaanba shacabweynaha Somaliland meel kasta oo ay joogaan gudo iyo dibad, waxaanu u rajeeyay inay sanadka sannadkiisa ku gaadhaan guul iyo barwaaqo.

Daahir Riyaale waxa uu ku dooday inay dawladiisu dedaal badan ka gashay sidii loo sugi lahaa xuduudaha dalka iyo maamul fidinta, taasina ay tahay ta suuragelisay in maanta manaasibaddan 18-ka May laga wada xuso, guud ahaanba dalka Somaliland.
“Waxa astaan inoo ah midnimada Qaranka, wada-jirka dal ahaaneed iyo dad ahaaneed oo aynu ka wada shaqayno, taas ayaanaynu ku gaadhaynaa himiladeena dhaw iyo ta fog labadaba, taas ayaana ah ta aynu ku xusayno sannad-guurada 17-aad” ayuu yidhi Madaxweyne Riyaale waxaanu shacabka Somaliland ugu mahad-naqay sugida nabadgalyada, oo uu sheegay inay aad ugu dedaalaan, foojignaan baddana ka muujiyaan.

Mar uu ka hadlayay khilaafka u dhexeeya isaga iyo hoggaamiyeyaasha xisbiyada mucaaridka iyo wada-hadalada u furmay waxa uu yidhi: “Waxaan idiin sheegayaa Xukuumad ahaan iyo Xisbiyada Qaranka wada-hadal ayaa noo bilaabmay, si fiican ayuu noogu bilaabmay, waxaananu rajaynaynaa balan dambe oo noo qabsoomaysa insha Allaahu inaanu wanaag ku dhamaysano wixii noo dhiman.”

Sidoo kale waxa uu Daahir Riyaale sheegay in ceelal biyood laga qodi doono Koonfurta magaalada Hargeysa, isagoo arrintaas ka hadlayana waxa uu yidhi: “Waxaan idiin sheegayaa dhibaatada inoogu daran ee dalkeena ka jirtaa waa biyo la’aanta. Safarkaygii ugu dambeeyay ee aan Imaaraadka ku tagay wixii aan kala soo kulmay Riigii ugu horeeyay oo ceelashii ugu horeeyay Koonfurta Hargeysa ka qodi doona hadii illaahay yidhaahdo, maadaama ay xagaa ka biyo la’adahay magaaladu, maantana wuu joogaa oo shalay ayuu ka soo degay Berbera. Waxaanu wax weyn ka tari doonaa baahida biyo la’aaneed ee wadanka ka jirta.”

Mar uu ka hadlayay cunta la’aanta caalamka ka jirta, waxa uu Riyaale yidhi, “Waxa aduunyada maanta ka taagan dhibaatooyin xaga maceeshada ah, Aduunka Bariiska dadkii beeri jiray maanta way joojiyeen, aniga oo Illaahay ka baryaya dhibaatooyinkaa inuu inaga soo furto waxa inala gudboon inaynu beeraha qodono, dawladuna waxay ku talagashay dadka beeraha qodanaya inay ka caawiso xaga beer qodaalka sannadkan haddii illaahay yidhaahdo, aniga oo illaahay ka baryaaya inuu inoo keeno roob inagu filan oo dalka oo dhan gaadha.”

“Fariinta aan u diraayo shacbiga reer Somaliland meel kasto oo uu joogo, waxa weeyaan inaynu ka shaqayno is jacaylka gudeheena iyo walaaltinimada gudeheena, taas oo inaga dhigaysa dad wax noqda,” ayuu yidhi Madaxweyne Rayaale isagoo balan-qaaday sidii ay dawladda Somaliland nabadgelyo ugula noolaan lahayd dalalka jaarkeeda, inta xidhiidhku ka dhexeeyo, inta aan xidhiidhku ka dhaxayna ay ku dedaali doonaan sidii ay xidhiidh ula samayn lahaayeen.

Madaxweynuhu mar uu la hadlayay Siyaasiyiinta uu ka midka yahay isagu iyo Saxaafadda waxa uu yidhi, “Waxaan ku boorinayaa bahda warbaahinta iyo qolyahayaga siyaasaduba inay dadka ka ilaaliyaan wax ala wixii xajiimaynaya wada-noolaanshaha iyo wada jirka shacbiga reer Somaliland, taas oo caqabad ku noqon karta geedi-socodka horumarkeena.”

Madaxweyne Riyaale waxa uu markii ugu horeysay ka hadlay ciidamada nabad-ilaalinta ee ay Qaramada Midoobay qorshaynayso inay ka soo dejiso Somaliland, iyadoo uu hore wargeyska Haatuf u daabacay war arrintan la xidhiidha oo uu Xoghayaha Qaramada Midoobay ku sheegay warbixintiisii uu March 14 u gudbiyay Golaha Ammaan ee Qaramada Midoobay, balse Madaxtooyada Somaliland ayaa warkaas si adag u difaacday oo ku tilmaantay mid aan waxba ka jirin. Hase yeeshee hadalkan Madaxweyne Riyaale ayaa u muuqda mid uu imika uun ku baraarugay kadib markii ay Golaha Ammaanku ogolaadeen in ciidamo Qaramada Midoobay leedahay la geeyo dalkii laysku odhan jiray Somalia oo ay qorshaha ugu jirto xataa Somaliland, waxaanu Riyaale ugu baaqay Qaramada Midoobay inay kala gartaan labada dal ee Somaliland iyo Somalia, waxaanu yidhi: “Waxaan maqlaayay UN-ta oo leh Soomaaliya Ciidamo hala keeno, fariinta halkan uga dirayaana waxa ay tahay UN-ta iyo beesha Caalamku waa inaanay iska indho tirin xaqiiqada dhabta ah ee taala, oo laba dal oo la kala yidhaahdo Soomaaliya iyo Somaliland ayaa jira, oo midna yahay dal jira oo dimuqraadi ah oo shaqaynaya, midna dal baaba’ay, anaga oo rajaynayna in Illaahay dhibaatada ka saaro maadaama ay jaarkeena yahay, beesha caalamkana waxay ummadani xaq u leedahay ayaanu weydiisanaynaa inaanu ka helo. Ciidamada la keenayaana nama saamayn doonaan, waxaanan idiin sheegayaa in ay Xukuumaddeenu ka hawlgali doonto, oo aanay saameyn inagu yeelanayn ee ay arrimahaasi koonfurta khuseeyaan.”

