Haatuf News

Home | Contact Us | Links |  Archives

Xukuumadda Rayaale Iyo Shacbiga Reer Awdal Maxaa Ugu Jira Cadaawadda Xisbiga KULMIYE?  

Qaramada Midoobay Oo Ka Digtay Cunno Yaraan Ba’an Oo Ku Soo Fool Leh Somalia

Xooggaga Maxaakiimta Oo La Wareegay Kantaroolka Siinka Dheer Ee Duleedka Muqdisho

Xisbiga Kulmiye Oo Ka Qayb-galay Shirweyne Caalami Ah Oo Lagaga Hadlay Dhibaatooyinka Siyaasadda

Wakiilada Oo Cod Aqlabiyada Ku Deedafeeyey Xilka Qaadista Xubintii UCID Ee Komishanka, Ansixiyeyna Xubinta Cusub Ee KULMIYE

Madaxweynaha Koonfur Afrika Oo Cambaareeyay Weerarada Lagu Hayo Dadka Ajnebiga Ah Ee Dalkiisa Jooga  

Wasaaradda Xanaanada Xoolaha Oo Dhakhaatiir Iyo Dawooyin U Dirtay Afar Gobol Oo Somaliland Ah 

Hay’adda HAPA Oo Dawooyin Iyo Qalab Caafimaad Ku Wareejisay Cusbitaalo Gabiley Iyo Hargeysa Ah  

Venezuela Oo Ku Eedaysay Maraykanka Inay Diyaarad Milateri Oo Uu Leeyahay Ku Soo Xad-Gudubtay Hawadeeda 

“Qof Kasta Oo Xafiis Laga Bedelayo Ilaa Cidii Badalaysay Timaado Isagaa Sii Fadhiyaya, Markaa…” Muuse Biixi Cabdi

Hargeysa, May 21, 2008 (Haatuf) – Hoggaamiyayaasha saddexda xisbi Qaran ayaa kulankoodii saddexaad oo ay shalay ka yeesheen khilaafaadka siyaasadeed ee dalka ka taagan ku heshiiyey wakhtiga ay qabsoomayaan doorashooyinku iyo in caqabadaha laga horqaado diiwaangelinta codbixiyayaashu.

Guddoomiyekuxigeenka 1aad ee xisbiga KULMIYE, Muj. Muuse Biixi Cabdi oo xalay shir jaraa’id ku qabtay Guriga Guddoomiyaha xisbiga KULMIYE, kadib markii ay ka soo baxeen wada-hadal fadhi ah oo ay hoggaanka labada xisbi ee mucaaridka ahi shalay gelinkii dambe kula yeesheen Madaxtooyada, madaxweynaha muddada xilkiisu dhammaatay, Daahir Riyaale Kaahin iyo ku-xigeenkiisa, Axmed Yuusuf Yaasiin ayaa sheegay in fadhigii shalay ay kaga wadahadleen ajande ku saabsan go’aan qabyo ah oo ay keeneen Komishanka Doorashooyinka Qaranka, isla markaana ay isla soo qaateen guddi farsamo oo ka kooban saddexda xisbi, kaas oo ah wakhtiga ay doorashooyinku qabsoomi karaan oo ah in doorashada hore qabsoonto 15ka December 2008, doorashada dambena ay qabsoonto badhtamaha March, 2009.

Gudoomiye ku xigeenka koowaad, Muuse Biixi Cabdi isagoo arinkaa ka hadlayey waxa uu yidhi: “Hadda waxaanu ka soo baxnay shirkii ay wada lahaayeen xukuumada iyo mucaaradka oo markii saddexaad ee aanu is aragno ah, maanta ajandaha laga hadlaayey waxa uu ahaa draft ama soo jeedin qabyo ah oo ay keeneen komishanku iyagoo tilmaamay sababaheedana soo dhameeyey wakhtiga ugu horaysa ee ay doorasho ka qabsoomi karto dalka, komishankuna waa hay,ada u xil saaran iney mudeeyaan oo ay wakhtiga doorashooyinka qabtaan sidaynu wada aqoonsanahay, waxay ku soo jaan gooyeen hawlahooda iney qaban karayaan doorashooyinka ta hore December lixdeeda doorashada labaadna bisha march dhexdeeda, arintaa farsamo ahaan markay komishanku sababihii ay ku soo sameeyeen soo raaceen, Rag farsamo ah oo xisbiyada ka socday oo hore arintaas uga soo diyaar gareeyey oo ay ku soo qanceen, waxa ay noqotay in wakhtigaasi uu noqonayo wakhtiga ugu horeeya ee doorasho la qaban karaayo waxaan la dhaafi karayn ayey noqotay, hasa yeeshee waxaa loo baahday mishkilada meesha taagan maaha goorma ayaa doorasho la qaban karaa, waxaa loo baahday in la hubiyo inaan doorashadu halkeedaa ka dhaqaaqin maalintaas la qabsaday, taa kooxahayaga mucaaridkii waxaanu ku soo jeedinay in loo baahan yahay damaanad xaga sharciga ah, oo arintaa komishanku qabtay dee qadarka Illaahay keeno waa halkeedee, in xaga sharciga Isha iyo Qodaxda laga dhameeyo in wakhtigaa doorashadu qabsoonto.

1. in xeerka doorashooyinka qodobada ku jira ee doorashada xanibaaya ee ka mida labada doorasho lix bilood ha u dhexeeyeen in diiwaangalinta, doorashadan maanta ah oo kaliya laga saaro, oo dib hay,adihii sharciga loogu celiyo qodob bay noqotay,

2. haddii wax qadar Alle ahi yimaadaan ama wax inaga waaweyn oo dabiici ahi, inaan hay’adaha sharci dejintu soo fara galin waxaa ay ku heshiiyeen, komishanka iyo saddexda xisbi Qaran, gaar ahaan Golaha Guurtida oo qolooyinkayagan mucaaridku bayr ka qabno oo dhawr jeer oo hore wax kor kor dhisay, intaana la isku waafaqo oo xagaa laga soo helo, labadaa arimood oo loo baahdo awgood oo aanu isla qaadanay in labadaaba sidaa loo fuliyo saddexdayadii dhinacba ayaa dib loogu celiyey arintaa cidii farsamadaa lahayd ee xisbiyada iyo komishanka ahayd, muddo dhawr cisho ahna loo baahday in hay,adihii sharciga qodobadan aan la socon karayn taa guurtida, in hay,adihii dee baarlamaanka labadii qolo ee baarlamaanka buu khusaynayaaye dib loogu celiyo arintii oo iyagana dib loogula kaco, sidaasi darteed waxa aanu qaadanay Arbacada, Khamiista, Sabtida sadexdaa cisho in hay,adaha sharci dajintu wixii kaga hadhsan halkaa ee ay qodobadaa kaga hor qaadayaan iyaga lagu celiyo Axadana laysku yimaado, warkaanu idiin haynaa waa intaa.

Intaa ka dib waxa ay wariyayaashu waydiiyeen gudoomiye ku xigeenka su’aalo waxaa ney u dhaceen sidan.