Burco
Isu-soo-bax ballaadhan oo lagu xusayay munaasibadda sannad-guuradii 17aad ee ka soo wareegtay maalintii ay Somaliland dib ula soo noqotay xornimadeedii ee 18-ka May ayaa shalay ka dhacday magaalada Burco, waxaana isu soo baxaa isugu baxay kumanaan dadweynaha reer Burco ah.
Munaasibaddan oo ahayd mid markii ugu horeysay ee ay tirada intaas le’egi oo dadweynaha reer Burco ahi isugu baxaan xuska maalinta 18-ka May, ayaa waxa dadweynaha kala qayb-galay munaasibaddan ka sokow madaxda degmada iyo kan gobolka Togdheer, masuuliyiinta sar-sare ee xisbiga KULMIYE oo uu horkacayo gudoomiyaha xisbigaas Axmed Maxamed Maxamuud (Siillaanyo), gudoomiye ku-xigeenka 1aad Muuse Biixi Cabdi, gudoomiye ku-xigeenka 2aad Cabdiraxmaan Cabdiqaadir Faarax, Afhayeenka xisbiga Maxamed Kaahin Axmed iyo xubno kale. Sidoo kale waxaa iyaguna ka qayb-galay munaasibaddaas gudoomiyeyaasha gobolka Togdheer ee xisbiyada UCID iyo UDUB.
Gudoomiyaha gobolka Togdheer Jaamac Cabdillaahi Warsame (Biin) ayaa waxa uu sheegay inuu si weyn ugu faraxsan yahay munaasibadan ballaadhan ee ay dadku sida weyn ugu soo baxeen taas oo uu sheegay guud ahaan marka laga yimaado Somaliland ay gobolkan xusuus gaara ugu taalo oo uu yahay gobolkani 17 sano ka hor halkii lagaga dhawaaqay la soo noqoshada madax banaanida Somaliland. Waxa kale oo uu xusay in ay bulshada reer Burco ay maanta qiimo gaara u sii leedahay sababta oo ah buu yidhi “waxa halkan fadhiya oo dabaaldega saaka inagala qaybgelaya mujaahid weyn oo ka mid ah raggii dalkan xoreeyay.”
Gudoomiyuhu isaga oo ka hadlaya khilaafyada siyaasadeed ee waayadan danbe taagana waxa uu yidhi: “Xaaladda dalku waxa ay maraysaa meel wanaagsan arrimaha siyaasadda ee laysku hayana ma aha kuwo dalka wax yeelaya waayo nin waliba dalka waa ilaashanayaa inaguna waxa aynu kaga wacannahay dadyowga kale wada hadalka ayaynu isku afgaranaa.”
Waxa kale oo uu gudoomiyaha Togdheer dhaliil kulul u soo jeediyay Hay'adaha samafalka iyo NGO-yada oo uu ku tilmaamay in ay waxqabadkii muhiimka ahaa kaga meeraystaan waxyaabo macno-yar, xayirayana quruxda Somaliland, waxana uu isagoo arrintaa sharaxaya yidhi: “Waxa aynu maqalaa oo aragnaa Hay'adaha iyo NGO-yada oo in badan shaqo ka dhigtay gudaha hablaheena sida gudniinka fircooniga oo ay meel walba la taagan yihiin, kuwo kale ee ka hadlaya xuquuq miyaanay ahayn xuquuq ay meel kaga dhacayaan gudaha hablaheena ee ay sheegayaan waa maxay xuquuqda ay inooga hadlayaan teeni ayay hortaagan yihiin, hadday xuquuq u doodaan maxaa laynoo aqoonsan waayay oo dadkan xuquuqdooda loo hortaagan yahay caalamka waxa aanu ka baryaynaa in ay xuquuqdeena ina mariyaan oo ina aqoonsadaan hadday xuquuq dhawrayaan.”
Ugu dambayna Badhasaabku waxa uu bulshada kula dardaarmay in ay ilaalilayaan nabadgelyada iyo horumarka.
Gudoomiyaha xisbiga KULMIYE Axmed Maxamed Maxamuud (Siillaanyo) oo isna halkaas khudbad ka jeediyay ayaa waxa uu sheegay qiimaha ay maalintani leedahay iyo halka ay xaaladda dalku marayso waxana uu sheegay in ay maalintani tahay mid ku weyn bulshada Somaliland waxana guud ahaan dadka reer Somaliland ugu baaqay in ay dhawraan wada jirkooda iyo ilaalinta qaranimadooda, waxana uu xusay in ay dareen weyn u leedahay maalintani oo ah 17-guuradi la soo noqoshada madaxa banaanida iyo goobta oo ah halkii lagaga dhawaaqay, isagoo Axmed Siillaanyo sheegay in ay soo dhowaynayaan wax kasta oo dalkan uu ku jiro horumarkiisa iyo deganaantiisu.
Axmed Siillaanyo mar uu ka hadlayay dhinaca siyaasaddana waxa uu yidhi: “Anagu waxa aanu jecelahay in lagu tallaabsado horumarka iyo dimuqraadiyadda si dalkani aqoonsi u helo. Sida aad la socotaana dhawr goor ayay doorashooyinku dib inooga dhaceen 15/5/2008 waa waqtigii aanu sheegaynay wixii ka dambeeya in aananu aqoonsanayn Madaxweyne-nimada Daahir Rayaale balse hadda waxa noo socda wada hadal waxaanuna jecelahay oo illaahay ka baryaynaa in aynu arrimaheena is afgarad ku dhamaysano. Runta in laga warwareego ma aha ee dimuqraadiyadeena waxa ku yimi hantaaqooyin weyn balse ma yeeli doono in ay hantaaqo ku timaado mustaqbalkeena.”
Dr Cabdi Aw Daahir oo isaguna halkaas kelmado kooban ka jeediyay ayaa waxa uu ku dheeraaday taariikhda ay maalintani leedahay iyo halganadii ilaa 1960 ee kala danbeeyay kuwaas oo uu sheegay in aynu soo maray halgano dhaadheer balse loo baahan yahay in aynu kaalintoodii buuxino.

Dr. Cabdi Aw Daahir waxa uu intaa ku daray in ay dawladii Somaliland soo marta ee ugu tayada fiicnayd ay ahayd tii 1997 taas oo uu sheegay wakhtigaa la soo dhisay dawlad tayo leh oo ay ka buuxan dad xula oo aqoon lehi. Waxa kale oo Dr. Cabdi Aw Daahir Sheegay inay Xukuumadda maantu dedaashay balse aad moodo in ay awoodeedii ku soo ururtay Udub-ka oo hareeri ka darooray balse ay iyagu haddii Alle yidhaahdo ay daroorta ka biin doonaan oo ay kebdo saari doonan.
Waxa iyaguna kelmado kooban halkaa ka jeediyay gudoomiyaha Xisbiga UCID ee gobolka Togdheer Cismaan Afgaab iyo gudoomiyaha UDUB ee gobolka Mr ayaanle iyo masuuliyiin kale oo uu ka mid yahay duqa magaalada Burco Maxamud Axmed Xasan (Dhegolaab) kuwaas oo dhamaantood ka sheekeeyay qiimaha ay maalintani leedahay.

Boorama
Sidoo kale, dabaal-dega munaasibadda 18-ka May ayaa shalay Boorama looga dabaaldegay, iyadoo uu munaasibaddan kala qayb galay Guddoomiyaha xisbiga Mucaaradka ah ee UCID, Faysal Cali waraabe, Guddoomiyaha gobolka Awdal, Maxamud Sh. C/laahi Cige, xubno ka tirsan Golaha Guurtida, masuuliyiinta Golaha degaanka Boorama, Salaadiin, Cuqaal iyo marti-sharaf kale.
Guddoomiyaa Faysal Cali Waraabe oo isagu xafladdan soo gebogebeeyey ayaa khudbad uu jeediyey waxa uu ka warramay marxaladda dal, khilaafaadka jira, ka ee dhinaca siyaasadda wada-hadalada u socda axsaabta mucaaradka iyo dawladda, iyo hadallo kale oo uu dadweynaha Somaliland kaga codsanayo inay xisbiga UCID taageeraan, haddii ay UDUB isku garanwaayaan. Waxa kale oo guddoomiyaha UCID si aad ah ugu weeraray khudbaddiisa Madaxweynaha dalka Djibouti Ismaaciil Cumar Geelle. Hadaladii Faysal halkaa ka jeediyeyna wax ka mid ahaa: "Waxaan marka hore salaamayaa dadweynaha reer Somaliland madaxweynaheeda iyo gaar ahaan magaalada Boorama oo ah magaaladii aan ku soo barbaaray. Waxan mar labaadka idinka raalligelinayaa hadalo dhawaan lagu baahiyey oo la iga soo xigtay inaan suldaan reer Boorama ah wax ka sheegay. Midda kale marwadu way naga mudantahay ixtiraam, qofkii looga ergeyn lahaana ma ihi Hudda. Waa ina adeertay, laakiin waan idiin sheegaynaa nasteexo ayaan isku leenahay oo ii sheegtaan waxa suuqa laga leeyahay, oo weliba reer Nuur ii sheegaa, xaalna waan idinka siiyey, waxan odhan lahaa Hargeysa casharro haka qaataan sida reer Boorama u nidaamiyaan munaasabadan oo kale. Siyaaradiibaan idiin imi, maalmaha khayrka lehna inaan imaado ayaan jeclahay. Somaliland waxa baylihiyey dadkii lixdankii Somaliland bixiyey, waxana garanweynay waxay Djibouti garatay, balse waan soo ceshannay. Haddii aan isqabqabsanno ninkaan gacalka nahay ee Djibouti ka madax ahi wax uu inoo tari iska daayoo hubbuu iskugu keen dhiibi, annaga hannooga biqina, madaxweynahana intaad nagu leedihiin isagana ku yidhaahda, middida daabkeeda isagaa hayee ha dabciyo hana ka xanaaqina markaan la xisaabtamaynno, sababtoo ah Somaliland oo dhan baa dooratay. Markaan doodaynana dagaal dhici maayo, sharcigaan isku qabsanaynaa. Rayaale uma cadaadinayo waa reer Awdal, laakiin xilkiisaan dhaliilaynaa. inaan dulmino ma doonaynno isaguna yaanu na dulmin. Nin suxufi ah oo halkan jooga baa igu yidhi Faysal malaha Madaxweyne-nimo ma doonayo 2003diina isagaa siiyey Rayaale, uma eexanne waan u hanneeyey. Waxaan doonaynaa khayraadka inaan la soo baxno oo aan dhisno dekedda Lughaya, tan iyo Saylac. Diinta islaamkaan ku shaqaynaynaa, laakiin maaha in macnaheedu inaan leenahay Addis Ababa ayaan qarxinaynaa, ama New York baan bam garanaynaa ee waxa weeye Somaliland baan dhisaynaa ku dhaha, meesha keliya een ku arkay isbeddel waa Boorama, saddexdaa daarood ee dhaadheer iyo laamigaasi ma jirin. Idinku magaalooyinkiina ayaad dhisataan, reer Ceerigabo Hargeysay dhisaan, reer Burco Hargeysay dhisaan, idinkuna magaaladiina ayaad dhisataan. Midda kale haddii madaxweynaha aan la xisaatanno oon qabsanno haka cadhoonina, sababtoo ah Madaxweynaha Somaliland oo dhanbaa dooratay, la hadla oo wax u sheega, hana nooga baqina Somaliland inaan wax yeelo, waanan dhaliilaynaa madaxweynaha. Waxa la yidhaahdo kolba dhinacbaad raacdaan haddaad UCID tihiin, annagu waxaanu raacnaa hadba ninka runta u dhaw ama xaq u dhaw.”

Dhinaca kale Guddoomiyaha UCID oo shir jaraa’id qabtay ayaa waxa kale oo uu aad ugu dheeraaday sida Djibouti iskugu mashquulisay heshiisiinta Soomaaliya, “waxaanu leenahay abaalkaanu kuu gallay noo gud” ayuu yidhi.
Faysal oo ka hadlaya arrimaha muranka siyaasadeed ku keenay Somaliland iyo halka wax marayaan ayaa yidhi "Bisha labaatankeeda ayaan ballansannahay, qodobada taaganna aan saarno sidii doorashooyin xaq oo xor ahi u dhici lahaayeen. Waxa ka mid ah diiwaangelintii oo ay diiddan yihiin xisbiyada qaar ka mid ah, time-line in la sameeyo labadaa ayaa ugu muhiimsan. Tan 15-ka May waa la soo dhaafay, muranna kuma jiro inuu xilkiisii dhammaaday, muran kuma jirin inay dawladdu dib u dhigtay, waxayna ka mid tahay uun waxyaalaha aanu dawladda ku cambaaraynaynno. Dawladda UDUB way dhammaatay, 20-ka bisha waxaanu leenahay halla eego in madaxweynuhu xaq u leeyahay inuu la guuro time-lineka, dhaar ma u baahan-naynaa. Shan sanadood ayaa la dhaariyey, isagay u fiican tahay, ma u baahan tahay in dawlad cusub la sameeyo, wayna dhammaanaysaa, waxaanse leenahay 15-ka markay dhammaato wakhtigiisu waxan leenahay waa gudoomiye xisbi (chairman).”
Sidoo kale waxa isna munaasibadda dabaaldega halkaasi ka hadlay Guddoomiyaha gobolka Awdal, Maxamuud Sheekh C/Laahi Cige, isagoo khudbaddiisu ku koobnayd arrimo u badan mahadcelin iyo ilaalinta nabadgelyada waxaanu yidhi "Maanta waa maalin qiimo u leh guud ahaanba dhulka Somaliland, iyadoo la ogyahay sida geesinimada leh ee Madaxweyne Rayaale Somaliland qarannimadeedii usoo dhammaystiray. Intaa kaddib waxan u mahadcelinayaa cid kastoo soo qabanqaabisay xafladdan qiimaha leh, gaar ahaan golaha degaanka Boorama, oo isagu in muddo ahba ku hawlanaa sidii maanta loo soo bandhigi lahaa xafladdan quruxda badan leh.
Waxa kale oo isna halkaasi ka hadlay Kusimaha maayarka Boorama Muumin Gadiid Cumar, isagoo gudoomiyaha goluhu wax ka taataabtay sida mar walba loogu baahanyahay in la ilaaliyo nabadgelyada, dadweynaha iyo maamulka golaha degaankuna wax ka qabtaan arrimaha horumnarinta magaalada.

Munaasabaddan shalay waxa kale oo ka hadlay xubno isugu jiray salaadiin, ay ka mid yihiin suldaan Ibraahim Dacar, suldaan Cabdi Jaamac dhawal, xubno ka tirsan Golaha guurtida, iyo wakiillo ku hadlay magaca ururka haweenka ee Gobolka Awdal, Xaawa Rooble Cidheere.
Munaasabaddan ayaa dhinaca kale waxa lagasoo jeediyey gabayo iyo suugaan kale oo lagu muujinayo qiimaha maalintani u leedahay dalka iyo dadweynaha Somaliland.
Ciidamada kala duwan ee ka hawlgala degaanka Boorama ayaa iyaguna salaan sharaf ay siiyeen maamulka gobolka iyo guddoomiyaha xisbiga UCID, iyagoo socod gaaddo ka ciyaar ahna ku soo bandhigay madashaas ee lagu xusayay munaasibadda 18-ka May, kuwaas oo dadweynihii goobta joogay ay aad u jeclaysteen.

Munaasabaddan ayaa dhinaca kale waxa ka hadalkoodii cidhiidhi la geliyey Madax iyo masuuliyiin xisbiga Kulmiye ah kaddib markii lagu oriyey ninka musharax mansabka Madaxweyne ku-xigeenka xisbiga KULMIYE ah, Ismaaciil Muumin. Inkastoo Ismaaciil Muumin Aare makarafoonka qaatay wax yar ka hor markii xafladda uu soo gebogebeeyey Gudoomiyaha UCID, balse markii uu laba kelmadood sheegay uun ayaa laga bakhtiiyey makarafoonka.

 

Ceerigaabo, Laas-caanood, Gabiley iyo Berbera, May 19, 2008 (Haatuf) – Gobolada Sool, Sanaag, Saaxil iyo degmooyinka Gebilay ayaa maalintii shalay si weyn looga xusay maalinta 18ka May oo ku beegan xuska sanad guuradii 17aad ee ka soo wareegtay la soo noqoshadii madax banaanida Somaliland.

Meelaha laga xusay munaasibadan 18ka may waxa ka mid ah Magaalooyinka Gebilay,Wajaale, Ceerigaabo iyo Laascaanood waxa dadweynaha kala qayb galay maamulka Gobolada iyo degmooyinkaas.

Ugu horeyn Magaalada Laascaanood ee xarunta Gobolka SOOL Waxaa shalay laga xusay xuska 18ka May ee gooni isu taaga Somaliland iyadoo xuskani ay soo qaban qaabiyeen masuuliyiinta kala duwan ee heer Gobol iyo mid Degmo ee Gobnolka Sool ee Somaliland.

Xuskan ayaa waxa uu ku bilaabmay jawi aad u degan waxaana ka qayb qaatay dadwayne aad u tieo badan kuwaas oo watay baabuur iyo calamada Somaliland iyo waliba astaamo ay ku muujinayaan halku dhigyo ay ku taageerayaan gooni isutaaga Somaliland iyo mawqifka ay ka qabaan kuwaas oo hadaldaaaasi ay kamida haayeen ‘waa muqadas gooni isu taaga Somaliland iyo hadalo kale’.

Shacabkii ka qayb qaatay munaasibadan ayaa waxa ay socod ku mareen wadad dheer ee dhexmarta bartamaha magaalada Laascaanood waxaana ay socodkooda ka qaadeen dhinaca Galbeed ee magaalada oo ay ku yaaliin inta badan xafiisyada Dawlada Somaliland ayna ku tageen dhanka Barri gaar ahaana Hotel Xamdi.

Dadkii maanta ka qayb qaatay munaasibadaasi sida wayn looga xusay Gobolka ayaa waxa ay dib ugu soo laabteen dhanka Galbeed ee magaalada gaar ahaana xarunta guriga Gobolka halkaas oo laga soo jeediyay khudbado kal gedisan oo ay soo jeediyeen masuuliyiinta Somaliland una jeedinayeen shacabka reer laascaanood.

Sidoo kale maayarka magaalada Laascaanood Canbaashe aw Daahir ayaa halkaasi waxa uu ka jeediyay khudbad uu ku xusayo sanadguurada 17aad ee gooni isu taaga Somaliland waxaana uu yiri ‘waxaan aad ugu faraxsanahay sida wayn ee reer Laascaanood ay uga qayb qaateen xuskan sida wayn looga xusay dhamaanba Gobolada Somaliland waxaana halkan aad ku muujiseen sida aad utihiin shacab Somalilandres ah taas oo keenaysa isdhexgalka reer Somaliland’.

Ugu danbayntii ayaa waxaa halkaasi ka hadlay Gudoomiyaha Gobolka Sool Cali Maxamuud Axmed waxaana uu ugu horayn qudbadiisii ku bilaabay amaan uu usoo jeediyay dadka shacabka waxaana uu sidoo kale uu hadaladiisii kamid ahaa in dhalinyarda reer Laascaanood ay dugsiyada sare iyo Jaamacad ay ku dhigan doonaan bilaash isagoo dhan kalena xusay in Xisbiyada Kulmiye iyo UCID aysan kasoo qayb galin munaasibadan iyadoo inta badan shacabkii halkaasi kasoo qayb galay ay siteen calaamado ugaar ah xisbiga UDUB taas oo ay u soo iibiyeen Masuuliyiintii xukuumadda ee soo abaabushay hawshan xuska 18 ka May.