S: Waxaa jiray guddiyo saddex geesooda oo markii horeba arinkan ku jiray, markaa kuwaas markii horeba maydaan mandate siin iyo wixii xagooda ka yimaada siday yihiin loogu soconaayo?
J: Maya mandate waanu siinay iney imigreshanka noo soo galaan guddi farsamo ayey ahaayeen, go’aanka waxaa leh hogaanada saddexda xisbi ayaale go’aanada kama dambaysta ah markaa way soo raaciyeen rayigan qoladan hoosaba in laga saaro wax alaale wixii aan la jaan qaadayn maanta oo golaha wakiilada dib loogu celiyo qodobada iyo golaha guurtida arintaa laga dhameeyo inaaney hadhawto retreat dib usoo qaadanayn marka way soo raaciyeen lifaaqyadaa markaa waxaa loo baahday inta aan qolooyinkani wada saxeexin inta aanu hir galin sharcigu in la soo dhameeyo wixii hay,adaha kale ku lamaan, labada hay,adood ee sharci dajinta ayaa bahalkii ku marane.

S: Arintii madaxwynaha iyada maad ka wada hadasheen, madaxweynaha xilkiisu 15ka bisha ku eekaa?
J: Haa, ajandayaal baa jira kolba qodob baa la galayaa maanta qodobkan baa lagu dheeraaday baan ku idhi, laba qodob oo kale ayaa meesha noo yaala oo ay doodoodu taalaa, midi waxa weeyi dawladda wakhtigeedu wuu dhamaaday, haddii aynu doorasho wakhti u qabano bal horta wakhtigii doorashada aynu ku heshiino, markaynu doorashada wakhtigeedii ku heshiino, yaa dawladda ina gaadhsiinaysaa waa tuma, waa noocee waa in iyadana laga heshiiyaa, waa ajande kale oo noo laaban, waxaa kale oo iyana noo laaban, qodob kale oo ah waar labada doorasho ee is daba yaala teebaa priority inoo leh teebaa aynu soo hore marinaa, mata madaxtooyada mise ta dawladdaha hoose, qolaba fikrad bay qabtaa, labadaa arimood wali si aanu dee walli wakhtigii iyo doodii wali go’aan maanu gaadhin, qodobka ugu cuslaa waxa weeyi doorashaynu u soconaa doorashadii way dhib badatay oo way guur guurtay horta doorashada aynu meel taagno wakhtiga la qabanayo waa taa taanu isha madaxa ka dhamaynayno.

S: Mala odhan karaa ka xisbi ahaan waxaad aqoonsateen sharciyadii xukuumada ay golaha guurtidu ugu kordhisay?
J: Maya, sharciyadii qodobkii ahaa, waanu kordhinay ee guurtida horana waanu u diidnay haddana waanu diidnay, laakiin mid baa jirta iyada maamul kasta iyo aduun kasta sida loo dhaqmo, meeshii kursigii ma noqonayo (vacant), malaha caqliyad taa odhanaysaa ma jirto, waxaynu ku dadaalaynaa anagu in la helo wakhtiga doorashada, waa qodob la isla wada qaato saddexda xisbi qaran, qodobka labaad ee aan u gudbayo, yaa idin gaadhsiinaya wakhtigaa, inta labadaa qodob laga heshiinaayo waa caadi aduunka oo dhan waxaa la yidhaahdaa (care taker) qofka meesha sii fadhiya, qof kasta oo xafiis laga bedalo, ilaa cidii badalaysay timaado dee isagaa sii fadhiyaya, waxaanu imika ka wada hadli doonaa oo balanka dambe noo ah waar yaa ina gaadhsiinaya, maamulka ina gaadhsiinaya muxuu noqonayaa waa noocee waa qodob noo laaban.

S: marka laga hadlo kulankan maanta aad yeelateen xisbiyada mucaaradka iyo xukuumadu, go’aamadii aad shalay qaadateen ee aad soo jeediseen, ee ahaa in draftkii ay idiin soo gudbiyeen komishanku, in doorashooyinku dhacaan December iyo March in aad ku dartaan qodobo kale qoladiinan mucaaridku in haddii duruufo kale yimaadaan aaney go’aamadaa soo fara galin hay’adaha sharcigu gaar ahaan Guurtidu, markaa idinku ma daba ka warwar baad ka qabtaan hadii xukuumadii dalka ka talinaysay aad heshiis la qaadataan in uu is bedel xagan ka yimaado.
J: Dee Mayee Sharciyaa yaala maaha guurtida oo qudha baarlamaanku waa in uu ka saaraa qodobada masalan lix bilood baa doorashooyinka u dhaxaynayaa iyo qaar kale oo dhawra oo carqalad ku ah wakhtigan oo muddadan oo qudha ah sharciga ma wada daynayno ee maanta dhibaataa ina haysata wakhtigii baa dawladdii ka dhamaaday doorashadii baynaan muddadeedii haynin markaa waxaanu daydayaynaa xal dee markaa waxa weeyi qodobada hor taagan oo dhan waa in labada goleba laga saaraa oo laga qaadaa, labadii golena waa in ay iyagii dhex martaa iyagiina wakhtigoodiina qaataan.

S: Hadii doorashadu ku qabsoomi waayaan bilaha December iyo March, ma isla soo qaadeen waxa dambe ee la yeelayo?
J: Haa bini Aadmi baynu nahay bini aadmiguna wakhtiga uu qabsado, qadar alle halkiisaa la dhiga horta waxa aanu ku dadaali oo aanu aad uga fikiri qadar alle oo yimaada mooyee oo anaga naga wayn mooyaane, in aaney si dambe arintaasi u dhaqaaqin taana yuhuunteedu way naga wada muuqatay dhamaantayo waayo xal baynu u baahanahay hadii ay timaado wax kale waa taanu u doonayno inaaney cid kale soo fara galin golle guurti ama gole baarlamaan oo arintaas ka hadalkeeda iyo go’aan qaadashadeeda loo daayo saddexda xisbi qaran iyo komishanka.

S: Madaxweynuhu hore waxa uu u lahaa sanadka ay golaha guurtidu ii kordhiyeen waa sharci hadana ma waxa uu idinla qaatay in aaney golaha guurtidu idin soo faragalin oo waxa ay soo saaraana ay sharci daro yahay?
J: Dooda ah waxa ay guurtidu kordhisay waa sharci iyo waa sharci daro mushtamaca iyo xukuumada mucaaradka waanu ku kala qaybsanay waxaanu iskugu tagnay in rayi’gaa aanu ku kala qaybsanahay in aanu xal dhexe iskugu tagno, anaguna waxa aanu ahayn qoladii lahayd guurtidu sharcigaa sida ay u dabaqeen may ahayn sidii sharciya maaha iyaguna waxa ay taagnayeen waa sharci, labadaba halkaa iska dhigoo maxaa inoo dana baanu taaganahay, maxaa inoo danana wakhtibaanu qaadanay oo ah kaa ay ka fursan wayday , maantana waxa aanu ku soconaa maxaa inoo dan ah, anagu ma nihin maxkamad looyarana ma nihin kani ma sharcibaa mise sharci maaha halkaas baanu iska dhignay.