Dhanka kale Degmada Gebilay Munaasibada xuska 18ka may oo lagu qabtay fagaaraha Khayriyada Gabiley oo ay ka soo qayb galeen wasiiro, xildhibaanada golaha wakiilada iyo boqolaal ka tirsan dadweynaha ku dhaqan deegaanka Gabiley oo halkaasi ku jeeni qaaraa Calanka Somaliland iyo dharka Hidaha iyo Dhaqanka oo xuskaasi kusoo bandhigay Maanso iyo Ciyaaro ku jihaysan xuska 18ka may, hasa yeeshee masuuliyiinta sadexda xisbi KULMIYE, UCID, iyo UDUB ee degmada Gabiley ayaa iyagu Munaasibad lagu xusayey 17guuradii kasoo wareegtay markii lagu dhawaaqay gooni isku taaga Somaliland 18kii May 1991kii oo shalay lagu qabtay caasimada gobolka Gabiley ee degmadaasi, ayaa si kulul mudaneyaasha mucaaridka ee golaha wakiilada iyo maamulka golaha deegaanka ay iskugu waydaarsadeen weedho kulul oo difaac iyo weerar isugu jira munaasibadaasi ka hadal taasoo la sheegay in maayarka degmada Gabiley Xuseen Jameeco ka hor joogsaday inay fagaarahaasi ka hadlaan.

Ugu horayn waxaa munaasabadaasi 18ka may ka hadlay xoghayaha arimaha dibada xisbiga Kulmiye Dr Axmed Xuseen Ciise oo isagu dadweynaha reer Gabiley shalay khudbad uga jeediyey fagaaraha khayriyada ayaa sheegay in Gabiley tahay deegaan khayraad balaadhan leh isla markaana u qalanta Gobolnimada loo magacaabay “ waan ku faraxsanahay inaan idinkala soo qayb galo xuska munaasibada 17 guurada ka soo wareegtay gooni isku taaga Somaliland oo ah madfacii 17-aad ee ku dhaca cadawga Somaliland runtii gobolnimada loo magacaabay degmada Gabiley waa gobol kharaad balaadhan alle ku manaystay oo deegaan balaadhana ku fadhiya iyadoo ka mida gobolada ugu khayraadka iyo dakhliga badan gobolada dalka ka kooban yahay waxaa loo baahan yahay in gobolkan Gabiley horumar balaadhan la gaadhsiiyo Jaamacado, Cusbitaalo iyo guudahaanba adeegyada bulshada hore loo mariyo, siyaasiyiin, xildhibaano, ganacsato iyo guud ahaanba shacbiga gobolka Gabiley meel kasta oo ay joogaan waxaan ugu baaqayaa in horumarka gobolka Gabiley meel qudha looga soo wada jeesto oo leysku tashado.”

Mudane Ibraahin Axmed Haybe oo isaguna ka mida xildhibaanada golaha wakiilada ee laga soo doorto Degmada Gabiley oo isaguna ka Hadley munaasibadaasi 18ka may ayaa yidhi “gobolnimada Gabiley waynu u baahanahay waxaase muhiima inaynu hanano loolanka siyaasada ee asxaabta dalka ka dhex aloosani maaha kuwo qaranimada iyo amaanka lagu duminayo ee waa loolan lagu kala riixanayo hanaanka iyo horumarka dalka, maalin dhawayd waxaa warbaahinta dawlada ee caasimada laga waday ololayaal la leeyahay reer barigu haka baxaan Hargeysa arintaasi arin fool xun bay ahayd oo ceeb ku ah shacabka Somaliland, hadii Ceerigaabo cadow soo weeraro reer Somaliland fadhiyi maayaan ee waydin gurmani, sidaa darteed reer Somalilnd ma kala sheegan karaan gobolada dalka waana xaaraan.”

Maxamed Yaasiin Sh. Cali oo ka mida mudaneyaasha golaha wakiilada xisbiga UDUB ee laga soo doortay gobolka Awdal ayaqa isaguna sheegay in magacaabida gobalnimo ee Gabiley la sugayey muddo sodon sanadooda isagoo intaa ku daray in shuruudihii gobolnimada lagu ansixin lahaa buuxiyeen “waxaa ii sharaf ah in munaasibada 18ka may kaga soo qayb galo Gabiley oo gobola waxaanan qabaa in gobolka Gabiley yahay gobol shuruudihii lagu ansixin lahaa buuxiyey hadaanu golaha wakiilada nahayna waxaan idiin balan qaadaynaa inaanu ansixindoono gobolnimadiina oo aanu u aragno in uu yahay gobolka ugu dhaqaalaha badan dalka”
Bashiir Sheekh Xuseen Tukaale oo isaguna ka mida mudaneyasha xisbiga UCID ee laga soo doorto Gabiley ayaa isaguna sheegay in gobolnimada Gabiley ay ka dhimantahay sugitaankii xuduudihii u gaarka ahaa deegaanada hoos yimaada sidaa darteed maamulka golaha deegaanka si wayn ugu eedeeyey dib udhaca Xafladii gobolka loo qaban lahaa oo uu sheegay in dariiqyo qaldan loo maray dhaqaalihii lagu qaban lahaa, gobolnimada Gabiley waa mid dhantaalan hadii aan xuduudkii la sugin farxada dadweynahana way sii dhantaalantahay.”

Xasan Cawaale Caynaan oo isaguna ka mida mudaneyaasha wakiilada xisbiga Udub ee Gabiley laga soo doortay ayaa sheegay in dagmada Gabiley ay dhawr iyo toban sanno ah ay haysatay maqaam ku meelgaadha oo gobolnimo lana tilmaami jiray lixda gobol iyo Gabiley.”

Marwo Safiya Aadan Meecaad oo ka mida haweenka reer Gabiley ayaa iyaduna si kulul ugu dhaliishay golaha deegaanka Gabiley waxqabad la’aanta xustayna dayaca ka muuqda adeegyadii bulshada iyo Jidadaka magaalada.

Dhinaca kale maayarka degmada Gabiley Xuseen Maxamuud Jameeco oo isaguna munaasibadaasi ka 18ka may khudbad kooban ka soo jeediyeye ayaa dareen cadho leh iyo jawaab kulul ka bixiyey eedihii mudaneyaasha wakiilada ee mucaaridku uga soo jeediyeen dibu dhaca xaflada gobolka Gabiley iyo duruufafha ku gadaaman magacaabida gobolnimo, waaxana uu yidhi “runtii in nala canaanto maamul ahaan ma diidanin oo waanu ogolnahay xafladii gobolka Gabiley dhawaan ayaanu qabanaynaa, xafladaha la qabtayna way ka balaadhan tahay ta Gabiley marka loo eego darisnimada caasimada iyo bulshada ka soo qayb galaysa.

Sidoo kale Tog-Wajaale Boqolaal qof oo ka mid ah dadweynaha ku nool tuuladaasi ayaa saaka munaasibada maalinta qarannimada Somaliland ee 18-ka may u xusay si ka duwan sidii looga dabaal degay magaalooyinka kale ee dalka, waxaa subaxdii hore dadwaynaha oo isugu soo baxay meel fagaara ah waxay qaarkood ku dabaal dagayeen koox farda ah oo gaashaaman iyo dhalin yar aad u tiro badan oo ku labisnaa dhar laga tolay suurada calanka somaliland, gudoomiyaha degmada wajaale qawrax muuse oo dad waynihii halkaa isugu soo baxay halkaa kala hadlay ayaa sheegay inay Tog-wajaale tahay meel madax banaanideeda degmonimo maanta dhamaystiran tahay, mar hadii dakhligeediiba gaar looga dhigay waxaa kale oo isaganu fagarahaa ka hadlay midka mida odayada wajaale hadaladiisiina waxaa kamid ahaa:

“Adeer maanta cidna ugu habran mayno halkan wixiinagu soo marayna nin waliba wuu garanayaa inta nin badrool lagu shubay ayaa dabna laqabad siiyay awrka iyo biyaha la isku sido ayaa la isku karsan jiray xoogbaanu ku qabsanay oonu kaga xorownay:
Sidaa waxaa yidhi cabdi saleebaan xasan oo kamida odayaasha degmada tog wajaale, waxaa kaloo isaguna kamid ahaa odayada halkaasi kahadlay cismaan miigane suldaan oo sheegay taariikhda tog wajaale iyo waxay kaga duwan tahay magaalooyinka kale waxaa kaloo isna halkaa kahadlay xildhibaan Ibraahin Xasan Axmed sangal oo katirsan golaha degaanka ee degmada gabiley.

Xuskan maalinta qaranimada Somaliland ee 18ka may waxaa dadweynaha kunool magaalada wajaale looga dareemayay si qiiro iyo xamaasad weynleh iyadoo aan munaasibad noocan oo kale ah aan hore looga xusin sababta ay xuskan weyn maanta u sameeyeen waxa weeyi laba arimood oo kala ah
Dakhliga kasoo baxa cashuuraha wajaale oo xor looga dhigay kadib markii dhawaan loo magacaabay degmada iyo tog wajaale dhinaca ethiopia oo maalita qaranimada dalkaasi ee hayaa gunbood layidhaa si weyn loo xuso lagana dareemo tog wajaale guud ahaanba waxayna dadweyna reer wajaaloo aad u faraxsani kuusheegayeen maanta in xuska 18ka may ee sanadkani uu ka saxmad badan yahay xusaskii hore, iyo kii hayaanka gunbooda qaranimada tog wajaale ee Ethiopia.

Sanadihii hore xuska 18 may inay jirtay iyo inkale mabaanu ogayn oo dakhligoo dhan waxaa lagayn jiray Gabiley, sidaa waxaa yidhi maxamud sheekh oo ka mid ah dadweynaha tog wajaale.

Dhinaca kale waxaa kaloo tog wajaale si weyn looga dareemayay xiisada ka taagan arinta dakhliga tog wajaale gaarka looga dhigay oo maayirka gabiley si weyn u diidan yahay waxaanay dadku aad uhadal hayeen arintan dakhliga Tog Wajaale.

Sidoo kale Gobolka Sanaag Magaalo madaxdiisa Ceerigaabo, Munaasabad si weyn loosoo abaabuley oo la odhan karo waxay ahayd mid dhawr maalmood oo hore lagu soo hawl-lanaa looguna talogalay xuska 18-ka May ayaa maanta waxa lagu qabtay fagaaraha beerta xorriyadda ee magaalada Ceerigaabo (Noura Garden).

Munaasabaddan oo ay soo abaabuleen maamulka degmada Ceerigaabo ayaa waxa kasoo qayb galay madaxda xukuumadda heer gobol iyo degmoba, shaqaalaha laamaha kala geedisan ee dawladda, ururrada bulshada rayidka ah fannaaniin reer Sanaag ah oo iyaguna heeso cusub halkaas kusoo bandhigay madax-dhaqameedyo iyo dadweyne kale oo aad u tiro badan oo iyaguna isugu jiray qaybaha kala geddisan ee dadweynaha waxaana cid kastaba gaarkeeda ka muujisay calaamadaha iyo halkudhegyada gaarka u ah iyo weliba farxad iyo rayrayn dheeraad u ah maalintan weyn ee 18-ka May.

Munaasabaddan oo ugu horrayn uu ka hadlay Maayorka Ceerigaabo Ismaaciil X. Nuur Faarax ayaa isagoo mahad balaadhan u jeediyey
guud ahaan ka soo qaybgalayaasha munaasibaddan gaar ahaanna fannaaniinta reer Sanaag ee heesaha waddaninnimada cusub halkaas kusoo bandhigay
Sidoo kalena inbadan ka hadlay taariikhda xuska iyo sida ay ku timid maalintan 18-ka May ayaa waxa hadalladiisi kamid ahaa “Dhibaatadii ka dhacday dalka kaddib 26-June 1960 qiiradii aynu ku guuldarraysannay oo ahayd 5-tii Soomaaliyeed aynu isla baadi doonnay markii aynu ku waayo aragnay ayaa waxaynu heshiis reer Somaliland u dhan yahay Seylac ilaa Weylo ku gaadhney Burco 18-May 1991-kii halkaas ayaa waxa ka dhalatay 26-kii Juun in ay isu beddeshey 18-ka May oo aynu xorriyaddeenna lasoo noqonnay had iyo jeerna waxaan maqlaa qaar yidhaahda annagu heshiiskaas kuma jirin taasina waa waxba kama jiraan”. Isagoo ka hadlaya khilaafkii axsaabta ee dhowaan oo dadweynuhu u dhega taageenna Maayorku wuxu yidhi “Khilaafkii dhowaan ee xukuumadda iyo axsaabta waxan mahad ballaadhan ugu jeedinayaa sida ay ka yeeleen axsaabta qaranku waxadna ogtihiin mar kasta oo khilaaf innasoo dhexgalo axsaabta qaranku dadkooda iyo dalkoodaba waa rabaan oo wax kastana sida wanaagsan ayay ka yeelaan waana dhaqankii la inooga bartay haddaynu reer Somaliland nahay”. Ugu danbayn dhinacyada abaarihii dhowaan gobolka soo maray iyo sicir bararka iyo arrimaha dhaqaalaha iyo horumarinta isagoo ka hadlayana wuxu yidhi “Sannadkan abaaro iyo sicir barar adag ayaa innasoo maray waxana hoos u dhacay dhaqaalihii iyo cashuurtii dadweynaha laga rabay weliba waxa jira xanuunnada shubanka oo meeelo gobolkeenna kamid ah (Dhahar) ka jira sidaas darteedna waxan idinkula dardaarmayaa nadaafadda oo aad ilaalisaan si cudurradaas looga hortago iyocashuurta oo aad bixisaan si horumarkeennu usii socdo weliba haddii aad cashuurta si wanaagsan u bixisaanna waxan idiin allan qaadayaa mashaariic horumarineed oo dhowaan laydiin samayn doono”.

Chief-Caaqil-Axmed Kullikulli oo isaguna madax-dhaqameedyadii fagaarahaas ka hadlay kamid ahaa ayaa waxa hadalladiisii kamid ahaa “Waxan dadweynaha reer Sanaag si gaar ah ugu mahad celinayaa khilaafkii axsaabta iyo xukuumadda ee dhowaan oo aynaan ku milmin taasina waa qiimaha aynu ognahay inay inoogu fadhido nabadgelyada aan cidina inaga taageerin ee aynu gaarkeenna u heshiinney Somaliland-na ilaahay ayaa ilaashanaya, dadweynahana waxan kula dardaarmayaa ilaalinta nabadgelyada.”

Maaddaama uu yahay Madaxa Hay’adda Bisha-cas ee gobolka Sanaagna isagoo xagga caafimaadka ka hadlaya wuxu yidhi “Dhahar inkastoo hay’ado badani ka hawl galeen haddana waxa shubanka ugu dhintay dhawr iyo toban qof arrintaasina waxay u baahan tahay inaynu ka feejignaanno oo ilaalinno nadaafadda sidoo kalena ciddii lagu arko xanuunkaas waa in si degdeg ah loo soo wargeliyaa xarumaha caafimaad iyo hay’adaha ku shaqada leh sida MCH-yada iyo Cusbitaalladaba”.

Kusimaha Guddoomiyaha Gobolka Sanaag C/casiis Xasan Siciid oo isaguna halkaas ka hadlay ayaa yidhi “Marka hore dadweynihiinna halkan isugusoo baxay iyo guud ahaanba reer-Sanaag waxan salaam hambalyo oo kusaabsan 18-ka May idiinka sidaa Madaxweynaha Jamhuuriyadda Somaliland Md-Daahir Rayaale Kaahin iyo Madaxweyne kuxigeenka JSL Axmed Yuusuf Yaasiin waxan kaloo idinku hanbalyaynayaa sida aad isugusoo baxdeen oo usoo bandhigteen una muujiseen dareenka shucuureed ee xuska maalinta 18-ka May ee manta aynu halkan ku xusayno oo ah 17 guuradii goonni idu taagga Somaliland”. Isagoo hadalkiisa sii watana wuxu intaas kusii daray “Waxan idinku boorrinayaa ilaalinta nabadgelyada iyo isku duubnaanta si aan waxyeello loo gaadhsiin nabadgelyadeenna iyo madaxbannaanideenna 30-sano kaddib aynu la soconno sidii aynu ulasoo noqonnay iyadoo aan cidina innaka maqnayn 18-kii May ee 1991-kii oo ah tan maantana looga dabbaaldegayo dhammaan meel kasta oo dalkeenna Somaliland ah”.

Dhinaca kalena Guddoomiyaha UCID ee gobolka Sanaag C/laahi Axmed Daammur oo kamid ahaa madaxdii fagaarahaas ka hadashay iyo weliba Isuduwayaasha Waxbarashada Caafimaadka iyo Arrimaha qoyska oo iyaguna kamid ahaa madaxdii laamaha dawladda ee halkaas ka hadlay ayaa ahaa kuwo dhammaantood muujiyey taageerada iyo taariikhda 18-ka May ee maanta la isugu soo baxay fagaaraha Beerta Xorriyadda Ceerigaabo.

Magaalada Berbera ee Gobolka Saaxil waxa iyana xalay ka dhacday xaflad lagu xusayay munaasibada xuska 18ka May, halkaasi oo ay dadweynaha kala hadleen Masuuliyiinta Magaalada Berbera.

Ugu dambeyntii waxa markii ugu horeysay Degmada Badhan ee Gobolka Sanaag ka dhacday munaasibad lagu xusayay maalinta 18ka May ee madax banaanida Somaliland.

 

Cardiff, May 19, 2008 (Haatuf) – Hoggaamiyeyaasha ururka QARAN ee socdaalka ku jooga carriga UK, ayaa shalay kala qayb-galay jaaliyadda Somaliland ee ku dhaqan gobolka Wales gaar ahaan magaalada Cardiff xaflad ballaan oo loogu dabaal-degayay munaasibadda 18-ka May oo ah sannadguuradii 17aad ee ka soo wareegtay maalintii ay Soamliland dib ula soo noqotay xornimadeedii.