S: Mala odhan kara Asxaabtiinii mucaaridka ahayd way idinka badisay xukuumadu ee inaydin is dhiibataan baa muhiim ah?
J: Taasi waa sida adiga kuugu muuqata ee aniga iiguma muuqato, aniga waxa ay iigu muuqataa xukuumada Udub iyo mucaaridkaba, iney mushkilad culus oo dalka kusoo fool yeelatay oo dawlada wakhtigeediina dhamaaday, doorashooyinkiina aan la hayn ay si masuuliyadi ku jirto iyo lexejeclo dalkii ay iskugu gacmo jiidayaan sideed mushkiladan uga baxdaan oo xal loo helaa laakiin fikradaasi adiga ayey kuu gaar tahay.

S: 15ka bishii May waxaa dhamaaday wakhtigii xukuumada idina waxaad sheegteen in aydaan aqoonsan doonin wixii ka dambeeya wakhtigaasi mawqifkiinii arintaasi ku waajahnaa miyaad ka tanaasusheen?
J: Waxaanu aqoonsanaynaa ama aqoonsan waayaynaa marka ay dhamaadaan wada hadaladu ama waa lagu heshiiyaa ama waa lagu heshiin waayaa, wadahadaladii ayeynu badhtanka kaga jirnaa, qodobkii ugu horeeyey ayaanu maanta gacanta galinay isagiina la islama meel dhigin ee boroseskaa buu maray, arintaadaasi waxaad jawaabteeda la sugaysaa maalinta uu shirkani xidhmo taas oo aan jecelahay in uu guul ku xidhmo, hadii uu guul ku xidhmi waayana xal uun baa la raadinayaa.

S: Waxaa jirta ciidamo badan oo wadooyinka faras magaalaha lagu daadiyo dhibaatooyin badana way keeneen arintaa iyaga ma kala hadasheen?
J: Maanta wixii aanu ka hadalay waa wixii ku saabsan qodobkaa doorashooyinka, su’aashii aad tidhi muddada doorashada yaa xilka idin gaadhsiinaya? Mid waan idiin sheegay oo waxaan doonayaa inaaad fahantaan, suurta gal maaha in vacuum imika qolada fadhidaa waa care take waaney fadhidaa, waxaa inoo dambaysa dawladda ina gaadhsiinaysa doorashada noocma ayaanu ka wada hadlaynaa, markaa qodobkaa hala gaadho, hadase waxay u joogayaan meesha oo ay usii fadhiyayaan kursigu faaruq buu noqonayaa aduunkoo dhana waa caynkaa, xafiis kasta oo la badalo cidii lagu badalaayey intii la keenaayo cid baa fadhiyaysa, wakhtigiisii wuu dhacay waa Run, waa muddo dhaaf waa Run, waxaynu wadnaa imika waa xal goormaynu doorasho qabsanaa, isagaynu dhexda kaga jirnaa markuu dhamaado ayeynu ka wada hadli, maxaad ku heshiiseen maxaad ku diideen, wali wuu socdaaye wali mabaanu heshiin manaanu dhamayn talaabadeedii se waanu qaadnay.



 

Faallo – Weriye Maxamed Cumar, Boorama

Tan iyo markii uu talada dalka qabtay Daahir Rayaale, waxay reer Boorama iyo guud ahaanba reer Awdal la yaabeen sida dhibta yar leh ee ay u fuuleen kursiga dalka ugu sarreeya, kaas oo ay aaminsanaayeen inay iska lahaayeen goboladii laga taageeri jiray SNM wakhtigii lagu jiray halgankii lagu xoreynayey Somaliland.

Waxa kale oo ay la yaabanaayeen sida dhibta yar leh ee Daahir Rayaale kursigaasi u tegey, isagoo aan ka mid ahayn siyaasiyiintii u tartamaysay kursigaasi, ama mucaaradka ahaa, amase ahaa ragii ugu dhawdhawaa Marxuum Cigaal laakiin aakhirataankii waxay isku qanciyeen in uu Rayaale nasiib ku helay iyo dhaxaltooyo marxuum Cigaal.

Midda kale waxay dad badan oo halkan iyo Somaliland joogaa la yaabban yihiin sida Rayaale uu kursigan ku yimi oo ahayd si dhib yar, balse ay u adkaatay in laga furfuro xukunka, isla markaana axsaabta mucaaradka ah ee dhawrka jeer la tartantay ay ilaa maanta ka guuleysan la’yihiin, taas oo keeni karta in shan sano oo dambe uu Rayaale sii xukumo dalka inkastoo ay jiraan cadaadisyo kaga imanaya xisbiyada qaarkood, gaar ahaanna xisbga Kulmiye, oo ay u arkaan inuu yahay cadowga ugu weyn ee Rayaale leeyahay wakhtigan xaadirka ah, UCID-na uu yahay saaxiibka ugu weyn ee xukuumadda maanta.

Haddaba markaad eegto cadaawadda iyo xumaanta ku salaysan arrimo door ah, oo aynaan qaarkood halkan ka sheegi karayn, ayaa waxay soo jiitamaysay ilaa sannadihii 2002dii-23dii wahtigaas oo wasiirka Xidhiidhka Golayaasha ee haatan, Cabdi Xasan Buuni, uu damacsanaa inuu ka noqdo musharraxa mansabka Madaxweyne ku-xigeenka doorashooyinkii Rayaale kursiga madaxweynimada keenay 2003dii.

Cabdi Xasan Buuni oo xisbiga Kulmiye waagaa doorashooyinkii golayaasha degaanka dalka, gaar ahaanna Boorama, ku guuleystay in xisbigaasi xubno door ah ku yeesho golahaasi, balse dhinaca kale ka bixitaankiisii ka dhashay mansabka Madaxweyne ku-xigeennimada ee Cabdi Xasan ku soo bixi waayey ayaa waxa Kulmiye Gobolkan uga bilowday cahdi cusub oo xisbigaasi dhaxaalsiisay guuldarrooyin siyaasadeed, cadaawad, takoorid, iyo khiyaamooyin qarsoon oo ay reer Boorama xisbigaasi kula dhaqmeen oo ah “qawda maqashii waxna ha au qaban”.

Nacaybka iyo dareenka cadaawadeed ee reer Awdal, ama reer Boorama tuseen guud ahaan axsaabta iyo ururada mucaaradka ah, ayaa waxa kale oo ka mid ah inay xitaa gobolka ka mustaafuriyaan masuuliyiinta, iyo siyaasiyiinta axsaabta ama ururada mucaaradka, iyadoo la ogaa sidii loo galay masuuliyiinta urur-siyaasadeedka Qaran, kaas oo Boorama lagu casumay isla markaana Inj, Maxamed Xaashi Iyo Dr. Gabboose hadh cad laga mustaafuriyey Borama, iyagoo weliba ciidan Bileys ah la daba dhigay inay ka kaxeeyaan magaalada.