Munaasibaddan lagu xusayay 18-ka May oo ahayd mid ka duwan kuwii hore ee lagu xusi jiray maalmahan oo kale, ayaa jaaliyadda reer Somaliland ee Cardiff waxay markii ugu horeysay isku af-garteen in ay jaaliyad ahaan in mucaarid iyo muxaafidba wixii khalad ah ay labada qoloba meel uga soo wada-jeestaan isla markaana wixii ictiraafka qadiyadda Somaliland wax yeelayana laga wada fogaado.

Cabdikariin Aadan oo ka mid ah xubnaha firfircoon jaaliyadda Somaliland ee gobolka Wales, ayaa Haatuf u sheegay inay isku afgarteen ka jaaliyad ahaan arrimo muhiim ah oo uu sheegay inay wax ka tari karaan xidhiidhka iyo tala-wadaaga ka dhexeeya jaaliyadda ku wada nool gobolka Wales. “Jaaliyad ahaan markii aanu eegnay mashaakilka ka taagan dalka waxaanu isku af-garanay in labadayada qolo ee muxaafidka iyo mucaaridkuba wixii mashaakilaad ah laga doodo oo wixii sharciyad iyo wixii kale ee laysku hayo cidii khaldan la sheego iyadoo loo dhan, oo aan masalan iyadoo mucaaridka ama muxaafidku iyagoo badhna ku sax ah badhna ku khaldan aan la wada odhan way wada khaldan yihiin.”

Xubnaha Jaaliyaddu waxa ay sheegeen inay taas u arkaan in xalka keliya ee lagaga badbaadi karo ay tahay iyadoo wixii khalad ah meel looga soo wada jeesto, taasna ay ku dhaqmi.

Sidoo kale, waxay Jaaliyadda reer Cardiff isla qaateen in mararka la kulmayo dadka danuhu inaga dhexeeyaan dibaddaha in iyadoo wixii la dhaliilo ah la sheegayo haddana maskaxda lagu hayo arrinta ictiraafka wixii dhaawacaya ama waxyeelo u geysan kara, isla markaana la ilaaliyo sidii sumcadda dalka loo dhawri lahaa.
Munaasibaddan lagu xusayay 18-ka May ee ka dhacday magaalada Cardiff ayaa waxaa dadka la hadlay labada gudoomiye ku-xigeenka urur-siyaasadeedka QARAN, Eng. Maxamed Xaashi Cilmi iyo Jamaal Caydiid Ibraahim, waxaanay uga warameen duruufaha dhaqaale iyo siyaasadeed ee dalka ka jira iyo qadiyadda sharciyada ururkooda halka ay marayso.

Eng. Maxamed Xaashi isagu ka waramay dhibaatooyinka u muuqda ee maamulka, sida miisaaniyadda oo dib uga dhacda wakhtigeedii la soo gudbin lahaa, Hanti-dhawraha oo aan sideedii u hawl-gelin iyo in si aan isu dheeli-tirnayn loo soo diyaariyo miisaaniyadda, taas oo uu sheegay in Masalan wasaaradda Maaliyadda kharashka loogu talo-galay inay u isticmaasho shidaalku ay ka badnaato miisaaniyadda wasaarad dhan. Sidoo kale waxa uu Maxamed Xaashi ka hadlay arrimo ay ka mid yihiin musuqmaasuqa iyo qorshe la’aanta Xukuumadda Riyaale.
Jamaal Caydiid Ibraahim oo isna halkaas ka hadlay ayaa ka waramay sidii uu ku yimi aasaaska ururka QARAN, asbaabihii ugu muhiimsanaa ee loo aasaasay, waxaanu sheegay inay ka dhalatay kadib markii ay arkeen dhibaatooyinka dalka ka taagan sida shaqo la’aan, horumar la’aan, kadibna ay isyidhaahdeen haddii talada gacan ku yeelan lahaydeen waxaad wax ka qaban kari lahaydeen xaga shaqooyin dadka loo sameeyo, isagoo xusay in markii ay isku dayeen inay sharciyad u doontaan ururkooda inay kala kulmeen dhibaato farabadan oo geyaysiisay in xabsiga Mandheera lagu xidho, iyagoo aan helin garsoor dhex ah.
Mar la weydiiyay hogaamiyeyaasha QARAN inay dagaalamayaan haddii la ogolaan waayo in loo diiwaangeliyo ururkooda, waxay sheegeen inay waxa ugu horeeya ee ay ahmiyadda saaraan tahay nabadgelyada oo aanay marnaba ku talinayn dariiq aan ahayn nabadgelyo, balse ay dariiq kastoo sharci ah u mari doonaan sidii ay xuquuqda distooriga ah u heli lahaayeen.

Waxa kale oo ay sheegeen hogaamiyeyaasha ururka QARAN inay mar walba iyagu diyaar u yihiin taladooda ka dhiibtaan wixii waajibaadkooda ah hadday muranada dalka ka jira iyo wixii khilaafaad ah ee soo kala dhex gala bulshada iyo dawladda dalka ka jirta.
Dhinaca kale, hoggaamiyeyaasha ururka QARAN waxay Sabtidii dorraad sidan oo kale xaflad lagu xusayay sannadguurada 17aad ee qaranimada Somaliland kala qayb-galeen jaaliyadda reer Somaliland ee ku dhaqan magaalada Bristol ee cariga Ingiriiska, halkaas oo ay sidoo kalena kala soo qayb-gashay MP Kerry McCarthy oo ah Mudane Baarlamaanka Ingiriiska ka tirsan oo laga soo doorto magaalada Bristol.

 

"Lama Joogo Waklhti La Sacabbiyo” Ismaaciil Muumin.

Boorama, May 19, 2008 (Haatuf) – Prof. Ismaaciil Muumin Aare oo ah musharax jagada Madaxweyne ku-xigeenka ee xisbiga Kulmiye iyo masuuliyiinta xisbigaasi ee gobolka Awdal ayaa dareen cadho leh ka muujiyey sidii looga takooray dabbaaldegga munaasabadda 18 May ee Boorama lagu qabtay shalay, taas oo ka dambaysay kadib markii loo diiday inuu ka hadlo munaasibaddaas.

Sida uu ku soo waramay weriyaha Haatuf ee gobolka Awdal, Maxamed Cumar Sheekh, shir jaraa’id oo uu wax yar kaddib dhammaadkii xafladdaasi qabtay, ayaa waxay maamulka gobolka Awdal ku eedeeyeen inuu ku kacay ficillo aan ku wanaagsanayn wada-jirka iyo waanwaanta axsaabta iyo dawladda u socota, isagoo musharraxaasi iyo masuuliyiintaasiba shirkoodan jaraa’id ay ku muujiyeen siday arrimahani dhaawac ugu geysan karaan sumcadda gobolka.

Ismaaciil Muumin oo arrintaasi ka hadlayaana waxa uu yidhi: "Maanta [shalay] oo 18-ka May ah, waxaan ummadda u diraynaa salaan, waxa jirta waayadan, iyadoo ay nabadi jirto, dastuurkeenna iyo dhaqankeenuna ku dhisan yahay istixgelin. Guurtidu waxay ahaayeen aasaaskii processkan. Waxa la lahaa maalmahan waa la is haystaa, waxa la gaadhay wakhtigii sida sharciga ah la isku qabsana lahaa. wakhti la sacabbiyo lama joogo, wwaa inaan doodno, waa in la wada hadlo, sacab maaha iyo guulwade Siyaad aan 20 sano ku soo jirray dadkiibaan ka kari la’nahay sacabbinta iska daaya. Haddaan ku dirtay inaan shan cisho ii hay ku idhi oo walaalkaa joogo, miyaanay ahayn inaad iska wareejiso, diktaatooriyad uma baahnin. Dimuqraadiyadda dadka laga eryeyaa, sidaa wax, jaamacadihiiba jira. Bini aadamku inaan hore uga sii soconno weeye meeshaan joogno. Sida sharciga ah innagoo marayna. Waad ogtihiin in saddexda xisbi wadahadal u socdo iyadoo la tixgelinayo wanaagga dadka iyo dalka, ciidanka waxan si silmi ah ugu wareejinaynaa kolba kii qabta. Sida maanta gobolka awdal ka dhacday xafladdiisii, waxaad mooddaa in labadii xisbi ee mucaaradka ah midna la soo dhaweynayo midna la fogeynayo, oo kolkii la kala dareerayey KULMIYE loo dhiibay, haddana laga bakhtiiyey, waxaan leenahay dawladdu caasimadda iyo gobolada waa inay sharci ku wada xukuntaa ee midba kay doonto aanay ku xukumin loona sinaado axsaabta qaranka. Waxaan ka xunnahay guddoomiyaha gobolku siduu noola dhaqmay ee isaga aad mooddo in amar gooni ah la siiyey."