Inkastoo xumaanta qaybaha dadweynaha Somaliland u hayaan xisbiga KULMIYE, aanay ku koobnayn reer Awdal oo keliya, oo ay jirto dagaal siyaasadeed oo kaga socda Hargeysa, iyo Berberaba, balse waxan ka hadlaynaa tallaabooyinkii dadweynaha reer Awdal xisbigaasi hoggaankiisa iyo siyaasaddiisaba ku wiiqeen ilaa 2002dii:
Hadii aan dib u raacno hagardaamooyinka xisbigaasi siyaasiga ah ka soo gaadhay reer Awdal tan iyo markii uu ka mid noqday axsaabta qaranka ayaa ah kuwo aan la soo koobi karayn.

1. Booqashdii ugu horreysay ee hogaamiyaha xisbigaasi, Axmed Siilaanyo ku yimaaddo Boorama 2002dii, ayaa waxa Boorama ka dhacay mudaharaadkii labaad ee taayirro lagu shido masuul ka yimaadda Hargeysa oo aan ahayn reer Awdal, iyadoo uu ka horreeyey mudaaharaad la mid ahaa oo lagala horyimi Marxuum Cigaal, oo booqasho ku imanayey Boorama, balse badhasaabka Gobolka oo waagaa ahaa nin dhex ahi uu baajiyey kalana dareeriyey banaanbaxaasi Axmed Siillaanyo lagu dhigi lahaa.

2. Khiyaamo xisbigaasi lagu khiyaameeyey doorashadii dhacday 2003dii ee madaxyttooyada loo tartamayey, taas oo weliba laga xishoonayey, dabadana uu ka riixayey Madaxweyne ku-xigeenkii hore ee Somaliland C/raxmaan Aw Cali, oo ka soo jeeda gobolkan, loona soo banaanbaxayey khudbadihiisa, isla markaana aanay reer Boorama tusin wax dareen ah oo ka dhan ah siyaasadda xisbigaasi, balse dhinaca kale xisbigaasi ka luggoynayey markay noqoto cod, olole, iyo wakiilnimada lagu ilaalinayo xisbigaasi danahiisa.

3. Waxyaalaha reer Boorama xisbigaasi badeen ayaa waxa kale oo ka mid ah iyagoo wakiiladii ama muraaqibiintii xisbigaasi lahaa laga tuuray gaadiidkii u kala qaadayey degmooyinka, isla markaana, muraaqibiinta xisbigaasi ay qaarkood hoosta kala socdeen xisbiga UDUB, oo aanay ahayn kuwo daacad u ahaa.

4. Dhaqalaha xisbigu ku bixiyey gobolkan wakhtigii doorashada, oo loogu shaqayn jiray UDUB, sahay cunto ahayd oo loogu dhiibay dadkii ka codaynayey meelaha ka fog Boorama, inta badan laga lunsaday ama laga dhacay. Ragii waagaa loo dhiibay sahayda, muraaqbiniintana u ahaa xisbiga ayaa waxa ka mid ah wasiirka Dalxiiska ee xukuumadda Rayaale, C/risaaq Waaberi.

5. Goobaha codbixinta qaarkood sida degaanada Dila, Magaalo-cad, iyo Qulujeed, oo ay masuuliyiintii xukuumadda kaga jiray degaankaasi, oo ka soo jeeda degaanadaasi u diideen in Kulmiye dhigto sanaaduuqda codbixinta.

6. Wakhtigii doorashada oo meelaha lagu tuhmo in KULMIYE ku badan yahay ciidanka amnigu qas ka abuurayey, kaddibna goobtaa la xidhayey.

7. Doorashadii baarlamaanka cusub oo si badheedh looga horjoogsaday goobaha qaarkood in la tiriyo codadkii, inkastoo markan dambe xisbigaasi guulo ka soo hooyey codbixintaasi.

8. Tan iyo markii ay soo dhawaadeen doorashooyinka haatan la filayo inay dalka ka dhacaan, ayaa taageerayaasha ama wakiilada xisbigaasi badankoodii la xidhxidhay, kuwa kalena abtirsiin ahaan, iyo dhaqaale ahaan loogu wareejiyey taageerayaasha xukuumadda ama ciidamada kala duwan laga shaqaaleeyay.

9. Waxay maanta maraysaa in musharraxiintii, iyo taageerayaashii iyo masuuliyiintii xisbigaasi gebi ahaanba laga mamnuucay inay gobolkan ka hadlaan ama afkaartooda ka soo jeediyeen. Dhacdooyinka lagu takoorayo xisbigaasina waxa tusaale ugu filaa tii ka dhacday Degmada Saylac, ee musharraxiintii iyo xildhibaanadii xisbigaasi loogu diiday inay ka hadlaan, waxa ku xigtay munaasibadii degmo-nimada magaalo Cad, waxa kale oo ku xigtay munaasibadii qaranka oo dhammi u sinaa ee 18-ka May, iyadoo aad mooddo in aaladda keliya ee maanta loo adeegsdo qofka la doonayo in xukuumadda lagu diro lagu tilmaamo ay tahay isagoo lagu sheego waa KULMIYE, sidaa darteedna looga fogeeyo shaqooyinka, shirarka, iyo dadweynaha kale ee gobolkaba.

Haddaba markaad isweydiiso waxyaalaha keenay in cadaawadda intaa le’eg gobolkan lagula dhaqmo xisbigaas qaran, ayaa dad badani ii sheegaan.

1. Isagoo hoggaankiisu aanu abtirsiin ahaan ka soo jeedin gobolka Awdal
2. in xisbigaasi ay u badan yihiin saraakiishii SNM, oo ay reer Boorama u arkaan cadow waayo hore ay lahaayeen, isna saamaxeen inta Somaliland jirto.
3. Cabsi ku salaysan aargoosi xisbigaasi reer Awdal lagaga aargoosto falalka lagula kacayo Hoggaanka xisbigaasi, cabsidaas oo ay dadweynaha xisbigaasi u geliyeen mudanayaasha saddexda gole kaga jira gobolkan Awdal, oo had iyo jeer ku ololeeya in la baabi’in doono reer Awdal haddii xisbigaasi qabsado, oo jaamacadaha la xidhi doono, iwm.
4. Hoggaanka xisbigaasi oo looga baqayo inuu qaato kursiga, magaca, awoodda, iyo sumcadda reer Awdal ku leeyihiin Somaliland iyo caalamka intiisa kaleba haddii UDUB laga adkaado.
5. Xiisadda lagaga soo horjeedo siyaasadda xisbigaasi ayaa waxa sii xoojisay ayey qaarkood leeyihiin iyadoo aanay siyaasiyiintii reer Awdal ee caanka ahaa ka muuqan hoggaanka sare ee xisbigaasi, una muuqda mid ay beelihii SNM taageeri jiray iska buuxiyeen mansabyada sare.
Dhinaca kale markaad eegto cadaawada intaa le’eg ee Reer Awdal kula soo dhaqmayeen, ama u muujiyeen xisbigaasi ilaa maanta ayaa lagu tilmaami karaa mid baalmarsan dimuqraadiyadda iyo midnimada reer Somaliland, waxanad mooddaa in reer Boorama ilawsan yihiin in degaanada xisbigaasi KULMIYE uu awoodda badan ku leeyahay dadweynaha ku nooli codkooda siiyeen Xisbiga UDUB, mana dhacdeen in Rayaale Madaxweyne maanta dalka ka noqdo ama mustaqbalka ka noqdo haddii aanay dadweynaha gobolada kale siinin codkooda xisbiga UDUB, codadka reer Awdal siiyeenna aanay keligood soo saareen.

Falalka cadaawadeed ee had iyo jeer masuuliyiinta xisbigaasina ay reer Awdal tusayaan Hogaanka iyo taageerayaasha axsaabta mucaaradka, siiba xisbga Kulmiye ayaa dhinaca kale laga yaabaa inay mideyso beelaha kale ee hoggaanka xisbigaasi ku abtirsado, kuna nool gobolada kale ee Somaliland, taas oo aakhirataanka guuldarro, iyo godobo kaleba geyeysiin karta dawladda Rayaale iyo xisbiga UDUB. Reer Awdalna halkii ay wax ka taransan lahaayeen ay bartilmameed u noqdaan dadweynaha gobolada kale ee Somaliland ee ay bahdilaadda ku hayaan siyaasiyiintooda, sidaa darteedna inta goori goor tahay ay axsaabta mucaaradka, gaar ahaan Kulmiye ka daayaan cunsurinimada ay kula dhaqmayaan masuuliyiintiisa.

Haddii ay xukuumadda UDUB daacad ka tahay inay joojiso arrimahaasina cadaawaddii ay xisbgaasi u gelisay dadweynaha reer Awdal dib ha uga saarto, haddii kale waxa iman doonta maalin kale oo aanay reer Awdal farxi doonin, kana duwan sidii ay ugu farxi jireen guulaha isdabajoogga ah ee xisbgooda UDUB sannadihii ina dhaafay ka soo hooyey mucaaradka loo eryanayo sidii aanay waddanka u dhalan ama aanay xaq ku lahayn.


 

Nairobi, May 21, 2008 (W. Wararka) – Hay’adda Qaramada Midoobay ee cuntada iyo beeraha ee magaceeda loo soo gaabiyo FAO ayaa walaac ba’an ka muujisay cunno yarida ka jirta dalka Soomaaliya, waxaanay sheegtay in laga cabsi qabo in kumanaan caruur ah sanadkan u dhintaan macaluul iyadoo ay sare u sii kacayso dadka u baahan gargaarka daruuriga ah ee ku sugan gudaha dalka Soomaaliya.

Hay’addu waxay sheegtay in ku dhowaad 2 milyan oo ruux ay gaadhi doonto dadka u baahan cunto gargaar ah iyadoo ay tiradaas ku soo korodhay 600,000 oo qof oo dadka magaalooyinka degan ah.
Hay’addu waxa kale oo ay sheegtay in qiimo kac ballaadhan uu ku yimid raashinka daruuriga ah ee la iibsado oo badankiisa laga keeno dibadda.

Hay’adda FAO waxay ka digtay cunno yari baahsan oo ku soo fool leh Soomaalida, ka dib markii aanay si ku filan u di’in roobabkii Gu’ga ee la filayay inay da’aan bilaha April iyo May.

Hay’adda FAO waxa kale oo ay sheegtay in ay horey u codsatay ilaa 8 milyan oo dollar oo ay gargaar raashin ah ku soo iibiso, balse hay’addu waxay xustay inay heshay oo keliya kala badh lacagtii ay u baahneyd.

18-ka May Oo Markii U Horeysay Laga Xusay Dalka Yemen
Sanca, May 21, 2008 (Haatuf) – Munaasabada sanad guurada 17aad ee ka soo wareegtay gooni isutaaga Somaliland oo markii u horaysay laga xusay wadanka Yemen caasimadiisa Sanca.

Habeen hore waxaa lagu qabtay munaasabadda 17aad ee ka soo wareegtay maalinta qaranimada Somaliland ee 18 May, hool weyn oo ku yaal magaaada Sanca ee Caasimada dalka Yemen, xafladaas oo ay ka soo qayb galeen dhamaan jaaliyada reer Somaliland qaybaheeda kala duwan iyo marti sharaf lagu soo casuumay halkaas oo dadka joogay ay kor u dhaafeen shan boqol oo qof.

Xafladan ayaa waxaa dadweynaha reer Somaliland kala soo qayb galay Wakiilka Somaliland u jooga dalka Yemen Cali Maxamed Axmed iyo laba wasiir oo ka tirsan Xukuumada Riyaale kuwaas oo kala ah Wasiirka Dib u dejinta iyo Wasiirka Cadaalada Abshir Axmed Xasan iyo Axmed Cali Casoowe oo halkaas dadkii isugu yimid hadalo uga jeediyey ku saabsan xaalada dalku maanta uu marayo iyo waxyaabaha u qabsoomay Somaliland iyo waxa laga sugayo xukuumada Somaliland oo aan weli Ictiraaf ka helin dunida taas oo ay sheegeen inay Somaliland tahay Dawlad ay dadkeedu wadaan.

Xafladan oo ahayd tii ugu horeysay ee nooceeda ah ee laga xuso dalka Yemen ayaa waxay socotey muddo saddex saacadood ah taas oo lagu soo bandhigay heeso,ciyaaro iyo gabayo ka turjumaya dhaqanka dadka reer Somaliland,xafladan ayaa waxaa isku soo duba ridey guddi uu madax u yahay Wakiilka Somaliland u jooga dalka Yeman ..


 

Muqdisho, May 21, 2008 (W. Wararka) – Xoogaga Maxkamadda islaamka ee Somalia ayaa shalay galab la wareegay Xarun fadhiisin u ahayd Ciidamada Dawladda Mbagathi oo u dhaxaysa Afgooye Iyo Muqdisho halkaas oo lagu magacaabo Siinka Dheer isla markaana bar kantarool u ahayd ciidamada Gobolka Banaadir oo lacag cashuur ah kaga qaadi jiray gawaadhida isaga kala goosha qaar ka tirsan gobolada dalkaas Somalia.

Mid ka mid ah masuuliyiinta ugu sarsareeya xoogaga dagaalka ku soo qaaday ciidamada dawladda Mbagathi oo la hadlay saxaafadda Somalia ayaa xaqiijiyey inay dagaal kadib kala wareegeen halkaasi ciidamada Mbagathi isla markaana ay wakhtigan oo ah goor gaaban oo galab ah gacanta ku hayaan iyagoo fasaxay gawaadhidii halkaas ku xanibnayd oo iyaga cashuurta lagaga qaadayey.

Sidoo kale Masuulkan oo diidey in magaciisa la shaaciyo ayaa sheegay inay la wareegeen ilaa laba gaadhi oo kuwa tiknkada ah oo ay lahaayeen Ciidamada Mbagathi, Hub farabadan iyo weliba agab kale iyo saanad milatari oo halkaas taalay.

Dhinaca kale waxaa halkaasi Biliqo ka gaystay dad shacab ah oo cadhaysan isla markaana qaatay lacagtii laga qaadayey gawaadhida iyo alaab kale oo ay ka carareen ciidamada Mbagathi ee gacan ku haynteeda goobtaas lagala wareegay.