Sidoo kale waxa isna halkaasi ka hadlay wakiilka xisbiga Kulmiye ee G/awdal Aadan Xaaji Maxamuud Aye, oo yidhi "Waxan leenahay ummadda yaan la majara habaabin. Sicir bararbaa jira, dad codka laga rabaa waa masaakiinta aan cidi ogeyn, dawladda waxan odhan lahayn waa inay cashuuraha ka kabaan dadka, raashinka qiimihiisana hoos loo dhigo. Shicibkaa dawlad lagu yahay. Xafladii maanta way fiicnayd laakiin dhaliil bay lahayd, waxay ahayd in kaalinteedii la mariyo xafladdaasi oo naloo oggolaado. Hadii xisbi hala iska ilaaliyo la yidhaahdo, sidaa kuma joogsanayo. xisbigana waad mooddaa in la iska celinayo. Waa dad isku mid ah, nabadda jirta in la ilaaliyo weeye, oo dadka la isku soo jiido. Maanta waxaynu maraynaa meel aan higsanaynno aqoonsi iyo dimuqraadiyad taam ah inaan gaadhno, waxaanad moodda in maamulkeenni gobolku sidaa si ka duwan uu dib innoogu celinayo. Waa waxan ka xunnahay annagoo maanta dadkeenii Somaliland dhammaanteen aan tusi weynay farxadda 18 May, sababtoo ah takooridda lagu samaynayo qayb ka mid ah dadweynaha gobolka ee badhna loo diidayo inay farxaddooda muujiyaan badhna loo oggolaanayo."

Ibraahim Aadan qaalib, kana mid ah siyaasiyiinta xisbiga KULMIYE oo isna ka hadlay shirkan jaraaid ayaa sheegay Xidhiidhka ka dhexeeyab i kulmiye iyo maamulku gobolku inuu marayo meel xun.

Top

Hargeysa, May 19, 2008 (Haatuf) – Deeq isugu jirta Gaadiid, qalabka biyaha, mishiino iyo waxoogaa raashin ah oo loogu tala galay dadkii ay abaartu waxyeelaysay ayaa maalintii doraad ahayd ka soo degtay dekeda magaalada Berbera, deeqdan oo la sheegay in ay bixisay ururka bisha cas ee dalka Isu-tagga Imaaraadka Carabta kadib markii uu dhowaan Riyaale booqasho ku tagey dalkaas.

Gaadiidkan ayaa waxaa ku jira Riig kaas oo uu Madaxweyne Rayaale sheegay maalintii shalay mar uu ka hadlayey xafladii 18ka May inay biyo dhowaan ka qodi doonaan koonfurta maaalada Hargeysa kaas oo uu sheegay inuu hordhac u yahay deeq ay bisha cas weydiisteen markii uu sanadkan horaantiisii tagey dalka Imaaraadka.

Sida ay sheegayaan ilo xog ogaal ah oo la socday deeqdan waxa ay hay’ada Bisha Cas ee Imaaraadku ay ka hirgalin doonaan Somaliland Tobaneeyo ceel kuwaas oo aan la sheegin meelaha laga qodayo inkasta oo Madaxweyne Riyaale sheegay in qaarkood laga qodi doono Koonfurta Magaalada Hargeysa.

Waxa kale oo deeqdan ka mid ah raashin loogu talo galay dadkii ay abaaruhu waxyeeleeyeen kaas oo ay hay’ada Bisha Cas ee Imaaraadku ay ka wada socdeen Bisha Cas ee Somaliland oo iyadu u qaybin lahayd dadka reer Somaliland, hase yeeshee waxay warar xogogaal ahi sheegeen in ay raashinkaasi ku wareejiyeen Madaxtooyada.

Deeqdan Bisha Cas ee Imaaraadka ayaa la sheegay in ay qayb ka tahay mucaawanada ay Hay’adaasi siiso Soomaaliya taas oo ay Somaliland sanadkan waxoogaa uga garoocday ka dib markii uu dhowaan Riyaale booqashada ku tagay dalka Imaaraadka Carabta oo qar ka mid ah shuyuukhda reer boqor ay dhawr jeer ugaadhsi u yimaadeen Somaliland kuwaas oo la sheegay inay iyagu ka danbeeyeen tegitaankii Riyaale ee dalka Imaaraadka.
 

Hargeysa, May 19, 2008 (Haatuf) – Gadiidka kala duwan ee mara wadada weyn e hormarta Madaxtooyada ayaa xalay fiidkii ciidamada bilaysku ay ka xidheen gebi ahaanba una diideen inay maraan jidka laamida ah.

id ka mid ah ciidanka Bileyska ee lagu amray in ay jidkaasi ka celiyaan gaadiidka oo wariye ka tirsan Haatuf oo markaasi saarnaa mid ka mid ah gaadiidkaasi laga celiyey halkaasi oo wax ka waydiiyey sababta gaadiidkan looga celinaayo jidkan ayaa sheegay in cabsi laga qabo in la waxyeeleeyo xaflad lagu qabanaayey xarunta madaxtooyada oo loogu dabaal degayo xuska sannad guuradda 17-naad ee Somaliland 18/May/2008, sidaa darteed loogu amray inay celiyaan Gaadiidkii halkaasi mari jiray.

Gaadiidka shacbiga reer Hargeysa ee loo diiday in ay maraan jidkan madaxtooyada ayaa waxaa ka mid ahaa Basaska rakaabka gura ee u kala goosha xaafadaha Jig-Jiga yar iy Beebsiga, waxayna arintani dhibaato ku noqotay dadkii rakaabka ahaa ee deganaa agagaarka madaxtooyada ilaa gooladda State-house -ka iyo waliba kuwii deganaa xaafada Biibsiga oo iyagana laftooda haddii ay marilahaayeen madaxtooyada dabadeeda ama jidka daba mara maxkamada sare loo diiday iyada oo jidkaasina la dhigay ciidan bileys ah oo celiya Gaadiidka halkaasi mari lahaa, waxayna arintaasi ka cadhaysiisay dad badan oo arimaha noocan ah ku tilmaamay shuquladii lagu yiqiinay xukunkiii kaligii taliska ahaa ee Siyaad Barre, “ waar waxaan oo kale maaha Nabadgelyo ilaalin ee shacabka danyarta ah cadibaada iyo dhibaatada kala taga” sidaa waxaa yidhi mid ka mid ah dadka shacbiga ah ee saarnaa Basaska oo markaasi la hadlaayey ciidanka Bileyska ee halkaasi u diiday gaadiidka in ay maraan “ bal imika halkeebaan ku xareeyaa Gaadhigayga” sdiaa waxaa yidhi nin watay mid ka mid ah Gaadiidka laga hor istaagay isgoyska dhinaca Bari ka xiga madaxtooyada oo isagu sheegay in gurigiisu ku dhaw yahay madaxtooyada, kuna xaraysan jiray gaadhigiisa gidaarka xayndaabka u ah gurigiisa, balse loo diiday in uu maro jidkan oo ah jidka kaliya ee uu u mari karo aqalkiisa, haddaba madaxtooyada Somaliland ayaa xalay lagu qabtay xaflad loogu dabaal degayo xuska maalinta 18-ka May, haseyeeshee qabashada xafladaasi waxay sahayatay dad badan iyo Gaadiid badan, ka dib markii loo diiday in ay iyaga iyo gaadiidkooduba maraan jidkaasi madaxtooyadda Somaliland. Taas oo badi dadkaasi ay ka yaabisay sababta loogu diiday jidkan in ay u maraan guryahooda iyo waliba cabsida in taasi leeg ee ay qabaan madaxtooyadu.

Waxaana dadka isu qaban weyday cida ilaa hadda laga cabsanayo, amase cida si gaar ah looga baqayo in dhibaato la gaadhsiiyo iyo in xayiraada intaasi leeg loogu dhibaateeyo bulshada xaflad yar oo lagu daawanayo riwaayado dariiqa hor mara Madaxtooyada ayaa halay subaxdii hore la xidhay ilaa iyo intii u Riyaale ka soo noqonayey Fagaaraha beerta Xoriyada halkaas oo uu kaga qayb galay xuska 18ka May!.
 

New York, May 19, 2008 (W. Wararka) – Golaha Amaanka ee Qaramada midoobay ayaa sheegay in ciidamo hor dhac ah oo ka socda dalalka Hindiya,Pakistan iyo Bangaladesh oo hoos imanaya jimciyada Quruumaha ka dhaxeysa ay dhowaan tegi doonaan dalka Somaliya kuwaas oo haatan lagu jiro qorshihii lagu geyn lahaa halkaas,sidii nabad loogu soo dabaali lahaa Somaliya.

Qaramada midoobay ayaa dhowaan bilawday sidii ay miisaaniyad ugu heli lahayd ciidamo nabad ilaalin ah oo la geeyo Somaliya kuwaas oo hoos imanaya jimiciyada quruumaha ka dhexeysa si ay wax uga qabtaan xasilinta iyo nabad soo celinta somaliya oo uu dagaal halakeeyay muddo 17 sanadood ah si la isugu dayo sidii loo badbaadin lahaa dadka rayidka ah ee dhibaatooyinku ka soo gaadhen dagaalada aan dhamaadka lahayn ee Somaliya.