Top

Belfast, May 21, 2008 (Haatuf) – Shirweyne caalami ah oo lagu gorfaynayay dhibaatooyinka siyaasadeed ee adduunka hadda ka taagan oo dhawaan lagu soo gabagabeeyay magaalada Belfast ee woqooyiga Ireland oo ay ka qaybqaateen wufuud ka socotay 28 dal ayaa lagu casuumay hogaamiyayaal ka tirsan 7 wadan oo Afrikaan ah oo uu ka mid yahay Guddoomiyaha Xisbiga Kulmiye Axmed Maxamed Maxamuud Siilaanyo. Shirwaynhan oo socday muddo saddex maalmood ah ayaa Axmed Siilaanyo oo hawlo qaran awgeed u tagi kari waayay, uu u wakiishay Dr. Maxamed Cabdillaahi Cumar.

Hadal uu ka jeediyay shirwaynaha Dr. Maxamed Cabdillahi Cumar wuxuu si balaadhan uga warbixiyay arrimaha siyaasadeed ee Geeska Afrika iyo qalalaasaha ka aloosan mandaqadda. Wuxuuna si gaar ah u taabtay xaaladda Somaliland ee hadda iyo baahida loo qabo in la helo gargaar caalami ah oo wax ka tari kara kobcinta dimuqraadiyadda, nolosha dadka iyo xal u helidda arinta aqoonsiga.

Waxaa kaloo uu shirweynaha uga waramay halganka dheer ee qaran-dhiska ah ee shacabka Somaliland soo maray tan iyo 18 May 1991, iyo siday uga go’an tahay inay ku biiraan bulshada caalamka xorta ah.

Intuu uu shirwaynuhu socday, waxaa u suuragashay Dr. Maxamed Cabdillaahi inuu si gooni gooni ah ula kulmo qaar ka mid ah madaxdii ka soo qaybgashay shirwaynaha, wuxuuna kala hadlay maslaxadda iyo danaha shacabka Somaliland. Waxaana ka mid ahaa masuuliyiintii uu la kulmay Madaxweynaha dalka Senegal mudane Abullaye Wade, hogaamiyaha mucaaradka ee Zimbabwe, Morgan Tsvangarai, oo la filayo inuu ku guulaysan doono talada dalkaasi bisha soo socota, iyo Marwo Rosie Odinga oo ka socotay Xisbiga Raila Odinga oo ah Ra’iisal- wasaaraha cusub ee Kiiniya.

Waxaa kalo mudane Maxamed Cabdillaahi uu kulamo gaar ah oo lagaga wadahadlay iskaashi dhexmara xisbiyada dimuqraadiga ah ee Yurub iyo Afrika la yeeshay hogaamiyayaal xisbiyo oo ay ka mid ahaayeen, afhayeenka arrimaha dibadda ee xisbiga VVD ee dalka Holland, Hans Van Baalen, Hogaamiyihii hore ee xisbiga D66 ee dalka Holland, Boris Dittrich, Guddoomiyaha Xisbiga Civic United Front ee dalka Tanzania, Dr. Ibrahim Haruna Lipumba, Lord Alderdice oo ka tirsan aqalka odayaasha Ingiriiska iyo David Ford oo ah hogaamiyaha Xisbiga Alliance Party ee Waqooyiga Ireland.

Intii uu joogay madasha shirweynaha waxaa mudane Maxamed Cabdillaahi uu guddoomay casuumado la xidhiidha shirar kale oo caalami ah oo loo fiday Guddoomiyaha Xisbiga Kulmiye Axmed Siilaanyo.
 

Hargeysa, May 21, 2008 (Haatuf) – Golaha Wakiilada ayaa fadhigoodii shalay cod aqlabiyada dib ugu celiyey xubintii komishanka doorashooyinka ee xisbiga Ucid Axmed Maxamed X. Daahir, oo uu Madaxweyne Rayaale golaha wakiilada ugu soo gubiyey si ay xilka qaadistiisa u ogolaadaan kadib markii uu ku eedeeyey, inuu gafafka galay shaqo wadareedii komishanka doorashooyinka hasa yeeshee waxaa eedayntaasi gaashaanka ku dhuftay gudida arimaha gudaha ee golaha wakiilada oo iyagu fadhigii shalay golaha soo hor dhigay wakiilka xisbiga kulmiye usoo magacaabay komishanka Cali Maxamed C/laahi (Bikolo) iyo wakiilkaasi Ucid ee hore ay shaqada uga joojiyeen lixda xubnood ee komishanka doorashooyinku taasoo gudida arimaha guduhu golah usoo jeedisay, in dib loogu celiyo xilkiisii komishanka doorashooyinka, oo ay sheegeen in aaney gudi ahaan ku qancin ee dihii xilka qaadistiisa loo soo cuskaday kuna sifeeyeen masuul daacad ah.

Fadhigan shalay oo uu gudoominayey Gudoomiyaha golaha wakiilada Md C/raxmaan Maxamed C/laahi Ciro, kana soo xaadireen 59 mudane ayaa waxaa fadhigaasi warbixin ku saabsan labada xubnood ee ay komishanka hor keeneen ka soo jeediyey Gudoomiyaha gudida arimaha gudaha Siciid Cilmi Rooble, oo ay gudidiisu qiimayn iyo baadhid ku soo samaysay eedaha xilka qaadistiisa lagu soo sababeeyey Axmed Maxamed X. Daahir oo ahaa wakiilkii komishanka doorashooyinka ee xisbiga Ucid soo magacaabay, taasoo uu tilmaamay in aaney gudi ahaan ku qancin eedahaa loo soo jeediyey, isla markaana ay golaha usoo jeediyeen in dib xilkiisii loogu celiyo, isagoo dhinaca kalena tilmaamay in wakiilka xisbiga Kulmiye usoo magacaabay komishanka doorashooyinka Cali Maxamed C/laahi, markii ay shuruudaha xeerku dhigayo magacaabistiisa daraasad kusoo sameeyeena uu tilmaamay in gudidoodu ku qanacday in gabi ahaanba shuruudihii laga rabay uu buuxiyey, sidaa darteena soo jeediyey in xilkaasi loo ansixiyo.

Intaa ka dib waxaa fadhigaasi laga akhriyey digreetada uu Madaxweyne Rayaale labadaasi xubnood ee asxaabta mucaaradka usoo magacawday komishanka doorashooyinka uu ugu soo gudbiyey golaha wakiilada isagoo wakiilka komishanka ee xibiga Ucid xilka qaadistiisa sabab uga dhigay Shan qodob oo uu sheegay in komishanku ku soo eedeeyeen, iyo natiijadii ay gudida baadhistu ka soo saartay eedihii ay komishanku u xanbaariyeen wakiilkaasi oo uu tilmaamay in gudidaasi ay ku qanacday in shaqo wadareedkii komishanka doorashooyinka uu ku gafay, isla markaana ay cadeeyeen inaanu la shaqayn karin, sidaasi darteedna waxa uu golaha usoo jeediyey, in sida uu dhigayo xeerka doorashooyinka golayaasha deegaanka iyo madaxtooyada xeer Lr.20 qodobkiisa 13naad, farqadiisa 3aad, uu awood usiinayo in xilka qaadista xubnaha komishanka iyo magacaabidoodaba ay ogolaadaan ama diidaan, isagoo dhinaca kalana wakiilka xisbiga Kulmiye usoo magacaabay komishanka isagana usoo jeediyey in goluhu waajibkiisa ansixinta ka guto, intaa ka dib waxa uu gudoomiyuhu mudaneyaasha usoo jeediyey inay u kala codeeyaan soo jeedinta gudida arimaha gudaha ee dibu celinta wakiilka xisbiga Ucid in shaqadiisii dib loogu celiyo, iyo soo jeedinta Madaxweyne Rayaale kuso jeediyey in xilka xayuubin lagu sameeyo Axmed Maxamed X. Daahir, intaa ka dibna waxa uu goluhu cod aqlabiyada ku ogolaaday soo jeedintii gudida ee ahayd in dib loo celiyo wakiilkaa komishanka doorashooyinka cod dhan 55 mudane, halka ay soo jeedinta Madaxweyne Rayaale na ka ogolaadeen 2 mudane hal mudanena ka aamusay gudoomiyuhuna ma codayn, halkaasi ayaanu ansax ku noqday wakiilka komishanka Ucid xilkiisii komishanka inuu dib ugu noqday, dhinaca kale waxa uu goluhu cod aqlabiyada ku ansixiyey wakiilka xisbiga Kulmiye usoo magacaabay komishanka Cali Maxamed Cabdilaahi cod dhan 58 mudane cid diiday iyo cid ka aamustayna ma jirin gudoomiyuhuna ma codayn.

Cape Town, May 21, 2008 (W. Wararka) – Madaxweynaha dalka Koonfur Afrika Thabo Mbeki ayaa wax laga xishoodo iyo dambi ku tilmaamay weerarada ka dhanka ah shisheeyaha ee ay ku dhinteen 22 qof ee ka dhacay dalkiisa.

Dadka ugu badan ee Ajaanibka ah ee lagu weeraro dalkaasi ayaa u badan Soomaalida halkaas ku dhaqan ee ka ganacsata.

Madaxweyne Mbeki wuxuu sheegay Bileysku inay gacanta ku qaban doonaan dambiilayaasha ku kacaya falalka lagu waxyeelaynayo dadka shisheeyaha ee halkaas ku dhaqan.

Magaalada xarunta ganacsi u ah dalka Koonfur Afrika ee Johannesburg ayaa waxaa ka dhacay weeraro loo geystay dadka ajnebiga ah oo lagu boobay hantidoodii.

Dadka la dhibaateeyay ayaa waxay u badan yihii dad ka soo jeeda dalka Zimbabwe oo muddo ku dhow 20 sannadood deganaa dalkaas Koonfur Afrika.

Ilaa 3 milyan ayaa lagu qiyaasaa muwaadiniinta Zimbabwe ee ku nool dalka Koonfur Afrika.
 

Hargeysa, May 21, 2008 (Haatuf) – Kooxo dhakhaatiirta xoolaha ah oo sida dawooyinka ayaa shalay galinkii dambe u kala baxay gobolada Saaxil, Awdal, Hargeysa Iyo Togdheer si ay xoolaha uga soo daweeyaan xanuunada xoolaha ee xiliga gu’ga marka uu curto ku dhaca, sida Caalka iyo Shilinta, waxaanay kooxahan gurmadka xoolaha u baxay hawlgalkoodan ku maqnaan doonaan muddo 25 cisho ah.

Shirjaraa’id oo uu shalay wasiirka Xanaanada Xoolaha Mr Idiris Ibraahin Cabdi xafiiiskiisa Hargeysa ayaa waxa uu kaga waramay hawlgalka ay kooxahan dhakhaatiirta xoolaha ahi ugu baxeen goboladaas, kuwaas oo uu sheegay inay ka soo shaqaynayaan sidii xanuunada xoolaha haya wakhtigan xaadirka ah ay u soo daweeyaan. Kooxahan gurmadka xoolaha ee shalay ka amba baxay Hargeysa ayaa waxa uu wasiirku ugu horayn isagoo ka hadlaya hawlgalkaa uu hadalkiisa ku bilaabay “Nin walba halka uu shaqada ka bilaabayey inuu caawa seexdo ka Burco ka bilaabaya, ka Saylac ka bilaabaya nin walba meesha uu shaqada ka bilaabayo inuu caawa seexdo oo aroorta ka shaqo tago weeyaan. Waxaa maanta nasiib wanaag ka baxay xaruntan dhexe ee wasaarada xanaanada xoolaha todoba kooxood, lix kooxood oo sida dawooyin iyo koox kormeer ah oo daba galkiiya waxaa kale oo baxay wiigan oo sii horeeyey oo la sugi kari waynay kuwan ilaa sadex dooxood oo hore, kooxaha hore waxaa maalgalisay hayada la yidhaahdo SAB oo EU-da ah, kuwan maanta baxaya oo ah lix kooxood iyo kooxda kormeerka oo isku ah todoba kooxood waxaa iska kaashaday howlgalkooda wasaarada xanaanada xoolaha, ururka dhakhaatiirta madaxa banaan ee ULPA iyo hayada la yidhaahdo SAHSP oo EU-da ah oo maalgalinta leh sedexdaa haayadood ayaa iska kaashaday.

Gurmad uma jeedo xanuuno cusub baa dilaacay ama dhibaato cusub baa jirta waxa weeyaan waxaa la soo maray abaar dheer, abaar dheer baa wadanka ka dhacday oo waad ogaydeen. hadana waxoogaa roobabku way bilawdeen laakiin abaartii may bixin oo lama odhan karo waxaa la galay wakhti roob ama Gu, wali waxaa jirta inuu roobku yar yahay oo teel teel ku yahay wadanka oo ay meelaha qaar ay wali cabashadii abaartu jirto, markaa waxaa dhaw inaanu reer miyiga ka caawino dhibaatada ay kaga tagtay abaartii hore ee dheerayd iyo dhibaatadan had iyo goor marka roobku da’o waxaa la socda xanuuno cusub. Waxaa la dawaynayaa waa xanuunadii caadiga ahaa maaha wax cusub waa Caalkii, waa Shilintii waa intii xoolaheena caadiga u ahayd xanuuno.