Diblomaasiyiin ka tirsan Qaramada Midoobay ayaa sheegay in qalinka lagu duugay miisaaniyada ciidamada nabad ilaalinta ee Somaliya oo gaadhaysa 7.4 Billion oo dollar, waxaana bishan dhamaadkeeda la filayaa in la geeyo cutubyo ka socda Hindiya,Pakistan iyo Bangaladesh.

Golaha amaanka ee qaramada midoobay ayaa waxa kale oo ay diyaarinayaan sidii ay ciidamada loo dirayo Somaliya ay ugu heli lahaayeen tababaro heer sare ah ka hor inta aan loo dirin Somaliya, waxaana taageerada ugu balaadhan ee ciidamadan laga filayaa in ay bixiyaan dalka Maraykanka iyo wadamada reer Yurub, waxaana laga taxadirayaa sidii aanu dib u dhac ugu iman lahayn qorshaha golaha amaanka ee ciidamada loogu dirayo Somaliya.

Ciidamadan aayaan la sheegin meesha laga geynayo Somaliya hase yeeshee war bixin uu Qaramada midoobay siiyay ergayga Qaramada midoobay ee somaliya Abdalawld ayaa lagu sheegay in ciidamadan la geyn doono dhamaan dalkii la isku odhan jiray Somaliya oo ay ku jirto Somaliland.

 

Warbixin: Barkhad M. Cumar.

Maalintii Jimcihii ee bishan May ay 16-ka ahayd ayaa waxaa jiray kulan lagaga hadlayey masaajid cusub oo laga furayey xaafada Kood-buur ee magalaada Hargeysa.

Xafladaasi furitaanka Masaajida oo ay iskugu yimaadeen dad tiro badan oo intooda badani ay ahaayeen dhalinyaro, kuwaas oo isugu yimid munaasibadan khayrka badan ee furitaanka masaajidka iyo madarasada loogu talo galay in lagu barto quraanka kariimka iyo Tarbiyada Islaamka, waxaa iyaduna dhismaha dheeraa meelo caafimaad oo loogu tallogelay in lagu daaweeyo ardayda iyo dadka deegaanka ku nool.

Inta badan goobahan noocan oo kale ah waxaa isugu yimaada dadka siyaasiyiinta, wasiirada xukumada iyo mudanayaasha golayaasha Qaranka, Musheekhda waaweyn ee caanka ah kuwaas oo khudbado ka jeediya, balse goobtan Jimcihii masjidka cusub laga furayey way ka duwaneyd oo may joogin dadkaasi, marka laga reebo dadkii hawsha masaajidka waday oo hadalo mahadnaqa ka soo jeediyey waxaa kaliya oo kulankaas lagu marti qaaday oo yimid Guddoomiyaha Xisbiga UCID faysal Cali Waraabe kaas ku labisnaa Khamiis iyo Cumaamad, sitayna hangoolkii hidaha iyo dhaqanka inoo ahaa ee aalaaba Faysal lagu yiqiinay.

Inkasta oo uu guddoomiyuhu soo habsaamay hadana wuxuu meel uu fadhiisto ka helay safafka dambe ee masaajidka , oo uu ku tukaday, halkaas oo ay dadku kolba ku jiidh –jiidhayeen iyaga oo aan ka war hayn in Gudoomiye Faysal Cali Waraabe uu yahay, sababta oo ah Faysal wuu ka duwanaa oo qofka aan ufiirsani muu garanayn labiskiisuna muu ahayn kii lagu yiqiin.
Aniga dareen gaar ah ayey ii ahayd, waayo sida aanu dadka u soo jiidhin ee uu halkii ugu dhaweyd ee albaabka agtiisa u fadhiistay, waayo inta badan waxaan ku tukadaa masaajid ay Siyaasiyiinta iyo madaxdu ku tukato maalinta Jimcaha, oo aan is idhi way isku arkaan todobaadkiiba maalintaas, wallaw dad kalana ay siyaabo badan ku macneeyaan, waxay inta badan Siyaasiyiintu iskugu yimaadaan masaajidkaa qudha oo ku yaalla Stationka Kood-Buur dabadiisa kaas oo la yidhaa magaciisa Masjidu Salaam, sababtoo ah waxaa jira masaajido badan oo u dhow dhow oo ay soo wada dhaafaan.

Si kastaba ha ahaatee, waxaa dhacda in inta badan aad arkayso nin masuul ah oo intuu habsaamay soona galay iyadoo khudbadii socoto, ka dibna inta ay soo dhex qaadaan dadkii oo fadhiya si aan ixtiraam lahayn usoo jiidha dadkii iyagu goor hore yimid masaajidka ee safafka hore fadhiyay ee cibaadaysanayey, taas oo siday u socdaan fadhiista ama cidhiidhyada safafka hore ee ay dadku uga sii horeeyey, taasina waxay keentaa inay dadku karaahiyeystaan jidh-jiidhkooda, iyadoo ay ka reeban tahay in iyadoo ay khudbada jimcuhu socoto la dhex soc socdo, balse ay tahay in nin waliba barta ugu dhaw ee uu soo gaadho fadhiisto, mararka qaar kood waxaad is odhanaysaa ma fahansana xaqa uu walaalkiisa uu jiidh jiidhayaa u leeyahay iyo inaanay cibaadada salaadda oo qudha aanay ahayn ee hab iyo dhaqan suuban uu leeyahay masaajidku.

Haddaba waxay u muuqataa inaanay masuuliyiinta qaarkood fahansanayn in madaxnimadu aanay ahayn tan aduunyadda ee masaajidka aan looga baahnayn iska weynayn siinta dadka kale, safafka lawada galayana ay tahay wax lagu tusaalo qaato oo madax iyo mijo aanu masaajidka looga baahnayn ee ay dadku u siman yihiin masaajidka, safafka horana ay leeyihiin ciddii hore u timid ee mutaysatay, qofkii habsaamana aanu ahayn in uu ku qabsado qof hore u soo kalahay, cibaadaduna ay ka mid tahay ixtiraamka walaalkaa iyo in aad qadarisid walaalkaaga muslimka ah, masaajidaduna ay leeyihiin habmaamuuseed loogu guto cibaadada.

Aan ku soo noqdee Faysal waxaa uu fadhiistay meelihii ay dadku marayeen isagoo aan iska weynayn dadkana jiidh jiidhin waayo madashu waa madal ilaahay u gaar ah dadkuna ay u siman yihiin, looguna kala dhaw yahay sida Illaahay loogu kala cabsi badan yahay, haddaba khudbadii jimcaha ka dib ayaa lagu casuumay Faysal Cali Waraabe si uu hadal uga dhiibto, markii uu hadalkii bilaabayna waxa uu ugu bushaareeyey dhalinyaraddii masaajidka ku tukanaysay in haddii uu ku guulaysto doorashada Madaxtooyada uu dalka ku maamuli doono diinta Islaamka, mar kaliya ayaa dhalinyaradii masaajidka fadhiday farxad iyo raynrayn darteed sacab isla oogsadeen, sacab kadib la garay in ay masaajid tahay oo aan sacab looga baahnayn, balse wajiyada dhalinyaradii badnayd ayaad dareemaysay siday ugu riyaaqsan yihiin hadalada fiican ee uu gudoomiyaha Xisbiga UCID ku hadlayo
waxaa kale oo uu sheegay in laba dal oo kaliya ay calankooda towxiid leeyahay, Sucuudi Arabiya iyo Somaliland, taas oo uu isna calanka xisbigiisa ku sameeyey tawxiidka oo uu xisbiyada kale dheer yahay, waxaad dhalinyaradii masaajidka joogtay aad ka dareemaysay dareen xoog leh oo ay ugu fiirsanayaan hadalada gudoomiyaha iyo waxaa ka suuroobi kara, maadaama uu nin siyaasi ah uu yahay, balse gudoomiyuhu isaga oo sii xaqiijinaya ka dhab ahaanshihiisa arintani waxaa uu yidhi “ walaal waxaan aniguba ku jiraa qolooyinkan khuruujka ah, masaajidkaa khuruujkaan ku xidhanahay , markaa Diintaynu ku xukumi doonaa isha Allaahu tacaalaa”, guddoomiyuhu waxaa kale oo uu sheegay in muslimiintu maanta ay daciif yihiin, waxaanay kaga bixikaraan cabsida illaahay iyo cibaadada badiyaana, xumaantana ay iska dhawraan oo ay ka fogaadaan, haddii ay taa la yimaadaana ay keeni karto in musliimku uu xoog yeesho, waxaa kale oo uu sheegay in mar ay gabadh reer galbeed ahi la soo hadashay ay ku tidhi sideed u maamuli kartaa dal muslim ah, adiga oo ah nin reer galbeedka wax ku soo bartay, taasna uu kaga jawaabay in uu labada isku wadda wadi doono.

Top