Kuwaas ayeynu kala dagaalamaynaa oo reer miyiga ka caawinaynaa, halkan waxaa yaala dawooyin aad iyo aad qiimo u leh oo dawooyin Europe iyo maraykan isugu jirta ah, oo aad iyo aad u anfici doona xoolaha lagu daweeyo. Waxaa qudha ee ay u baxayaan inaan sheego in gurmadkan maanta ay iska kaashadeen hayadaha wasaarada xanaanada xoolaha, dhakhaatiirta madaxa banaan ee ULPA iyo hayada maal galisay SAHSP waa mashruuc Eu-da ah maalgalintu. Kuwaa hore usii baxay ee sadexdaa kooxoodna ah ee wiigan baxay iyaguna waa hayad kale oo Europe oo la yidhaahdo SAB, markaa labaduba waa EU-da maalgalintoodu. Kooxaha maanta baxaya waxa weeyi laba kooxood oo Awdal ah mid horena wuu ka sii horeeyey oo kooxo hore ah, laba kooxood oo Maroodi-jeex ah Hargeysa, oo kor iyo hoos ukala baxaya, laba team oo Saaxil ah, laba team oo Togdheer ah, kuwan iyo kuwii hore marka la isku daro 10 kooxood ayey isku noqonayaan, waxay sidaan dawooyin, dawooyinkaa ay sidaan waa bilaash reer miyiga waa u bilaash meeshii ay xoolo bukaa ay joogaan ee ay tagaan iyagaa dawaynaya” ayuu yidhi Mr. Idiris isagoo intaa ku daray “maanta gurmadkan baxaya waxaa ka maqan laba gobol waa Sanaag iyo Sool, wiigan soo socda todoba cisho dabadeed intan in leeg oo kooxood ayaa baxaysa oo ay maal galinayso FAO, oo inagala shaqayn doonto VET-Aid hayada la yidhaa, waxaana muhiimada la siin doonaa Sool iyo Sanaag markaa imika wixii ka dambeeya 13ka gobolba waxaad arki doontaan wasaaradii xanaanada xoolaha oo wareegaysa”.

Waxaa kale oo uu wasiirka xooluhu intaa ku daray ‘hawshaa ay maanta u baxeen kooxahani waxay ku maqnaan doonaan 25 cisho, laakiin kooxaha baxaya todobaadka dambe kuwaasi waxa ay ku maqnaan doonaan laba bilood”.

Intaa ka dib su’aalihii ay warbaahintu ay waydiisay iyo jawaabihii uu ka bixiyey waxa ay u dhaceen sidan:
S: Dawadan aad sheegtay ee $30,000 (Soddon kun oo doolar) imisa qaybood bay ka kooban tahay laakiin dadkoo dhan ma wada gaadhaysaa?
J: Dawadu waxay ka kooban tahay dawooyin lagu daweeyo cudurada laga qaado wadankeena sida shilinta, Caalka iyo cudurada kale markaa wadanka oo dhan waa ay wada gaadhaysaa.

S: Kooxaha aad tirisay ee gobolada u kala baxaya maxaad ku ogaatay in muddo yar ay ku dhameynayaan ma qiimayn baad ku samayseen?
J: Haa, wasaaradu mar walba wax bay ogtahay dhakhaatiirtana waxa kaxeysanaya isuduwayaasha Gobolada markaa waxa weeyaan macluumaad la soo ururiyay oo la isla gartay haya’ada iyo Wasaaradu in sidaa wax loo bilaabay.

S: Waxa jirta in dhibaatooyin ay haystaan reer miyiga sidaa tii ka dhacday xeebta oo kale imikana waxa aad sheegtay in aad shilinta ka daweynaysaan xoolaha markaa wax kale ma u diyaariseen?
J: Waxa weeyaan horta markii ay reer miyigu ku xumayd ee ay ku kululayd waanu ku dhex jirnay anagu dawooyinka markaa la hayayna midba si bay ku timid, haday noqoto mid lacag ah iyo mid bilaash ah, khasabna maaha in reer miyiga khasab loogu daweeyo xoolihiisa imikana dawadu way jabam tahay oo qof waliba waa uu iibsan karaa.

 

Hargeysa, May 21, 2008 (Haatuf) – Hay’adda Horn Africa Parents Association {HAPA} ee fadhigeedu yahay dalka Canada ayaa deeq dawooyin iyo qalab caafimaad ku caawisay soona gaadhsiisay cisbitaalka Gabiley iyo Horn Africa Health Care Center Hospital ee magaalada Hargeysa.

Deeqdan oo markeeda hore ay hay’adda International Direct Relief gudoonsiisay hay’ada Hapa, ayaa Hapa-na ay ugu deeqday oo soo gaadhsiisay labadan cisbitaal.

Wakiilka hay’ada HAPA ee magaalada Hargeysa Cabadalle Haybe, ayaa maalintii shalay qalabkan iyo dawooyinkan caawimada ah ku wareejiyay maamulka cisbitaalka Gabiley oo uu ka socday Ciise Sh Muxumed Warsame iyo maamulka Horn Africa Health Care Center Hospital Dr Maxamed Axmed {Carabeyte}, waxana halkaa uu ka sheegay Cabdalle Haybe in deeqdan ay Hay’adda HAPA ku caawisay labada cisbitaal, isaga oo sheegay inaanay ahayn markii ugu horaysay ee ay hay’adu qalab caafimaad iyo dawooyin ay soo gaadhsiiso dalka ee wakhtiyo hore ay meelo ka mid ah ku soo caawisay.

Waxa iyaguna halkaas mahad naq ka jeediyay Ciise Sh Muxumed Warsame, oo ka socday maamulka Cisbitaalka Gabilay isaga oo sheegay baahida loo qabo qalabkan iyo dawooyinkan isaga aad iyo aad ugu hambalyeeyay muwaadiniinta caawimadan soo gaadhsiiyay ee gudoonsiiyay.

Sidoo kale Dr Maxamed Axmed {Carabeyte} ayaa isaguna mahad naq iyo bogaadin u jeediyay muwaadiniinta caawimadan qalabka iyo dawooyinka caafimaad ka kooban ugu deeqay labada Cisbitaal.

Caracas, May 21, 2008 (W. Wararka) – Dawladda Venezuela ayaa ka dalbatay Washington inay sharraxaad ka bixiso sababta uu Maraykanku ugu soo xadgubay hawadeeda.

Diyaarad Militari oo Maraykan ah ayaa la sheegay inay soo gashay hawada dalka Venezuela maalintii Sabtida toddobaadkan.

Wasiirka Arrimaha Dibadda ee dalka Venezuela Nicolás Maduro, ayaa sheegay inay u yeedhayaan safiirka Maraykanka u jooga caasimadda dalkaas ee Caracas, Mr. Patrick Duddy si uu sharaxaad uga bixiyo sababta ay diyaaradda milateri ugu soo xad-gudubtay hawada dalkiisa.

Dhinaca kale, Wasaaradda Difaaca Maraykanka (Pentagon) ayaa qirtay inay jirto diyaarad Maraykanku leeyahay oo ku xad-gudubtay hawada dalka Venezuela, waxaanay ku sababaysay ku xad-gudubkaas inuu keenay khalkhal dhinaca hagida hawada ah, taas oo ay sheegeen inay hay’adda hawada ee dalka Venezuela si wanaagsan diyaaradda markii dambe ugu soo hageen inay dib ugu soo laabato hawada Maraykanka unay soo fadhiisatay madaarkii ay ka duushay markii hore.

Waxa kale oo ay Pentagon ku sheegay war-saxaafadeed uu soo saaray in baadhis milateri ku wadaan falkan, isla markaana ay natiijo degdeg ah ka soo saari.
 

Top